Ilembile Luka 18:1-43
18 Moi e-no Yesu atoawandela ifwanafwani-o vofuna athonyi-edha funeya oi talobelenga hora dhothene thitho ira ta-atatile rima.
2 Liye atoonga ira: “Sidadi n’nango mwatookala namatonga oi kaaova Nlungu thitho kaabala vyamutu.
3 Sidadimo mwatookala thitho i-yana wa makwele oi anoodhowecha wa namatongule mavepha ira, ‘Munditongele molongomana selwanga na mutu una miselu na miyo.’
4 Wa hora yolapela namatongula kaafuna m’tongela selwee, mbwenye vasogolovee atoonga rimanimwee ira, ‘Angalive ira kandinoova Nlungu venango kandinobala vya mutu uliwethene,
5 ndinoonechecha ira longomano litoireya wa i-yana wa makwelula namwasa oi unaandiruchi-a. Ndinoira vyevyi ira a-adhenga vano nondichenyeli-a na vinovepha liyevi.’”
6 Adhamale Mbwiye aongile ira: “Mutovwa viongile namatonguo angalive ira liye ali o-olongomana?
7 N’nga Nlungu kanodha onechecha ira longomano litoireya waatu osakuliwa vevo vanokhuwa aliwa nathana nama-iyu vanoalevela liye rima?
8 Mwaimbarimbari ndinouwandelani ira liye unodha onechecha ira longomano litoireya mombaranya waaliwa. N’nga Mwana mutu adhafiya unodha fwanyadi iroromelo ninga yei vailambo yavathivano?”
9 Yesu atoonga thitho ifwanafwani-o yo-arelai waatu enango tadhiona ninga olongomana, thitho taona atu enango ninga o-okaana basa. Liye atoonga ira:
10 “Atu ambili tatoodhowa kachisini malobela. M’mbo-i ali Farisi thitho mwinango ali mulimbo khomi-a soko.
11 Farisule atooroma lobela noroma onga rimanimwee ira, ‘Nlungwanga, ndinousimbani namwasa oi ndili o-iyana na atu enango othene. Aliwa ndi mambavwa, o-olongomana na manyambi. Ndili o-iyana thitho na mulimbo khomi-a sokula.
12 Miyo ndinosalecha udya fendo mbili vasumana thitho ndinovelelecha yakhumi va vyongo vyothene vinofwanyecha miyo.’
13 Mbwenye mulimbo khomi-a sokule angaimenle vandendai vang’ono, kafunile ing’ana dhulu. Liye anoodhiguguda vamirimani noonganga ira, ‘Nlungwanga, ndirieleni rima miyo mutu odawa.’
14 Mwaimbarimbari ndinouwandelani ira, mutu wen’ne vyadhowa liye waniwa atooniwa ira ngolongomana maningi kwaranya Farisule. Namwasa oi mutu uliwethene odhigweli-a unodha va-iwa manyadho, mbwenye mutu uliwethene odhiyevi-a unodha gweli-iwa.”
15 Moi e-no atu tanoom’dhelana a-imiwa ira aa-ele mandhee, mbwenye anamafunjedhao tangaoni vyevyo, tatooroma aombela uwali.
16 Mbwenye Yesu atoaitana a-imao noonga ira: “Kaa-iyeni a-imao tadhe wa miyo kamwaakondi-e, namwasa oi Umwene wa Nlungu ngwaatu ninga a-imala.
17 Mwaimbarimbari ndinouwandelani ira, mutu uliwethene o-owachela Umwene wa Nlungu ninga mwana, kanodha volowa mu Umwenuo.”
18 Moi e-no namatonga mwinango atoom’fuka ira: “Namafunji-a wapama, n’nga ndiire n’ni ira ndidhakaena ingumi yo-omala?”
19 Yesu atoom’mwakhula ira: “Mwasiwa ngwan’ni unondiromola ira wapama? Kavali wapama mbwenye Nlungu baa-i.
20 We utoidhiwa malamulo oi: ‘Kuire unyambi, kuphe mutu, kube, kuvelele umboni onama thitho loi mulemezenga babinyu nam’minyu.’”
21 Mutuo atoom’mwakhula ira: “Vyothene vyevi ndikanle ndivi-arelanga romela ndingali mwana.”
22 Yesu angavwide vyevi atoom’mwandela ira: “Yongo imbo-i inaasoweyave mwa we: Udhowe umaguli-e vyongo vinawe thitho kobiridhee umava-e alimbo sauwa. Waira e-no unodha kaana fuma dhulu wamala udhe udhakale nama-arelanga.”
23 Liye angavwide vyevyo, atookaana tangaranga maningi namwasa oi ali ofuma maningi.
24 Yesu atoom’mwing’ana mutuo noonga ira: “Vinodha kala vyorucha maningi ira atu ofuma tadhavolowe mu Umwene wa Nlungu!
25 Onga mwaimbarimbari pyo-orucha ira ngamila ivolowe valibengani la singano i-yani-ana ira mutu ofuma avolowe mu Umwene wa Nlungu.”
26 Atu tavwide vyevi tatoofuka ira: “N’nga mbaani unofuna vulumuwa?”
27 Liye atoawandela ira: “Vyongo vyo-oodeya waatu, pyoodeya wa Nlungu.”
28 Mbwenye Pedru atoonga ira: “Kaing’anani! I-yo nito-iya vyongo vi-u nou-arelani.”
29 Yesu atoawandela ira; “Mwaimbarimbari ndinouwandelani ira, kavali mutu u-iidhe nyumba, i-yana, abalee, anamabalee, venango a-ima namwasa wa Umwene wa Nlungu
30 oi kanodha fwanya vyoinjiva kwaranya vyevyo muhora ino thitho muhora inodhiyo unodha kaana ingumi yo-omala.”
31 Adhamale atoatukulela vakhundu anamafunjedhee 12 ale noawandela ira: “Kavuruwanani! Va-eeni ninodhowa wu Yerusalemu thitho vyothene vyalembiwile na anamaongela vyokhuza Mwana mutu vinamakwakwaneli-edhiwe.*
32 Mofwanafwani-a tanamam’velele waatu amitundu inango thitho tanama’mwirele vyaiburutu, m’nyoza nom’thurela mare.
33 Tamala m’kwapula tanodha m’pha, mbwenye vadambo laneraru liye unodha venyathi.”
34 Mbwenye aliwa kataodile vwechecha thapulela wa madhu enala, namwasa oi madhu enala ali olokoteya waaliwa moi kataodile avwechecha.
35 Moi e-no Yesu awandamelanga wu Yeriko, mutu mwinango o-oona atookaathi khundu mwandhila novepavepanga.
36 Angavwide mwinji waatu uviranga duzi na vevo, atoofuka yaireya.
37 Aliwa tatoom’mwandela ira: “Yesu wau Nazareti unaavira!”
38 Liye angavwide vyevyo atookhuwa ira: “Yesu mwana Davide, ndivweleni tangaranga!”
39 Moi e-no atu tali vasogolo tatooroma m’sumulula nom’mwandela ira amiyale. Mbwenye taira e-no pyasimbwa liye khuwa ira: “Mwana Davide, ndivweleni tangaranga!”
40 Ee-no Yesu atooimela noawandela atu ira tam’dhena wa liye. Angafiile vaduzi, Yesu atoom’fuka ira:
41 Unofuna ira nduirelen’ni?” Liye atoowakhula ira: “Mbwiyeni, mundikhami-e ira ndirome ona.”
42 Ee-no Yesu atoom’mwandela ira: “Urome ona, iroromeloyaa itouili-a.”
43 Hora yeniyene liye atooroma ona thitho atooroma m’arela alemezanga Nlungu. Thitho atu othene taoni vyevi tatooroma m’titimi-a Nlungu.
Madhu achindo
^ Venango: “vinamaireye.”
