MURU 8
N’nga Umwene wa Nlungu chini?
1. Tilobelo liivi lovweya linofuna i-yo tapanya va muru wen’na?
ATU anjinji atoidhiwa lobelo lovweya pama la Babi-u venango la mbwiye. Yesu ato-indi-edha basa lobeloleli vofuna funji-a anamafunjedhee ira talobelenga. Mwasiwa ngwan’ni liye atoira lobeloleli? N’nga lobeloli likalelen’ni lofuneya wa i-yo malamboano?
2. Pivyongo viraru viivi vyofuneya vinifunji-idhe Yesu ira nivepenga?
2 Yesu aongile ira: “Mulobelenga moi ee-ni: ‘Babi-u wadhulu, dhina linyu licheni-iwe. Umweninyu udhe. Ifunelwinyu iireye, ninga dhulu thitho vikale saasawa na ilambo yavathi.’” (Muleri Mateu 6:9-13.) N’nga mwasiwa ngwan’ni Yesu atonifunji-a ira nivepenga vyongo viraruvi?—Onani madhu akomoni 20.
3. Chini inofwanela i-yo idhiwa vyoonga Umwene wa Nlungu?
3 I-yo nifunjedhile ira Nlungu dhina lee ngu Yohova. Thitho nitofunjedha vinofuna Nlungu waatu na ilambo yavathi. N’nga Yesu afuna aongen’ni vonifunji-a ira nivepenga ira Umwene wa Nlungu udhe? Ninofwanela idhiwa inothapulela Umwene wa Nlungu, vinofuna ira Umwenuo thitho munacheni-ele aliwa dhina la Nlungu.
N’NGA UMWENE WA NLUNGU CHINI?
4. Umwene wa Nlungu chini? N’nga Mwenee mbaani?
4 Umwene wa Nlungu nguutongi ukaathi-idhe Yohova dhulu. Usakunle Yesu ira akale Mwene wa Umwene wen’na. Yesu aroma tonga ilambo yavathi liye unodha kami-a atu moi kavali namatonga mwinango unaode kami-a atu molingana na liye. Liye utokaana nguru dhinjinji kwaranya anamatonga othene ailambo yavathi. Na mwasa wenuo, Bibilya linoonga ira Yesu ngu “Mwene waale anotonga ninga mamwene na Mbwiye waale anotonga ninga ambwiye.”—1 Timoteo 6:15.
5. N’nga Umwene wa Nlungu unodha tonga ilambo yothene kumela wani?
5 Bibilya linoromola Umwene wa Nlungu ira “Umwene wa dhulu” mwasiwa kumela dhulu wewo unodha tonga vailambo yothene yavathi. (Apokalipse 11:15; 2 Timoteo 4:18) Vangavirile malambo 40 Yesu angavenyathi-iwile, atowelela dhulu. Liye atodedi-edha hora yofwanelela ira akale Mwene.—Mayirelo 2:33.
6, 7. Mwasiwa ngwan’ni Yesu ngwapama kwaranya anamatonga othene availambo yavathi?
6 Yesu ngunamatonga wapama kwaranya anamatonga othene availambo yavathi. Namwasa wan’ni? Yoroma, liye kanokwa. Mbwenye anamatonga amalamboano mbo-olongomana thitho anokwa. Bibilya linoonga ira Yesu “ngun’na ingumi yo-okwa.” (1 Timoteo 6:16) Ee-no, vyothene vinofuna liye ira, akami-e atu vinodha kala vyodhowa nodhowa.
7 Yanambili, Yesu unodhakala Mwene wapama na ooma rima. Vyoro-edha vinango vya Bibilyani vinoonga ira liye unodha kaana “nemba wa Yohova.” Yesu unodha tonga na zelu, nguru, na dodoliso. Liye unodha mvwela Yohova. Yesu “kanodha tonga mwasa wa maonelo aundhe” venango va-a malangi-o mwasa oi uteuvwa ira vatokala vyongo vidaweile. Mbwenye unodha tonga atu a kalelo lodhiyevi-a venango [osauwa] na upama. (Esaya 11:2-4) Mungadhiveliwile kaana namatonga ninga wen’na?
8. N’nga ninoidhiwa a-vi ira Yesu unodha tonga naatu enango?
8 Bibilya linoonga ira Nlungu utosakula atu enango ira tamatonge vambo-i na Yesu dhulu. Mofwanafwani-a, rumiwi Paulo atomwandela Timoteo ira: “Nadhowanave vilela, i-yo ninodha tonga na liye.” (2 Timoteo 2:12) N’nga mbaatu angasi anofuna dhatonga ninga Mamwene na Yesu?
9. (a) Mbaatu angasi anofuna dhowa matonga vambo-i na Yesu? (b) N’nga Yohova uromile e-lini asakula?
9 Va muru 7 wa bukuleli, nifunjedhile ira Juwau atokaana vyoro-edha vya Yesu ninga Mwene. Liye aonin’ni? Liye ammoni Yesu angali dhulu na Mamwene enango okwakwana 144.000. Juwau atoonga ira: “Enala mbanam-ara Yesu uliwethene unaa liye. Aliwa taguliwile vaari vaatu.” (Muleri Apokalipse 14:1, 4.) N’nga mbaani anaromoliwa ira mba 144.000? Mbamakristau ororomeleya asakuliwile na Nlungu ira tatonge ilambo yavathi vambo-i na Yesu. Aliwa takwa anovenyathi-iwa dhowa makala dhulu. (Apokalipse 5:10) Yohova uromile sakhula gululi la 144.000 romela hora yaarumiwi.
10. N’nga ninoidhiwa a-vi ira mamwene tasakuliwile na Yohova tanodha nivwechecha?
10 Yohova angasakule Yesu na gulu la 144.000, liye atooni-a ira unonidhiveliwana vinjinji thitho unonifunela vyapama. Yesu unodha kala Mwene wapama na mwasa oi utoroma kalao thitho utoidhiwa nyarwa dhinoireya vailambo yavathi. Paulo aongile ira Yesu utoidhiwa vinofuna i-yo. Liye aongile ira Yesu unooda “zindiyela vyongo vya-anaoda i-yo” thitho “atowesedhiwa mumakalelo othene ninga i-yo.” (Aebere 4:15; 5:8) Thitho gulu la 144.000 litoidhiwa vinofuneela i-yo. Neri-a aliwa tatolimbanana vyodawa na marenda. Nitokaana iroromelo yoi Yesu na gulu la 144.000 anodha nivwechecha pama.
N’NGA UMWENE WA NLUNGU UNODHA IRAN’NI?
11. Mwasiwa ngwan’ni Yesu atofunji-a anamafunjedhee ira ifunelo ya Nlungu iireye dhulu?
11 Mwasiwa ngwa’ni Yesu atofunji-a anamafunjedhee ira tavepenga ira ifunelo ya Nlungu ireye dhulu? Mwasiwa ngoi kai atu othene okala dhulu taira vyafuna Nlungu. Muru 3 wa buku leli utoonga ira Satana Namanami-a, atomdhimbinuwela Yohova. Angelo enango tatom-arela Satana ee-no katamvwele Nlungu. Aliwa njiminemba yothakala. Yohova atorumeli-a ira Satana na minemba yothakaliyo tadhowenave kala dhulu vahora yoyeva. Nyo munodha funjedha vyoonga vyevyo va muru 10.
12. Pivyongo viili viivi vinoongiwa valemba la Apokalipse 12:10?
12 N’nga Satana na minemba yothakala tangakalile dhulu fiedha e-lini? Bibilya linooni-a ira fiedhela Yesu angakalile mwene. Vyevyo vingaireile, Yesu atowana khondo na Satana. (Muleri Apokalipse 12:7-10.) Versu 10 linoonga vya vyongo viinli vyofuneya vinjinji viireile. Yoroma, Yesu atokala Mwene thitho atoroma tonga. Yanambili, Satana atotamangi-iwa dhulu udha vailambo yavathivano.
13. Chini yaireile dhulu Satana angatamangi-iwile?
13 Bibilya linoonga ira angelo ororomeleya tatodhiveliwa Satana vambo-i na minembee yothakala tangatamangi-iwile dhulu. Lemba la Apokalipse 12:12 Linoonga ira: “Dhiveliwani, dhulu, nanyo, okala wewo!” Neri-a chineneeva dhulu utokala rendele okwakwanela na vwelana mwasiwa othene anokala wewo tanomvwela Nlungu.
Vyoireya vailambo yavathi vyatoroma simbwa injiva romela vevo Satana na minembee yothakala vyatamangi-iwile aliwa dhulu. Mbwenye vyevi vinomala chineneeva
14. N’nga vyongo vili a-vi vailambo yavathi Satana vitamangi-iwile liye dhulu?
14 Mbwenye vyongo vailambo yavathi pyo-iyana vinjinji. Vyongo vyoopi-a vinoaireela atu “mwasiwa namanami-a utouthithelani” thitho liye “utonyanyuwa vinjinji, neri-a utoidhiwa ira u-adhina hora yoyeva.” (Apokalipse 12:12) Na mwasa, wenuo liye unaa vilimbi-edha munaodele liye ira adhi-e nyarwa, uvwa upa na ona nyarwa vailambo yavathi.
15. N’nga Nlungu un’na ifunelo yan’ni yoonga ilambo yavathi naatu?
15 Mbwenye Nlungu unofuna ira ilambo yothene yavathi ikale paradaizo thitho ira atu olongomana takaleo dhowa nodhowa. (Salimo 37:29) N’nga Umwene wa Nlungu unaire a-vi vyevi?
16, 17. N’nga lemba la Danieli 2:44 linaniwandela n’ni vyoonga Umwene wa Nlungu?
16 Lemba la Danieli 2:44 linoonga ira: “Malambo amamwene enao, Nlungu wa dhulu unodha kaathei-a Umwene oi chipo kunodha nongiwa. Thitho umwenuwo kunodha veleliwa mandhani mwa ziza linango laatu. Unodha nyenya na mali-a maumwene othene, thitho unodha kalawo dhowa nodhowa.” N’nga vyoro-edha vyevi vinonifunji-a n’ni vyoonga Umwene wa Nlungu?
17 Yoroma, vinonifunji-a ira vangakalile mautongi enango vanduli voi Umwenuo utoroma tonga. Nitoidhiwa vyevyo neri-a vyoro-edhavyo vinoniwandela ira Umwene wa Nlungu waromile tonga “m’malambo a Mamwene enale.” Yanambili, Umwene wa Nlungu ngodhowa nodhowa thitho kunodha chinjiwa na utongi unango. Yanararu, Umwene wa Nlungu nguutongi wapama unofwanela atonga atu!
18. N’nga khondo ya Umwene wa Nlungu inofuna dhawana na mautongi a ilambwila inoongiwan’ni?
18 N’nga Umwene wa Nlungu unodha roma a-vi tonga ilambo yothene yavathi? Mautongi tanodha kaana rima ofuna wana na Nlungu. Na mwasa wani? Na mwasa oi tanodha dimeli-iwa na minemba yothakala ira yaagumani-e “kondo ya dambo nlukulu la Nlungu, wanguru dothene”. Khondo yen’na inoongiwa armagedo. Mbwenye mautongi ailambwila katinodha ganyali. Vanduli viwa, Umwene wa Nlungu unodha tonga vailambo yothene.—Apokalipse 16:14, 16; onani madhu akomoni 10.
19, 20. Mwasiwa ngwa’ni ninofuneela ira Umwene wa Nlungu udhatonge ilambo yavathila?
19 Mwasiwa ngwa’ni ninofuneela tongiwa na Umwene wa Nlungu? Yoroma, mwasa oi nili o-olongomana, ninobulela thitho ninokwa. Umwene wa Nlungu unoniva-a ngari yokalao dhowa nodhowa. Lemba la Juwau 3:16 linoonga ira: “Voi Nlungu atodhiveliwana vinjinji ilambo yavathi, moi atovelela Mwanee obaliwa ekene, ira mutu uliwethene unamroromele a-anongiwe, mbwenye akaena ingumi yo-omala.”
20 Yanambili, vatokala atu anjinji othakhala. Aliwa tanonama, kai atu apama, thitho mbamakalelo oraruwa. Kaninaode vimali-a vyevyo, Nlungu utolanyedha nonga atu othakala. Atu othakala tanodha wukwa va Armagedo. (Muleri Salimo 37:10.) Yanararu, mautongi ailambwila katinooda mali-a nyarwa thitho katina makalelo apama. Aakale ira mbamautongi apama tangakami-idhe atu ira tavwelenga Nlungu, mbwenye mautongi ailambwila katinaira vyevyo. Pyaimbarimbari ira Bibilya vinoonga aliwa ira: “Mutu unompei-a mutu fwee vomtonga.”—Namalaleya 8:9.
21. N’nga Umwene wa Nlungu unodha ira n’ni?
21 N’nga Umwene wa Nlungu unodha iran’ni? Umwenuo unodha iri-a ira ifunelo ya Nlungu iireye vailambo yavathi. Mofwanafwani-a, vakhondo ya Armagedo, Satana na minemba yothakala tanodha e-liwa perezoni. (Apokalipse 20:1-3) Thitho mwasa wa yoombolana, atu ovwela tanodha kaana ingumi yapama na ngari yokalao dhowa nodhowa. Ilambo yavathi inodha kala paradaizo. (Apokalipse 22:1-3) Umwenuo thitho unodha cheni-a dhina la Nlungu. Vyevi vinooni-a ira Umwene wa Nlungu waroma tonga, atu othene tanodha lemeza dhina la Yohova.—Onani madhu akomoni 21.
N’NGA YESU A-ELIWILE E-LINI KALA MWENE?
22. Yesu kaa-eliwile kala Mwene angali vailambo yavathi venango angamadhi fiyawene dhulu. N’nga ninoidhiwa a-vi vyevi?
22 Yesu kaaromile tonga angali vailambo yavathi. Nitoidhiwa vyevyo mwasa oi liye atowafunji-a anamafunjedhee ira tavepenga ira: “Umweninyu udhe.” Vyevi vinooni-a ira Umwenuo wali wasogolo. N’nga Yesu akalile Mwene angamadhi fiya wene dhulu? E-i. Ninoidhiwa a-vi vyevyo? Ninoidhiwa mwasa oi vangavirile hora yoyeva Yesu angawelele dhulu, rumiwi Paulo na Pedru taongile ira lemba la Salimo 110:1 latokwakwanela wa Yesu. Va yoro-edha yen’na Yohova atommwandela Yesu ira: “Yohova utommwandela mbwiyanga ira: Kaathi ndhandha langa lodyana fiedha ndinga-elile amwidanao ninga yonyingalelavo manyalwao.” Vyevi vinooni-a ira angalive ira uli dhulu Yesu anofwanela dedi-edha. (Mayirelo 2:32-35; Aebere 10:12, 13) N’nga Yesu akalile e-lini Mwene?
Umwene wa Nlungu unodha iri-a ira ifunelo ya Nlungu iireye vailambo yavathi
23. (a) N’nga Yesu u-eliwile e-lini kala Mwene wa Umwene wa Nlungu? (b) N’nga muru o-arela ninodha funjedhan’ni?
23 Yesu u-eliwile kala Mwene yawa ya 1914. (Salimo 110:2) Vangavirile hora indendai ndulimu yawa yen’na ya-anafiye, gulu la makristau latozindiyela ira vyoro-edhiwa vyofuneela vyangakwakwanele yawa ya 1914. Ee-no vyongo vinoireya vailamboi romela yawa ya 1914 vinooni-a ira vyazindiyele makristau oroma vyali vyaimbarimbari. Yesu anga-eliwile kala Mwene, liye atomtamangi-a Satana udha vailambo yavathi. Ee-ni Satana utoidhiwa ira “u-adhina hora yoyeva.” (Apokalipse 12:12) Muru o-arela ninodha funjedha ira ninokala “hora yoyeva” in’na Satanila. Thitho ninodha ona ira chineneeva Umwene wa Nlungu unodha tonga ilambo yavathi thitho ifunelo ya Nlungu inodha ireya vailambwila.—Onani madhu akomoni 22.
