Ilembile Marku 6:1-56
6 Adhamale atookhuma weo nodhowa isa ya waniwa thitho anamafunjedhee tatoom’arela.
2 Lingafiile dambo la Sabudu, liye atooroma fuji-a mu sinagoga. Atu anjinji tam’vuruwana tatoodabwa thitho tatoonga ira: “N’nga mutu wen’na vyongo vyevi uvikhumilena wani? Mwasiwa ngwan’ni utova-iwa zelu dhedhi ira aodenga irana mabasa akopolo?
3 N’nga wen’na kai mesili osemule, n’nga m’mee kai Mariya, thitho abalee kai Yakobo, Yosefi, Yudasi na Simoni? N’nga arongolee kai ana i-yo vanwala?” Ee-no tatooroma m’thakaleliwanee.
4 Mbwenye Yesu atoawandela ira: “Namaongela kanolemeziwa waniwa, nee naabalee, nee vandheviwa mbwenye wu limburo n’nango.”
5 Ee-no kaodile irana mabasa akopolo aliothene weo, mbwenye a-enle mandha vaatu olengeseya abulela noaili-a.
6 Mwaimbarimbari liye atoodabwa ona ira atwao katana iroromelo. Ee-no arungunuwile mamidhi avaduzi nofunji-a.
7 Adhamale atooitana anamafunjedhee 12 ale, noroma aruma ambili ambili thitho atoava-a kopolo ira taodenga khumi-a mizimu yothakala.
8 Thitho atoawandela ira katitukule yongo vaulendwiuo mbwenye golomondo baa-i. Atoawandela ira katitukule pau, mabudu a vyodya venango kobiri mapastani mwiwa,
9 mbwenye ira taware sapato thitho ira ta-aware nguwo mbili.
10 Thitho atoawandela ira: “Mwafiya vanyumbani iliyothene, mukalenga vanyumbanivo fiyedha hora yokhuma weo yakwakwana.
11 Uliwethene unokonda atu uwachelani venango uvuruwanani mwakhumanga weo mugume tumbulu manyaloniwinyu, ira ukale umboni waaliwa.”
12 Ee-no tatoodhowa malaleela ira atu tachinyuwe,
13 thitho tatookhumi-a viwanda vinjinji, dholi-a makhura atu anjinji tabulela, noaili-a.
14 Moi e-no mwene Herodi atoovwa vyevi namwasa oi dhina la Yesu latoovweya maningi, thitho atu taonga ira: “Juwau Namabadiza utovenyathi muukwani, ngumwasiwa unoira mabasa akopolo.”
15 Mbwenye atu enango taonga ira: “Ndi Eliya.” Thitho atu enango taonga ira: “Ndinamaongela ninga mwali anamaongela awale”.
16 Mbwenye Herodi angavwide vya Yesu atoonga ira: “Mwaimbarimbari Juwau agwandi-idhe miyo murule, utovenyathi-iwadi.”
17 Liye atoonga vyevi namwasa oi Heroduo atooruma atu ira tamam’mange Juwau nom’fungela perezo, namwasa oi Herodi athenle Erodiya i-yana wa balee Filipi.
18 Atooira vyevi namwasa oi Juwau anoom’mwandelecha Herodi ira: “Pyo-orumeli-iwa ira muthele i-yana wa balinyu.”
19 Namwasa wa vyevi, Erodiya anom’mwidanana maningi Juwau thitho anofuna m’pha, mbwenye kaaoda irana vyevyo.
20 Herodi anoom’lemeza Juwau namwasa oi anooidhiwa ira ndi mutu olongomana na ochena, thitho anoom’vunela. Angavwide vyaonga Juwau, atoogomiwa luso, mbwenye atoodhowanave m’vuruwana mosangalala.
21 Ee-no dambo loi Erodiya akwakwaneli-edhe vyafuna liye, latoofiya. Leli ali dambo lothuulela baliwa wa Herodi thitho atoasaka-edhela yodya andimuwa ta-arela Herodi, andimuwa aanyakondo na atu ovweya maningi mu Galileya.
22 Moi e-no mwana wa i-yana wa Erodiya atoovolowa ongoina, moi atoom’sangalali-a Herodi na atu tadya vambo-i na liye. Ee-no mwene atoom’mwandela sikanuo ira: “Undivepe iliyothene inofunawee thitho ndinouva-a.”
23 Mwaimbarimbari, liye atoolumbela ira: “Yongo iliyothene inofunawee ndivepa ndinouva-a, masiki ikhundu ya umwenangula.”
24 Ee-no sikanuo atookhuma dhowa mafuka m’mee ira: “N’nga ndimavepe n’ni?” M’meuo atoom’mwandela ira: “Umavepe muru wa Juwau Namabadiza.”
25 Hora yeniyo sikanuo atoodhowa mombaranya wa mwenuo mam’vepa ira: “Ndinofuna ira mundiva-e muru wa Juwau Namabadiza paratoni chineneeva.”
26 Angalive ira mwene atoosukwala maningi, mbwenye liye kaakondile vothuulela lumbeloleenle thitho na alendwee ale.
27 Ee-no hora yeniyene, mwene atooruma nyakondo amwing’anela nom’mwandela ira am’dhelena muru wa Juwau. Liye atoodhowa magwanda muru wa Juwau perezonimo,
28 noudhana paratoni. Moi e-no atoom’va-a sikan’ne thitho sikanuo atoodhowa mam’va-a m’mee.
29 Anamafunjedhee tangavwide vyevyo tatoodha dhatukula tembwee nodhowa mau-ela masiyeni.
30 Arumiwi tatoogumanyeya wa Yesu nom’mwandela vyongo vyothene vyairile aliwa na vyafunji-idhe aliwa.
31 Liye atoawandela ira: “Nyo mudhe uno nidhowe wu limburo lo-okala atu ira mumavume vang’ono.” Namwasa oi atu anjinji tanoodha tongodhowanga thitho katanave hora yoi tavume venango hora yoi tadye.
32 Moi ee-no tatoogwela mwadiya nodhowa wu limburo lo-okala atu.
33 Mbwenye atu tatoaona takhumangavo thitho atu anjinji tatooviidhiwa vyevyo. Ee-no atu okhumela masidadi othene tatootamangela weo namendo moi atwao mbaromile fiyavo valimburonivo.
34 Mbwenye angathithile mwadiyani, atoona mwinji nlukhulu waatu thitho atoavwela tangaranga, namwasa oi tali ninga mabila o-okaana namakumbiza. Moi atooroma afunji-a vyongo vinjinji.
35 Moi e-no dhuwa lingavirile, anamafunjedhee tatoodha wa liye noonga ira: “Uno kauli atu thitho hora itovira.
36 Mwawandele atwala ira tadhowe mamidhi avaduzi na visa vyorungunuwa ira tamagule vyodya ira tadye.”
37 Mbwenye liye atoawakhula ira: “Nyo mwaava-e vyodya.” Yesu angaongile vyevi, aliwa tatoom’fuka ira: “N’nga i-yo ninooda magula mapau a kobiri yokwakwana madenariyo 200 noava-a atwala ira tadye?”
38 Liye atoafuka ira: “Muna mapau mangasi? Mudhowe mumaaone!” Tangaaoni tatoonga ira: “Vali mapau mathanu na somba mbili.”
39 Adhamale atoawandela atwao ira takaathi magurupu vamalachi obitimela.
40 Thitho tatookaathidi, magurupu aatu 100 enango 50.
41 Moi e-no atootukula mapau mathanu na somba mbili dhile liye ing’ana dhulu nolobela. Adhamale atoomeyameya mapawao noava-a anamafunjedhee ira taava-e atwao, thitho atoomeyameya somba mbili dhile noagawedha atu othene.
42 Ee-no othene tatoodya norumbala,
43 thitho tatoogumanya mapau o-ala okwakwana migogoda 12, a-lengesa somba.
44 Atu adyide mapawao, talivo alombwana okwakwana 5.000.
45 Adhamale, Yesu atoawandela anamafunjedhee mombaranya ira tagwele mwadiya nosogola dhowa kombela n’nango duzi na wu Betisaida. Mbwenye liye ato-alela naifunelo yoi awandele atwao ira tadhowenga waniwa.
46 Adhamale awandela atwao ira tadhowenga, atoogwela mwangoni ekhene malobela.
47 Dhuwa lingavirile, mwadiyule wali ungafiile vari va bara, mbwenye liye ali ekhene rundani.
48 Yesu angaoni anamafunjedhao tachapanga mwadiya morucheya namwasa olimbanana lipevo lakopolo, liye atoa-ara awendanga vadhulu va bara. Enala ali mabingu ocha.* Mbwenye anamafunjedhao taona ninga Yesu afuna aakwaranye.
49 Tangam’moni awendanga vabaranivo, anamafunjedhao tatoothuulela ira: “Mwaimbarimbari enala mbamasopenya!” Thitho tatookhuwa mogweli-a madhu.
50 Tatooira vyevi namwasa oi othene tatoom’mona thitho tatoova. Mbwenye hora yeniyene liye atoawandela ira: “Mukurudheye! Kamuove, ndimiyo.”
51 Moi e-no Yesu atoogwela mwadiyanimo thitho lipevolo latooparari. Anamafunjedhao tangaoni vyevi tatoodabwa maningi.
52 Namwasa oi katavwechechile thapulela wamapau ale, aliwa tanoorucheyave ira tavwecheche vyongo vyothene.
53 Tangavandenle nofiya rundani, tatoofiya wu Jenezareti noimeli-a mwadiyuo chereerani mwa bara.
54 Mbwenye Yesu adhathithe mwadiyanimo, atu tatoom’zindiyela.
55 Ee-no atu tatooroma tamanga wu na wu isa yothene yeyo noroma tukula vakandalani atu othene tabulela noadhowana wali Yesu.
56 Moi e-no avolowa mamidhi venango masidadi na visa vyorungunuwa, atu tanoodhana atu obulela vamerekado. Aliwa tanoom’sembezela ira ta-inde usalu opota wanguwee yaundhe thitho atu othene tau-indile, tatooila.
Madhu achindo
^ Hora yen’na ndi romela 3 hora fiyedha 6 hora namaebe-i.
