Mayirelo a Arumiwi 5:1-42
5 Lombwana mwinango dhinalee Ananiya na i-yanee Safira, tatooguli-a mundiwa.
2 Mbwenye liye atoovungulavo kobiri dhinango nodhilokota thitho i-yanee atooviidhiwa vyevyo. Moi e-no atootukula kobiri dha-adhidho madhivelela waarumiwi.
3 Mbwenye Pedru atoom’fuka ira: “Ananiya, n’nga mwasiwa ngwan’ni Satana utoulimbi-a rima ira unami-e zimu ochena volokota kobiri dhinango dha munda?
4 N’nga munduo kwaliwaa wa-anauguli-e? Thitho wangamadhi uguli-a kobiridho kwaadhiirena yongo iliyothene yafunawee? N’nga mwasiwa ngwan’ni watoothuulela irana vyongo vyevi? Veva kunami-idhe atu, mbwenye unami-idhe Nlungu.”
5 Ananiya angavwide vyevi atoogwa vathi noukwa. Thitho atu othene tangavwide vyevi tatoova maningi.
6 Moi e-no azombwe tatoodha dham’bilinga na nguwo thitho tatoodhowa mam’lokota.
7 Vangavirile mahora mararu i-yanee atoovolowa thitho kaaidhiwa vyaireile.
8 Moi e-no Pedru atoom’fuka ira: “Kandiwandele, n’nga kobiri dhothene dhiguli-idhe nyo mundinyu tidhedhi?” Liye atoowakhula ira: “Ee, ndidhedho.”
9 Adhamale Pedru atoom’fuka ira: “Mwasiwa ngwan’ni nyo ambilene mwatoovwelana ira munami-e zimu wa Yohova?* Kaing’ana, atu atukunle man’naa dhowa mam’lokota ali valango. Naweene thitho anoutukula.”
10 Vahora yeniyene safira atoogwa vaduzi na manyalo a Pedru noukwa. Vahora yavolowa azombwe m’mbamo tafwaidhe angamadhi wukwa. Ee-no tatoom’tukula dhowa mam’lokota duzi naman’nee.
11 Vidhaire e-no atu afunjedha madhu a Nlungu na atu enango othene tangavwide vyevyo tatoova maningi.
12 Arumiwao tanoodhowanave ira vizindiyelo na vyodabwi-a vinjinji vari vaatu. Thitho atu othene ororomeleya tanoogumanyeya valimburo laitaniwa khonde la Solomu.
13 Onga mwaimbarimbari kavali mutu uliwethene alimbile rima vwelana na anamafunjedhao, mbwenye atu tanoatitimi-a maningi.
14 Thitho numero yaatu aroromela Mbwiye yanoodhowanave wenjedheleya, namwasa oi alombwana na a-iyana anjinji tatookala anamafunjedha.
15 Atwao tanoodhana atu abulela noagoni-a khundu mwa ndhila vamakama mang’ono na maphaa ira Pedru aviranga, ruthee baa-i ufiyedhele alimbo bulelao.
16 Thitho atu anjinji okhumela masidadi orungunuwa Yerusalemu tanoodhowana weo atu abulela na aoni-iwa nyarwa na viwanda. Moi othene enao anooili-iwa.
17 Mbwenye ndimuwa wa sembe naatu othene ali vambo-i na liye oi tali a gulu la Asaduki, tatookaana bivu. Ee-no aliwa tatoovenyathi
18 noamanga arumiwao thitho tatoafungela perezo.
19 Mbwenye nama-iyu, ngelo wa Yohova atoodhula viseo vya perezwiyo noakhumi-a thitho atoawandela ira:
20 “Mudhowe kachisini thitho mumadhowenave awandela atu vyokuza ingumi yo-omala inodha.”
21 Bebeinimwee namaebe-i maningi tatoovolowa kachisini noroma funji-a.
Mbwenye ndimuwa wa sembe na atu othene ali vambo-i naliye tatoogumanyei-a anamatonga othene a Tribunale nlukhulu la Ayuda na andimuwa othene a Israeli. Adhamale tatooruma anamaing’anela ira tamatukule arumiwale perezoniule noadhana.
22 Ee-no anamaing’anelao tangafiile, kataafwaidhemo perezonimo. Ee-no tatoowelela dhowa maonga vyevi.
23 Aliwa tatoonga ira: “Nifwaidhe perezo ingali yofungiwa pama thitho anamaing’anela tangaimenle milangoni. Mbwenye ningadhunle kanifwaidhemo mutu uliwethene.”
24 Namaing’anela kachisi na ndimuwa wa sembe tangavwide vyevi, tatoogomiwa luso namwasa oi kataidhiwa ira vinokala a-vi.
25 Mbwenye vatoofiya mutu mwinango noawandela ira: “Nyo! Alombwana aafungenle nyo perezo ale tali kachisini thitho tanaafunji-a atu.”
26 Vidhaire e-no namaing’anela kachisi na anamaing’anelee tatoovenyathi dhowa maatukula. Mbwenye kataatukunle mwauwalanga voova ponyedhiwa mabwe naatu.
27 Ee-no atoadhana noaimeli-a mu sala la Tribunale nlukhulu la Ayuda. Thitho ndimuwa wa sembe atoonga
28 ira: “Natouwandelani mwakopolo ira kamudhafunji-eve okoka mudhina leli. Mbwenye kaing’anangani! Mutodhali-a Yerusalemu wethene na makhundo anofunji-a nyo thitho mutosimikizela rima ira i-yo nikaena landu wa sangiri ya mutu wen’na.”
29 Pedru naarumiwi enango tatoowakhula ira: “I-yo ninofwanela vwela Nlungu ninga namatonga a-kala atu.
30 Nlungu wa anamabali-u atoom’venyathi-a Yesu wam’phide nyo voira m’thomeya vaimurini.
31 Thitho Nlungu atoom’titimi-a vom-ela wu dhandhalee lodyana ninga rumiwi nlukhulu na namavulumucha. Atooirana vyevi ira Aisraeli tachinyuwe thitho ira vyodawaviwa vileveleliwe.
32 Thitho i-yo nili amboni a vyongo vyevi, saasawa thitho na zimu ochena wavelenle Nlungu waatu anom’vwela ninga namatonga.”
33 Tangavwide vyevi tatoothakaleliwa maningi moi tanoofuna apha.
34 Mbwenye Farisi mwinango dhinalee Gamaliyeli atooimela mu Tribunale nlukhulu la Ayuda. Liye ali namafunji-a wa Ilamulo thitho anoolemeziwa na atu othene. Moi e-no atoawandela ira tarome akhumi-a vang’ono arumiwao.
35 Adhamale atoawandela ira: “Nyo Aisraeli, muire polepole na vinofuna nyo airana atwala.
36 Namwasa oi malambo andulimo, waatookala mutu mwinango aitaniwa Teuda, oi atoodhivwei-a maningi thitho atu owandamela 400 tatoovolowa gulunimwee. Mbwenye atoophiwa thitho atu othene tam-arela tatoobalaleya a-fwanyeyave.
37 Adhamale watoodha Yudasi wau Galileya malambo alembeliwa atu. Atu anjinji tatookopeya nom-arela mbwenye naliyene thitho atookwa. Moi atu othene tam’arela tatoobalaleya.
38 Ee-no vyongo vafiile aliwava, ndinouwandelani ira kaamwalimbanena atwala mwaa-iye viwa. Namwasa oi akala ndiifunelwiwa venango basali linokhumela waatu, kalinodhowa undendai.
39 Mbwenye akala linokhumela wa Nlungu kamunooda akondi-a. Thitho mwakanyi-edhave irangana vyevi munokala ninga munaalimbanana Nlungu.”
40 Aliwa tatoovwela malangi-oe ala thitho tatoaitana arumiwiale. Moi e-no tatoakwapula noawandela ira ta-iye onga mudhina la Yesu, adhamale tatoa-iya.
41 Vidhaire e-no arumiwao tatookhuma va Tribunale nlukhulu la Ayuda. Aliwa tali osangalala namwasa oi Nlungu atoaona ira tali ofwanelela ireliwa vyaiburutu namwasa wa dhina la Yesu.
42 Dambo nlilothene tanoodhowanave funji-a mwathindhi kachisini na nyumba na nyumba thitho tanoolaleela milanyu yapama yoonga vya Kristu Yesu.
