Ilembile Juwau 1:1-51
1 Voroma vatookala aitaniwa madhu. Madhu ali vambo-i na Nlungu thitho madhwao ali Nlungu.
2 Romela voroma liye ali vambo-i na Nlungu.
3 Vyongo vyothene vyatookalao dhela mwa liye thitho kavali yongo na imbo-ene yakanleo a-kala dhela mwa liye.
4 Ingumi yatookalavo dhela mwa liye thitho ingumiyo yali wala omoneela atu.
5 Walao unaamoneela isini mbwenye isiyo kitimi-idhe walao.
6 Watoodha mutu mwinango arumiwile na Nlungu, dhinalee ali Juwau.
7 Mutu wen’na atoodha dhairela umboni vyowalao, naifunelo yoi atu o-iyana-iyana taroromele dhela mwa liye.
8 Kai ira liye ali walao, mbwenye adhele dhairela umboni vyowalao.
9 Wala waimbarimbari unomoneela atu o-iyana-iyana, wali unga-adhi vang’ono ira udhe vailambo.
10 Liye ali vailambo thitho ilambo yatoophandhuchiwa dhela mwa liye, mbwenye ilamboyo kiyam’mwidhiwa.
11 Liye atoodha waniwa, mbwenye atu awaniwao katam’mwachenle.
12 Mbwenye atu othene am’mwachenle, liye atoava-a kopolo ira takale ana Nlungu namwasa oi tanoororomela dhinalee.
13 Aliwa katabaliwile dhela mwaatu venango namwasa ofuna wa mutu venango thitho namwasa ofuna wa anamabaliwa, mbwenye tabaliwile dhela wa Nlungu.
14 Ee-no aitaniwa madhuo atoobaliwa na tutu launyama thitho anookala vari vaatu. I-yo natoona titimi-olee, titimi-o ninga linova-iwa mwana obaliwa ekhene khumela wa babee. Nlungu anoom’riyela rima maningi nom’funji-a imbarimbari.
15 (Juwau anooirela umboni vya liye, moi anoonga mokhuwa ira: “Ula ngwam’monga miyule ira, ‘Unodha nduli mwangamu ngundimuwa kwaranya miyo, namwasa oi atookalavo miyo nda-anabaliwe.”’)
16 Namwasa oriya rima ulukhulu wana liye, hora dhothene nanoowachela riya rima ulukhuluo mokwakwanela.
17 Voi Ilamulo yatooveleliwa dhela mwa Mose, mbwenye dhela mwa Yesu Kristu nitooni-iwa riya rima na imbarimbari.
18 Romela walelene kavali mutu uonivo Nlungu, mbwenye obaliwa ekhene uli vakhundu va Babee, ngwaongile vya Nlungu.
19 Vahora yavelela Juwau umboni wen’na, Ayuda tatooruma asembe na Alevi khumela wu Yerusalemu dham’fuka ira: “N’nga we uli ani?”
20 Liye atoorumela ira khabe, “Kandili Kristu.”
21 Aliwa tatoom’fuka ira: “N’nga we uli ani? N’nga uli Eliya?” Liye atoowakhula ira: “Khabe.” “Venango uli Namaongela?” Liye atoowakhula ira: “Khabe!”
22 Ee-no aliwa tatoom’fuka ira: “N’nga we uli ani? Kaniwandele ira nimaode awakhula atu anirumile. N’nga we wamwinyaa unodhionga ira uli ani?”
23 Liye aongile ira: “Ndili madhu a mutu mwinangwee unokhuwa kokolani ira, ‘Mulinyali-e ndhila ya Yohova,’ ninga mwaongele namaongela Esaya.”
24 Atwao tarumiwile na Afarisi.
25 Moi e-no aliwa tatoom’fuka ira: “Akala ira khuli Kristu, Eliya venango Namaongela, n’nga mwasiwa ngwan’ni unobadiza atu?”
26 Juwau atoawakhula ira: “Miyo ndinobadiza ma-injeni. Mbwenye vari vinyu vatokala mutu mwinango oi nyo kamunom’mwidhiwa.
27 Liye ngunodha nduli mwangamu thitho miyo kandili ofwanelela thathula migo-i ya sapatodhee.”
28 Vyongo vyevi vyaireela wu Betaniya kombela la Yordani, wabadizela Juwau atu.
29 Dambo lo-arela Juwau atoona Yesu adhanga wa liye, moi e-no liye atoonga ira: “Kaing’anani Mwana libila wa Nlungu, unokhumi-a madawo vailambo!
30 Wen’na ngwam’mongecha miyule ira: ‘Unodha ndulimwangamu ngundimuwa kwaranya miyo, namwasa oi liye atookalao miyo nda-anabaliwe.’
31 Miyo thitho kandam’mwidhiwa, mbwenye mwasa unondiiri-a miyo badiza atu ma-injeni ngoi liye aoneele wa Aisraeli.”
32 Juwau atoonga thitho umboni oi: “Ndatoona zimu uthithanga ninga kangaiwa khumela dhulu thitho watookalave va liye.
33 Miyo thitho kandam’mwidhiwa, mbwenye Nlungu andirumile dhabadiza ma-injeni atoondiwandela ira: ‘Wadhaona zimu uthithanga dhakaatheya va mutu mwinangwee, wenuo ngunobadiza na zimu ochena.’
34 Miyo ndatoovionadi vyevyo thitho ndatoovelela umboni ira liye ndi Mwana Nlungu.”
35 Dambo lo-arela Juwau ali angaimenle vambo-i na anamafunjedhee ambili.
36 Thitho angaoni Yesu aviranga, atoonga ira: “Kaing’anani Mwana libila wa Nlungu!”
37 Anamafunjedha ambilao tangavwide vyevyo, tatoom’arela Yesu.
38 Adhamale Yesu atoodhimbinuwa thitho angaaoni tam’aranga, atoafuka ira: “N’nga munosakan’ni?” Aliwa tatoonga ira: “Rabi, (dhina loi Rabi linothapulela, “Namafunji-a”), n’nga munokala wani?”
39 Liye atoawandela ira: “Dhoweni mumaoneo.” Adhamale aliwa tatoodhowa maona wakala liye thitho tatookala vambo-i na liye dambo lelo. Yen’na yali 16 hora.
40 Andreya, oi ali balee Simoni Pedru ali mbo-i mwaatu ambilao, oi avwide vyaongile Juwau nom’arela Yesu.
41 Voroma liye atoom’gumanana balee Simoni nom’mwandela ira: “I-yo nitom’fwanya Mesiya” (dhina loi Mesiya linothapulela, “Kristu”),
42 Andreya atoom’dhowanee wa Yesu. Yesu angam’moni atoonga ira: “We uli Simoni mwana Juwau, unodha itaniwa thitho Kefa” (dhina leli linothapulela “Pedru”).
43 Bebe-inimwee, Yesu atoothuulela vyoi adhowe wu Galileya. Moi e-no atoogumanana Filipi nom’mwandela ira: “Ukale nama-arelanga.”
44 Filipi ali wau Betisaida, sidade lakhumela Andreya na Pedru.
45 Adhamale Filipi atoogumana na Natanieli nom’mwandela ira: “I-yo nitom’fwanya Yesu mwana Yosefi wau Nazareti, oi unoongiwa Muilamulo ya Mose na vyaongile anamaongela.”
46 Mbwenye Natanieli atoom’fuka ira: “N’nga mu Nazareti munooda khuma mutu uliwethene wapama?” Filipi atoom’ mwandela ira: “Dhowenga umam’mone”
47 Yesu angamoni Natanieli adhanga wa liye atoonga ira: “Kaing’anani Muisraeli waimbarimbari, oi mwa liye kamuli inyengo.”
48 Natanieli atoom’fuka ira: “N’nga mundiidhi a-vi?” Yesu atoom’mwakhula ira: “Filipi a-anauitane, miyo ndatouona ungali chindo mwa muri wa savule.”
49 Natanieli atoom’mwandela ira: “Rabi, nyo muli Mwana Nlungu, muli Mwene wa Israeli.”
50 Yesu atoom’fuka ira: “N’nga utondiroromela namwasa oi nditouwandela ira ndatouona ungali chindo mwa muri wa savule? Unodha ona vyongo vilukhulu kwaranya vyevi.”
51 Adhamale Yesu atoawandela ira: “Mwaimbarimbari ndinoowandelani ira, munodha ona dhulu ungadhuleile, angelo a Nlungu tagwelanga nothitha udha vali Mwana mutu.”
