Ilembile Mateu 11:1-30
11 Yesu angamari-idhe velela malangi-o wa anamafunjedhee 12, atookhuma weo nodhowa mafunji-a nolaleela masidadi enango.
2 Mbwenye Juwau angali perezo, atoovwa vyongo vyaira Kristu * thitho atooruma anamafunjedhee,
3 dhowa mafuka ira: “N’nga Mesiya unom’dedi-edhela i-yo ngunyo venango nidedi-edhele mwinango?”
4 Vowakula Yesu aawandenle ira: “Mudhowe mumam’mwandele Juwau vyongo vinoona nyo na vinovwa nyo:
5 Atu o-oona anaona, orangala anawenda, avikutwe anaili-iwa thitho atu o-ovwa anauvwa. Atu okwa anavenyathi-iwa thitho atu osauwa analaleeliwa milanyu yapama.
6 Osangalala mbaatu oi katinofwanya yosukwali-a mwamiyo.”
7 Vahora yawelela anamafunjedha a Juwau, Yesu atooroma fuka mwinji waatuo vyokhuza Juwau ira: “N’nga mwadhowile kokolani * maona n’ni? N’nga mwadhowile maona rere otekenyeya na liphevo?
8 Nyo mwadhowile maona n’ni? N’nga mwadhowile maona mutu owara vyowara vyavadhulu? Khabe, voi atu owara vyowara vyavadhulu, anofwanyeya nyumbani dha mamwene.
9 N’nga mwadhowenle n’ni weo venango mwadhowile maona namaongela? Ee, ndinouwandelani ira Juwau ali namaongela mbwenye ali ofuneya maningi kwaranya anamaongela.
10 Malemba anoonga vya liye ira: ‘Kaona! Miyo ndinotumiza rumiwanga ira asogole mausaka-edhela ndhila!’
11 Mwaimbarimbari ndinouwandelani ira vari vaatu othene kavali ndimuwa maningi kwaranya Juwau Namabadiza. Mbwenye mutu oi ngwang’ono mu Umwene wa dhulu ngu ndimuwa kwaranya liye.
12 Romela malambo a Juwau Namabadiza fiyedha va-eeni, atu anadhilimbi-edha mwathindhi ira takaena ngari yomavolowa mu Umwene wa dhulu. Thitho atu anodhilimbi-edha mwathindhi anaikaana.
13 Namwasa oi vyongo vyothene vyalembile anamaongela thitho vili mu ilamulo, vyaonga vyongo vyafuna ireya fiyedha mu hora ya Juwau.
14 Akala munororomela venango khabe, Juwau ndi ‘Eliya aongiwile na anamaongela ira unodha.’
15 Mutu una mabaru avwe.
16 “N’nga mbumba yen’na ndiifwanafwani-edhe naani? Ili ninga a-ima akaathidhe va merekado nokhuwelanga afwiwa anowaredhana aliwa,
17 ira: ‘Natouombelani itoliro, mbwenye nyo kamwainile. Natoonla mokhuwa, mbwenye nyo kamwadhigugudile vamirimani namwasa wa tangaranga.’
18 Mofwanafwana na vyevi, Juwau atoodha thitho kaadya venango umwa, mbwenye atu taongecha ira: ‘Utokaana iwanda.’
19 Utodha Mwana mutu * thitho unaudya na umwa mbwenye atu anoonga ira, ‘Kaonani! Mutu osimbwa udya na odhiveliwana maningi vinyu, xamwali waalimbo khomi-a soko na odawa.’ Mulimwethene, zelu inosimikizela ira njolongomana namwasa wamabasee.” *
20 Adhamale atooroma sumulula atu amasidadi mwairile liye mabasa manjinji akopolo namwasa oi aliwa katachinyuwile. Liye aongile ira:
21 “Soka wa nyo atu awu Korazini, soka wa nyo atu awu Betisaida! Namwasa oi mabasa akopolo aireile mwanyo a-akale ira aireile wu Tiro na wu Sidoni, atu tangachinyuwile, tangawarile masaala, nokaathi vadorani.
22 Mbwenye ndinouwandelani ira va dambo lotongiwa, langiwa winyu unodha kala opha maningi kwaranya wa Tiro na Sidoni.
23 N’nga weyo Kafarnau unodha titimi-iwa fiyedha dhulu? Khabe, mbwenye unodha thithela masiyeni namwasa oi mabasa akopolo aireile wa we a-akale ira aireile wu Sodoma, sidadilo langakanlevove fiyedha va-eeni.
24 Mbwenye ndinouwandelani ira vadambo lotongiwa, langiwa wa Kafarnau unodha kala opha maningi kwaranya wa Sodoma.”
25 Vahora yeniyo Yesu atoonga ira: “Ndinoutitimi-ani nyo Baba vamethoni vaatu othene, Mbwiye wa dhulu na ilambo yavathi, namwasa oi vyongo vyevi mutoalokotedha atu a zelu na ozindiyela vyongo, mbwenye mutovivwei-a wa a-ima ang’ono.
26 Ee Baba, namwasa oi nyo mwatoorumeli-a ira vyongo vyevi viireye.
27 Babanga utondiva-a vyongo vyothene, kavali mutu unom’mwidhiwa pama Mwana kwaranya Baba. Thitho kavali mutu unom’mwidhiwa pama Baba kwaranya Mwana. Na Mwanuo mutu unofuna liye ira am’mwidhiwi-e vya Baba.
28 Mudhe wa miyo nyo mwethene munolaba basa lochenyeli-a na onyemeliwa. E-no ndinodha uvumi-ani.
29 Mutukule goli langa * norumela funji-iwa na miyo, namwasa oi ndili ofwasa na odhiyevi-a thitho munodha vumi-iwa.
30 Namwasa oi goli * langa to-orucha tukula na tolwanga ngo-onyemela.”
Madhu achindo
^ Venango: “vyo-arelavovyee.”
^ Venango: “tolo.” Muone Thapuleliwa wa madhu enango a Bibilyani.
