YOFUNJEDHA 44
N’nga mafesta malukulu othene a dambo lothuulela vyoireya vinango anomsangalali-a Nlungu?
Yohova unofuna ira nisangalalenga na ingumi, thitho unofuna ira hora dhinango niirenga mafesta. N’nga mafesta na maferiado othene anom’sangalali-a Nlungu? N’nga ninathonyi-edhe a-vi ira ninom’dhiveliwana Yohova vosakula vyofwanela ira va mwasa wen’na?
1. Mwasiwa ngwan’ni mafesta manjinji katinom’sangalali-a Yohova?
Munodabwa idhiwa ira mafesta manjinji katinovwelana na vinofunji-a Bibilya thitho enango aromi-iwile na mareligiau onama. Thitho mafesta enango anokuzana na vyongo vyamizimu venango aromile namwasa ororomela ira vatokala yongo inango inodhowanave kaana ingumi mutu akwa. Vatokala enango thitho aromile namwasa ororomela vyaukwiri venango roromela ira vyongo vinango vinoireya namwasa wa ngari. (Esaya 65:11) Moi e-no Yohova atowenjeli-a arumiwe ira: “Mu-iyane naaliwa . . . kamusakwinye yongo yothakhali-iwa.”—2 Akoritiyo 6:17. a
2. N’nga Yohova unovwa a-vi aonanga atu tairanga mafesta olemeza atu enango?
Yohova anoniwenjeli-a ira ninofwanela rambela “roromela mwa mutu uliwethene okumela tumbuluni.” (Muleri Jeremiya 17:5.) Vatokala malambo anango amaferiyado akaathi-iwile vofuna lemeza anamatonga venango anyakondo. Enango tanoira mafesta othuulela dambo lawachenle aliwa ufulu odhitonga oka, vizindielo vyailambo iwa ninga bandera. (1 Juwau 5:21) Enango thitho tanoira mafesta vofuna lemeza magurupu andale, na magurupu aanamatonga tanolimbana vofuna dhi-a ufulu waatu. N’nga Yohova unavwe a-vi akala ira ninoirana mafesta olemeza atu enango venango magurupu aanamatonga, simbwasimbwa waale tanolimbi-a makundu o-iyana na vinofuna Nlungu?
3. N’nga mbamakalelo avi anoiri-a ira tundu wa mafesta enango ukale o-ofwanelela?
Bibilya linokondi-a vyongo ninga “umwa mokwaranyi-a madile, mafesta a madugudugu, noumwa mopikisana.” (1 Pedru 4:3) Atu tairanga mafesta enango tanoira vyongo mo-odhikondi-a thitho tanoirana vyamararuo. Ira nikaleve vauxamwali na Yohova, ninofwanela rambela mafesta anolimbi-a makalelo othakala ninga enala.
FUNJEDHANI VINJINJI
Muone vinairenyo ira mum’sangalali-enga Yohova vosakula vyongo mofwanelela vamwasa wa maferiyado na mafesta.
4. Kamwiirenga mafesta o-osangalali-a Yohova
Muleri Aefeso 5:10, mwamala mutapanye vyofuka vyo-arelavi:
-
N’nga ninofwanela sikimizelan’ni ira niidhiwe akala pyofwanela irana festa inango?
-
N’nga mbamafesta avi enao tali ovweya waninyuo?
-
N’nga munothuulela ira Yohova unosangalala na mafesta enao?
Mofwanafwani-a, nyo mwatoroma thuulelavo ira mathuulelo a Nlungu mboi a-vi vamwasa osangalalela vadambo lobaliwa? Bibilya kalinoonga vya rumiwi wa Yohova uliwethene aromilenga sangalalavo va dambo lobaliwa. Mbwenye linoonga vyaatu ambili baa-i tairile vyevi, thitho othene enao katalabela Nlungu. Muleri Maromelo 40:20-22 na Mateu 14:6-10. Mwamala mutapanye vyofuka vyo-arelavi.
-
N’nga vamafesta othenala, vaireile yongo yolandana ivi?
-
Movwelana na vimadhi i-yo leri mumaverswala, n’nga munoona ira mathuulelo a Yohova mboi a-vi vamwasa osangalalela malambo obaliwa?
Venango munodhifuka ira, ‘N’nga Yohova unosukwala akala nditoirana mafesta a malambo obaliwa venango mafesta enango o-ovwelana na makundo a Bibilyani?’ Muleri Ekisodo 32:1-8. Mwamala, muonele VIDIYO notapanya vyofuka vyo-arelavi.
-
Mwasiwa ngwan’ni ninofwanela sikimizela akala vinofuna i-yo irana pyorumeleya wa Yohova?
-
N’nga ninaviire a-vi vyevi?
N’nga munaidhiwe a-vi mafesta o-osangalali-a Nlungu?
-
N’nga festa yen’na inovwelana na vinofunji-a Bibilya? Ira mwiidhiwe, musakesake mwaromele aliwa.
-
N’nga festa yen’na inolemeza atu, magulu venango vizindiyelo vyoi vinooniwa kala vyofuneya maningi muilambo? Ninofwanela m’lemeza Yohova kwaranya uliwethene thitho ninororomela ira nguliye unofuna dhamali-a nyarwa dhothene vailamboi.
-
N’nga vinoira atu vafesta yen’na vinovwelana na makundo a Bibilyani? Ninofwanela dhilimbi-edha kalave ochena vamethoni va Nlungu.
5. Mukami-enga atu enango ira talemezenga vinororomelanyo
Kai vyokweya konda atu enango taukanyi-edhangani ira muire vambo-i naaliwa mafesta o-osangalali-a Yohova. Mbwenye, munoira pama awandelamo mokurudheya thitho mopwaseya mwasa wa-anakalelanyo vambo-i naaliwa vamafestanivo. Ira muone ifwanafwani-o ya moda unairelenyo vyevi, muonele VIDIYO.
Muleri Mateu 7:12, mwamala mutapanye vyofuka vyo-arelavi:
-
Movwelana na versuli, n’nga munofwanela awandela abalinyu ira ta-iyachi irana festa inango?
-
N’nga munaasikimizeli-e a-vi abalinyu ira munoadhiveliwana thitho munoathuulela angalive ira kamunoira naaliwa vambo-i festa inangwee?
6. Yohova unofuna ira nisangalalenga
Yohova unofuna ira nisangalalenga vambo-i naabali-u thitho naafwi-u. Muleri Namalaleya 8:15, mwamala mutapanye yofuka yo-arelai:
-
N’nga versuli linotonyi-edha a-vi ira Yohova unofuna ira nisangalalenga?
Yohova unofuna ira atwee tasangalalenga. Muonele VIDIYO yothonyi-edha mwemo munoireela aliwa vyevi vamigumanwi-u ya vilambo vyothene.
Muleri Agalatiya 6:10, mwamala mutapanye vyofuka vyo-arelavi:
-
N’nga ninofwanela iranao vambo-i maferiyado ovweya ninga ndhila yoirela atu enango vyapama?
-
N’nga mungasangalalile kanyi-edhiwa velela yotuva inango na mwasa wa festa inangwee, venango na mwasa oi munofunechecha ivelela?
-
Hora dhinango, a Mboni dha Yohova anjinji tanoairelecha a-imiwa vyongo vinango vyavakundo. Thitho hora dhinango anoagulela vyotuva vya-adedi-edhela aliwa. Akala mutokaana a-ima, n’nga pivyongo vivi vyavakudo vinaairelenyo?
ATU ENANGO ANOONGA IRA: “Kavinabala ira feriyadoyo iromiwile a-vi. Yofuneya choi vahora yen’na ninokaana ngari yosangalala vambo-i naabali-u thitho afwi-u.”
-
N’nga nyo munam’mwandele vyoi a-vi mutu wenuo?
MAKUNDO OGWANDELA
Yohova unofuna ira nisangalalenga vambo-i naabali-u thitho afwi-u. Mbwenye liye unofuna ira na-airenga vambo-i naatu mafesta o-osangalali-a Yohova.
Vyofuka vyowelela
-
N’nga ninofwanela dhifuka vyofuka vivi ira niidhiwe akala ira festa inangwee inom’sangalali-a Yohova venango kabe?
-
N’nga ninaakami-e a-vi abali-u naafwi-u ira tavwecheche mwasiwa wa-anasangalalela i-yo naaliwa va maferiyado enangwee?
-
N’nga ninoidhiwa a-vi ira Yohova unofuna ira nisangalalenga?
IDHIWANI VINJINJI
Muone maferiyado enango oi Makristau katinosangalalana.
“N’chifukwa Chiyani a Mboni za Yehova Sachita Nawo Maholide Ena?” (Mwasa wavasaiti)
Muone myasa 4 inoniiri-a roromela ira mafesta a malambo obaliwa katinom’sangalali-a Nlungu.
“N’chifukwa Chiyani a Mboni za Yehova Sakondwerera Masiku Akubadwa?” (Mwasa wavasaiti)
Muone zombwe unango mwairele liye vyongo mopwaseya xikolani anganyoziwile namwasa okonda irana mafesta.
Makristau anjinji tatosakula ira ta-asangalalenga vambo-i naatu vamafesta akomoni wa yawa. N’nga tanovwa a-vi tathuulela vyasakunle aliwavyo?
“Amasangalala Ngakhale Kuti Sachita Khirisimasi” (Nsanja ya Olonda, 1 wa Dezembro wa 2012)
a Muone Madhu a komoni 5 ira mwiidhiwe vinairenyo atu enango tairanga festa ya feriyado inango.
