Ilembile Juwau 12:1-50
12 Unga-adhi malambo 6 ira Paskwa iromeye, Yesu atoofiya wu Betaniya weo wali Lazaro, wam’venyathi-idhe liye muukwa.
2 Ee-no tatoapiyela yodya ya namaulo weo thitho Marta anowalabela. Mbwenye Lazaro ali mbo-i mwaatu adya vambo-i na Yesu.
3 Moi ee-no Mariya atootukula makhura onukhela. Makhurao ali nado o-othangani-ana yongo, apereso yavadhulu maningi, okwakwana magarama 327. Mariya atookhutulela makhurao manyalo a Yesu noapuputa manyalwao na sisilee. M’mba mwenthene mwemo mwanoonukhela pama namwasa wa makhurao.
4 Mbwenye Yudasi Iskariyoti, oi ali m’mbo-i mwa namafunjedhee a-adhi vang’ono ira am’velele atoonga ira:
5 “Mwasiwa ngwani makhura onukhelala katiguli-iwile na madenariyo* 300 noveleliwa waatu osauwa?”
6 Kai ira liye aongile vyevi namwasa oi anookhumbanyedha atu osauwa khabe, mbwenye namwasa oi liye ali mbavwa. Liye anoolokota kaxa la vyovelela thitho anooba kobiri dhaponyedhiwa kaxanimo.
7 Moi e-no Yesu atoawandela ira: “Kam’iyeni aire vyevi, vokozeela dambo lo-eliwa wanga masiyeni.
8 Nyo muli naatu osauwa hora dhothene, mbwenye kamunodha kalanga na miyo hora dhothene.”
9 Ee-no mwinji nlukhulu wa Ayuda watooidhiwa ira Yesu uli wu Betaniya. Ee-no watoofiya a-kala dham’mona Yesu baa-i, mbwenye thitho dham’mona Lazaro, wam’venyathi-idhe liye muukwa.
10 Moi e-no andimuwa a sembe tatoovwelana vyoi tam’phe okoka Lazaro,
11 namwasa oi Ayuda anjinji tanoodhowa weo nom’roromela Yesu namwasa wa Lazaro.
12 Bebeinimwee, mwinji nlukhulu waatu wadhidhe pwandonio watoovwa ira Yesu unaaudha wu Yerusalemuo.
13 Ee-no tatootukula tambi dha kanjeza nokhuma magumananee. Thitho tatooroma khuwa ira: “M’vulumucheni! Oraeli-iwa ngunodha mu dhina la Yohova,* oi ngu Mwene wa Isaraeli!”
14 Yesu angafwaidhe mwana buru, atoom’gwela movwelana na vinoonga malemba ira:
15 “Kuove mwana wa i-yana wa Zioni. Kaing’ana! Mwenaa unaaudha angagwenle vamwana buru wa lombwana.”
16 Voroma anamafunjedheao katavivwechechile vyevyo. Mbwenye Yesu angava-iwile titimi-o, aliwa tatoothuulela ira vyam’mwirela atwao vyali vyofwanafwana na vyalembiwile vyokhuza liye.
17 Moi ee-no atu anjinji alivo vahora yaitana liye Lazaro ira akhume masiyeni nom’venyathi-a, tatoodhowanave m’mwirela umboni.
18 Ngumwasee thitho atu anjinji tatoodhowa mam’gumananee, namwasa oi tatoovwa ira Yesu atoira izindiyelo yei.
19 Ee-no Afarisi tatooroma tapanya ira: “Munodhionela mwekhene ira kavali inoiravo i-yo. Kaonani! Atu othene anam’arela.”
20 Vari vaatu adhidhe dhalambela vapwandonivo vatookala thitho atu enango a Igiriki.
21 Aliwa tatoodhowa wa Filipi oi ali wau Betisaida isa ya Galileya, thitho tatooroma m’vepha ira: “Mbwiye, i-yo ninofuna nim’mone Yesu.”
22 Filipi atoodhowa mwam’mwandela Andreya vyevyo thitho ambilene tatoodhowa mwa’mwandela Yesu.
23 Mbwenye Yesu atoawakhula ira: “Hora yoi Mwana mutu alemeziwe itofiya.
24 Mwaimbarimbari ndinouwandelani ira, isimbeu ya tirigu ya-agwele vathi aliwa wukwa, inokalave imbo-i. Mbwenye yagwela vathi aliwa wukwa inova-a vyova-a vinjinji.
25 Mutu uliwethene unodhiveliwana ingumiyee unaainonga, mbwenye mutu uliwethene unoidanana ingumiyee muilambwila, unaaibarela ira adhakaena ingumi yo-omala.
26 Akala mutu unofuna ndilabela andi-arele thitho unofuna miyo makala, rumiwanga unodha kala thitho weo. Mutu uliwethene unondilabela, unodha lemeziwa na Babanga.
27 Ingumi yanga inaarucheya, n’nga ndionge n’ni? Baba mundivulumuche vahora yoruchila. Mbwenye hora yen’na inofwanela ndifiyela voi ndadhele vyevi.
28 Baba mulemeze dhina linyu.” Angaongile vyevi vatoovweya madhu khumela dhulu ira: “Nditolilemeza thitho ndinodha lilemeza okoka.”
29 Ee-no mwinji waatu waimenle vevo wangavwide vyevyo watooroma onga ira utogudha ndhari. Enango tanoonga ira: “Ngelo utom’monganee.”
30 Yesu atoawandela ira: “Madhu enala kativweile na mwasa wa miyo, mbwenye namwasa wa nyo.
31 Va ee-ni ilamboi inaatongiwa, mbwenye namatonga wa ilambwila unoponyedhiwa undhe chineneeva.
32 Mbwenye ndadha thomeiwa vaimurini, atu a mitundu yo-iyana-iyana ndinodha adhi-a wa miyo.”
33 Liye aonga vyevi vofuna oni-a moda wafuna liye wukwa vadhavira hora yoyeva.
34 Moi e-no mwinji waatuo watoom’mwakhula ira: “I-yo Muilamulo navwide ira Kristu unodha kalao modhowa nodhowa. N’nga mwasiwa ngwan’ni munoonga ira Mwana mutu unofwanela thomeiya vaimurini? N’nga Mwana mutu wenuo mbaani?”
35 Yesu atoawandela ira: “Njeza inokalave vari vinyu wa hora yoyeva. Muwendenga njeziyo ingalivo, ira isi ya-aufiyedheleni. Namwasa oi mutu uliwethene unowenda mu isi kanoidhiwa unodhowa liye.
36 Vanowenda nyo ungali njeza, muthonyi-edhe ira munororomela njeziyo, ira mukale a-ima a njeza.”
Yesu angamadhi onga vyevi, atookhumavo nodhowa mavithala.
37 Angalive ira liye atooira vizindiyelo vinjinji vari viwa, aliwa kataroromela,
38 moi madhu a namaongela Esaya atookwakwaneli-edhiwa. Liye aongile ira: “Yohova, n’nga baani uroromele vyongo vyavwide liye wa i-yo? N’nga dhandha la Yohova lioni-iwile ani?”
39 Mwasa unango waairi-idhe ira ta-aroromele ngwaongile namaongela Esaya ira:
40 “Utofunga methwiwa thitho utoumi-a mirimiwa ira ta-aone na methwiwa, ira mirimiwa ya-avwecheche vyongo nodhimbinuwa ira miyo ndaaili-e.”
41 Esaya atoonga vyevi namwasa oi atoona titimi-o la Kristu.
42 Mbwenye vatookala atu anjinji tam’mroromenle, thangani-avo anamatonga anjinji. Mbwenye kataonga vakwecha, namwasa oi taova ira Afarisi anoakhumi-a mu sinagoga.
43 Aliwa tanoodhiveliwana maningi titimi-o laatu kwaranya titimi-o la Nlungu.
44 Mbwenye Yesu atookhuwa ira: “Mutu uliwethene unondiroromela kanororomela miyo baa-i, mbwenye unororomela thitho undirumile.
45 Mutu uliwethene undioni utom’mona thitho andirumile.
46 Ndidhidhe ninga njeza muilambo, ira mutu uliwethene unondiroromela a-adhowenave kala isini.
47 Akala mutu utovwa madhwanga mbwenye aavwela, miyo kandinom’tonga namwasa oi kandadhele dhatonga ilambo, mbwenye dhaivulumucha.
48 Mutu uliwethene unondipwaza thitho a-arela madhwanga, tokala unofuna m’tonga. Madhu aongile miyo mbanofuna dham’tonga vadambo lomari-a.
49 Namwasa oi kandinaongevo vyamuruni mwanga, mbwenye Baba andirumile ngwandiva-idhe lamulo va vinofwanela miyo onga na vinofwanela miyo funji-a.
50 Thitho ndinoidhiwa ira lamulolee tokami-a atu dhakaana ingumi yo-omala. Ee-no vinoonga miyo, ndinovionga movwelana na vyandiwandenle Baba.”
