1, 2. N’nga i-yo ninofwanela dhifukangan’ni, mwasiwa ngwan’ni vyofukavevyi pyofuneya?

BIBILYANI mutofunjedhamo ira atu anjinji anothuulela ira anomlambela Nlungu, mbwenye onga imbarimbari aliwa anofunji-a vyongo vinoidanana Nlungu. (2 Akoritiyo 6:17) Mwasiwa ngwenuo, Yohova unoniwandela ira nikumemo“Babuloni Nlukulu.” (Apokalipse 18:2, 4) N’nga nyo munovwela lamulo leli? Mutu uliwethene unofwanela ira yosakula vamwasa wen’na. Ninofwanela dhifuka ira: ‘Miyo ndinolambela Nlungu ninga munofunela liye, venango ndinomlambela munofunela miyo?’

² Akala ira nyo mutokumamo religiauni lonama venango mutofudhi-amo dhina linyu, mutoira pama. Mbwenye munofwanela ira vinjinji kwaranya vyevyo. Nan’ni ee-no? Venango nyo munodhiveliwanave vyongo vinango vyovwelanana religiau lonama. Dhoweni nione vilemeelo vya-anadhiveliwana Yohova na vwechecha mwasiwa i-yo kaninofwanela virumela.

3. (a) Mwasiwa ngwan’ni vinooda kala vyorucha waatu enango i-yachi i-ndi-edha basa vyosema vomlambela Nlungu? (b) N’nga Bibilya linoongan’ni vamwasa wen’na?

³ Atu enango anoona ira kai vyokwakwana mlambela Nlungu baa-i a-indi-edha basa vyosema. Mwasa oi tatolemeela irana vyevyo. Akala iranyo munoona e-no, thuulelani vifunjilenyo. Thitho muthuulelenga ira Yohova unonifunji-a makalelo ofwanelela omlambelana. Thitho Bibilya linoonga movweya pama ira Yohova kanofuna ira ni-indi-edhenga basa vyosema vomlambela.—Muleri Ekisodo 20:4, 5; Salimo 115:4-8; Esaya 42:8; 1 Juwau 5:21.

4. (a) Mwasiwa ngwan’ni kaninofwanela lambela minemba yaatu okwa? (b) N’nga mwasiwa ngwan’ni Yohova atoakondi-a atwee ira katiwesedhenga ongana atu okwa?

 ⁴ Atu enango ano-indi-edha basa hora na nguru dhiwa voira vyongo vyevyo vinothuulela aliwa ira vinodhiveliwi-a minemba yaatu okwa. Aliwa anooda lambela minemba yaatu okwa. Mbwenye nifunjedhile ira atu okwa katinonikami-a venango nipei-a. Mutu akwa kanokaana ingumi limburo n’nango. Mbwenye akala mutu unowachela milanyu yabali ukwide mwaimbarimabari milanyuyo inokumela wa minemba yothakala. Mwasiwa ngwenuo Yohova atoawandela Aisraeli ira katiwesedhenga ongana atu okwa venango ira vyongo vyovwelanana minemba.—Dotornomio 18:10-12; onani madhu akomoni 26 na 31.

5. N’nga chini inaukami-eni ira mu-iye i-ndi-edha basa vyosema vomlambela Nlungu, thitho ira mu-iye lambela minemba yaatu okwa?

⁵ N’nga chini inofuna ukami-ani ira mu-iye i-ndi-edha basa vyosema vomlambela Nlungu venango ira mu-iye lambela minemba yaatu okwa? Munofwanela leri Bibilya na thuulela mopwaseya mwemo Yohova munoonela liye vyongovyo. Liye unoona ira vyongo vyevi “pyothakala.” (Dotornomio 27:15) Mulobelenga wa Yohova dambo nlilothene mvepa ira aukami-eni ona vyongo ninga munoonela liye thitho ira aukami-eni mlabelanga mwa ndhila inofunalee. (Esaya 55:9) Kamukaikelenga ira Yohova unodha uva-ani nguru ira muode i-ya irana yongo iliyothene yovwelana na lambela onama.

6. N’nga mwasiwa ngwan’ni andimuwa areligiau atosakula ira tairenga festa yotheela baliwa wa Yesu dambo la 25 mwedi wa Dezembro?

⁶ Mafesta anoireya komoni wayawa ili yothene mboidhiweya vailambo yothene yavathi. Atu anjinji anoonga  ira dambo leli tanotheela wukwa wa Yesu. Mbwenye Mafestala akumele religiauni lonama. Buku n’nango linoonga ira atu okala ilambo ya Roma tanotheela kuma wadhuwa dambo la 25 mwedi wa Dezembro. Andimuwa areligiau taonga vyo-arela Kristu anoidhiwa ira Yesu kabaliwile dambo leli. Angalive ee-no, aliwa tatosakula ira tatheelenga baliwa wa Yesu va dambo leli. (Luka 2:8-12) Anamafunjedha a Yesu kataira Mafesta. Buku n’nago linoonga ira vanduli va vyawa 200 Yesu angabaliwile, kavali mutu aidhi dambo laimbarimbari lelo labaliwile liye , thitho atu anjinji katabala voonga vya dambo labaliwile Yesu.” (Origens Sagradas de Coisas Profundas) Ilemeelelo ya Mafesta yaromile vanga-virile vyawa machikwi manjinji Yesu angawelele dhulu.

7. N’nga mwasiwa ngwan’ni Makristau aimbarimbari katinoira Mafesta?

⁷ Atu anjinji anoidhiwa ira Mafesta thitho thangani-avo vileemelo vyovelela yothuva vinoireya dambo leli, vikumele religiauni lonama. Mofwanafwani-a, ndulimu ilambo yau Inglaterra na vilambo vinango vyau Amerka malamulo tanokondi-a atu ira Mafesta mwasa oi njiilemelelo yokumela religiauni lonama. Uliwethene aira Mafesta anolangiwa. Mbwenye vira wa hora atu muvilambo vyevi tatoroma ira Mafesta. Mbwenye makristau aimbarimbari katinoira festa mwasiwa hora dhothene mbofunechecha ira vyongo vinomdhiveliwi-a Nlungu.

8, 9. N’nga mwasiwa ngwan’ni makristau oroma kataira festa yotheela dambo lobaliwa?

⁸ Atu anjinji anodhiveliwa ira festa ya dambo labaliwile aliwa. N’nga makristau anofwanela iranga festa na theelanga dambo labaliwile aliwa? Mafesta venango theela dambo lobaliwa vinoongiwa Bibilyani mbaatu enao a-analambela Yohova. (Maromelo 40:20; Marku 6:21) Atu  anotheela dambo labaliwile aliwa mwasa ofuna lemeza alungu onama. Mwasiwa gwenuo makristau oroma “taona ira theela dambo libaliwile mutu chilemeelelo yaundhe.”—Enciclopédia Delta Universal.

⁹ Atu a Aroma na Agiriki a hora yawale tanororomela ira festa yotheela dambo lobaliwa yanoiri-a ira alungu tamvunele mwinyaa festiyo. Aliwa tathuulela ira vanokala nemba waonela vyabaliwa mutuwo, ee-no nembuo wanovunela ingumi yothene yamutuo.

10. N’nga mwasiwa ngwan’ni makristau amalamboano katinoira festa yotheela dambo lobaliwa?

¹⁰ N’nga Yohova unodhiveliwana Mafesta okumela religiauni lonama? (Esaya 65:11, 12) E-i, kanodhiveliwana. Mwasiwa ngwenuo kaninoira festa yotheela dambo lobaliwa na mafesta enango ovwelana na lambela onama.

11 (a) N’nga atu enango anoira Mafesta namwasa wan’ni? (b) N’nga yongo yofuneya vinjinji yofwanela ira chini?

¹¹ Atu enango anodhowanave theela dambo lobaliwa na Mafesta angalive ira anoidhiwa ira vyongo vyevi vikumele religiauni lonama. Aliwa anoona ira Mafesta enala anowava-a hora yowaredha na mabanjiwa. N’nga nyo munoona e-no? Kai yodaweya kaana hora yowaredhana banja linyu. Yohova ngwaromi-idhe banja thitho unofuna ira nikalenga aimwerumweru nabanjali-u. (Aefeso 3:14, 15) Mbwenye ninofwanela ona ira yofuneya vinjinji kukala vauxamwali wapama na Yohova, i-ya dhiveliwi-a abali-u voira mafesta okumela religiauni lonama. Ngumwasiwa rumiwi Paulo atoonga ira: “Hora dhothene muonenga ira inomdhiveliwi-a Mbwiye chini.”—Aefeso 5:10.

12. N’nga chini inairi-e festa inango kala yo-odhiveliwi-a Yohova?

¹² Atu anjinji anoona ira kavali mwasa osaka idhiwa  ira ileemelelo inango yaromile a-vi, mbwenye Yohova kanoona e-no. Liye kanodhiveliwana Mafesta okumela religiauni lonama venango vofuna simba atu venango vizindiyelo vyailambo. Mofwanafwani-a, atu takala wu Iguputu tanoira vyo-iyana-iyana volambela milungwiwa yonama. Aisraeli tangakumile wu Iguputu, tatolandela ileemeelo inango yaundhe wa Aiguputwawo, thitho tatova-a dhina loi “festa ya Nlungu.” Mbwenye Yohova atoalanga mwasa wa vyevyo. (Ekisodo 32:2-10) Movwelana na malangi-o aongile Esaya, “kaninofwanela sakwinya yongo iliyothene yothakala!”—Muleri Esaya 52:11.

13. N’nga atu a-iidhe irana Mafesta tanokaana vyofuka viivi?

¹³ Nyo mwasakula a-ya Mafestani enango, venango munooda kaana vyofuka vinjinji. Mofwanafwani-a venango munodhifuka ira: N’nga ndinaire a-vi afwanga abasani tandifuka mwasa wa-anadhowela miyo Mafestani? N’nga ndinaire a-vi akala ira mutu utondiva-a yotuva ya festa? N’nga ndinaire a-vi akala ira mannanga venango i-yananga unondikanyi-edha ira ndiire ilemeelo inango yamafesta? N’nga ndinofwanela iran’ni ira a-imanga ta-aonenga ira anomaniwa vyongo mwasa oi katinoirana vilemeelo vya Mafesta venango vyotheela dambo lobaliwa?

14, 15. N’nga nyo munaire a-vi akala afwinyu tanoufunelani vyongo vyapama vafesta inangwee venango uva-ani yotuva?

¹⁴ Akala ira mutu mwinango utonivepa ira niire vyongo vyoira ikundu ya festa, ninooda wakula movwelana na vinaroromela i-yo. Mofwanafwani-a, akala atu enango tanoufunelani vyongo vyapama vafesta inangwee, nyo munooda awandela ira, “Nosimba vinjinji” mbwenye akala ira mutu mwinango unofuna idhiwa vinjinji, munooda mmwandela mwasa wa-anairelanyo Mafesta. Mbwenye hora dhothene, munofwanela onga mooma rima, mwazelu  thitho mwalemezo. Bibilya linoonga ira: “Hora dhothene madwinyu akalenga ooma, ninga mwaa-ele mwinyu, ira muode wakula mutu uliwethene.” (Akolose 4:6) Venango munoawandela ira munodhiveliwa waredha naatu enango thitho velela yotuva waatu mbwenye munooda irana vyevi vahora inango a-kala hora ya Mafesta.

¹⁵ N’nga munaire a-vi akala mutu mwinango utouva-ani yotuva? Bibilya kalian’na thandha wa malamulo oira mutu a-arelenga vakadha mwasa, mbwenye linoniwandela ira ninofwanelela irana vyongo vinofuna nikami-a ira nikaena ithuulela rima yapama.(1 Timoteo 1:18, 19) Venango mutu unofuna uva-ani yotuva kaidhi ira kamunoirana mafesta. Unooda onga ira, “Nditoidhiwa ira kamunatheela festa, mbwenye ndinofuna ndiuva-eni yotuvila.” Va vyongo vyambili vene, munooda sakula wachela yotuvio venango awachela. Mbwenye munofwanela onechecha ira musakulile vyongo vyoira kamunaviomba mlandu. Kaninofwanela ira iliyothene inaode dodomi-a uxamwali-nyu na Yohova.

16. N’nga munofwanela iran’ni akala abalinyu anofuna ira festa?

¹⁶ N’nga munaire a-vi akala abalinyu anofuna ira festa? Kamunofwanela alimbana. Muthuulele ira aliwa tatokaana ufulu oira vinofuna aliwa. Munofwanela athuulela thitho alemeza va vyongo visakule aliwa, ninga munofunela nyo ira aliwa taulemezengani na visakule nyo. (Muleri Mateu 7:12.) N’nga akala abalinyu anofuna ira nyo mukalevo vafestanivo? Mwa-anasake yoira, munofwanela mvepa Yohova ira aukami-eni sakula vyongo mwazelu. Munofwanela thuulela mokwakwanela vinofuna ireya vafestanivo. Muthuulele ira hora dhothene munofwanela sakula vyongo vinamdhiveliwi-a Yohova.

17. N’nga munaire a-vi ira a-iminyu ta-asililenga atu enango tairanga mafesta o-iyana-iyana?

 ¹⁷ N’nga munaire a-vi ira a-iminyu ta-asililenga taona atu tairanga Mafesta o-iyana-iyana? Munofwanela asakelanga hora yosangalala vambo-i naaliwa. Munooda irana vyevi vowagulela vyotuva vyo-iyana-iyana thangani-avo vahora yakonda aliwa adedi-edhela. Mbwenye akala munoona hora yowaredha naaliwa thitho adhiveliwana, inokala yotuva yapama vinjinji kwaranya yotuva iliyothene.

18 N’nga mwasiwa ngwan’ni ninofwanela fiya vamigumanoni yaukristau?

¹⁸ Ira nimdhiveliwi-e Yohova, ninofwanela kumamo religiauni lonama thitho i-achi vilemeelo vyothene vya religiau lonama. Mbwenye ninofwanela irana vyongo vinoirana atu tali religiauni laimbarimbari. N’nga vyongo viwa piivi? Yongo yoroma fiya vamigumanoni yothene yaukristau. (Muleri Aebere 10:24, 25.) Fwanyeya vamigumanoni chiyongo yofuneya vinjinji waatu tali mu religiau laimbarimbari. (Salimo 22:22; 122:1) Nagumaneyanga ninokala olimbi-ana unango na fwee.—Aroma 1:12.

19. N’nga mwasiwa ngwan’ni munofwanela awandela atu enango vyongo vifunjedhile nyo Bibilyani?

¹⁹ Yongo inango yofuneya kuwandela atu vyongo vifunjedhile nyo Bibilyani. Atu anjinji katinokala aimwerumweru na vyongo vyothakala vinoireya muilambo yothakalila. Venango nyo mutoaidhiwa atu enango ira vyongo ninga vyevi vinowaireela. Munofwanela awandela vyongo vinodedi-edha i-yo sogolo. Mwadhilimbi-edhanga fiya vamigumanoni thitho awandela atu milanyu ya Bibilyani, muno-iyachi funa vilemeelo vinoirana mareligiau onama. Muidhiwe ira mwairangana vyevi munokala waimwerumweru thitho Yohova unodha uraeli-ani vinjinji mwasa osakula mlambela namakalelo ofwanelela.—Malaki 3:10.