Ilembile Luka 8:1-56
-
A-iyana tanoowenda vambo-i na Yesu (1-3)
-
Ifwanafwani-o ya mulimbo dhala mbeu (4-8)
-
Mwasa wam’mwiri-a Yesu i-ndi-edha basa vifwanafwani-o (9, 10)
-
Atoonga thapulela wa ifwanafwani-o ya mulimbo dhala mbeu (11-15)
-
Mutu a-indi-a nyale kanoikhunela na gogoda (16-18)
-
M’mee Yesu naabelee (19-21)
-
Yesu atooparari-a liphevo lakopolo (22-25)
-
Yesu atootumiza viwanda mwanguluwe (26-39)
-
Mwana wa i-yana wa Jairo; i-yana atoo-inda nguwo ya Yesu (40-56)
8 Va-anavire hora yolapela, Yesu atooroma wenda sidadi na sidadi thitho mudhi na mudhi nolaleela milanyu yapama ya Umwene wa Nlungu. Thitho arumiwee 12 ale tali na liye vambo-i.
2 Ali thitho na a-iyana enango aakhumi-idhe liye mizimu yothakala noaili-a marendiwa. Enango mwa aliwa ali Mariya aitaniwa thitho ira Madalena wenuo wam’khumi-idhe liye viwanda 7.
3 Juwana mwadhi Kuza oi ali namalaba wa ndimuwa wa Herodi, Suzana na a-iyana enango anjinji enao tam’labela Yesu na arumiwee vo-indi-edha basa fumiwa.
4 Moi e-no mwinji lukhulu waatu ungagumaneile, vambo-i naatu enango tam’arela khumela masidadi o-iyana i-yana, Yesu atoonga ifwanafwani-o yoi:
5 “Mulimbo dhala mbewu atoodhowa madhala mbewudhee. Vahora yadhala liye mbewu dhinango dhatoogwela khundu mwa ndhila nonyingaliwa thitho dhatoodyiwa na mbalame.
6 Mbewu dhinango dhagwele vamabweni. Mbwenye dhingamenle, dhatoouma namwasa oi kavali tota.
7 Mbewu dhinango dhagwele vamingani thitho mingadho dhaulukhulela vambo-i na mbewudho noimwanani-a mbewudho ulukhula.
8 Mbwenye dhinango dhagwele vamateyani apama thitho dhingaulukhunle, dhatoova-a vyova-a weli-edha fendo 100.” Angaongile vyevi atoonga mogweli-a madhu ira: “Mutu una mabaru avwe.”
9 Mbwenye anamafunjedhee tatoom’fuka vyathapulela ifwanafwani-o yei.
10 Liye atoonga ira: “Nyo mutova-iwa ngari yoi muvwecheche masegredo opambuleya a Umwene wa Nlungu. Mbwenye wa atu enango, anavwenga vifwanafwani-o baa-i. Vili ee-no ira ing’ana taing’anenga, mbwenye ta-azindiyele yongo. Uvwa tavwenga, mbwenye ta-avwechechenga vinoongiwavyo.
11 Ifwanafwani-oila thapulelawee ndi e-ni: Mbewudho ndi madhu a Nlungu.
12 Mbewu dhagwele khundu mwandhiladho, mbaatu anovwa madhwao. Amala Namanami-a unodha dhaakhumi-amo madhwao mirimani mwiwa ira ta-aroromele thitho vulumuwa.
13 Mbewu dhagwele vamabweni mbaatu oi tavwa madhwao, tanoawachela mosangalala mbwenye katina michichi. Tanororomela hora yoyeva, mbwenye tadhagumanana vyowesedha tanofooka.
14 Mbewu dhagwele vamingani mbaatu anovwa madhu a Nlungu mbwenye namwasa wa vyokhumbanyi-a, fuma na vyosangalali-a vya ingumi ya malamboano, anoimwanana ulukhula pama thitho vyova-a viwa kavinowarala.
15 Mbwenye mbewu dhagwele vamateya apama, mbaatu oi vasogolo vovwa madhwao na rima wapama maningi, tanoalokota novilela vahora inova-a aliwa vyova-a.
16 “Kavali mutu uno-indi-a nyale, amala liye igudumela na gogoda venango i-ela vathi vakama. Mbwenye unoi-ela vayo-elavo nyale ira atu anovolowa m’mbamo taone njeza.
17 Namwasa oi kavali yovithaleya inofuna dhakonda a-oniwa. Thitho vyongo vyothene vyolokotiwa mwasegredo maningi vinodha idhiweya, kavinodha lokoteya modhowa nodhowa.
18 Ee-no muvuruwanenga mopwasedha maningi. Namwasa oi mutu una vyongo unodha va-iwa vyoinjiva, mbwenye mutu ukondile a-kaana, unodha wakiwa masiki vinothuulela liye ira utovikaana.”
19 Moi e-no m’mee na abalee tatoodha wa liye, mbwenye namwasa oinjiva waatu tatooimwanana fiya vali liye.
20 Mbwenye atu enango tatoom’mwandela ira: “M’minyu na abalinyu taimenle vandheva tanofuna onga na nyo.”
21 Vowakhula Yesu aawandenle ira: “M’manga na abalanga mbaala anovuruwana madhu a Nlungu noa-arela.”
22 Dambo n’nango Yesu na anamafunjedhee tatoogwela mwadiya thitho atoawandela ira: “Dhoweni nivandelele khombela n’nango la bara.” Ee-no aliwa tatooroma chapa mwadiya.
23 Mbwenye tawendanga, Yesu atoogona. Adhamale vabaranivo vatooromeya lipevo nlukhulu thitho ma-inje atooroma dhala mwadiyanimo moi wa-adhi vang’ono ira ubwine.
24 Adhamale tatoodhowa mam’venyathi-a thitho tatoom’mwandela ira: “Namafunji-a, Namafunji-a, ninofuna wukwa!” Yesu angavwide vyevi atoovenyathi nosumulula lipevo na mabimbi akopolwao, moi vyatooparari thitho vabaravo vatoopwaseya.
25 Moi e-no atoafuka ira: “N’nga iroromelo inyu ili wani?” Mbwenye aliwa tatoova thitho tatoogomiwa luso, moi tatooroma fukana ira: “N’nga mwaimbarimbari mutu wen’na mbaani? Kaing’anani, unooda tonga lipevo na ma-inje thitho vinom’vwela.”
26 Moi e-no tatooimeli-a mwadiyule tatamo la Jerazeno, khombela n’nango laduzi na Galileya.
27 Yesu angathithile mwadiyani nofiya rundani, atoogumanana mutu mwinango aoni-iwa nyarwa na iwanda okhumela sidadimo. Wahora yolaphela, mutuo kaawara nguwo thitho kaakala vanyumbani mbwenye akala masiyeni.
28 Mutuo angam’moni Yesu, atookuwa maningi nodhigwi-a vathi vamethonivee. Adhamale atookuwa mwakopolo ira: “N’nga munofunan’ni wa miyo Yesu, Mwana Nlungu Wadhuludhulu? Pepani ndinouvepani ira kamundioni-e nyarwa.”
29 (Namwasa oi Yesu anoowandela zimu othakaluo ira ukhume mwa mutuo. Zimuo wanoom’-inda mwakopolo fendo dhinjinji* mowelelawelela anoomangiwa na makureti thitho matandaza nom’mwing’anela. Mbwenye namwasa wa kopolo ya iwandayo, anoophadha makuretao notawela ulimburo lo-okala atu.)
30 Yesu atoom’fuka ira: “Dhinalaa uli ani?” Liye atoowakhula ira: “Ndili mwinji,” namwasa oi viwanda vinjinji vyatoovolowa mwa liye.
31 Viwandavyo vyanom’sembezela mowelelawelela ira a-avidhowi-e lindini.
32 Moi ee-no kumbi lukhulu wa nguluwe waira udya vamwangoni. Ee-no viwandavyo vyatoom’sembezela ira avirumeli-e mavolowa mwanguluwedho thitho liye atoovirumeli-a.
33 Vidhaire e-no viwandavyo vyatookhuma mwa mutuo nodhowa mavolowa mwa nguluwedho. Nguluwe dhothenedho dhatootamangela pedi malupela bara thitho dhatoobwina.
34 Mbwenye anamakumbiza a vifuovyo tangaoni vyaireilevyo, tatootawa maonga vyevi mu sidadi na mamidhi.
35 Adhamale atu tatoodhowa maona vyaireilevyo. Aliwa tangafiile wa Yesu tatoofwanya mutu akhumi-iwile viwanda ule angakaathidhe vathi duzi na Yesu. Mutuo ali angawarile pama thitho mathuulelwee ali pama moi aliwa tatoova.
36 Atu aoni vyairile Yesu vyo, tatoawandela moda mwaili-iwile mutu aoni-iwa nyarwa na viwandule.
37 Adhamale mwinji othene okhumela mamidhi avaduzi a Jerazeno, watoom’vepa ira akhumeo waniwao, namwasa oi wanoova maningi. Vidhaire e-no liye atoogwela mwadiya ira adhowenga.
38 Moi e-no mutu wam’khumi-idhe liye viwandule atoom’vepa mowelelawelela ira awendenga na liye. Mbwenye Yesu atoom’mwandela mutuo ira adhowenga waniwa. Liye aongile ira:
39 “Udhowe nyumbaniwaa thitho umaonge viuwirele Nlungu.” Ee-no mutuo atoodhowadi thitho anoonga musidadi mwethene vyongo vyam’mwirele Yesu.
40 Yesu angawelenle wu Galileya, mwinji waatu watoom’mwachela na mandha menli, namwasa oi atu othene taira m’dedi-edhela.
41 Adhamale vatoofiya mutu mwinango dhinalee Jairo. Mutu wen’na ali namasogolela wa Sinagoga. Moi e-no atoodhigwi-a vamanyaloni va Yesu noroma m’sembezela ira adhowe nyumbaniwee.
42 Jairo atooira vyevi namwasa oi mwanee mbo-i baa-i wa i-yana oi ana vyawa 12, ali anga-adhi vang’ono ira akwe.
Vahora yadhowa Yesu, atu anjinji tatoom’arela thitho tanoom’finya.
43 Moi e-no vatookala i-yana mwinango abulela marenda okhumi-a sangiri wa vyawa 12, thitho kavali mutu uliwethene aodile m’mwili-a.
44 I-yanuo atoom’arela Yesu nduliwee no-inda khundu mwa nguwee ya undhe. Hora yeniyene urendee okhuma sangirule watooila.
45 Moi e-no Yesu atoofuka ira: “N’nga mbaani undi-indile?” Atu othene tangakhondile, Pedru atoonga ira: “Namafunji-a, nyo thitho munoona ira atu othene enala tanaaufinyani, n’nga munofuka ira mbaani undi-indile?”
46 Mbwenye Yesu atoonga ira: “Mwaimbarimbari utokala undi-indile, namwasa oi nditovwa ira kopolo itokhuma mwa miyo.”
47 I-yanuo angaoni ira vyairile liyevyo vyatooidhiweya, atoodhowa vali Yesu angurumelanga thitho atookokora noonga vamethoni vaatu othene yam’mwiri-idhe ira am’inde, thitho na moda mwailele liye hora yeniyo.
48 Mbwenye liye atoom’mwandela i-yanuo ira: “Mwanawe, iroromeloyaa itouwili-a. Udhowe mwarendele.”
49 Angali wari moonga, namalaba wa namasogolela wa Sinagogule atoofiya thitho atoonga ira: “Mwaninyule utokwa. Kam’iyeni Namafunji-ula kamum’moni-e nyarwa.”
50 Yesu angavwide vyevyo, atoom’mwandela ira: “Kuove ukaena iroromelo baa-i, thitho mwanaa unokaana okoka ingumi.”
51 Angafiile nyumbanio kaarumeli-idhe ira mutu uliwethene avolowe vambo-i na liye khumi-avo Pedru, Juwau na Yakobo thitho anamabala asikanuo.
52 Mbwenye atu othene taira ula thitho dhiguguda vamirimani namwasa watangaranga. Ee-no Yesu atoawandela ira: “Miyalani, namwasa oi mwanula kakwide, mbwenye unaagona.”
53 Angaongile vyevi, atwao tatooroma m’theya monyoza, namwasa oi tanooidhiwa ira mwanuo utokwa.
54 Mbwenye liye atoom’inda dhandha nom’mwitana ira: “Sikanawe, venyathi!”
55 Vidhaire e-no sikanuo atookaana okoka ingumi thitho hora yeniyene liye atoovenyathi. Moi e-no Yesu atoawandela ira tam’va-e yodya sikanuo.
56 Vevo anamabalee tatoosangalala maningi, mbwenye Yesu atoawandela ira katiwandele mutu uliwethene vyaireilevyo.
Madhu achindo
^ Mundhila inango: “malambo manjinji.”
