YOFUNJEDHA 24
N’nga angelo baani, n’nga aliwa tanoira n’ni?
Yohova unofuna ira niidhiwe vyokuza banjalee ladhulu. Banja leli mutokala angelo anoitaniwa “a-ima a Nlungu.” (Yobo 38:7) N’nga Bibilya linoonga vyoi a-vi vyokuza angelo? N’nga angelo tanoira vyoi a-vi? N’nga angelo othene tali bajani mwa Nlungu?
1. N’nga angelo mbaani?
A-anapanduche ilambo yavathi, Yohova aromile panducha angelo. Mofwanafwana na Nlungu angelo katinaoneya thitho tanokala dhulu. (Aebere 1:14) Angelo tatokalao mamiliau manjinji thitho ngelo uliwethene ngo-iyana na fwee. (Apokalipse 5:11) Aliwa “tanoirana viongile Yohova, movwela malamulwee.”(Salimo 103:20) Walelene Yohova anorumecha angelo va ilambo yavathi ira tadhavelele milanyu nokami-a thitho vulumucha atwee. Malamboano angelo tanosogolela Makristau ira tamalaleele waatu tanofuna idhiwa vya Nlungu.
2. N’nga Satana na viwandavyee mbaani?
Angelo enango tatoosakula a-vwela Yohova. Ngelo uromile irana vyevi ngwenuo unaitaniwa ira “Satana Namanami-a, unonami-a ilambo yothene yavathi weo uli atu.” (Apokalipse 12:9) Satana afuna ira atongenga atu enango, ee-no atonami-a Adamu na Eva thitho adhamale ongonami-a angelo enango ira ta-iyachi vwela Yohova. Angelo tasakunle panduwela Nlungwala, tanoitaniwa viwanda. Voi angelwala tali dhulu, Yohova atoatamangi-edha vailambo yavathivano thitho tanodedi-edha nongiwa vachineneeva.—Muleri Apokalipse 12:9, 12.
3. N’nga Satana na viwandavyee tanonami-a a-vi atu?
Satana na viwandavyee tanonami-a atu anjinji ira teirenga vyamizimu. Irana vwevi koopi-a maningi namwasa oi tanoairi-a roromela ira tanoonga naatu akwide. Mofwanafwani-a, atu enango tarucheyanga, tanodhowa maongana alimbo roromela nyenyedhi, oro-edha vyasogolo, venango mang’anga. Atu enango tabulela tanosakasaka mirombwe waatu oirana vyamizimu. Satana na viwandavyee tanoiri-a atu roromelanga ira tanooda onga naatu akwide. Anoonga vya vyoireya vyoidhiweya pama vyamakalelo o-iyana-iyana. Mbwenye Yohova anoniwenjeli-a ira: “Kamudimbinuwele wa oonga vyamizimu thitho kamufukedhele wa oro-edha vyasogolo.” (Levitiku 19:31) Liye unoniwandela vyevi namwasa oi unofuna nivunela wa Satana na viwandavyee, oi mbaamwidani a Nlungu thitho anofuna nipei-a.
FUNJEDHANI VINJINJI
Sakasakani ira muone vyongo vyapama vinoira angelo, opi-a ororomela vyamizimu thitho vinaire i-yo ira nidhivunele wa Satana na viwandavyee.
4. Angelo tanokami-a atu funjedha vyokuza Yohova
Angelo a Nlungu katinolaleela mooneela waatu. Malo mwa vyevyo tanosogolela anamalaba a Nlungu waatu tanofuna funjedha. Muleri Apokalipse 14:6, 7, mwamala mutapanye vyofuka vyo-arelavi:
-
Mwasiwa ngwan’ni ninofuneela kami-iwanga na angelo nalaleelanga?
-
N’nga monodhivwa a-vi mwathuulela ira angelo tanousogolelani waatu tanofuna funjedha Bibilya? N’nga mwasiwa ngwan’ni munoonga e-no?
5. Murambelenga vyamizimu
Satana na viwanda mbaamwidani a Yohova thitho amwidani-u. Muleri Luka 9:38-42, mwamala mutapanye yofuka yo-arelai:
-
N’nga viwanda vinoairela atu vyoi a-vi?
Kaninofuna ira vyongo vinaniiri-e ira viwanda vinivuti-e. Muleri Dotornomio 18:10-12, mwamala mutapanye vyofuka vyo-arelavi:
-
N’nga viwanda vinofuna onga na i-yo thitho ninami-a vo-indi-edha basa ndhila dhiivi? N’nga pivyongo viivi vinosimbwecha ireya tatamu ulinyo?
-
N’nga munoona ira pyovweya Yohova anikondi-anga irana vyamizimu? Mwasiwa ngwan’ni munoonga e-no?
Muonele VIDIYO, mwamala mutapanye vyofuka vyo-arelavi.
-
N’nga munothuulela ira Paula itumwa yam’mwari-idhe liye mwanee yali yoopi-a? Mwasiwa ngwan’ni munoonga e-no?
-
N’nga Paula afuneela iran’ni ira a-avuti-iwe na viwanda?
Makristau aimbarimbari katinarumela ira viwanda vyaavuti-e. Muleri Mayirelo 19:19 na 1 Akoritiyo 10:21, mwamala mutapanye yofuka yo-arelai:
-
Akala mutokaana vyongo vyovwelana na vyamizimu, mwasiwa ngwan’ni munofwanela vitumeya venango vitatila?
6. Pyoodeya gonji-a Satana na viwandavyee
Satana ngunotonga viwanda. Mbwenye angelo ororomeleya tanosogoleliwa na Mikaeli ndimuwa wa angelo. Mikaeli tidhina n’nango la Yesu. N’nga Mikaeli utokaana kopolo dhoinjiva a-vi? Muleri Apokalipse 12:7-9, mwamala mutapanye vyofuka vyo-arelavi:
-
N’nga unakopolo mbaani vari va Mikaeli na angelwee thitho Satana na viwandavyee?
-
N’nga munothuulela ira anama-arela a Yesu tanofwanela ovanga Satana na viwandavyee?
Munooda gonji-a Satana na viwandavyee. Muleri Yakobo 4:7, mwamala mutapanye yofuka yo-arelai:
-
N’nga munaire a-vi ira mwa-avuti-iwe na Satana vambo-i na viwandavyee?
ATU ENANGO ANOONGA IRA: “Kavali yorucha iliyothene waredha na mavidiyo a jogo, noonela mafilimi oonga vya mizimu. Pyosangalali-a baa-i.”
-
N’nga mathuulelo enala mboopi-a namwasa wan’ni?
MAKUNDO OGWANDELA
Angelo ororomeleya tanonikami-a. Satana na viwandavyee mbaamwidani a Yohova thitho tano-indi-edha basa vyamizimu vofuna nami-a atu.
Vyofuka vyowelela
-
N’nga angelo ororomeleya tanokami-a avi atu funjedha vyoonga Yohova?
-
N’nga Satana na viwandavyee mbaani?
-
Mwasiwa ngwan’ni nyo kamunofwanela ira iliyothene yokuzana na vyamizimu?
IDHIWANI VINJINJI
Muone umboni othonyi-edha ira Yesu ngu Mikaeli ndimuwa wa angelo.
“Kodi Mikayeli Mkulu wa Angelo Ndi Ndani?” (Mwasa wavasaiti)
Muone umboni osikimizela ira Namanami-a ngwaimbarimbari.
Muone vyam’kami-idhe i-yana mwinango i-yachi roromela vyamizimu.
“Anapeza Chifuno cha Moyo” (Nsanja ya Olonda, Julho wa 1993)
Muone mwemo Satana munonami-edha liye atu vowairi-a ira taroromelenga vyamizimu.
“Zoona Zake za Matsenga ndi Ufiti” (Njira ya ku Moyo Wosatha—Kodi Mwaipeza? ikundu 5)
