Ilembile Mateu 22:1-46
22 Yesu atoawandela thitho vifwanafwani-o vinango ira:
2 “Umwene wa dhulu ninooda ufwanafwani-edha na mwene yasaka-edhele pwando lothela mwanee wa lombwana.
3 Moi e-no atooruma adhaaree ira tamathuuche atu aitaniwile va pwando la kazamento, mbwenye atwao katafunile udha.
4 Adhamale atooruma thitho adhaari enango ira, ‘Mumawandele atu aitaniwilao ira: “Miyo nditosaka-edha yodya yanathana, ng’ombe dhanga dhalombwana, na nyama dhanga dhoruva dhitophiwa thitho vyongo vyothene vitomala saka-edhiwa. Mudhe va pwando la kazamento.”’
5 Mbwenye atwao tatoopwaza vyawandeliwile aliwavyo nokhumavo. M’mbo-i ade mindawee thitho mwinango ade maguli-a malondee.
6 Mbwenye enango tatoo-inda adhaari amwenao thitho tatoakhoma noapha.
7 “Adhaire e-no mwenuo atoothakaleliwa maningi thitho atootumiza anyakondwee dhowa mapha atu taphide adhaareao noka-a sidadi liwa.
8 Moi e-no atoawandela adhaaree a-adhale ira, ‘Pwando la kazamento litomala saka-edhiwa, mbwenye atu taitaniwilale tali o-ofwanelela.
9 Ee-no mudhowe ndhila dhinaaundhe wa sidadi thitho mutu uliwethene unofuna nyo m’fwanya, mum’mwitane ira adhe va pwando lakazamentoli.’
10 Moi ee-no adhaarao tatoodhowa ndhilamo thitho tatooitana atu othene afwaidhe aliwa, othakala naapamene. Thitho sala lodyelamo pwando lakazamento latoodhala na atu taitaniwileale.
11 “Mwenule angavolowile maona alendwao, atoona mutu mwinango oi kaawarile yowara ya kazamento.
12 Ee-no mwenuo atoom’fuka ira, ‘Andimuwa! N’nga viodeile a-vi volowa muno mwa-anawareve yowara ya kazamento?’ Mbwenye liye kawakunle yongo ilioyothene.
13 Adhamale mwenuo atoawandela anamalabee ira, ‘Mum’mange mandha na mendo thitho mum’ponyedhe undhe isini. Amalenga weo nothakuna meno.’
14 “Namwasa oi oitaniwa mbaatu anjinji, mbwenye osakuliwa mbolengeseya.”
15 Adhamale Afarisi * tatoodhowa vakhundu matapanya ira tam’fwanyele myasa yom’nukedhela va vyongo vyaonge liye.
16 Ee-no Afarisi * tatooruma anamafunjedhiwa vambo-i naatu ta-arela Herodi * thitho aliwa tatoonga ira: “Namafunji-a, nitoidhiwa ira nyo munoonga imbarimbari nofunji-a ndhila ya Nlungu waimbarimbari thitho kamunoira vyongo vofuna sangalali-a mutu, namwasa oi kamunoing’ana maoneelo aatu.
17 Kaniwandeleni, munothuulela a-vi? N’nga pyorumeleya velela soko wa Kaisara venango khabe?”
18 Mbwenye Yesu atoidhiwa thakala wa mirimiwa thitho atoonga ira: “Nyo atu ainyengo! Munondiwesedhela n’ni?
19 Mundioni-e kobiri ya soko.” Aliwa tatoom’dhelana kobiri imbo-i ya denario. *
20 Moi e-no liye atoafuka ira: “N’nga kove na madhu ali evala pyaani?”
21 Aliwa tatoowakula ira: “Pya Kaisara.” Ee-no liye atoawandela ira: “Akala ndi e-no, muvelele wa Kaisara vyongo vya Kaisara, mbwenye vya Nlungu muvelele wa Nlungu.”
22 Tangavwide vyevi tatoodabwa thitho tatookhumavo nom’iyachi vevo.
23 Va dambo lelo Asaduki * oi taongecha ira atu okwa katinodha venyathi-iwa, tatoodha nom’fuka ira:
24 “Namafunji-a, Mose aongilenga ira: ‘Akala lombwana utokwa a-anabale a-ima, balee unofwanela m’thela i-yana wamakweluo nom’balela balee a-ima.’
25 Vatookala alombwana 7 muubalinimwiwa. Oroma atoothela adhamale liye wukwa. Mbwenye voi kaana a-ima, i-yanuo atootheliwa na balee lombwanuo.
26 Vyatoireya saasawa wanambili, udha wanararu, fiyedha othene 7.
27 Magomelowee, i-yanule thitho atookwa.
28 N’nga veva atu okwa tadha venyathi-iwa, i-yanula unodha kala waani? Voi othenene 7 tatoomala m’thela.”
29 Mbwenye Yesu atoawakula ira: “Munaadawi-a namwasa oi kamuidhi Malemba venango kopolo ya Nlungu.
30 Namwasa oi atu okwa tadhavenyathi-iwa, alombwana katinodha thela, thitho a-iyana katinodha theliwa mbwenye othenene tanodha kala ninga angelo adhulu.
31 Onga vyovenyathi-iwa waalimbo wukwa, n’nga kamwalerile vyaongile Nlungu wa nyo ira,
32 ‘Miyo ndili Nlungu wa Abrahamu, Nlungu wa Izaki na Nlungu wa Yakobo’? Liye ngu Nlungu waatu aingumi, a-kala waatu okwa.”
33 Mwinji waatuo wangavwide vyevyo, watoodabwa na vyafunji-a liye.
34 Afarisi * tangavwide ira Yesu atoagomi-a luso Asaduki, * aliwa tatoogumaneela kala gulu limbo-i.
35 Thitho m’mbo-i mwaaliwa oi anooidhiwa Ilamulo, vofuna m’mwesedha atoom’fuka ira:
36 “Namafunji-a, N’nga Lamulo nlukhulu maningi muilamulo tivi?”
37 Yesu atoom’mwakula ira: ‘“Mum’dhiveliwengana Yohova * Nlungwinyu na riminyu othene, ingumiinyu yothene na mathuulelwinyu othene.’
38 Leli tilamulo nlukhulu maningi thitho loroma.
39 Lanambili lofwanafwana na loroma toi: ‘Um’dhiveliwengana fwaa ninga munovidhiveliwana we wekhene.’
40 Ilamulo yothene ikhumenle va malamulo menlala, thangani-avo vyalembile anamaongela.”
41 Afarisale tangagumaneele vambo-i, Yesu atoafuka ira:
42 “Munothuulela a-vi vya Kristu? * N’nga liye ngumwanaani?” Aliwa tatoowakula ira: “Ndi mwana Davide.” *
43 Liye atoafuka thitho ira: “N’nga mwasiwa ngwan’ni movudheleliwa na zimu, Davide atoom’romola ira Mbwiye, vaongile liye ira,
44 ‘Yohova * atoom’mwandela Mbwiyanga ira: “Ukale udhandha langa lodyana fiyedha ndidhaa-ela amwidanaa othene vathi va manyalwaa”’?
45 N’nga akala Davide unom’romola ira Mbwiye, vinoodeya a-vi ira akale mwanee?”
46 Kavali nam’mbo-ene aodile m’mwakula thitho romela dambo lelo, kavalive alimbile rima m’fukanga vyofuka.
