Ilembile Mateu 12:1-50
-
Yesu ndi “Mbwiye wa Sabudu” (1-8)
-
Lombwana orangala dhadha atooili-iwa (9-14)
-
Rumiwi unodhiveliwana Nlungu (15-21)
-
Viwanda vyatookhumi-iwa na kopolo ya zimu ochena (22-30)
-
Vyodawa vyo-oleveleliwa (31, 32)
-
Muri unoidhiweyana vyova-a vyee (33-37)
-
Izindiyelo ya Yona (38-42)
-
Zimu othakala wawelela (43-45)
-
M’mee Yesu na abalee (46-50)
12 Vahora inango Yesu avirangana mamindani a tirigu vadambo la Sabudu, anamafunjedhee tatookaana ndhala moi tatooroma vulula tirigu ira tadye.
2 Afarisi * tangaoni vyevi tatoom’mwandela ira: “Kaing’ana! Anamafunjedhao tanoira vyongo vyo-ofwanelela irana vadambo la Sabudu.”
3 Mbwenye liye atoawakula ira: “N’nga kamwalerile vyairile Davide vambo-i na alombwana ana liye tangana ndhala?
4 Liye atoovolowa m’mba mwa Nlungu noudya mapau a asembe oi liye vambo-i na alombwana ana liye, katarumeli-iwa udya movwelana na malamulo mbwenye arumeli-iwa mbaasembe baa-i.
5 N’nga kamwalerile mu Ilamulo ira alimbo velela sembe tanoolaba basa vadambo la Sabudu aliwa kalave o-odawa?
6 Mbwenye ndinouwandelani ira mutu mwinango ofuneya maningi kwaranya kachisi uli vano.
7 Mbwenye akale ira mutovwechecha thapulela wa madhu oi, ‘Ndinofuna tangaranga a-kala sembe,’ kamwatongenga atu o-odawa.
8 Namwasa oi Mwana mutu * ndi Mbwiye wa dambo la Sabudu.”
9 Angakhumile weo, atoodhowa mavolowa musinagoga mwiwa.
10 Mwemo mwatookala mutu orangala dhandha. Ee-no aliwa tatoom’fuka ira, “N’nga pyorumeleya ili-a mutu vadambo la Sabudu?” Ifunelwiwa yali yoi tam’fwanyele selu om’nukedhela.
11 Mbwenye liye atoawakhula ira: “N’nga mbaani wa nyo oi utokaana libila limbo-i, amala libilalo gwela lindini vadambo la Sabudu, liye a-likhumi-amo?
12 Ee-no mutu ngofuneya maningi kwaranya libila! Ee pyorumeleya irana yongo yapama vadambo la Sabudu.”
13 Moi e-no atoom’mwandela mutuo ira: “Thapula dhandhalaa.” Liye atoothapuladi thitho latookala pama ninga n’nangolo.
14 Mbwenye Afarisi * tatookhumela vandhe mavwelana ira tam’phe.
15 Yesu angaidhi vyevi, atookhumavo vevo. Atu anjinji tatoom’ara thitho liye atoaili-a othene enao.
16 Mbwenye atoawandela mwakopolo ira ta-am’monge.
17 Liye atoira vyevi ira vyaongile Nlungu dhela mwa namaongela Esaya vikwakwaneli-edhiwe. Liye aongile ira:
18 “Kaonani! Rumiwanga um’sakunle miyo, ndinom’dhiveliwana thitho unondisangalali-a maningi. Ndinodha e-la zimwanga va liye thitho unodha thonyi-edha pama longomano * laimbarimbari waatu amitundu inango.
19 Liye kanodha kangana na mutu venango khuwa thitho kavali unofuna dhavwa madhwee ndhila dhilukhulu.
20 Rere othweya kanodha uundha thitho go-i wa nyale otuwela wichi kanodha utimi-a fiyedha angadhi-idhe longomano. *
21 Mwaimbarimbari dhela mudhinalee mitundu yaatu inodha dedi-edha vyongo vyapama.”
22 Moi e-no tatoom’dhelana mutu aoni-iwa nyarwa na iwanda oi kaoona thitho kaaonga. Mbwenye liye atoom’mwili-a moi mutu o-oonguwo atooroma onga thitho ona.
23 Vingaireile e-no mwinji waatuo watoodabwa maningi thitho watooroma onga ira: “N’nga wen’na kai Mwana Davide * ule?”
24 Afarisi * tangavwide vyevyo tatoonga ira: “Wen’na kai ira unokhumi-a viwanda nakopolodhee khabe, mbwenye na kopolo dha Belizebule * namatonga wa viwanda.”
25 Yesu angaidhi mathuulelwiwa, liye atoonga ira: “Umwene uliwethene ogaweya unomala thitho sidadi venango nyumba iliyothene yogaweya inogwa.
26 Mofwanafwana na vyevi akala ira Satana * unokhumi-a Satana * fwee, kuongela ira ngogawaneya. Thitho umwenee unomala.
27 Thitho akala ndinokhumi-a viwanda na kopolo dha Belizebule, * n’nga anama-arelinyu tanovikhumi-a na kopolo dhaani? Ngumwasiwa anama-arelinyuao tanodha utongani ira muli odawa.
28 Mbwenye akala miyo ndinokhumi-a viwanda na kopolo ya zimu wa Nlungu, kuongela ira Umwene wa Nlungu utoufiyedhelani morurumucha.
29 Venango mutu unavolowe a-vi m’mba mwa mutu wakopolo notukula vyongo vyee akala ira voroma kam’mangile? Aira e-no panaode liye tukula vyongo m’mbamo.
30 Mutu uliwethene o-okala ikhundu yanga, unoruni-ana na miyo thitho mutu o-olaba basa logumanya atu vambo-i na miyo, unoabalalecha.
31 “Vamwasa wen’na, ndinouwandelani ira atu anodha leveleliwa yodawa ya tundu uliwethene na madhu othene onyoza, mbwenye mutu unonyoza zimu kanodha leveleliwa.
32 Mofwanafwani-a mutu uliwethene unoonga madhu onyoza Mwana mutu * unodha leveleliwa. Mbwenye mutu uliwethene unoonga madhu onyoza zimu ochena, * kanodha leveleliwa muhora yen’na venango hora inodhiyo.
33 “Akala nyo muli muri wapama vyova-a vinyu vinodha kala vyapama. Mbwenye akala nyo muli muri othakala vyova-a vinyu thitho vinodha kala vyothakala, namwasa oi muri unoidhiweya na vyova-avyee.
34 Nyo ana nyowa, n’nga munaonge a-vi vyongo vyapama mungali atu othakala? Namwasa oi lomo unoonga vidhanle rimani.
35 Mutu wapama unoonga vyongo vyapama namwasa oi rimanimwee mudhanle vyongo vyapama, thitho mutu othakala unoonga vyongo vyothakala namwasa oi rimanimwee mudhanle vyongo vyothakala.
36 Mbwenye ndinouwandelani ira vadambo lotongiwa, atu anodha wakula selu namwasa wa madhu othene o-okhaana basa anoonga aliwa.
37 Namwasa oi akala unoonga madhu apama unodha tongiwa ira uli olongomana thitho akala unoonga madhu othakala unodha tongiwa ira uli odawa.”
38 Moi e-no alembi na Afarisi * enango tatoom’vepa ira: “Namafunji-a ninofuna munioni-e izindiyelo.”
39 Vowakula liye atooawandela ira: “Mbumba yothakala thitho yo-ovwela inofunechecha ingaoni izindiyelo. * Mbwenye katinodha oni-iwa izindiyelo * iliyothene khumi-avo izindiyelo * ya namaongela Yona.
40 Namwasa oi mofwanafwana na Yona oi amadhi malambo mararu nathana nama-iyu m’mbani mwa somba ilukhulu, Mwana mutu * thitho unodha kala malambo mararu nathana nama-iyu masiyeni.
41 Vadambo lotongiwa, atu awu Ninive tanodha venyathi vambo-i na mbumbila, mbwenye a Ninive tanodha runi-a mbumbiyo namwasa oi aliwa tatoochinyuwa * tangavwide milanyu yalaleela Yona. Mbwenye va-eeni mutu okwaranya Yona uli vano.
42 Mwene wa i-yana wau suli, unodha venyathi-iwa moukwa vambo-i na mbumbiyo thitho mwene wa i-yanuo unodha runi-a mbumbiyo namwasa oi mwene wa i-yanuwo atoodha khumela magomelo a ilambo yavathi dhavuruwana zelu dha Solomu. Mbwenye va-eeni mutu okwaranya Solomu uli vano.
43 “Zimu * othakala wakhuma mwamutu unodhowa masaka limburo lovuma. Mbwenye wakonda a-lifwanya,
44 aliwa unoonga ira, ‘Ndinowelela nyumbaniwanga wali miyo ule.’ Wafiya unofwanya ira kamunokala mutu uliwethene mbwenye mutosaka-edhiwa pama nobalei-iwa.
45 Waira e-no unodhowa matukula mizimu inango 7 yothakala maningi kwaranya wenuo thitho yavolowa warimo inokaathi mwemo. Mbwenye vyo-arelavovyee, vyoira vya mutuo vinokala vyothakala maningi kwaranya voroma. Pumwemo thitho munofuna dhakalela mbumba yothakalila.”
46 Vyaonga liye na mwinji waatuwo watoodha m’mee naabalee. Aliwa taimenle vandhe thitho tafuna onga na liye.
47 Ee-no mutu mwinango atoom’mwandela ira: “M’minyu naabalinyu tali vandheva, thitho tanofuna onga na nyo.”
48 Vowakula liye atom’mwandela mutu am’mongana liyeo ira: “N’nga m’manga naabalanga mbaani?”
49 Adhamale atoothapula dhandhalee thonya anamafunjedhee, noonga ira: “Kaona! M’manga naabalanga mbaala!
50 Namwasa oi mutu uliwethene unoirana vinofuna Babanga wadhulu, wenuo ngu balanga, rongolanga, na m’manga.”
Madhu achindo
^ “Belizebule ndi dhina n’nango la Satana.” Muone Thapuleliwa wa madhu enango a Bibilyani.
^ “Belizebule ndi dhina n’nango la Satana.” Muone Thapuleliwa wa madhu enango a Bibilyani.
