Mayirelo a Arumiwi 7:1-60
7 Mbwenye ndimuwa wa sembe atoofuka ira: “N’nga vyevi pyaimbarimbari?”
2 Setefano atoonga ira: “Abalanga na ababanga, kavuruwanani. Nlungu wa titimi-o atooneela wa namabali-u Abrahamu, vahora yali liye wu Mesopotaniya, a-anadhowe makala wu Harana.
3 Thitho atoom’mwandela ira: ‘Uthame mu ilamboyaa nokhuma vari vaabalaa. Udhowe wu ilambo inofuna miyo dhauoni-a.’
4 Ee-no atoothama mu ilambo ya Kaldeya nodhowa makala wu Harana. Weo babee angakwide, Nlungu atoom’mwandela ira athamele ilambo inokala nyo ila.
5 Mbwenye kam’va-idhemo yotuva iliyothene, nee isilimburo ing’ono. Mbwenye malomwee atom’lanyedha ira unodha m’va-a ilambwila ira ikale yotuvayee na yambumbee,* angalive ira hora yenio ali a-anakaena mwana.
6 Thitho Nlungu atoom’mwandela ira mbumbee* inodha kala alendo mu ilambo yaanya, thitho atu anodha asanducha kala adhaari noaoni-a nyarwa wa vyawa 400.
7 Nlungu aongile ira, ‘Ndhinodha tonga ziza linofuna aliwa dhalilabela ninga adhaari, amala tanodhakhumao ira tadhandilabele valimburo leli.’
8 “Nlungu thitho atoom’va-a vwelano loineliwa. Adhamale Abrahamu atoobala Izaki thitho atoom’mwinela vadambo la 8. Naliyene thitho Izaki atoobala Yakobo, Yakobo atoobala a-ima 12 oi thitho atookala maziza 12.
9 Aliwa atoom’kaanela bivu Yosefi nom’guli-a wu Iguputu. Mbwenye Nlungu ali vambo-i na liye,
10 thitho atoom’vulumucha mu nyarwadhee dhothene. Moi anoom’dhiveliwana nom’kami-a ira airenga vyongo mwazelu vamethoni va Farau mwene wa Iguputu. Farauo atoom’va-a Yosefi izo yoi aing’anelenga mu ilambo ya Iguputu na vandhevee.
11 Adhamale wu Iguputu nau Kanani othene watookala nyarwa ilukhulu ya ndhala, moi anamabali-u katafwanya yodya.
12 Mbwenye Yakobo atoovwa ira wu Iguputu utokala yodya, thitho atooruma anamabali-u ale wa fendo yoroma.
13 Mbwenye wa fendo yanambili Yosefi atoodhizindiyeli-a waabalee, thitho Farau atooidhiwa vya abalee Yosefi na anamabalee.
14 Moi e-no Yosefi atooruma atu dhowa wu Kanani matukula babee Yakobo naabalee othene. Thitho othene vambo-i tali 75.
15 Moi e-no Yakobo atoodhowa wu Iguputu thitho atookwela weo vambo-i na anamabali-u.
16 Adhamale atoatukula noadhowana wu Sekemu, maalokota masiyeni aagunle Abrahamu na kobiri dha fero waa-ima a Hamori wu Sekemuo.
17 “Hora ingakwivenle yoi yolanyedha yavelenle Nlungu wa Abrahamu ikwakwaneli-edhiwe, mbumba ya Yakobo yatooinjiva maningi wu Iguputu.
18 Vasogolovee, mwene mwinango akonda a-m’mwiidhiwa Yosefi atooroma tonga wu Iguputu.
19 Mowenjela mwene wen’na anooruchi-a atu a ziza li-u nokanyi-edhanga anamabali-u ira tatatilenga a-imiwa atete ira takwe.
20 Vahora yen’na Mose atoobaliwa, thitho Nlungu anoom’mona ira ngobaleya. Liye atookala vandhe va anamabalee wa myedi miraru.
21 Mbwenye va-iiwile liye ekhene, mwana wa i-yana wa Farau atoom’tukula, nodhowa mam’mulukhuli-a ninga mwanee.
22 Ee-no Mose atoofunjedha zelu dhothene dhamu Iguputu. Liye anoonga mwakopolo noirana vyongo vilukhulu.
23 “Angana vyawa 40, atoothuulela vyodhowa maona abalee Aisraeli.
24 Angaoni ira balee unaaoni-iwa nyarwa na mutu wau Iguputu, atoom’vunela vopha mutu wau Iguputuo.
25 Mose athuulela ira abaleao anozindiyela ira Nlungu unaa avulumucha dhela mwa liye, mbwenye aliwa katalizindiyele likhundo leli.
26 Bebe-inimwee liye atoodhowa okoka maaona thitho afwaidhe Aisraeli ambili tawananga. Mbwenye Mose atoodhilimbi-edha akami-a ira tavwelane voonga ira: ‘Nyo muli vaubali. N’nga munowanelan’ni?’
27 Mbwenye akhoma fweuo atom’ndunya Mose noonga ira: ‘N’nga mbaani uuva-idhe izo yoi unisogolelenga nonitonganga?
28 N’nga unofuna undiphe ninga mwaphele we mutu wau Iguputule dhilo?’
29 Mose angavwide vyevi atootawa nodhowa makalanga mwilambo ya Midiyani. Weo atoobala a-ima ambili aalombwana.
30 “Vangavirile vyawa 40, ngelo atooneela wa liye kokolani va mwango wa Sinai, va thakuru laminga la-inda mulo.
31 Mose angaoni vyevi, atoodabwa maningi. Mbwenye vyakwivela liye ira amaing’anecheche pama, atoovwa madhu a Yohova* aonganga ira:
32 ‘Miyo ndili Nlungu wa anamabalaa, Nlungu wa Abrahamu, wa Izaki na wa Yakobo.’ Mose angavwide vyevi atooroma ngurumela thitho kaafunileve kwivela vathakurulo ira amaing’anecheche pama.
33 Yohova atoom’mwandela ira: “ Uungule sapatodhaa namwasa oi limburo liimenle weelo tochena.
34 Miyo nditoona ira atwanga ali wu Iguputu anaoni-iwa nyarwa maningi. Nditovwa dhumbela wiwa thitho nditodha ira ndaavulumuche. Moi e-no ndinofuna ndoorume ira udhowe wu Iguputu.’
35 Mose wenuo, wakondile aliwa noonganga ira: ‘N’nga mbaani auva-idhe izo yoi unisogolelenga nonitonganga?’ Ngwenuo am’rumile Nlungu ninga namasogolela na namavulumucha dhela mwa ngelo aoneele wa liye va thakuru laminganle.
36 Mutu wen’na atoasogolela noakhumana mu Iguputu thitho atoira vyodabwi-a na vizindiyelo wu Iguputu, va Bara Yofila na kokolani wa vyawa 40.
37 “Mose wen’na ngwaawandenle Aisraeli ira: ‘Nlungu unodha uva-ani namaongela ninga miyo khumela vari vaabalinyu.’
38 Nguliye ali na Aisraeli kokolani vambo-i na ngelo aongilena liye vambo-i na anamabali-u va mwango wa Sinai. Liye atoowachela madhu a Nlungu ira aniwandele.
39 Mbwenye anamabali-u tatookonda m’vwela. Aliwa tatoom’ela vakhundu thitho mirimiwa yatoowelela wu Iguputu.
40 Tatoom’mwandela Aroni ira: ‘Unisaka-edhele alungu ira tanisogolelenga namwasa oi kaniviidhi vim’mwireele Mose, wenuo anisogolela vyakhuma i-yo wu Iguputu.’
41 Adhamale tatoosakanya fwano la mwana ng’ombe. Moi e-no tatoodhana sembe dhavelela wa fwanolo thitho tatoosangalala na basa lamandhiwa.
42 Ee-no Nlungu atoa-iya ira talabele vyongo vya dhulu ninga munoongela malemba, mu bukhu la anamaongela. Malembao anoonga ira: ‘Nyo a mbumba ya Israeli, n’nga sembe na vyovelela vyavelela nyo kokolani mule wa vyawa 40, mwavivelela wa miyo?
43 Nyo mwanootukula sasa wa Moloki na nyenyedi ya nlungu oitaniwa Refani, mafwano asaka-edhe nyo ira mwaalambelenga. Ee-no ndinodha utamangi-edhelani undendai kwaranya wu Babulo.’
44 “Anamabali-uao tatookaana sasa wa umboni kokolani. Sasuo tausaka-edhile mo-arela malangi-o avelenle Nlungu wa Mose movwelana na iruthiruthi yaoni liye.
45 Anamabali-u tatoowachela sasula khumela waanamabaliwa thitho tatouvolowana vambo-i na Yoswa muilambo yoi mwali atu amaziza enango athamangi-iwile na Nlungu, vari va anamabali-u. Thitho sasuwo watookala muilamboi fiyedhela malambo a Davide.
46 Nlungu atoom’riyela rima Davide moi Davide atoovepha ngari ira amange nyumba ya Nlungu wa Yakobo.
47 Mbwenye Solomu ngwamangile nyumba ya Nlungu.
48 Mbwenye Nlungu Wadhuludhulu kanokala nyumba dhomangiwa na madha movwelana na madhu anamaongela oi:
49 ‘Yohova uongile ira, dhulu ndi pandwanga wa umwene thitho ilambo yavathi chonyingalavo manyalwanga. N’nga munandimangele nyumba yoi a-vi? N’nga limburo linofuna miyo vumelavo nliwani?
50 N’nga kai miyo apanduchile vyongo vyothene vyevi?’
51 “Nyo atu orucha, muli ouma rima, na o-ovwela. Hora dhothene munoruni-a zimu ochena noira vyongo ninga mwairela anamabalinyu.
52 N’nga ndi namaongela uvi oi anamabalinyu katam’moni-idhe nyarwa? Aliwa tatoopha atu alaleile vya udha wa mutu olongomanuo oi nyo mwatoom’velela nom’pha.
53 Nyo mwatoowachela Ilamulo dhela mwaangelo, mbwenye kamwai-arenle.”
54 Tangavwide vyevi, tatoothakaleliwa maningi mirimanimwiwa, noroma m’thakunela meno.
55 Mbwenye Setefano angadhaliwile na zimu ochena, atooing’anechecha dhulu thitho atoona titimi-o la Nlungu na Yesu angaimenle wu dhandha lodyana la Nlungu.
56 Moi e-no atoonga ira: “Kaing’anani! Ndinoona dhulu ungadhuleile, thitho Mwana mutu angaimenle wu dhandha lodyana la Nlungu.”
57 Aliwa tangavwide vyevi tatookhuwa maningi tangafungile mabarwiwa na mandhiwa, thitho othene tatootamangela vali liye.
58 Adhamale tatoom’khumi-edha undhe wa sidadi noroma m’ponyedha mabwe. Thitho amboni am’nukhedhe tatoo-ela nguwo dhiwa vaduzi na vali zombwe mwinango dhinalee Saulo.
59 Vahora yam’ponyedha aliwa mabwee, Setefano atoovepha mosembezela ira: “Mbwiye Yesu, muwachele zimwanga.”
60 Adhamale atookokora nokhuwa mwakopolo ira: “Yohova, kamwaaombe landu wa yodawa yei.” Angaongile vyevi atookwa.
