YOFUNJEDHA 01

N’nga Bibilya linaukami-eni a-vi?

Li-ani

Vinooneya ira i-yo othene ninokaechana vyofuka vya ingumi, nyarwa, wukwa na sogolo li-u. Thitho ninosamalelecha vyongo vya dambo na dambo ninga kaana kobiri nokaana banja losangalala. Atu anjinji atozindiela ira Bibilya linorumela vyofuka vyofuneya maningi vyoonga ingumi, thangani-avo velela malangi-o apama onikami-a kaana ingumi yosangalala. N’nga nyo munoona ira Bibilya linooda mkami-a mutu um’mwidhinyo?

1. N’nga pyofuka viivi vinowakula Bibilya?

Bibilya linowakula vyofuka vyofuneya maningi ninga vi: N’nga ingumi iromile a-vi? N’nga ifunelo yaingumi chini? Mwasiwa ngwan’ni atu anoona nyarwa? N’nga chini inoireya mutu akwa? Mwasiwa ngwan’ni utokala kondo dhinjinji angalive ira atu anofuna rendele? N’nga chini inofuna ireya vailambo yavathi? Fuka vyofuka ninga vyevi kai odaweya. Mamiliau aatu anjinji atozindiyela ira vyowakula vya Bibilyani pyovweya.

2. N’nga Bibilya linanikami-e a-vi kaana ingumi yapama dambo na dambo?

Bibilya linovelela malangi-o apama. Mofwanafwani-a, linokami-a mabanja kala osangalala mwaimbarimbari. Linoniwandela munaodele i-yo limbanana nyarwa nokala osangalala na basa lina i-yo. Bukhuli linoukami-ani idhiwa vinofunji-a Bibilya vamyasa dhedhi na myasa dhinango. Ee-no munodha rumelela ira “Malemba othene [venango nionge ira Bibilya lipumbula] . . . mboganyali-a.”—2 Timoteo 3:16.

Bukhuli kalinavolowela malo mwa Bibilya. Mbwenye mwaimbarimbari linodha ukami-ani funjedha Bibilya. Ee-no mudhilimbi-edhenga leri malemba othene alembiwile mu bukhunimu, thitho mufwanafwani-enga vinoonga Bibilya na vinofunjedhanyo.

FUNJEDHANI VINJINJI

Onani mwemo Bibilya mukami-edhele aliwa atu enango, na mwemo munasangalalele nyo voleri Bibilya na upama ovepa kami-iwa ira muode vwechecha vinoonga aliwa.

3. Bibilya linooda nisogolela

Bibilya lili ninga wala wa laterna. Linonikami-a sakula vyongo mwapama noona vinofuna dhaireya sogolo.

Muleri Salimo 119:105, mwamala mutapanye vyofuka vyo-arelavi:

N’nga mulimbo lemba Masalimula athuulelan’ni va mwasa wa Bibilya?
N’nga nyo munothuulelan’ni vyoonga Bibilya?

4. Bibilya linowakula vyofuka vi-u

Onani mwemo Bibilya mwam’kami-ile aliwa purusora mwinango fwanya vyowakula vya vyofuka vya-avwechecha liye wa vyawa vinjinji. Muonele VIDIYO, mwamala mutapanye vyofuka vyo-arelavi.

VIDIYO: Dhowananive kaana idedi-edho! (1:42)

Vidiyonimu pivyofuka viivi vyan’na purusorula?
N’nga funjedha Bibilya wam’kami-ile a-vi?

Bibilya linonilimbi-a ira nifukenga vyofuka. Muleri Mateu 7:7, mwamala mutapanye yofuka yo-arelai:

N’nga pyofuka viivi vinofuna nyo ira Bibilya luuwakuleni?

5. Munooda sangalala mwaleringa Bibilya

Atu anjinji anodhiveliwana leri Bibilya, vyevi pyokami-a maningi. Muonele VIDIYO, mwamala mutapanye vyofuka vyo-arelavi.

VIDIYO: Kuwerenga Baibulo (2:05)

Vidiyonimu, mwasiwa ngwan’ni azombwe katadhiveliwana leri mabukhu?
N’nga ee-ni mwasiwa ngwan’ni aliwa anodhiveliwana leri Bibilya?

Milanyu ya Bibilyani inonididili-a rima noniva-a idedi-edho. Muleri Aroma 15:4, mwamala mutapanye yofuka yo-arelai:

N’nga munodhiveliwa uvwa milanyu ya Bibilyani yonididili-a rima na yoniva-a idedi-edho?

6. Atu enango anooda nikami-a vwechecha pama Bibilya

I-yavo leri Bibilya wavaokane, atu anjinji atozindiela ira tapanya naatu enango vinofunjedha aliwa vinoakami-a ira talivwechechenga pama. Muleri Mayirelo 8:26-31, mwamala mutapanye yofuka yo-arelai:

N’nga ninaode a-vi vwechecha pama vinoonga Bibilya?—Muone maversu 30 na 31.

Lombwana mwinango wa Itiyopiya afuneeleya kami-iwa ira avwecheche vinoonga malemba. Atu anjinji malamboano anoona ira tipama ira atu enango taakami-e livwechecha pama Bibilya

ATU ENANGO ANOONGA IRA: “Funjedha Bibilya kutatila hora.”