Ilembile Juwau 10:1-42
10 “Mwaimbarimbari ndinouwandelani ira, mutu unovolowa tangani mwa mabila moira volowelana valimburo n’nango a-kala valango, wenuo ngu mbavwa thitho owaka vyongo vyaatu enango.
2 Mbwenye unovolowana valango ngunamakumbiza wa mabilao.
3 Namaing’anela wa valango unom’dhulela thitho mabilao anovuruwana madhwee. Namakumbizuo unoaitana madhina noasogolela.
4 Akhumi-a mabila othenene vandhe, unoasogolela thitho mabilao anom’ara, namwasa oi anovwa madhwee.
5 Aliwa katino-ara lendo mbwenye anom’tawa, namwasa oi katiidhi madhu aalendo.”
6 Yesu atoawandela ifwanafwani-o yei, mbwenye aliwa katavwechechile thapulelawee.
7 Ee-no Yesu atoawandela thitho ira: “Mwaimbarimbari ndinoowandelani ira, miyo ndili lango wa tanga la mabila.
8 Atu othene adhidhe dhanama ira mbaanamakumbiza aimbarimbari, ndi mabavwa na owaka atu vyongo thitho mabila kataavwele.
9 Miyo ndili lango. Mutu unovolowana vali miyo unodha vulumuwa thitho unodha volowa nokhuma ira amasake tongwe.
10 Mbavwa unodha naifunelo yofuna dhaba, upha nononga. Mbwenye miyo ndidhidhe ira mabila adhakaena ingumi yo-omala.
11 Miyo ndili namakumbiza wapama. Namakumbiza wapama unovelela ingumiyee namwasa wa mabila.
12 Namalaba oi kai namakumbiza thitho mabila kai yee, aona mbulu adhanga uno-iya mabilao notawa. Moi e-no mbuluo uno-inda mabila nobalalei-a enango.
13 Unoira vyevi namwasa oi liye ngunamalaba thitho kanobala mabila.
14 Miyo ndili namakumbiza wapama. Ndinoidhiwa mabilanga thitho aliwa anondiidhiwa,
15 ninga mwemo muli aliwa na Baba oi unondiidhiwa miyo thitho ndhinom’mwidhiwa Baba. Ee-no ndinovelela ingumi yanga namwasa wa mabilao.
16 Nditokaana mabila enango oi katili tanganimu. Enao thitho ndinodha adhana thitho anodha vuruwana madhwanga. Anodhakala kumbi umbo-i thitho namakumbiziwa unodhakala mbo-i.
17 Baba unondidhiveliwana namwasa oi ndinovelela ingumi yanga ira ndimaiwachele okoka.
18 Kavali mutu unondiwaka ingumi yanga, mbwenye ndinoivelela mofuna wanga. Nditokaana kopolo yoivelela na kopolo yodhaiwachela okoka. Babanga ngwanditongile ira ndiirena vyevi.”
19 Veva thitho Ayuda tatoo-iyana mathuulelo namwasa wa madhu enala.
20 Anjinji mwa aliwa tanoonga ira: “Wen’na utokaana iwanda thitho ngunami-ala. N’nga mwasiwa ngwan’ni munom’vuruwana?”
21 Enango tatoonga ira: “Enala kai madhu a mutu wa iwanda. N’nga iwanda inooda dhula metho a mutu o-oona?”
22 Vahora yeniyo mu Yerusalemu mwatooireya pwando lodhulela kachisi wa Nlungu. Hora yen’na yali yodidila maningi
23 thitho Yesu ali awendanga kachisinimo valimburo laitaniwa khonde la Solomu.
24 Adhamale Ayuda tatoom’rungunuwa noroma m’fuka ira: “N’nga unodhowanave niruchi-a mathuulelo fiyedha e-lini? Akala uli Kristu, uniwandele mo-ovira khundu.”
25 Yesu atoawakhula ira: “Nditomala uwandelani wale, mbwenye nyo kamunororomela. Mabasa anoira miyo mudhina la Babanga, anondiirela umboni.
26 Mbwenye nyo kamunororomela namwasa oi kamuli mabilanga.
27 Mabilanga anovuruwana madhwanga. Miyo ndinoaidhiwa thitho mabilao anondi-arela.
28 Ndinodha ava-a ingumi yo-omala, aliwa katinodha nongiwa thitho kavali unofuna dhandiwaka mandhani mwanga.
29 Mabila andiva-idhe Babanga mbofuneya maningi kwaranya yongo iliyothene, thitho kavali unofuna m’mwaki-a Baba.
30 Miyo na Babanga nili ambo-ive.”*
31 Veva thitho Ayuda tatoododa okoka mabwe ira tam’ponyedhe.
32 Yesu atoawandela ira: “Nditouoni-ani mabasa manjinji apama okhumela wa Baba. N’nga munofuna ndiponyedha mabwe namwasa wa basa livi?”
33 Ayudao tatoom’mwakhula ira: “Kaninofuna uponyedha mabwe namwasa wa basa lapama, mbwenye namwasa oi unaam’nyoza Nlungu. We uli mutwene vyaa mbwenye unaadhifwanafwani-edha na Nlungu.”
34 Yesu atoafuka ira: “N’nga Muilamulo inyu kamulembiwile ira: ‘Miyo ndiongile ira: “Nyo muli alungu”’?
35 Akala ira atu aruni-iwile na madhu a Nlungu atooromoliwa ira “alungu.”
36 N’nga nyo munondiwandela miyo oi ndatoocheni-iwa na Babanga norumiwa udha vailamboi ira, ‘Unonyoza Nlungu,’ namwasa wa viongile miyo ira, ‘Ndili Mwana Nlungu’?
37 Akala kandinolaba mabasa a Babanga, kamundiroromele.
38 Mbwenye akala ndinoalaba masiki mwa-andiroromele, muroromele mabasao ira mudhowenave idhiwa ira miyo na Babanga nili ovwelana.”
39 Ee-no tatoowesedha okoka ira tam’inde, mbwenye liye atoazemba.
40 Liye atoovandela okoka Yordani nodhowa ulimburo wabadizela Juwau voroma thitho atookala weo.
41 Atu anjinji tatoodha wa liye noroma onga ira: “Juwau kairile izindiyelo iliyothene, mbwenye vyothene vyaongile liye vyokhuza mutula vyali vyaimbarimbari.”
42 Ee-no atu anjinji a weo tatoom’roromela.
Madhu achindo
^ Venango: “nili ovwelana.”
