Wa Aroma 4:1-25
4 Voi vili e-no, n’nga niongen’ni vyokhuza namabali-u Abrahamu?
2 Mofwanafwani-a, aakale ira Abrahamu anooniwa kala olongomana namwasa wa vyaira liye, angakanlena mwasa ogaya mbwenye a-kala vamethoni va Nlungu.
3 N’nga malemba anoongan’ni? Anoonga ira: “Abrahamu atoororomela vyam’mwandenle Yohova, thitho atooniwa ira ngolongomana.”
4 Namalaba atambili-iwa kobiree kavinothapulela ira patarawee ngoriya rima, mbwenye pyafwanela liye tambili-iwa namwasa olaba basa.
5 Mbwenye Nlungu oi unoona atu odawa kala olongomana, unoona ira mutu oi kalabile basa mbwenye liye roromela, ngolongomana.
6 Davide atoonga vya mutu osangalala oi Nlungu unom’mona kala olongomana angalive ira vyoiravyee kavinovwelana na Ilamulo. Liye aongile ira:
7 “Osangalala mbaatu aleveleliwile vyoira viwa vyo-ovwela malamulo noleveleliwa vyodawa viwa.
8 Osangalala ngu mutu oi Yohova kanodha thuulela yodawayee.”
9 N’nga mbaatu oineliwa baa-i anosangalala venango o-oineliwa thitho anosangalala? Voi ninoongecha ira: “Abrahamu atooniwa kala olongomana namwasa wa iroromeloyee.”
10 N’nga liye ali oi a-vi vahora yaoniwa liye kala olongomana? N’nga ali oineliwa venango a-anaineliwe? Liye ali a-anaineliwe.
11 Thitho Nlungu atoom’mwandela Abrahamu ira aineliwe ninga izindiyelo yothonyi-edha ira Nlungu atoom’mona ira ngolongomana a-anaineliwe namwasa wa iroromelo. Atooirana vyevi ira adhakale baba waatu othene o-oineliwa ana iroromelo, ira atwao tadhaoniwe ira mbolongomana.
12 Ira adhakale thitho baba waatu o-oineliwa, a-kala oineliwa baa-i mbwenye thitho waatu anowenda mo-arela iroromelo ninga yana babi-u Abrahamu a-anaineliwe.
13 Namwasa oi Abrahamu venango mbumbee* katalanyedhiwile ira anodha wachela ilambo namwasa o-arela ilamulo, mbwenye aliwa tatoowandeliwa yolanyedhayo namwasa oi Abrahamu atookaana iroromelo thitho Nlungu atoom’mona ira ngolongomana.
14 Namwasa oi akala atu ano-arela ilamulo mbanofuna dhawachela yotuvayo, kuongela ira iroromelo kinave basa thitho yolanyedha ile itomala.
15 Imbarimbari choi, pwanya Ilamulo unoiri-a ira mutu alangiwe, mbwenye va-akale ilamulo mutu kanofwanyeyana yodawa.
16 Namwasa wa iroromelo liye atoolanyedhiwa yolanyedha yei ira ikale yovwelana noriya rima ulukhulu wa Nlungu. Thitho atoolanyedhiwa yolanyedha yei ira ikale yosikimizeleya waatu othene oi ndi mbumbee,* a-kala waatu tano-arela Ilamulo baa-i, mbwenye thitho waatu ano-arela iroromelo ya Abrahamu oi ndi baba wa i-yo othene.
17 (Vyevi pyovwelana na vinoonga malemba ira: “Nditousakula ira ukale baba waatu amaziza manjinji.”) Vyevi vyali e-no wa Nlungu am’roromela Abrahamu, oi unovenyathi-a atu okwa thitho unoonga vya vyongo vyoi kavilivo kalanga ninga vitokalavo.*
18 Abrahamu atookaana idedi-edho thitho iroromelo yoi unodhakala baba waatu amaziza manjinji, angalive ira vyevi vyaoneya ira pyo-oodeya. Liye atoororomela vyevi movwelana na vyaongiwile ira: “Mwemu ndi munofuna dhakalela mbumbaa.”*
19 Angalive ira atookaana iroromelo yolimba, liye anoothuulela vya manungwee, voi vahoriyo ali ninga okwa (namwasa oi ana vyawa vyowandamela 100). Thitho anooidhiwa ira Sara ngoulula maningi moi kanooda kaana mwana.
20 Mbwenye namwasa wa yolanyedha ya Nlungu, iroromeloyee yatoodhowanave kala yolimba thitho yatoom’va-a kopolo moi atoom’titimi-a Nlungu.
21 Thitho liye kaakaikela ira Nlungu utokaana kopolo yokwakwaneli-edha vyalanyedhile liye.
22 Namwasa wa vyevi, “Nlungu atoom’mona ira ngolongomana.”
23 Mbwenye madhu oi “Nlungu atoom’mona ira ngolongomana” kaalembiwile namwasa wa liye baa-i.
24 Atoolembiwa thitho namwasa wa i-yo oi ninooniwa ira nili olongomana namwasa oi ninororomela Nlungu am’venyathi-idhe Yesu Mbwii-u.
25 Yesu atooveleliwa namwasa wa vyodawa vi-u thitho atoovenyathi-iwa ira nioniwe kala olongomana.
Madhu achindo
^ Mundhila inango: “mbeu.”
^ Mundhila inango: “mbeu.”
^ Mundhila inango: “vyongo vyoi kavilivo aliwa kalavo.”
^ Mundhila inango: “mbeu.”
