Wa Aroma 7:1-25
7 Abali, n’nga kamunoidhiwa ira ilamulo inokaana kopolo va mutu vahora inokaana liye ingumi? Ndinoongana nyo anoidhiwa Ilamulo.
2 Mofwanafwani-a, i-yana otheliwa mwa lamulo unokalave vambo-i na man’nee vahora yoi man’neuo ngwaingumi. Mbwenye man’neuo akwa, i-yanuo unokala othathuwa wu lamulo lokhuza man’nee.
3 Akala i-yanuo utotheliwa man’neuo angana ingumi, kuongela ira utoraruwa. Mbwenye akala man’neuo utokwa, i-yanuo ngothathuwa wu lamulo lokhuza man’nee, ee-no atheliwa na lombwana mwinango kanaararuwa tai.
4 Abalanga, manungo a Kristu atouthathulani wu Ilamulo ira mukale a mutu mwinango oi atoovenyathi-iwa naifunelo yoi niva-e vyova-a wa Nlungu.
5 Namwasa oi vahora yakala i-yo movwelana na manungwi-u odawala, Ilamulo yatooiri-a ira vyofuna vya manungwi-u odawao vizindiyeliwe. Thitho vyofuna vyevi vinganiiri-idhe ira nikwe.
6 Mbwenye va-eeni nitothathuliwa wu Ilamulo, namwasa oi nitokwa wu Ilamulo yanisogolela ira nikale adhaari mundhila ipya mosogoleliwa na zimu ochena, a-kala mundhila yawale mosogoleliwa na malamulo olembiwa.
7 N’nga nionge a-vi? N’nga Ilamulo chodawa? Mwaimbarimbari khabe. Onga mwaimbarimbari, kandaidhiwe vyodawa aakale ira kavali Ilamulo. Mofwanafwani-a, aakale ira Ilamulo kiongile ira kusilile mwabivu, miyo kandaidhiwe “Silila mwabivu.”
8 Mbwenye namwasa wa Ilamulo, vyodawa vitondiiri-a kala mutu osilila wa tundu uliwethene. Namwasa oi Ilamulo ya-anakalevo, vyodawa kavyana kopolo.
9 Ilamulo ya-anakaleo ndali waingumi. Mbwenye Ilamulo ingafiile vyodawa vyatookala okoka na kopolo mbwenye miyo ndatookwa.
10 Lamulo lafuna ndisogolela ira ndimafwanye ingumi, landisogolele wuukwa.
11 Vyodawa vyatoo-indi-edha basa lamulo leli vondinyengelela thitho vyatoondipha.
12 Ee-no Ilamulo vaokhene chochena thitho malamulo mbochena, mbolongomana, na apama.
13 N’nga vyevi vinothapulela ira yongo yapama yatooiri-a ira ndikwee? Khabe. Vyodawa pyairi-dhe ira ndikwe. Ilamulo chapama namwasa oi chiiri-idhe ira viidhiweye pama ira vyodawa pinoiri-a ira ndikwe. Ee-no malamulo atoonikami-a idhiwa ira vyodawa pyothakala maningi.
14 Nitoidhiwa ira Ilamulo chokhumela wa Nlungu dhela mwa zimu, mbwenye miyo kandili olongomana thitho ndatooguli-iwa kala dhaari wa vyodawa.
15 Kandinovwechecha vinondiireela. Namwasa oi vinofuna miyo irana kandinoviirana. Mbwenye ndinoira vinoidanana miyo.
16 Mbwenye akala ndinoirana vyo-ofuna miyo, ndionge ira ndinorumela ira Ilamulo chapama.
17 Unoirana vyevyo kai miyo, mbwenye pyodawa vili mwa miyo.
18 Nditoidhiwa ira manungoni mwanga modawamu, kamuli yongo iliyothene yapama. Namwasa oi ndinofuna irana vyongo vyapama, mbwenye kandinooda viirana.
19 Vyongo vyapama vinofuna miyo irana kandinoviirana, mbwenye vyongo vyothakala vinokonda miyo a-funa ndinoviirana.
20 Mbwenye akala ndinoirana vyongo vinokonda miyo a-funa kuongela ira unoirana vyevyo kai miyo, mbwenye ndi vyodawa vili mwa miyo.
21 Vinondiireela pyoi, ndafuna irana vyongo vyapama ndinoona vyongo vyothakala mwa miyo.
22 Rimani mwanga ndinosangalala maningi na malamulo a Nlungu,
23 mbwenye ndinoona lamulo lili manungoni mwanga lilimbananga na malamulo a mathuuleloni mwanga nondiiri-a kala dhaari wa ilamulo ya yodawa ili manungoni mwanga.
24 Miyo mutu orucheya! N’nga mbaani unofuna ndivulumucha wu manungo anondiiri-a ira ndikwala?
25 Nlungu unodha ndivulumucha dhela mwa Mbwii-u Yesu Kristu. Ee-no mathuuleloni mwanga ndili dhaari wa malamulo a Nlungu, mbwenye manungoni mwanga ndili dhaari wa lamulo la vyodawa.
