Vyongo vyothakala vyaireya atu tanodhifuka ira, “Mwasiwa ngwan’ni vyevi vitoireya?” Pyosangalali-a ira Bibilya linowakula yofuka yei!

1. N’nga Satana airilen’ni ira vyothakala virome ireya vailambwila?

Satana Namanami-a atoom’dhimbinuwela Nlungu. Satana afuna ira atongenga atu enango, ee-no atonami-a atu oroma Adamu na Eva ira naaliwene tam’dhimbinuwele Nlungu. Satana atoira vyevi vom’mwandela Eva vyonama. (Maromelo 3:1-5) Atoiri-a ira Eva athuulelenga ira Yohova anoalokothedha vyongo vinango vyapama. Liye athapulela ira atu tanooda kala osangalala masiki ta-avwele Nlungu. Satana atoonga yonama yoroma vowandela Eva ira katinodha kwa. Ngumwasiwa, Bibilya linoonga ira Satana “ngonama thitho ngubaba wa vyonama.”—Juwau 8:44.

2. N’nga Adamu na Eva tasakunle ira n’ni?

Yohova atoava-a Adamu na Eva iliyothene yafuneela aliwa. Liye atooawandela ira tanooda udya vyova-a vyamwiri uliwethene wa mundani mwa Edeni kumi-avo umbo-i baa-i. (Maromelo 2:15-17) Mbwenye Adamu na Eva, tatosakula udya vyova-a vya mwiri waakondi-idhe Nlungu. Eva “atoocha yova-a ya mwiri noroma udya.” Vasogolovee, atomva-a Adamu “naliyene atoroma udya.” (Maromelo 3:6) Othene katavwenle Nlungu. Namwasa oi Adamu na Eva tali ochena, vyali vyo-orucha ira tasakule irana vyapama. Mbwenye aliwa tasakunle avwela Nlungu. Vyairile aliwa vyevi tatodawa thitho tatokonda ira Nlungu taatongenga. Vyairile aliwavi vyatoadi-edha nyarwa dhilukulu.—Maromelo 3:16-19.

3. N’nga vyasakunle Adamu na Eva vyanikuzile a-vi?

Adamu na Eva tangadawile, atova-a vyodawavyo a-imiwa othene. Voonga vya Adamu, Bibilya linoonga ira: “Ngumwasiwa, ninga mwemo madawo mwavolowile aliwa mwiilamboni dhela mwa mutu m’mbo-i, na wukwa dhela mwa madawo, wukwao watomwadheya waatu othene, neri-a othene tatodawa.”—Aroma 5:12.

I-yo atu ninogumanana nyarwa va myasa dho-iyana-iyana. Hora dhinango ninogumanana nyarwa namwasa oi kanisakunle vyongo mwazelu. Thitho hora dhinango ninogumanana nyarwa namwasa oi atu enango tasakunle vyongo modaweya. Venango ninorucheya namwasa oi nitogumanana vyongo vyo-odedi-edha.—Muleri Namalaleya 9:11.

 FUNJEDHANI VINJINJI

4. N’nga mbaani unoiri-a ira nigumanengana nyarwa?

Atu anjinji tanororomela ira Nlungu ngunotonga ilambwila. N’nga vyevi pyaimbarimbari? Muonele VIDIYO.

Muleri Tiyago 1:13 na 1 Juwau 5:19, mwamala mutapanye yofuka yo-arelai:

• N’nga Nlungu ngunoiri-a ira nigumanengana nyarwa?

5. N’nga vyongo vikadhi viwendanga a-vi kumela varomile Satana tonga?

1. Adamu na Eva tangali Paradaizoni tali atu olongomana. Mbwenye tangamvwenle Satana tatomdhimbinuwela Yohova

2.   Tangamadhi mpanduwela, ilamboni mwatodhala vyodawa, nyarwa, na wukwa

3. Yohova unodha mali-a madao, nyarwa, na wukwa. Thitho atu tanodha kala olongomana Paradaizoni ninga vyali aliwa walelene

6. I-yo atu nagumanana nyarwa vinonkuza maningi Yohova

N’nga Nlungu vinom’kuza i-yo nagumanangana nyarwa? Dhoweni nioneni vyalembile Mwene Davide na rumiwi Pedru. Muleri Salimo 31:7 na 1 Pedru 5:7, mwamala mutapanye yofuka yo-arelai:

• N’nga munovwa a-vi mwathuulela ira Yohova unoona nyarwa dhinogumanana i-yo thitho unonisamalela?

 MAKUNDO OGWANDELA

Satana Namanami-a thitho Adamu na Eva mbaromi-idhe nyarwa dhothene dhinoireya vailamboi. Mbwenye Yohova unokuziwa maningi naonanga nyarwa thitho mo-odimbela unodha mali-a nyarwa dhothene.

Vyofuka vyowelela

• N’nga chonama iivi Satana Namanami-a yaongile liye wa Eva?

• N’nga a-vwela wa Adamu na Eva unikuzile a-vi i-yo othene?

• N’nga ninoidhiwa a-vi ira Yohova unonikhumbanyedha nagumanana nyarwa?