YOFUNJEDHA 34
N’nga ninathonyi-edhe a-vi ira ninodhiveliwana Yohova?
N’nga va ee-ni mutoroma mdhiveliwana maningi Nlungu kwaranya vyaroma nyo funjedha Bibilya? N’nga munofuna mudhowenave kala vauxamwali olimba na liye? Akala ti e-no, muthuulelenga ira Yohova aonanga ira munodhowanave m’dhiveliwana, paevo vanofuna liye udhiveliwanani maningi. N’nga munathonyi-edhe a-vi ira munom’dhiveliwana?
1. N’nga ninathonyi-edhe a-vi ira ninom’dhiveliwana Yohova?
Ninothonyi-edha ira ninom’dhiveliwana Yohova navwelanga malamulwee. (Muleri 1 Juwau 5:3.) Liye kanonikanyi-edha ira nim’vwelenga. Mbwenye unofuna ira mutu uliwethene asakulenga ekene mvwela venango amvwela. Yohova unoira vyevi na mwasa ofuna ira “nim’vwelenga kumela vathi va rima.” (Aroma 6:17) Vyevi vinothapulela ira liye unofuna ira mum’vwelenga na mwasa oi munom’dhiveliwana a-kala mokanyi-edheya. Ikundu 3 na 4 ya bukhuli inodha ukami-ani thonyi-edha ira munom’dhiveliwana Yohova moira vyongo vinom’sangalali-a na rambela vyongo vinoidanana liye.
2. Mwasiwa ngwan’ni vinonirucha thonyi-edha ira ninom’dhiveliwana Yohova?
Bibilya linoonga ira: “Nyarwa dha mutu olongomana tidhinjinji.” (Salimo 34:19) Othenene ninorucheya ira nithonyi-edhe ira ninom’dhiveliwana Nlungu na mwasa oi nili atu odawa. Ninooda gumanana vyorucha vamwasa orambulela kombiri, ireliwa vyongo vyo-olongomana na nyarwa dhinango. Nagumanana nyarwa, vinokala vyorucha ira niire vyongo vinofuna Yohova. Mbwenye mwadhilimbi-edhanga kala ororomeleya iranga vyongo vinofuna Yohova, paevo vanothonyi-edhanyo ira munom’dhiveliwana maningi kwaranya yongo iliyothene. Mwairanga vyevi munothonyi-edha ira muli ororomeleya wa Yohova thitho liye unodha kala ororomeleya wa nyo. Yohova kanodha u-iyani.—Muleri Salimo 4:3.
FUNJEDHANI VINJINJI
Muone mwasee unam’mwiri-a Yohova sangalala mwam’vwelanga thitho vinaukami-eni ira mudhowenave kala ororomeleya wa liye.
3. Mwasa wenuo unoukuzani
Movwelana na vinoleri i-yo Bibilyani m’bukhu la Yobo, Satana aongile ira Yobo am’labela Nlungu na mwasa wa idyani. Malamboano thitho Satana unoonga ira atu tanom’labela Yohova na mwasa wa idyani. Muleri Yobo 1:1, 6–2:10, mwamala mutapanye vyofuka vyo-arelavi:
-
N’nga Satana aongile ira Yobo avwela Yohova namwasa wan’ni?—Muone Yobo 1:9-11.
-
N’nga Satana unaonga ira atu othene thangani-avo nyo anovwela Yohova namwasa wan’ni?—Muone Yobo 2:4.
Muleri Yobo 27:5b, mwamala mutapanye yofuka yo-arelai:
-
N’nga Yobo athonyi-edhe a-vi ira anom’dhiveliwana Yohova na rimee wethene?
Yobo atothonyi-edha ira anodhiveliwana Yohova vokalave ororomeleya wa liye
Na-iyene ninothonyi-edha ira ninom’dhiveliwana Yohova mokalave ororomeleya wa liye
4. Musangalali-enga rima wa Yohova
Muleri Sanganiko 27:11, mwamala mutapanye vyofuka vyo-arelavi:
-
N’nga Yohova unovwa a-vi mwairanga vyongo mwazelu thitho mwam’vwelanga? Mwasiwa ngwan’ni munoonga e-no?
5. Pyoodeya kala ororomeleya wa Yohova
Ninodhilimbi-edha wandela atu enango vyooga Yohova na mwasa om’dhiveliwana. Thitho ninoirana vyevi vothonyi-edha ira nili ororomeleya wa liye angalive ira hora dhinango vinokala vyorucha. Muonele VIDIYO, mwamala mutapanye vyofuka vyo-arelavi.
-
N’nga nyo vinouruchani wandela atu enango vyoonga Yohova?
-
Movwelana na vioni i-yo vidiyonimu, chini yam’kami-idhe Grayson ira amali-e ova?
Nadhiveliwangana vyongo vinodhiveliwana Yohova noidanana vyongo vinoidanana liye, kaninorucheya ira nikale ororomeleya wa liye. Muleri Salimo 97:10, mwamala mutapanye vyofuka vyo-arelavi:
-
Movwelana na vifunjedhile i-yo, n’nga pivyongo vinango viivi vinodhiveliwana Yohova? N’nga ndi vyongo vivi vinoidanana liye?
-
N’nga munaire a-vi ira murome dhiveliwana vyongo vyapama noidanana vyongo vyothakala?
6. Vyongo vinoniwendela pama nam’vwelanga Yohova
Atu anomvwela Yohova vyongo vinowawendela pama hora dhothene. Muleri Esaya 48:17, 18, mwamala mutapanye vyofuka vyo-arelavi:
-
Movwelana na lembali, n’nga pyovweya roromela ira hora dhothene Yohova aniva-anga malangi-o unoidhiwa ira malangi-oao anonikami-a? Mwasiwa ngwan’ni munoonga e-no?
-
Fiyedha e-ni, n’nga funjedha Bibilya thitho vyoonga Nlungu waimbarimbari Yohova uukami-idheni a-vi?
MUTU UNANGO UNOODA UFUKANI IRA: “N’nga vyoira vyanga vinooda m’sangalali-a Nlungu?”
-
N’nga nyo munaleri lemba livi loi linooda m’kami-a idhiwa ira Yohova unosangalala venango sukwala na vinoira i-yo?
MAKUNDO OGWANDELA
Munothonyi-edha ira munom’dhiveliwana Yohova vomvwela nodhowanave kala ororomeleya wa liye angalive ira munogumanana nyarwa.
Vyofuka vyowelela
-
N’nga mufunjedhilen’ni va ifwanafwani-o ya Yobo?
-
N’nga munathonyi-edhe a-vi ira munom’dhiveliwana Yohova?
-
N’nga chini inaukami-eni ira mudhowenave kala ororomeleya wa Yohova?
IDHIWANI VINJINJI
Muone vinaukami-eni kala ororomeleya wa Yohova na pingoni.
“Munthu Wokhulupirika, Mudzamuchitira Mokhulupirika” (16:49)
Muone vinoonga Satana vyokuza atu.
Muone mwemo a-ima munathonyi-edhele aliwa ira anom’dhiveliwana Yohova.
N’nga zombwe venango sikana unokanyi-edhiwa naafwe irana vyongo vyothakala unaire a-vi ira adhowenave kala ororomeleya wa Nlungu?
