YOFUNJEDHA 46
N’nga mwasiwa ngwan’ni munofwanela dhivelela thitho badiziwa?
Mutu unodhivelela wa Yohova am’lanyedha mulobelo ira unofuna alambelenga liye ekene thitho ira a-elenga vyofuna vya Nlungu valimburo loroma vaingumiyee. (Salimo 40:8) Aira e-no unobadiziwa. Wen’na unokala umboni oi atodhivelela wa Yohova. Ee-no, dhivelela wa Yohova ndi yongo yofuneya maningi, yeyo mutu inofwanela liye irana vaingumiyee. Voi dhivelela wa Yohova kofuneya maningi thitho unooda chinja ingumi inyu. N’nga chini inauiri-eni sakula vyevi?
1. N’nga chini inoiri-a ira mutu adhivelele wa Yohova?
Ninodhivelela wa Yohova namwasa oi ninom’dhiveliwana maningi. (1 Juwau 4:10, 19) Bibilya linoniwandela ira: “Um’dhiveliwengana Yohova Nlungwao na rimao wethene, ingumiyao yothene, mathuulelwao othene thitho kopolo dhaa dhothene.” (Marku 12:30) Ninothonyi-edha ira ninom’dhiveliwana Nlungu, mwa vyoonga na vyoira vi-u. Vyevi ninooda vilandani-a na lombwana na i-yana oi tanosakula thelana namwasa oi tanodhivelana. Saasawa thitho na mutu unom’dhiveliwana Yohova. Udhiveluo unom’mwiri-a ira adhivelele wa liye thitho badiziwa.
2. N’nga Yohova unoaraeli-a a-vi anamalabee tabadiziwile?
Mwabadiziwa munodha volowa banja lapama maningi la Yohova. Thitho munodha ona ira Yohova unoudhiveliwanani mundhila dho-iyana i-yana thitho munodha kala vauxamwali olimba maningi kwaranya va-eeni. (Muleri Malaki 3:16-18.) Munodha roma m’mona Yohova ninga Babinyu thitho munodha kaana abali naarongola vailambo yothene yavathi ale tanom’dhiveliwana Yohova thitho tanoudhiveliwanani maningi. (Muleri Marku 10:29, 30.) Mbwenye vatokala vyongo vinango vyevyo vinofwanelanyo irana mwa-anabadiziwe. Munofwanela funjedha vyoonga Yohova, m’dhiveliwana thitho m’roromela Mwanee. Mwaira e-no mudhivelele wa Yohova, thapulela ira mum’mwandele dhela mulobelo ira munodha m’labela va ingumiinyu yothene. Mwaira vyongo vyevi nobadiziwa munodha kaana ngari yodhakaana ingumi yodhowa nodhowa. Ngumwasiwa Madhu a Nlungu anoonga ira: “Ubadizo . . . unovulumucha mutu.”—1 Pe. 3:21.
FUNJEDHANI VINJINJI
Sakasakani ira mwiidhiwe funeya odhivelela wa Yohova thitho nobadiziwa.
3. I-yo othene ninofuneela sakula unofuna i-yo m’labelanga
Walelene wu Israeli, atu enango tathuuulela ira tanooda m’lambelanga Yohova, ikundu inango talambelanga milungu yonama ninga Baala. Mbwenye Yohova atom’ruma namaongelee Eliya ira amakami-e atwao zindiyela ira irangana vyevi ko-ofwanelela. Muleri 1 Mamwene 18:21, mwamala mutapanye yofuka yo-arelai:
-
N’nga Aisraeli tafuneela sakula iran’ni?
Mofwanafwana na Aisraeli, i-yo thitho ninofuneela sakula unofuna i-yo mlabelanga. Muleri Luka 16:13, mwamala mutapanye vyofuka vyo-arelavi:
-
Mwasiwa ngwan’ni kavinoodeya m’lambela Yohova ikundu inango nilambelanga mutu venango yongo inangoyee?
-
N’nga ninathonyi-edhe a-vi Yohova ira nitosakula m’labela liye ekene baa-i?
4. Muthuulelenga vinoira Yohova vothonyi-edha ira unoudhiveliwanani
Yohova utoniva-a vyotuva vinjinji vyapereso yavadhulu. N’nga i-yo ninamva-en’ni? Muonele VIDIYO.
N’nga Yohova uuthonyi-edheleni udhivela mundhila dhiivi? Muleri Salimo 104:14, 15 na 1 Juwau 4:9, 10, mwamala mutapanye vyofuka vyo-arelavi:
-
N’nga pyotuva viivi viuva-idheni Yohova vinosimbanyo maningi?
-
N’nga vyotuva vyevyo vinouiri-ani ira mum’monenga a-vi Yohova?
Mutu aniva-a yotuva inangwee yoi itonisangalali-a maningi ninom’simba. Muleri Dotornomio 16:17, mwamala mutapanye yofuka yo-arelai:
-
Mwathuulela vyothene viuireleni Yohova, n’nga munoona ira munam’va-en’ni?
5. Ninofwanya maraeli-o manjinji nadhivelela wa Yohova
Atu anjinji tanothuulela ira tanooda kala osangalala akala ira mbovweya, akala tanolaba basa lapama, venango akala tatokaana kobiri dhinjinji. N’nga vyevi pyaimbarimbari? Muonele VIDIYO, mwamala mutapanye vyofuka vyo-arelavi.
-
Mwasiwa ngwan’ni Andrey atosakula i-ya ugwa bola angalive ira anoudhiveliwana maningi?
-
N’nga munothuulela ira atoira pama i-ya ugwa bola nodhivelela wa Yohova? Mwasiwa ngwan’ni munoonga e-no?
Rumiwi Paulo a-anakale Kristau anolaba basa lavadhulu. Liye ali angafunjile mafunji-edho okuza malamulo a Yuda thitho atofunji-iwa na purusori ovweya maningi vahora yeniyo. Mbwenye ato-iya vyothene vyevyi kala Kristau. N’nga Paulo atonong’onedha libondo na vyasakunle liyevi? Muleri Afilipi 3:8, mwamala mutapanye vyofuka vyo-arelavi:
-
Mwasiwa ngwan’ni Paulo atoonga ira vyaira liye voroma a-anakale Kristau, vyali ninga dhungu la vikatha?
-
N’nga afwaidhe maraeli-o oi a-vi namwasa wa vyongo vyasakunle liyevi?
-
N’nga munothuulela ira ingumiinyu inooda kala yapama maningi akala mutosakula m’labela Yohova? Mwasiwa ngwan’ni munoonga e-no?
Paulo angakanle Kristau atofwanya vyongo vinjinji kwaranya vya-iidhe liye
ATU ENANGO ANOONGA IRA: “Mutu kanofuneela dhivelela maningi wa Nlungu, male alobelanga baa-i.”
-
Mwasiwa ngwan’ni munoona ira dhivelela wa Yohova kofuneya maningi?
MAKUNDO OGWANDELA
Ninodhivelela wa Yohova thitho badiziwa namwasa om’dhiveliwana.
Vyofuka vyowelela
-
Mwasiwa ngwan’ni Yohova ngofwanela m’dhiveliwana nom’lambela na rimi-u othene?
-
N’nga Yohova unoaraeli-a a-vi anamalabee tabadiziwile?
-
N’nga nyo mungadhiveliwile velela ingumiinyu wa Yohova?
IDHIWANI VINJINJI
Muone mwasee namaumba unango na mutu wadodoliso logwa bola maningi mwasakulele aliwa dhivelela wa Yohova.
Zimene Achinyamata Amafunsa—Kodi Ndidzachita Zotani Pamoyo Wanga?—Zimene Anasankha (6:54)
Muone myasa dhinango dhinairi-e mutu ira adhivelele wa Yohova.
“N’chifukwa Chiyani Muyenera Kudzipereka kwa Yehova?” (Nsanja ya Olonda, 15 wa Janeiro wa 2010)
Muonele nyumbwila ira muone mwemo atu anodhivelela wa Yohova munosangalalela aliwa.
Mumwasa oi “Kwa zaka zambiri ndinkadzifunsa kuti, ‘Kodi Mulungu anatilengeranji anthufe?’” muone vyam’mwiri-idhe mutu unango thuulela vyongo vyaona liye ira pyofuneya maningi vaingumiyee.
“Baibulo Limasintha Anthu” (Nsanja ya Olonda, ya 1 wa Novembro wa 2012)
