Mayirelo a Arumiwi 27:1-44
27 Nangarumeli-iwile dhowa wu Italiya na mwadiya, Paulo na anyaperezo enango tatooveleliwa mandhani mwa namasogolela waanyakhondo dhinalee Juliyo wa mugulu laanyakhondo a Agustu.
2 Natoogwela mwadiya wa Adiramitiyo oi wa-adhi vang’ono venyathi ulendo odhowa wu magombe a khundu mwa bara wu provisia ya Aziya. Nidhamale natoovenyathi vambo-i na Aristarku oi ali wau Masedoniya sidadi la Atezalonika.
3 Bebeinimwee natoofiya wu Sidoni, thitho Juliyo atoom’riyela rima Paulo moi atoom’rumeli-a ira adhowe waafwee ira tamam’samalele.
4 Ningagwenle okoka mwadiya khumela weo, natoowenda khundu mwa isuwa ya Kupuru yeyo yanibarela wu lipevo lelo lakhuma wadhowa i-yo.
5 Natoowenda vabara mowerewera ilambo ya Silisiya na Pafiliya moi natoofiya va gombe la Mira, wu Lisiya.
6 Nidhafiye weo namasogolela waanyakhondo atoofwanya mwadiya wakhumela wu Alexandriya oi wadhowa wu Italiya, thitho atoonigweli-a mwemo.
7 Ee-no natoowenda mwavang’ono vang’ono wa malambo mangaasi nidhamale natoofiya morucheya wu Kinido namwasa wa lipevo ladha sogolo wi-u. I-yo navirilena wu Salimone ira isuwa ya Kereti inibarelenga ulipevolo.
8 Ningawendile morucheya khundu mwa isuwa yei, natoofiya valimburo n’nango loitaniwa Magombe Apama, loi lali vaduzi na sidadi la Laseya.
9 Moi vatoovira malambo manjinji, thitho wenda vabara wali oophi-a namwasa oi hora yosala udya wa dambo loleveleliwa vyodawa, wali ungavirile. Ee-no Paulo atoava-a malangi-o.
10 Liye atoawandela ira: “Miyo ndinoona ira ulendula nauroma va e-ni ninonongi-a vyongo vinjinji. Ninonongi-a mitolo, mwadiya, thangani-avo thitho navingumi vi-u.”
11 Mbwenye namasogolela waanyakhondo atoovwela alimbo wendi-a mwadiya na mwinyaa mwadiyuo malo movwela vyaongile Paulo.
12 Voi gombelo kalali lapama kalavo hora yodidila, atu anjinji tatoovwelana ira takhumevo. Aliwa tafuna ona akala pyoodeya mafiya wu Fenikisi ira tamakale weo vahorila. Fenikisi lali gombe* la Akereti ikhundu ya makhumelo a dhuwa awu norte na ikhundu ya makhumelo adhuwa awu suli.
13 Lipevo lakhumela wu suli lingaromile mwavang’ono navang’ono, aliwa tathuulela ira vyafuna aliwa vinoodeya. Ee-no aliwa tatoogweli-a nangula noroma wenda chereerani mwa isuwa ya Akereti.
14 Mbwenye va-anavire hora lipevo loitaniwa Euriakilo* latooroma vira.
15 Voi mwadiya wanoolimbanana lipevo lakopolo thitho kanaoda ulinyali-a dhowa wakhumela lipevolo, natooimwanana thitho mwadiya watooroma welela nduli.
16 Nidhamale natooroma wenda chereerani mwa isuwa inango ing’ono yoitaniwa Kauda yeyo yanibarela wu lipevo. Mbwenye nanooimwanana chapa mwadiya ung’ono wamburuliwa na mwadiya ulukhuluo.
17 Moi e-no tatoogweli-a mwadiya ung’onuo mu mwadiya ulukhuluo noumanga ira ulimbe. Mbwenye voova ira mwadiyuo unooda mbiyela sevani wu Sirti, aliwa tatoothathula migo-i yamangiwa na nguwo ya mwadiyuo ira undunyiwenga na lipevo.
18 Mbwenye voi lipevo lukhulu lanoonindunya mwakopolo, bebeinimwe atu tatooroma ponyedha mitolo mwikho ira mwadiyuo ululuveliwe.
19 Dambo laneraru, tatootatila migo-i yogweli-ana nguo ya mwadiyuo.
20 Ningaoni ira dhuwa na nyenyedi kavinooneya wa malambo manjinji thitho dhowanave ndunyiwa na lipevo la kopolo, natooroma kaikela akala ninovulumuwa.
21 Atwao tangamadhi malambo manjinji a-dya yongo, Paulo atooimela variviwa noonga ira: “Nyoo, mwa-avwele vyaonga miyovile i-yo a-khuma wu Keretiule kanaone nyarwa e-ni thitho mitolwi-u kiyanongeye.
22 Mbwenye kamukhumbanye namwasa oi kavali unofuna wukwa, mbwenye mwadiyula unonongeya.
23 Ma-iyu ngelo wa Nlungu unom’labela miyo urumiwi wavakhundu, atooimela duzi na miyo
24 noonga ira: “Kuove Paulo. Unofwanela maoneela wa Kaisara. Thitho uidhiwe ira namwasa wa we, Nlungu unovulumucha atu othene ali vambo-i na we vaulendula.’
25 Ee-no mulimbe rima, namwasa oi ndinororomela ira Nlungu unokwakwaneli-edha vindiwandenle liye.
26 Mbwenye mwadii-ula unonongeya duzi na isuwa inango.”
27 Nama-iyu a dambo la 14, lipevo latooroma nindunyela wu na wu vabara ya Adriya. Moi e-no vari va nama-iyu, alimbo wendi-a mwadiyuo tatooroma thuulela ira tanaakwivela rundani.
28 Ee-no tatooweza di-a wa baramo tongofwanya ira ali mametru 36. Tangawendile vang’ono tatooweza okoka tongofwanya ira ali mametru 27.
29 Mbwenye voova ira ninodima mabwe, tatoothithi-a anangula 4 nduli wa mwadiyuo thitho tanoofunechecha ira undhe ungachide.
30 Ee-no alimbo wendi-a mwadiyuo tanoofuna tawamo. Moi ee-no tatoothithi-a mwadiya ung’onule kalanga ninga funa tadhowe sogolo mathithi-a anangula.
31 Paulo atoom’mwandela namasogolela wa anyakondo na anyakhondwao ira: “Atwala takhumamo mwadiyanimuno, kamunovulumuwa.”
32 Adhamale anyakhondwao tatoophadha migo-i ya mwadiya ung’onuo nou-iya ira udhowenga.
33 Undhe unga-adhi vang’ono ira uche, Paulo atoowandela atu othene ira tadye. Liye aongile ira: “Va e-ni vatovira malambo 14 mudedi-edhanga mungali osukwala thitho kamudyide iliyothene.
34 Va-eni ndinaulimbi-ani ira mudye ira vyongo viuwendeleni pama. Masiki sisi limbo-i la murunimwinyu kalinodha nongeya.”*
35 Angaongile vyevi atootukula pau. Adhamale atoolobela wa Nlungu vari vaatu othene nogawa pawiyo thitho liye atooroma udya.
36 Adhamale, atu othene tatoolimba rima noroma udya.
37 Mwadiyanimo nalimo atu okwakwana 276.
38 Othene tangamadhi udya norumbala, tatootatilela tirigu baramo ira mwadiyuo ululuveliwe.
39 Undhe ungachide, kataidhi wali aliwa, mbwenye tatoona gombe n’nango lauseva thitho tanoofunechecha ira akala pyoodeya tamaimeli-e mwadiya vevo.
40 Ee-no tatoophadha migo-i ya nangula noigwi-edha bara. Tatoothathula thitho migo-i yomangana visimatabwa vyochapana mwadiya. Tangagweli-edhe isinguwo ya sogolo wa mwadiya, tatooroma dhowa gombe.
41 Adhamale tatoofiya va kamba la useva yoi yali mwikomo. Moi sogolo wa mwadiyuo watoombiyela usevanimo thitho mabimbi a kopolo tatooroma dima nduli wa mwadiyuo moi watooroma thweya.
42 Vidhaire e-no anyakhondo tatoothuulela vyopha anyaperezo othene ira va-afwanyeye mutu oliwethene o-ambelelela notawa.
43 Mbwenye namasogolela wa anyakhondo anoofunechecha ira Paulo tama’fiyenee pama, ee-no atoakondi-a vyafuna aliwa iravyo. Mbwenye atoowandela alimbo idhiwa a-mbelela ira talupele baramo naifunelo yoi takale oroma fiya rundani.
44 Atoowandela thitho atu enango othene ira tairena vimbo-ive, enango tagwele vamatabwani thitho enango tagwele vamapedaso a mwadiyuo. Adhaire e-no othene tatoofiya rundani tangali pama.
Madhu achindo
^ Venango: “ligombe.”
^ Lipevo leli lali lokhumela wu ikhundu ya makhumelo adhuwa au suli.
^ Venango: “kavali unofuna wukwa.”
