Ilembile Juwau 9:1-41
9 Yesu awendanga atoona mutu abaliwile o-oona.
2 Anamafunjedhee tatoom’fuka ira: “Rabi, n’nga adawile mbaani ira mutula abaliwe o-oona? Nguliye venango anamabalee?”
3 Yesu atoawakhula ira: “Mutula venango anamabalee katidawile. Mbwenye vyevi vitoireya ira mabasa a Nlungu aoneele dhela mwa liye.
4 Ninofwanela laba mabasa andirumille Nlungu ungali nathana. Namwasa oi ma-iyu afiya mutu kanaode laba basa.
5 Vili miyo vailamboi, ndili wala wa ilambo.”
6 Angaongile vyevi, atoothurela mare vathi nomunya marogodo, adhamale atoo-ela marogodwao muthoni mwa mutuo.
7 Moi e-no atoom’mwandela ira: “Udhowe umasusule vatanda la Silowe” (dhina leli ninothapulela “Orumiwa”). Moi e-no mutuo atoodhowa masusula thitho atoowelao aonanga.
8 Moi ee-no atu owandamana naatu enango oi ndulimu tanoom’monecha avepanga tatooroma onga ira: “N’nga wen’na kai akhaathecha vathi vepavepangule?”
9 Atu enango tanoonga ira: “Ee ngwen’na.” Enango thitho tanoongecha ira: “Khabe, utelandana baa-i.” Mbwenye mwinyauo anoawandela ira: “Ee ngumiyo.”
10 Moi e-no tatoom’fuka ira: “N’nga methwaala adhuleile a-vi?”
11 Liye atoowakhula ira: “Mutu mwinango dhinalee Yesu atoomunya marogodo noa-ela muthoni mwangamu. Adhamale atoondiwandela ira, ‘Udhowe umasusule wu Silowe.’ Moi ndatoodhowa masusula thitho nditoroma ona.”
12 Angaongile vyevyo atwao tatoom’fuka ira: “N’nga mutuo uli wan’ni?” Liye atoonga ira: “Kandiidhi uli liye.”
13 Aliwa tatoom’tukhula mutu wen’na oi voroma ali o-oona nom’dhowana wa Afarisi.
14 Dambo lamunyile Yesu marogodo nodhula metho a mutuo lali Sabudu.
15 Vahora yeniyo Afarisi naaliwene tatooroma m’fuka mutule vya mwemo mwaromele liye ona. Liye atoonga ira: “Atoo-ela marogodo muthoni mwanga, moi ndatoodhowa masusula, ndidhamale ndatooroma ona.”
16 Moi e-no enango mwa Afarisao tatooroma onga ira: “Mutu wen’na kai okhumela wa Nlungu, namwasa oi kanalokota Sabudu.” Enango tanoonga ira: “N’nga mutu odawa unaire a-vi vizindiyelo ninga vyevi?” Ee-no atwao tatoo-iyana mathuulelo.
17 Afarisao tatoom’fuka okoka mutu ali o-oonule ira: “Voi liye utoudhula metho, n’nga unothuulela ira liye mbaani?” Mutuo atoawakhula ira: “Liye ngunamaongela.”
18 Mbwenye Ayudao kataroromela ira mutuo alidi o-oona, moi tatooitana anamabalee,
19 noafuka ira: “N’nga wen’na ngumwaninyu unom’mongecha nyo ira ngo-oona? N’nga viodeile a-vi ira arome ona?”
20 Anamabalao tatoowakhula ira: “Ninoidhiwa ira wen’na ngumwani-u abaliwile o-oona.
21 Mbwenye kaninoidhiwa ira viodeile a-vi ira arome ona. Kanim’mwidhi um’dhunle metho. Mum’fuke mwinyaula ngundimuwene wen’na unoongamo ekhene.”
22 Anamabaleao tatoonga vyevyi namwasa oi taova anamasogolela amareligiau Aiyuda. Namwasa oi aliwa tatoomala vwelana ira mutu arumela ira Yesu ndi Kristu, unokhumi-iwa musinagoga.
23 Ngumwasiwa anamabaleao tatoonga ira: “Ngundimuwene wen’na, mum’fuke mwinyaula.”
24 Ee-no aliwa tatoom’mwitana okoka mutu ali o-oonule nom’mwandela ira: “Ulemeze Nlungu, i-yo nitoidhiwa ira mutu wen’na ngodawa.”
25 Liye atoawakhula ira: “Vyoi mutu wen’na ngodawa, miyo kandiidhi. Yongo imbo-i inoidhiwa miyo choi voroma ndali o-oona mbwenye va-eni ndinaaona.”
26 Moi e-no aliwa tatoom’fuka ira: “N’nga uuwirilena n’ni ira adhule methwaa?”
27 Liye atoawakhula ira: “Nditomala uwandelani mbwenye nyo kamwavuruwana. N’nga munofuna muvwe n’ni thitho venango nanyeene thitho munofuna mukale anamafunjedhee?”
28 Angaongile vyevi, aliwa tatoom’nyoza noonga ira: “We nguli namafunjedha wa mutu wen’ne, mbwenye i-yo nili anamafunjedha a Mose.
29 Ninoidhiwa ira Nlungu atoonga na Mose, mbwenye vyamutula kaniidhi ira unokhumela wani.”
30 Mutuo atoawakhula ira: “Vyevi pyodabwi-a maningi mwaonganga ira kamuidhi ukhumele liye, mbwenye liye utondidhula metho.
31 Nitoidhiwa ira Nlungu kanovuruwana mutu odawa, mbwenye akala mutu unoova Nlungu noirana vinofuna liye, liye unom’vuruwana.
32 Romela walelene, kaninavwevo ira mutu utodhula metho amutu abaliwile o-oona.
33 Aakale ira mutu wen’na kakhumele wa Nlungu, kaaode irana yongo iliyothene.”
34 Vowakhula tatoom’mwandela ira: “We obaliwa muvyodawa vyokoka. N’nga unofuna unifunji-e?” Adhamale tatoom’khumi-a sinagogani!
35 Yesu atoovwa ira mutule tatom’khumi-a sinagogani. Thitho angam’gumanenee, atoom’fuka ira: “N’nga unororomela Mwana mutu?”
36 Mutuo atoom’mwakhula ira: “N’nga Mwana mutuo mbaani? Kandiwandeleni Mbwiye ira ndim’roromele.”
37 Yesu atoom’mwandela ira: “Utom’mona wale, thitho ngwen’na unom’mongana weula.”
38 Liye atoonga ira: “Nditouroromelani Mbwiye.” Adhamale atoom’kokorela.
39 Moi ee-no Yesu atoonga ira: “Ndidhidhe vailambwila dhatonga ira atu o-oona tarome ona thitho atu oona takale o-oona.”
40 Afarisi enango ali vevo tangavwide vyaonga Yesu, tatoom’fuka ira: “N’nga i-yo thitho nili o-oona?”
41 Yesu atoawandela ira: “Mwa-akale o-oona, kamwakaena yodawa. Mbwenye voi munoonga ira ‘Ninoona,’ Yodawa inyu kinodha leveleliwa.”
