Ilembile Juwau 16:1-33
16 “Nditouwandelani vyongo vyevi ira iroromelo inyu ya-afooke.
2 Atu anodha ukhumi-ani masinagoga. Mwaimbarimbari inodhafiya hora yoi mutu uliwethene unofuna dhauphani unodhathuulela ira utolaba urumiwi opambuleya wa Nlungu.
3 Mbwenye anodha irana vyevi namwasa oi katinondiidhiwa thitho katinom’mwidhiwa Baba.
4 Mbwenye nditouwandelani vyongo vyevi, ira hora yoi viireeye yadhafiya, mudhathuulele ira ndatoouwandelani.
“Vyongo vyevi kandauwandenleni va maromelo namwasa oi ndali vambo-i na nyo.
5 Va-eni ndinodhowa wa wenuo andirumile, mbwenye kavali uliwethene wa nyo unondifuka ira, ‘N’nga munodhowa wani?’
6 Mbwenye namwasa oi nditouwandelani vyongo vyevi, mutosukwala maningi mirimani mwinyu.
7 Onga mwaimbarimbari, ndinodhowa ira nyo muganyali. Namwasa oi nda-adhowe, namakami-ule kanodha wa nyo. Mbwenye ndadhowa ndinamam’tumize wa nyo.
8 Thitho aliwa wadhadha unodhavelela umboni wu ilamboi okhuza vyodawa, longomano na utongi wa Nlungu.
9 Yoroma unodhavelela umboni okhuza vyodawa, namwasa oi aliwa katinondiroromela.
10 Wadhamala unodhavelela umboni okhuza longomano, namwasa oi miyo ndinaadhowa wa Baba thitho kamunodha ndionave.
11 Vomari-a unodhavelela umboni okhuza utongi wa Nlungu, namwasa oi namatonga wa ilambwila utomala tongiwa wale.
12 “Nditokaanave vyongo vinjinji vyoi ndiuwandeleni, mbwenye va e-ni kamunooda vivwechecha vyothene vyevyo.
13 Mbwenye namakami-uo adhadha oi ngu zimu waimbarimbari, unodhausogolelani mwiimbarimbari yothene. Namwasa oi kanodhaonga vinofuna liye thuulela vaekhene, mbwenye unodhaonga vivwide liye nouidhiwi-ani vyongo vinofuna dhaireya.
14 Liye unodha ndilemeza, namwasa oi unodha uidhiwi-ani vyongo vyavwide liye wa miyo.
15 Vyongo vyothene vina Baba pyanga. Ngumwasee ndinouwandelani ira namakami-uo unodha uidhiwi-ani vyongo vivwide liye wa miyo.
16 Wahora yoyeva kamunodha ndionave, thitho wahora yoyeva munodha ndiona.”
17 Angaongile vyevi, anamafunjedhee enango tatooroma fukana ira: “N’nga unothapulelan’ni vanoniwandela liye ira, ‘Wahora yoyeva kamunodha ndionave mbwenye wahora yoyeva munodha ndiona,’ thitho ira, ‘ndinodhowa wa Babaa’?”
18 Aliwa taonga ira: “N’nga unothapulelan’ni vanoonga liye ira, ‘wahora yoyeva’? Kaninoviidhiwa vinoonga liye.”
19 Yesu atooidhiwa ira anofuna m’fuka, e-no atoafuka ira: “N’nga munofukana viongile miyovi ira: ‘Wahora yoyeva kamunodha ndiona, thitho ira wahora yoyeva munodha ndiona?’
20 Mwaimbarimbari ndinouwandelani ira, munodhanla no dumbela mbwenye ilambo inodha sangalala. Munodha sukwala, mbwenye sukwala winyu unodha chinjeya kala sangalala.
21 I-yana abalanga unovwa upha maningi namwasa oi horee itofiya. Mbwenye mwana abaliwa unodiwala upha othene weule namwasa oi unosangalala ira mwana utobaliwa vailambo.
22 Saasawa thitho na nyo, va e-ni muli osukwala. Mbwenye mwadhandiona okoka miriminyu thitho inodha sangalala. Kavali unofuna dhamari-a sangalala winyu.
23 Vadambo lelo kamunodha ndifukave vyofuka. Mwaimbarimbari ndinouwandelani ira, mwadhavepa yongo iliyothene wa Baba mudhina langa, liye unodhauva-ani.
24 Fiyedha va e-ni kamunavepevo yongo iliyothene mudhina langa. Muvephe thitho munodhava-iwa ira musangalale maningi.
25 “Nditouonganani vyevi dhela muvifwanafwani-o. Hora inodhafiya yoi kandinodha uonganani okoka vo-indi-edha basa vifwanafwani-o, mbwenye ndinodha uwandelani vya Baba movweya pama.
26 Vadambo lelo munodhavepha yongo wa Baba mudhina langa. Mbwenye kandinothapulela ira miyo ndinodha uvephelani khabe.
27 Babuo unoudhiveliwanani namwasa oi munondidhiveliwana thitho mutondiroromela ira miyo ndadhidhe ninga namaimelela wa Nlungu.
28 Ndadhidhe va ilamboi ninga namaimelela wokhumela wa Baba. Va e-ni ndinaakhuma va ilamboi thitho ndinodhowa wa Baba.”
29 Anamafunjedheao tatoonga ira: “Mbwiye va-eni ninovwechecha vinoonga nyo namwasa oi kamuno-indi-edha basa vifwanafwani-o.
30 Va-eni nitoidhiwa ira nyo mutoidhiwa vyongo vyothene thitho kavanofuneelave mutu ira aufukeni vyofuka. Vamwasa wen’na ninororomela ira nyo mwakhumele wa Nlungu.”
31 Yesu atoawakhula ira: “N’nga va e-ni mutororomela?
32 Mwaimbarimbari ndinouwandelani ira, inodhafiya hora thitho njen’na, yoi mwethene munobalaleya, uliwethene dhowa nyumbaniwee nondi-iya ndekhene. Mbwenye kandinodhakala ndekhene, namwasa oi Baba uli namiyo.
33 Miyo nditouwandelani vyevi ira mukale mwarendele namwasa wa miyo. Muilambonimu munogumanana nyarwa dhilukhulu, mbwenye mulimbe rima! Miyo nditoigonji-a ilambo.”
