Ilembile Marku 7:1-37
7 Moi e-no Afarisi na alembi enango akhumenle wu Yerusalemu tatoogumanyeya wa Yesu.
2 E-no aliwa tatoona enango mwa anamafunjedha a Yesu tadyanga yodya namandhani mothakali-iwa, venango ira mo-o-ambamo mandhani.*
3 (Afarisi na Ayuda othene katinodya ta-ana-ambemo mandhani fii-a viguguni, vo-arela sanganiko dhaanamabala.
4 Thitho tawela khumela merkado, katinodya ta-ana-ambe. Vatokala sanganiko dhinjinji dhedho dhawandeliwile aliwa thitho tanaadhi-arela, ninga bwini-a makopo ma-injeni, mino na viya vyakuwa.)
5 Ee-no Afarisi na alembala tatoom’fuka Yesu ira: “Mwasiwa ngwan’ni anamafunjedhinyu katino-arela sanganiko dhaanamabala, mbwenye anodya yodya na mandhani mothakali-iwa?”
6 Liye atoawakula ira: “Esaya atooro-edha vyaimbarimbari vyokhuza nyo atu ainyengo movwelana na vyaongile malemba ira, ‘Atwala anondilemeza na milomwiwa baa-i, mbwenye mirimiwa ili undendai na miyo.
7 Yongo iliyothene inoira aliwa vondilambela cho-okaana basa, namwasa oi anofunji-a malamulo aatu kala ninga malamulo a Nlungu.’
8 Munopwaza malamulo a Nlungu nokamelanga sanganiko dhaatu.”
9 Thitho atoawandela ira: “Mowenjela munopwaza malamulo a Nlungu ira mu-arelenga sanganiko dhinyu.
10 Mofwanafwani-a, Mose aongile ira, ‘Mulemezenga babinyu nam’minyu,’ thitho aongile ira, ‘Mutu uliwethene om’mongela babee venango m’mee madhu aiburutu unofwanela phiwa.’
11 Mbwenye nyo munoongecha ira, ‘Mutu am’mwandela babee venango m’mee ira: “Yongo iliyothene ina miyo yafuna miyo ukami-anani ndi kobani, (thapulela ira yotuva yoi ndivelele wa Nlungu),”
12 nyo kamunorumeli-ave ira mutuo am’mwirele babee venango m’mee yongo iliyothene.
13 Mwaira vyevi, munoiri-a ira madhu a Nlungu akale o-okaana basa namwasa wa sanganiko dhinyu dhivelenle nyo waatu. Thitho munoira vyongo vinjinji ninga vyevi.”
14 Angaongile vyevyo, atooitana okoka mwinji waatuo ira udhe wa liye thitho atoawandela ira: “Mundivuruwane nyo mwethene thitho muvwecheche thapulelawee.
15 Kavali yongo iliyothene inokhumela undhe wa mutu novolowa manungonimwee inam’thakali-e mutu. Mbwenye vyongo vinokhuma mwa mutu ndivinothakali-a mutu.”
16 ——
17 Yesu angakhumile va mwinji waatuo, atoodhowa mavoluwa nyumba inango, thitho anamafunjedhee tatooroma m’fuka vyaifwanafwani-oile.
18 Ee-no liye atoafuka ira: “N’nga nanyeene thitho muli o-ozindiyela ninga aliwa? N’nga nyo kamunoidhiwa ira yongo iliyothene ili undhe yavolowa mwa mutu kinom’thakali-a?
19 Vili ee-no namwasa oi kinovirana rimanimwee mbwenye m’mbanimwee thitho inamatatiliwe mutu adhowa chimbuzini.” Namadhu enala Yesu atoonga ira vyodya vyothene pyochena.
20 Liye atoonga thitho ira: “Yongo inokhumela manungoni mwa mutu kinothakali-a mutu.
21 Namwasa oi mirimani mwaatu munokhuma mathuulelo othakala ninga: Vyamararuo* uba, vyopha atu,
22 unyambi,* idyani, irana vyongo vyothakala, inyengo, kalelo lova-a manyadho, bivu, madhu onyoza, dhigweli-a thitho irana vyongo mo-okaana zelu.
23 Vyongo vyothakala vyothene vyevi, vinokhumela rimani mwa mutu thitho vinom’thakali-a.”
24 Yesu angakhumile weo atoodhowa visa vya Tiro na Sidoni. Weo atoodhowa mavolowa nyumba inango thitho kafun’ne ira mutu uliwethene aidhiwe ira liye uli weo. Mbwenye atu tatooviidhiwa.
25 Hora yeniyene, i-yana mwinango oi ana mwanee wa i-yana aoni-iwa nyarwa na zimu othakala, atoovwa vya Yesu thitho atoodha dhakokora vamanyalonivee.
26 I-yanula ali wa Igiriki wa Isirofenisiya. Liye atoovepa Yesu mowelela welela ira akhumi-e iwanda yaoni-a nyarwa mwaneeuo.
27 Mbwenye Yesu atoom’mwandela i-yanuo ira: “Yoroma, vinofuneya ira a-ima taromese rumbala, namwasa oi kai pama tukula yodya ya a-ima va-a visianambwa.”
28 Mbwenye i-yanuo atom’mwakula ira: “Ee mbwiyeni, mbwenye visianambwa vinodya vinyenyeri vinogwi-a a-imao chindo mwa meza.”
29 Yesu angavwide vyevyo, atoom’mwandela i-yanuo ira: “Namwasa oi utoonga vyevi, udhowe iwandayo itokhuma mwa mwanaauo.”
30 Ee-no atoodhowa nyumbaniwee thitho atoofwanya mwaneuo angagonathidhe vatalimbani iwandiyo yangakhumile.
31 Vahora yakhuma Yesu wu isa ya Tiro dhowanga wu bara la Galileya, avirilena wu Sidoni na isa ya Dekapoli.*
32 Weo atu tatoom’dhelana mutu o-ovwa* na a-onga. Aliwa tatoom’vepa ira a-ele dhandhalee vamutuo.
33 Mbwenye liye atoom’tukula mutuo nom’dhowanee vakhundu. Adhaire e-no atoovolocha vibunovyee mabaruni mwa mutuo, thitho angathurele vibunovyee atoosameli-a lumi la mutuo.
34 Adhaire e-no atooing’ana dhulu novuma mwakopolo, moi e-no atoom’mwandela mutuo ira: “Efata,” thapulela ira, “dhuleya.”
35 Adhaire e-no, mabarwee tatoodhuleya thitho urendee o-oonguo watoomalelatu, moi atooroma onga pama.
36 Moi e-no atoawandela ira katiwandele mutu uliwethene vyevyo. Mbwenye Yesu adhaawandele mwakopolo ira katiwandele mutu uliwethene, paevo vasimbwa aliwa vionga maningi.
37 Mwaimbarimbari aliwa tatoodabwa maningi noonga ira: “Liye utoira vyongo vyothene mwapama. Masiki atu ana urenda o-ovwa anaauvwa thitho ana urenda o-oonga anaaonga.”
Madhu achindo
^ Vyevi vinothapulela ira mo-ocheni-iwa movwelana na sanganiko dhiwa.
^ Venango: “masidadi 10.”
^ Venango: “korogodogo.”