Ilembile Juwau 17:1-26
17 Yesu angaongile vyongo vyevi, atooing’ana dhulu noonga ira: “Baba, hora itofiya. Mulemeze mwaninyu, ira mwaninyu aulemezeni.
2 Nyo mutom’va-a Mwaninyu utongi vaatu othene ira atu am’va-idhe nyo, liye aava-e ingumi yo-omala.
3 Ingumi yo-omala tanodha ikaana tafunjedha noidhiwa vya nyo Nlungu m’mbo-i baa-i uli waimbarimbari, na vya Yesu Kristu, wam’rumile nyo.
4 Nditoulemezani vailambo yavathi, na mwasa oi nditomari-a laba basa landiva-idhe nyo.
5 Moi e-no Baba, mundirumeli-e ira ndikale vakhundu vinyu thitho mundiva-e titimi-o lana miyo vakhundu vinyu ilambo ya-ana panduchiwe.
6 Atu aatukunle nyo muilambo nondiva-a, miyo nditoaidhiwi-a dhina linyu. Ali inyu, mbwenye mutondiva-a thitho aliwa atovwela madhwinyu.
7 Va e-ni atoidhiwa ira vyongo vyothene vyandiva-idhe nyo pyokhumela wa nyo,
8 namwasa oi nditoawandela madhu andiwandenle nyo. Aliwa atoarumela thitho atoidhiwa ira miyo dhadhidhe ninga namaimelelinyu nororomela ira nyo ngwandirumele.
9 Ee-no ndinoalobelela. Kai ira ndinolobelela ilambo khabe, mbwenye ndinolobelela atu andiva-idhe nyo, namwasa oi mbinyu.
10 Vyongo vyothene vina miyo pinyu thitho vyongo vinyu vyothene pyanga. Miyo nditolemeziwa vari vaatu andiva-idhe nyo.
11 “Miyo ndinaakhuma vailamboi thitho ndinodha wa nyo, mbwenye aliwa ano-ala vailamboi. Baba Ochena, mwaaing’anele namwasa wa dhina linyu lindiva-idhe nyo, ira takale ovwelana ninga i-yo nili ovwelana.
12 Vahora yali miyo vambo-i na aliwa, ndatoaing’anela na mwasa wadhina linyu lindiva-idhe nyo. Miyo nditoavunela moi kavali uliwethene wa aliwa unongeile khumi-avo unofuna dhanongiwa, ira lemba likwakwaneli-edhiwe.
13 Mbwenye va e-ni ndinodha wa nyo, thitho ndinouwandelani vyevi ndingali vailamboi ira aliwa tasangalale maningi ninga musangalalile miyo.
14 Nditoawandela madhwinyu, mbwenye ilambo inoaidanana namwasa oi katili ikhundu ya ilambo, mofwanafwana na miyo oi kandili ikhundu ya ilambo.
15 “Kandinovepha ira mwaakhumi-e vailamboi khabe, mbwenye ira mwaavunele wa wothakaluo.
16 Aliwa katili ikhundu ya ilambo, mofwanafwana na miyo thitho oi kandili ikhundu ya ilambo.
17 Mwaacheni-e vo-indi-edha basa imbarimbari. Madhwinyu ndi imbarimbari.
18 Nyo mwatoondiruma udha vailamboi. Mofwanafwana na vyevi, miyo thitho nditoaruma vailamboi.
19 Miyo ndinaadhicheni-a namwasa wa aliwa, ira aliwa thitho tacheni-iwe na imbarimbari.
20 “Kandinolobelela ala baa-i, mbwenye ndinolobelela thitho anondiroromela tangavwide vyafunji-idhe aliwa.
21 Ndinoira vyevi ira othene enala takale ovwelana ninga nyo Baba na miyo nili ovwelana, ira aliwa thitho takale ovwelana na i-yo naifunelo yoi ilambo iroromele ira nyo mwatoondiruma.
22 Nditoatitimi-a ninga mwandititimi-idhe nyo, ira aliwa takale ovwelana ninga muli i-yo ovwelana.
23 Miyo ndikale ovwelana na aliwa, nyo mukale ovwelana na miyo, ira aliwa tavwelane mwaimbarimbari, ira ilambo iidhiwe ira mwatoondiruma thitho ira munoadhiveliwana ninga munondidhiveliwana nyo.
24 Baba, miyo ndinofuna ira atu andiva-idhe nyoala tadhakale vambo-i na miyo unofuna miyo dhakala, ira tadhaone titimi-o langa lindiva-idhe nyo, namwasa oi mwatoondidhiveliwana mwa-anakaathei-e ilambo.
25 Baba olongomana, mwaimbarimbari ilambo kainouidhiwani, mbwenye miyo ndinouidhiwani thitho ala atoidhiwa ira ngunyo mwandirumile.
26 Miyo nditoiri-a ira aliwa taidhiwe dhina linyu thitho ndinodha dhowanave aidhiwi-a dhinalo ira aliwa thitho taoni-engana udhivela ninga wandioni-idhe nyo, ira miyo ndikale ovwelana na aliwa.”
