Mayirelo a Arumiwi 1:1-26
1 Teofilo mumwasa oromule, ndatoolemba vyongo vyothene vyairile Yesu na vyafunji-idhe liye,
2 fiyedha vadambo latukuliwile liye dhowa dhulu, angavelenle malangi-o dhela mwa zimu ochena waarumiwee aasakunle liye.
3 Vasogolo vooni-iwa nyarwa, liye atooneela angali waingumi waarumiweao vo-indi-edha basa maumboni manjinji osikimizela. Aliwa tatoom’mona wa malambo 40 thitho liye anoawandela vya Umwene wa Nlungu.
4 Vahora yagumanyeile liye vambo-i na anamafunjedhao, atoava-a malangi-o oi: “Kamukhume mu Yerusalemu, mbwenye mudedi-edhele vyalanyedhile Baba, ninga mwauwandenleni miyo.
5 Namwasa oi Juwau abadiza na ma-inje, mbwenye va-anavire malambo manjinji nyo munodha badiziwa na zimu ochena.”
6 Ee-no tangagumanyeile, tatoom’fuka ira: “Mbwiye, n’nga munoweli-edha umwene wa Israeli va ee-ni?”
7 Liye atoawakhula ira: “Kamunofuneela idhiwa hora venango malambo asakunle Baba muutongee.
8 Mbwenye mwadhawachela zimu ochena, munodha kaana kopolo. Thitho munodha kala mboni dhanga mu Yerusalemu, wu Yudeya othene, wu Samaria fiyedha khomoni wa ilambo yavathi.
9 Angamadhi onga vyevi, atootukuliwa dhowa dhulu aliwa taonanga, thitho rambo watoom’khunela moi kataodileve m’mona.
10 Vahora yaing’anechecha aliwa dhulu liye agwelanga, mo-odedi-edhela vatooneela alombwana ambili owara vyowara vyochena thitho tatooimela vakhundu viwa.
11 Alombwana ambilao tatoafuka ira: “Nyo alombwana awu Galileya, mwasiwa ngwan’ni munaaing’anangave dhulu? Yesu utukuliwile varivinyu nodhowa dhulula, unodha dha mundhila yofwanafwana na yam’moni nyo adhowanga dhulu.”
12 Adhamale tatoowelela wu Yerusalemu, khumela Mwango wa Maolivi. Mwango wen’na wali vaduzi na Yerusalemu, wen’na wali ulendo wa kilometru imbo-i.*
13 Tangafiile sidadimo tatoovolowa kwartu ya dhulu, mwakalecha aliwa. Mwemo mwatookala Pedru, Juwau, Yakobo, Andreya, Filipi, Tomasi, Bartolumeu, Mateu, Yakobo mwana Alfeu, Simoni wathindhule na Yudasi mwana Yakobo.
14 Movwelana, othene enala tanoolimbela lobela vambo-i na Mariya m’mee Yesu, a-iyana enango naabalee Yesu.
15 Malambo enao, Pedru atooimela vari vaabalao, (mwinji wethene wenuo wali waatu owandamela 120) noonga ira:
16 “Abalanga, vyali vyofuneela ira lemba laongile Davide mokami-iwa na zimu ochena, likwakwaneli-edhiwe. Lembali ndi lokhuza Yudasi asogolele atu oma-inda Yesu.
17 Liye ali fwi-u, thitho alaba vambo-i na i-yo.
18 (Mutu wen’na atoogula munda na kobiri yatambili-iwile liye namwasa olaba basa lothakala. Liye atoogwa na muru nophwedheya ingulu thitho marumbwee othene atookhuma vandhe.
19 Vyevi vyatooidhiweya waatu othene awu Yerusalemu, moi munda wenuo tatouva-a dhina la iongelwiwa loi Akelidama, thapulela ira “Munda wa Sangiri.”)
20 Mu bukhu la Masalimo tatoolembamo ira, ‘Limburolee likale dembe, thitho kavafwanyeye mutu uliwethene okaathimo’ thitho ira, ‘Izoyee ninga namaing’anela iva-iwe mutu mwinango.’
21 Ee-no pyofuneya ira avoloweliwe limburo na mutu m’mbo-i waatu awendecha vambo-i na i-yo hora yothene yairecha Mbwiye Yesu vyongo vyo-iyana i-yana vari vi-u.
22 Mutwee akale awendecha vambo-i na i-yo romela vabadiziwile Yesu na Juwau, dhafiya dambo latukuliwile Yesu dhowa dhulu. Thitho akale mboni ninga i-yo vamwasa ovenyathi-iwa wa Yesu muukwa.”
23 Ee-no vatoosakhuliwa atu ambili, Yosefi aitaniwa Barsaba oi anoidhiweya thitho ira Justo na Matiyasi.
24 Adhamale atoolobela ira: “Nyo Yohova,* munoidhiwa mirima ya atu othene, munithonyi-edhe mutu um’sakunle nyo, vaatu ambilala
25 ira akale rumiwi nolaba basa la-iidhe Yudasi dhowangavyee.”
26 Adhamale atooira vyolotela thitho vyolotelavyo vyatoosakula Matiyasi. Ee-no liye atoom’thangani-a vaarumiwi 11 ale.
Madhu achindo
^ Mundhila inango: “ulendo warumeli-iwa Ayunda wenda va dambo la Sabudu.”
