MURU 18
Ndinofwanela velela ingumi yanga wa Yohova nobadiziwa?
1. N’nga munadhifuke yofuka iivi voona ira muromile wale funjedha Bibilya vo-indi-edha basa bukuleli?
FUNJEDHA Bibilya vo-indi-edha basa bukuleli utoukami-ani idhiwa vyongo vyo-iyana-iyana vilanyedhile Nlungu ninga, ingumi yo-omala, inaireya waatu okwa thitho vyoi atu akwide anodha venyathi-iwa. (Namalaleya 9:5; Luka 23:43; Juwau 5:28, 29; Apokalipse 21:3, 4) Akala ira mutoroma dhowa migumanoni ya Mboni dha Yohova mutoona ira aliwa anomlambela Nlungu na makalelo apama. (Juwau 13:35) Venango muromile wale kala vauxamwali na Yohova thitho munofuna mlabela li-ye. Venango munodhifuka ira, ‘n’nga ndinaire a-vi ira ndimlabele Nlungu?’
2. N’nga mwasiwa ngwan’ni mutu mwinango wa Itiyopiya atovepa ira abadiziwe?
2 Yofukha yofwanafwanana yei chofukha yafukhile mutu mwinango wa Itiyopiya. Mutu wen’na alaleeliwe na namafunjedha unango wa Yesu dhinalee Filipi Yesu angavenyathi-iwile wale. Filipi atomkami-a mutuo idhiwa ira Yesu ali Mesiya. Mutu wa Itiyopiya angavwide vyevi, liye atodhiveliwa vinjinji na vyafunjedhile liye vahora yeniyo atoonga ira: “Kaonani! Ma-inje manjinji kaienala. N’nga inandiimwanani-a badiziwa chini?”—Mayirelo 8:26-36.
3. (a) N’nga Yesu aawandele a-vi anamafunjedhee? (b) N’nga mutu unofwanela badiziwa moi-avi?
3 Bibilya linoonga movweya pama ira akala munofuna mlabela Yohova, munofwanela badiziwa. Yesu atoawandela anamfunjedhee ira: “Mwaafunji-e atu amaziza othene thitho mwaabadizenga.” (Mateu 28:19) Yesu atovelela ifwanafwani-o vamwasa wen’na neri-a liye atobadiziwa. Vabadiziwa liye, abwini-iwile manungoothene a-kala ira mmoka ma-inje vamuru. (Mateu 3:16) Malamboano thitho kristau abadiziwanga unofwanela bwini-iwa manungo othene ma-injeni.
4. N’nga badiziwa unooni-an’ni?
4 Mwabadiziwa munooni-a waatu enango ira munofunechecha kala vauxamwali na Nlungu thitho mlabela. (Salimo 40:7, 8) Venango munodhifuka ira, ‘N’nga ndinofwanela iran’ni ira ndibadiziwe?’
MUNOFWANELA IDHIWA VYOFWANELELA THITHO KAANA IROROMELO
5. (a) N’nga yongo yoroma inofwanelanyo ira chini ira mubadiziwe? (b) N’nga migumano yaukristau njofuneya moi a-vi?
5 Mwa-anabadiziwe, munofwanela mmwidhiwa Yohova na Yesu. Muromile wale irana vyevi varomile nyo funjedha Bibilya. (Muleri Juwau 17:3.) Mbwenye idhiwa Yohova na Yesu kai okwakwanela. Bibilya linoonga ira munofwanela ‘idhiwa mokwakwanela’ ifunelo ya Yohova. (Akolose 1:9) Dhowa migumanoni ya Mboni dha Yohova unodhaukami-ani ira mummwidhiwe pama Yohova. Ngumwasiwa munofwanela fwanyeya vamigumano hora dhothene.—Aebere 10:24, 25.
Mwa-anabadiziwe, munofwanela funjedha Bibilya
6. N’nga munofwanela idhiwa makundo a Bibilyani oinjiva moi a-vi ira mufwanelele badiziwa?
6 Mbwenye, Yohova kanadedi-edha ira mwa-anabadiziwe mukale mungaidhiwile vyothene vili Bibilyani. Liye kaadedi-edhile mutu wa Itiyopiya ira aidhiwe vyothene a-anabadiziwe. (Mayirelo 8:30, 31) I-yo thitho ninodha dhowanave funjedha vya Nlungu dhowa nodhowa. (Namalaleya 3:11) Mbwenye, ira mubadiziwe munofwanela idhiwa thitho roma roromela makundo oroma a Bibilyani.—Aebere 5:12.
7. N’nga funjedha Bibilya uukami-idheni a-vi?
7 Bibilya linoonga ira: “Va-akale iroromelo kavinoodeya mdhiveliwi-a Nlungu.” (Aebere 11:6) Munofwanela kaana iroromelo mwa-anabadiziwe. Bibilya linoniwandela ira atu enango a sidadi la Koritiyo tatovwa vyafunji-a anamafunjedha a Yesu thitho “tatoroma roromela nobadiziwa.” (Mayirelo 18:8) Mofwanafwana naatu enala, funjedha winyu Bibilya utoukami-ani ira muroromelenga vilanyedhile Nlungu thitho ira muroromelenga kuto wa Yesu unofuna nivulumucha mmadaoni na wukwa.—Yoswa 23:14; Mayirelo 4:12; 2 Timoteo 3:16, 17.
MUWANDELENGA ATU ENANGO VINOONGA BIBILYA
8. N’nga chini inofuna uiri-ani ira muwandelenga atu enango vifunjedhilenyo?
8 Mwadhowanave funjedha Bibilya thitho ona mwemo munofuna aliwa ukami-ani vaingumi inyu, iroromelo inyu inoroma ulukula. Munodharoma awandela atu enango vinofunjedhanyo. (Jeremiya 20:9; 2 Akoritiyo 4:13) N’nga mbaani anofwanelanyo roma awandela vinofunjedhanyo?
Iroromelo inodhaukami-ani awandela atu enango voonga vifunjedhilenyo
9, 10. (a) N’nga mbaani anofwanelanyo roma awandela vinofunjedhanyo Bibilyani? (b) N’nga munofwanela iran’ni akala munofuna laleela vambo-i na pingo?
9 Munooda wandela abalinyu, afwinyu, atu owandamanana venango atu ana-indananyo basa vambo-i. Irana vyevi kwapama, mbwenye munofwanela viirana mwaudhivela thitho mowalemeza. Mwaona ira munooda laleela vambo-i na pingo, munofwanela mmwandela Mboni wa Yovova unamfunjananyo Bibilya ira munofuna laleela vambo-i na pingo. Liye aona ira muli okozeya thitho muno-arela makundo a Bibilyani, vinova-a dodoliso loi mwethene mumaonane vambo-i na andimuwa ambiili avapingoni vinyu.
10 N’nga ifunelo yodhowa matapanyana naandimuwa avapingoni chivi? Aliwa tanodha tapanya nanyo ira taone akala munovwechecha thitho roromela makundo oroma a Bibilyani, akala muno-arela vinoonga Bibilya, thitho akala munofunadi kala Mboni wa Yohova. Thuulelani ira andimuwao anoing’anela atu othene pingoni, thangani-avonyo, kamunafwanela ova mwatapanyanga naaliwa. (Mayirelo 20:28; 1 Pedru 5:2, 3) Mwamala tapanya, andimuwao anodha uwandelani akala munoroma laleela vambo-i na pingo.
11. N’nga mwasiwa ngwan’ni mutu unofwanela chinja makalelo enango a-anarome laleela vambo-i na pingo?
11 Andimuwa anooda uwandelani ira vatokala vyongo vinango vinofuna nyo chinja mwa-anarome laleela vambo-i na pingo. N’nga chinja vyongo unoonga aliwa kofuneya a-vi? Kofuneya neri-a nalaleelanga ninaimelela Yohova, ee-no kalelo li-u linofwanela kala lapama neri-a linodha iri-a atu mlemeza Yohova.—1 Akoritiyo 6:9, 10; Agalata 5:19-21.
MUNOFWANELA CHINYUWA NOCHINJA
12. N’nga chinyuwa unothaphulelan’ni?
12 Vatokala yongo inango inofwanelanyo irana mwa-anabadiziwe. Rumiwi Pedru aongile ira: “Chinyuwani na chinja ira madawinyu afudhiwe.” (Mayirelo 3:19) N’nga chinyuwa kuira a-vi? Chinyuwa unothapulela kaana tangaranga vamwasa wa vyodawa viirile-iyo. Mofwanafwani-a, akala voroma mwatokaana kalelo loraruwa, munofwanela chinyuwa. Thitho masiki ira hora dhothene munodhilimbi-edha irana vyongo vyapama, munofwanela chinyuwa neri-a othene nili odawa thitho ninofuna ira Nlungu anilevelele.—Aroma 3:23; 5:12.
13. N’nga “chinja” unothapulelan’ni?
13 N’nga vivwela tangaranga va vyono viirile i-yo pyokwakwanela? E-i. Pedru atoonga okoka ira “chinjani”. Vyevi vinothapulela ira munofwanela rambelanga makalelo othakala airechanyo voroma noroma irangana vyongo vyapama. Ira nivwecheche likundo leli, nifwanafwani-e ira mutodhowa tatamoni unango oira nyo kamunarome fiyawo. Mwangawendile hora indendai, mutozindiyela ira muto-olowa. N’nga munaire a-vi? Kaninokaikela ira munoimela, nochinja roma dhowa ofwanelela. Mofwanafwana na vyevi, pyoodeya ira mwaari mofunjedha Bibilya vitoukami-ani idhiwa ira vatokala makalelo na vyongo vinango vinofwanelela nyo chinja venango iya-chi. Munofwanela kala okozeya “chinja,” roma—irana vyongo—vyapama.
MUNOFWANELA DHIVELELA WA NLUNGU
Nyo mutovelela inguminyu wa Yohova?
14. N’nga munadhivelele a-vi wa Nlungu?
14 Yongo inango yofuneya irana mwa-anabadiziwe kudhivelela wa Yohova. Munooda dhivelela wa Yohova, vomlanyedha mulobelo ira munodha mlambelenga liye baa-i thitho munongoona ifunelwee kala yofuneya vinjinji vaingumi inyu.—Dotornomio 6:15.
15, 16. N’nga inammwiri-e mutu ira adhivelele wa Nlungu chini?
15 Lumbela ira ndimlabelenga Yohova baa-i uli ninga lumbela ira munodha kala na mutu munamdhiveliwana nyo vainguminyu yothene. Kafwanafwani-ani ira lombwana na i-yana tali vaimweendi. Lombwanowo aroma mmwidhiwa pama i-yanuwo, unoroma mdhiveliwana vinjinji vanduli viwa unofuna ira amthele. Angalive ira thela unodhi-a izo ilukulu, lombwanuwo unomthelave i-yanuwo mwasa oi unomdhiveliwana.
16 Thitho mwafunjedhanga vya Yohova munoroma mdhiveliwana vinjinji thitho munoira vyothene vinaodenyo ira mumlabelenga. Irana vyevi unoulimbi-ani ira muvelele lobelo wa Nlungu lomlanyedha ira munodha mlabela. Bibilya linoonga ira uliwethene unofuna a-rela Yesu, “avikonde yeka.” (Marku 8:34) N’nga vyevi vinothapulelan’ni? Vinothapulela ira muonenga ira vwela Yohova chiyongo yofuneya vinjinji. Muonenga ira vinofuna Yohova pyofuneya vinjinji kwaranya vyofuna vinyu.—Muleri 1 Pedru 4:2.
KAMUOVE DAWI-A
17. Mwasiwa ngwan’ni atu enango katinafuna dhivelela wa Yohova?
17 Atu enango katinafuna dhivelela wa Yohova mwasa oi anoova ira katinaode kwakwaneli-edha vinalanyedha liye ira tamlabelenga. Aliwa katinofuna msukwali-a Yohova, venango tanokaana mathuulelo oi ta-adhivelele wa Yohova katinaoneye kala odawa na vinoira aliwa.
18. N’nga chini inaukami-eni ira mwa-aove msukwali-a Yohova?
18 Akala munodhiveliwana Yohova kamunodha ova ira munodha irana vyongo vyomsukwali-a. Udhivelinyu unodha uiri-ani ira mudhilimbi-edhe irana vyongo vilanyedhile liye. (Namalaleya 5:4; Akolose 1:10) Kamunodhaona ira vinofuna Yohova pyorucha. Rumiwi Juwau atolemba ira: “Dhiveliwana Nlungu unothapulela lokota malamulwee, thitho malamulwee mbo-onyemela.”—1 Juwau 5:3.
19. Mwasiwa ngwa’ni kamunofwanela oova dhivelela wa Yohova?
19 Ka-i ira mutu adhivelela wa Yohova unoirenga vyongo vyothene vyofwanelela. Yohova kanadedi-edhela ira niirenga vyongo vya-anaoda i-yo. (Salimo 103:14) Liye unodha ukami-ani ira mwiirenga vyongo vyofwanelela. (Esaya 41:10) Muroromelenga Yohova na riminyu othene, thitho “liye unodha dhongola ndila dhawo.” —Sanganikho 3:5, 6.
ONGA VAMWINJINI VAATU IRA MWATODHIVELELA WA NLUNGU
20. N’nga mwadhivelela wa Nlungu yongo yo-arela chini?
20 N’nga munoviona ira muli okozeya dhivelela wa Yohova? Mwadhivelela wa Yohova vato-ala yongo imbo-i ira mwiirena. Munofwanela badiziwa.
21, 22. N’nga munaonge a-vi vatando vyoonga iroromelo inyu?
21 Munofwanela mmwidhiwi-a ndimuwa ovwelani-a mabasa aandimuwa wavapingoni vinyu ira mwatodhivelela wa Yohova munofuna badiziwa. Vanduli viwa liye unodha vepa andimuwa enango ira tatapanye nanyo makundo enango oroma a Bibilyani. Aliwa takaana imbarimbari yoi nyo muli ofwanelela, anodha uwandelani ira munooda badiziwa vagumano nlukulu o-arela wa Mboni dha Yohova. Vagumanuwo, vanodha ongiwa mwasa wenuo unaonge pama mwasa obadiziwa. Vanduli viwa oonga mwasuwo unodha fuka atu ira tawakule vyofuka vyo-orucha. Mwawakulanga vyofukavyo, munokala mulaleeyanga vatando vya iroromelo inyu.—Aroma 10:10.
22 Mwasuwo wamala munodha badiziwa. Munodha bwini-iwa tutu lothene ma-injeni. Badiziwawo unodha oni-a atu ira mutodhivelela wa Yohova thitho ira romela vevo muli wa Mboni dha Yohova.
N’NGA BADIZIWA WINYU UNOTHAPULELAN’NI?
23. N’nga badiziwa mudhina la Baba, na la Mwana, na nemba ochena “unothapulelan’ni”?
23 Yesu aongile ira anamafunjedhee tabadiziwenga “mudhina la Baba, la Mwana, na nemba ochena.” (Muleri Mateu 28:19.) N’nga vyevi vinothapulelan’ni? Vinothapulela ira munanazindiyela utongi wenuo una Yohova thitho izo yeniyo Yesu inaliye vokwakwaneli-a vinofuna Nlungu. Vinothapulela thitho ira munoidhiwa vyevyo vinofuna Nlungu. Thitho ira munoidhiwa ira Nlungu uno-indi-edha basa nemba ochena vokwakwaneli-a ifunelowee.—Salimo 83:18; Mateu 28:18; Agalata 5:22, 23; 2 Pedru 1:21.
Ubadizo unodha oni-a waatu othene ira nyo mutosakula irana ifunelo ya Yohova
24, 25. (a) N’nga ubadizo unaimelelan’ni? (b) N’nga ninodha tapanyan’ni vamuru omari-a wabukuli?
24 Ubadizo unaimelela yongo inango yofuneechecha. Mwabwini-iwanga ma-injeni, vinooni-a ira mutokwa, venango ira muto-iya ingumi inyu yawale. Mwathavuwanga, munoroma ingumi inango ipya yoira vinofuna Nlungu. Vinaoni-a ira romela vahora yenna munoroma mlabela Yohova. Munofwanela thuulela ira mudhivelele wa Yohova. A-kala wa mutu, gulu, venango basa n’nangolene.
25 Dhivelela unodha ukami-ani ira udhivelinyu na Yohova uulukule. (Salimo 25:14) Mbwenye vyevi kavinothapulela ira mutu unovulumuwa mwasa oi utobadiziwa. Rumiwi Paulo alembile ira: “Dhowananive sakaedha ivulumucho inyu, moova thitho mongurumela.” (Afilipi 2:12) Ubadizo pavoromela baa-i. N’nga munaire a-vi ira mudhowenave kala vauxamwali na Yohova? Muru omari-a wa bukuli unodha wakula yofuka yeyi.
