Wa Aroma 9:1-33
9 Ndinoonga mwaimbarimbari movwelana na Kristu, kandinaanama tai. Thitho ithuulela rima yanga inondiirela umboni mwa zimu ochena,
2 ira ndili osukwala maningi thitho rimanga unondiphecha hora dhothene.
3 Ndingadhiveliwile ira miyo ndi-iyani-iwe na Kristu ninga mutu otembeleliwa malo mwaabalanga oi ndi atu atundwanga,
4 oi mba Aisraeli. Nlungu atoasakula ira takale a-imee thitho atoava-a titimi-o, vwelano, Ilamulo, urumiwi wavakhundu na vyolanyedha.
5 Aliwa ndi a-ima a anamabali-u awale thitho Kristu abaliwile khumela mwaaliwa. Nlungu oi ndilukhulu va vyongo vyothene, atitimi-iwe modhowa nodhowa. Ame.
6 Mbwenye vyevi kavinothapulela ira madhu a Nlungu katakwakwaneli-edhiwile. Namwasa oi kai othene a mbumba ya Israeli oi ndi “Aisraeli” aimbarimbari.
7 Angalive ira aliwa ndi ambumba* la Abrahamu, kavinothapulela ira othene ndi a-imee. Namwasa oi anofuna dhaitaniwa, “Mbumbaa* anodha kumela wa Izaki.”
8 Vyevi vinothapulela ira kai a-ima othene a Abrahamu oi ndi a-ima aimbarimbari a Nlungu, mbwenye a-ima obaliwa movwelana na yolanyedha, mbanooniwa kala mbumba.*
9 Voi yolanyedhaile yaongile ira: “Ndinodhadha okoka hora ninga yen’na thitho Sara unodhakaana mwana walombwana.”
10 Yolanyedhai kiyaveleliwile vahora yen’na baa-i, mbwenye yatooveleliwa thitho wa Rabeka oi ana wise ira abale anasambili a Izaki namabali-ule.
11 Anasambilao ta-anabaliwe thitho ta-anaire yongo iliyothene yapama venango yothakala, Nlungu atooni-a ira ifuneloyee inodha nyindela va liye mwinyauo oi ngunoitana a-kala vyoira vya mutu.
12 Ee-no Nlungu atoom’mwandela Rabeka ira: “Mwana wa ndimuwa unodhakala dhaari wa ng’onwee.”
13 Movwelana na vinoonga Malemba ira: “Ndatoom’dhiveliwana Yakobo, mbwenye Ezau ndatoom’mwidananee.”
14 N’nga niongen’ni veva? N’nga Nlungu utekala o-olongomana? Mwaimbarimbari khabe.
15 Namwasa oi liye atoom’mwandela Mose ira: “Mutu unofuna miyo m’riyela rima ndinodha m’riyela rima, thitho mutu unofuna miyo m’vwela tangaranga, ndinodha m’vwela tangaranga.”
16 Ee-no kavinonyindela funa wa mutu venango thindhilee, mbwenye vinonyindela Nlungu watangaranga.
17 Voonga vya Farau, lemba n’nango linoonga ira: “Nditou-iya na ingumi ira nduuoni-e kopolo dhanga thitho ira dhina langa lilaleiwe vailambo yothene yavathi.”
18 Ee-no liye unovwela tangaranga mutu unofuna liye m’vwela tangaranga, mbwenye unorumeli-a ira atu enango taumi-e mirimiwa.
19 Venango unooda ndiwandela ira: “Mwasiwa ngwan’ni Nlungu unofwanyela atu matangwi? N’nga baani unofuna runi-a ifuneloyee?”
20 N’nga we uli ani ira uruni-engana na Nlungu? N’nga yongo youmbiwa inooda wandela mutu uiwumbile ira, “Mwasiwa ngwan’ni undisaka-edhele e-ni?”
21 N’nga kamunoidhiwa ira mutu oumba yombwe utokaana ufulu o-indi-edha basa ulongo umbo-ive wenuo voumba yongo inango yolemezeya, na yongo inango yonyozeya?
22 Vyevi ndi vyofwanafwana na Nlungu. Liye unofuna oni-a thakaleliwawee na kopolodhee waatu othakala. Angalive ira vili e-no, liye unooni-a vilelawee waatu anoathakaleliwana liye, oi anofwanela nongiwa.
23 Liye atooira vyevyo ira athonyi-edhe ulukhula wa titimi-olee waatu ofwanela vweliwa tangaranga, enao aasakunle liye ira tawachele titimi-olee.
24 Atwee ngu i-yo oi atooniitana a-kala khumela wa Ayuda baa-i mbwenye thitho waatu amitundu inango.
25 Vyofwanafwana na vyaogiwile mu bukhu la Oseya ira: “Atu oi kai anga ndinodha aromola ira ‘atwanga,’ thitho i-yana oi kaadhiveliwiwa ndinodha m’romola ira ‘odhiveliwiwa.’
26 Weo wawandeliwa aliwa ira, ‘kamuli atwanga,’ anodha wandeliwa ira, “muli a-ima a Nlungu waingumi.”
27 Thitho Esaya atoonga vyokhuza Israeli ira: “Angalive ira ana Israeli anodhakala anjinji ninga useva wa bara, anofuna dhavulumuwa mboyeva baa-i.
28 Namwasa oi Yohova* unodha tonga miselu yaatu availambo yavathi mombaranya.”
29 Thitho movwelana na vyavaeletu Esaya onga, “Yohova* wa magulu akhondo adhulu a-akonde a-ni-iyedha mbumba* nakale ninga Sodoma, thitho nakale saasawa na Gomora.”
30 N’nga niongen’ni veva? Angalive ira atu amaziza enango kata-arenle longomano, aliwa tatookala olongomana namwasa wa iroromelo.
31 Mbwenye angalive ira Aisraeli tanoo-arela lamulo la longomano, aliwa kataodile a-rela lamulo la longomano.
32 Namwasa wan’ni? Namwasa oi aliwa tathuulela ira anooda li-arela muvyoira viwa, a-kala mwairoromelo. Aliwa tatoogwegweduwa na “libwe logwegweduwi-a.”
33 Movwelana na vinoonga malemba ira: “Miyo ndinodha e-la mu Ziyoni libwe logwegweduwi-a na losukwali-a, mbwenye mutu unofuna roromela libwelo kanodha sukwala.”
Madhu achindo
^ Mundhila inango: “mbeu.”
^ Mundhila inango: “mbeu.”
^ Mundhila inango: “mbeu.”
^ Mundhila inango: “mbeu.”
