Ilembile Luka 2:1-52
2 Malambo enao, Kaisara Agustu atootonga ira atu othene ilamboyo tamalembi-e.
2 (Lembeliwa weu wali oroma thitho waireile vahora yoi Kureniyo ali namatonga wa Siriya.)
3 Atu othene tatoodhowa malembi-a thitho mutu uliwethene adhowile malembi-a sidade la waniwa.
4 Yosefi naliyene atookhuma wu Galileya, sidadi la Nazareti nodhowa wu Yudeya sidadi la Davide loitaniwa Betelehemu, namwasa oi liye ali wa banja thitho ziza la Davide.
5 Atoodhowa malembi-a vambo-i na Mariya anthenle liye movwelana na vyavwelan’ne aliwa. Vahora yeniyo Mariya a-adhi vang’ono ira abale.
6 Tangali weo, hora yoi Mariya abale yatookwakwana.
7 Liye atoobala mwanee oroma wa lombwana thitho atoom’mbilinga na nguwo nom’gonathi-a modyelamo vifuwo, namwasa oi nyumba mofiyedhela alendo kamwali limburo.
8 Tatamo leli mwatookala anamakumbiza oi tali undhe wa sidadi noing’anelanga vifuwo viwa nama-iyu.
9 Mo-odedi-edhela ngelo wa Yohova* atooimela vaduzi naaliwa, thitho titimi-o la Yohova latowala valimburo lothene lelo moi anamakumbiza tatoova maningi.
10 Mbwenye ngeluo atoawandela ira: “Kamuove! Miyo ndidhidhe dhalaleya wa nyo milanyu yapama inofuna dhasangalali-a maningi atu othene.
11 Namwasa oi penene, mu sidade la Davide mutobaliwa namavulumuchinyu oi ngu Kristu Mbwiye.
12 Izindiyeloyee chiila: Weo munamafwanye mwana wa tete obilingiwa na nguwo nogonathi-iwa modyelamo vifuwo.”
13 Mo-odedi-edha watooneya mwinji nlukhulu wa angelo vambo-i na ngelule thitho wanotitimi-a Nlungu ira:
14 “Titimi-o wa Nlungu dhuludhulu, thitho rendele vailambo yavathi waatu anoasangalalana liye.”
15 Ee-no angelwao tangawelenle dhulu, anamakumbizao tatooroma wandelana ira: “Dhoweni wu Betelehemu ira nimaone vyongo vyaireilevyo, viniidhiwi-idhe Yohova.”
16 Aliwa tatoodhowa mombaranya thitho tatoofwanya Mariya na Yosefi na mwana wa tetuo tangam’gonathi-idhe modyelamo vifuwo.
17 Tangaoni vyevi, tatoonga milanyu yawandeliwile aliwa yokuza mwanuo.
18 Atu othene tavwide, tatoodabwa navyaawandenle anamakumbizao.
19 Mbwenye Mariya atoolokota madhu othene enala thitho atooroma thuulela thapulelawee rimanimwee.
20 Adhamale anamakumbizale tatoowelela wali aliwa, talemezanga notitimi-a Nlungu namwasa wa vyongo vyothene vyavwide aliwa na vyaoni aliwa, movwelana na vyawandeliwile aliwa.
21 Vangavirile malambo 8, hora yoi aineliwe ingakwakwane, tatoom’va-a dhina loi Yesu. Leli tidhina laongile ngelule Mariya a-anakaena wise.
22 Thitho hora yoi aliwa tacheni-iwe movwelana na ilamulo ya Mose yangakwakwan’ne, tatoodhowa na mwanuo wu Yerusalemu mam’velela wa Yohova.
23 Vyevi vyali vyovwelana na vilembiwile mu ilamulo ya Yohova ira: “Mwana uliwethene walombwana oroma baliwa, unodha kala ochena wa Yohova.”
24 Weo aliwa tatoovelela sembe movwelana na vinoonga ilamulo ya Yohova ira: “Majiwa menli venango ana kangaiwa ambili.”
25 Moi e-no mu Yerusalemu mwatookala mutu mwinango dhinalee Simioni. Lombwana wen’na ali olongomana na odhivelela wa Nlungu. Liye anoodedi-edha hora yafuna Nlungu dhadidili-a Aisraeli thitho zimu ochena wali va liye.
26 Thitho Nlungu atoom’mwandela dhela mwa zimu ochena ira kanodhakwa a-anaone Kristu wa Yohova.
27 Moi e-no mosogoleliwa na zimu, Simioni atoodha va kachisi. Thitho anamabala a Yesu tangam’dhidhena dhamwirela vyafuna ilamulo,
28 liye atoom’tukula mwanuo mandhanimwee nom’titimi-a Nlungu ira:
29 “Va-eeni Mbwiye nlukhulu kwaranya, munorumeli-a dhaarinyu wukwa mwa rendele movwelana na vyaongilenyo.
30 Namwasa oi methwanga atoona ndhilinyu yovulumuchela atu,
31 yeniyo isaka-edhile nyo vamethoni vaatu amitundu yothene.
32 Methwanga atoona njeza inokami-a atu amitundu yothene ira taode ona thitho nditoona titimi-o la atwinyu Aisraeli.”
33 Anamabala a mwanuo tanoodabwa na vyaonga Simioni vyokuza mwanuo.
34 Thitho Simioni atooraeli-a anamabalao nowandela Mariya m’mee mwanuo ira: “Kavuruwana! Mwanula unodha iri-a ira atu anjinji tagwe thitho ira atu anjinji tavenyathi mu Israeli. Noira idhakale izindiyelo inofuna atu dhairuni-a.
35 (ee, unodha lathiwa na sarasada lolapa), ira vinothuulela atu anjinji rimanimwiwa vidhakhumelele vakwecha.”
36 Vatookala thitho namaongela wa-iyana dhinalee Ana mwana Fanueli wa ziza la Aseri. I-yana wen’na ali oulula maningi thitho atookala na man’nee wa vyawa 7 baa-i khumela vyathelan’ne aliwa.*
37 Liye ali i-yana wa makwele thitho an’na vyawa 84 mbwenye kaajombecha vakachisi. Liye anoolabecha urumiwi opambuleya nathana na ma-iyu thitho anoosala udya nolobela mosembezela.
38 Muhora yeniyo liye atoofiya duzi noroma simba Nlungu thitho onga vyokuza mwanuo waatu othene tadedi-edha ivulumucho ya Yerusalemu.
39 Ee-no tangamadhi ira iliyothene movwelana na ilamulo ya Yohova, tatoowelela wu Galileya, sidadi la waniwa wu Nazareti.
40 Mwanuo atoodhowanave ulukhula nokala wakopolo. Zeludhee dhanoinjiva thitho Nlungu atoodhowanave m’sangalalanee.
41 Yawa na yawa anamabalee tanoodhiveliwana dhowa wu Yerusalemu wu pwando la paskwa.
42 Moi e-no angana vyawa 12, aliwa tatoom’dhowana weo movwelana na mwambo wa pwandolo.
43 Pwandolo lingamadhi aliwa tatoovenyathi welela waniwa. Mbwenye zombuwo Yesu atoo-alela wu Yerusalemu thitho anamabalee kataviidhiwa vyevyo.
44 Aliwa tathuulela ira liye uli vambo-i naaliwa vagulu laatu avaulendwao, moi tatoowenda ulendo wa dambo lipumbula. Adhamale tatooroma m’sakasaka mwaabaliwa naafwiwa.
45 Mbwenye tadhakonde am’mona tatoowelela wu Yerusalemu. Weo tatoom’sakasaka mamburo othene.
46 Moi e-no vangamadhi malambo mararu, tatoom’fwanya angali kachisini, angakaathidhe vari vaanamafunji-a thitho avuruwananga noafukanga vyofuka.
47 Mbwenye atu othene tam’vuruwana tatoodabwa maningi na vyowakhulavyee thitho voona ira ali ovwechecha vyongo maningi.
48 Anamabaleao tangam’moni tatoodabwa maningi, thitho m’mee atoom’fuka ira: “Mwanawe, mwasiwa ngwan’ni utonioni-a nyarwa e-ni? Miyo na babaaula natoosukwala maningi thitho nanousakasaka.”
49 Mbwenye liye atoawakhula ira: “Mwasiwa ngwan’ni mwanoondisakasaka? N’nga kamunoidhiwa ira miyo ndinofwanela fwanyeyanga m’mba mwa Babanga?
50 Mbwenye aliwa katavwechechile vyaawandela liyevyo.
51 Adhamale tatoovenyathi vambo-i nowelela wu Nazareti, thitho liye atoodhowanave avwela. Veva thitho m’meeuo atoalokota pama maningi madhu othene enala rimanimwee.
52 Mbwenye Yesu atoodhowanave ulukhula mu zelu na imo. Thitho Nlungu naatu tatoodhowanave m’sangalalanee.
Madhu achindo
^ Mundhila inango: “khumela vaunamwalee.”
