YOFUNJEDHA 47
N’nga mutokozeya badiziwa?
Fiyedha ee-ni mutofunjedha vinjinji vyoonga Yohova kumela Bibilyani. Kaninokaikela ira vifunjedhilenyo, vitoukami-ani chinja vyongo vinango vaingumiinyu. Mbwenye vinooneya ira vatokala vyongo vinango vinouyimwanani-ani ira mudhivelele wa Yohova thitho badiziwa. Yofunjedha yei, ninofuna nitapanye vyongo vinango vinoimwanani-a atu enango badiziwa thitho vinairenyo, ira vyevi vya-auimwanani-eni badiziwa.
1. N’nga munofwanela idhiwa vyongo vyoinjiva a-vi ira mubadiziwe?
Ira mubadiziwe, munofwanela “idhiwa mwapama imbarimbari.” (1 Timoteo 2:4) Vyevi kavinothapulela ira munofwanela idhiwa yowakula ya yofuka iliyothene inaufukengani atu yoonga Bibilya. Ninoonga e-no namwasa oi angalive Makristau tabadiziwile walelelene, tanodhowanave funjedha vyongo vinango. (Akolose 1:9, 10) Mbwenye, ira mubadiziwe munofwanela roma vwechecha pama vinofunji-a Bibilya. Andimuwa avapingoni vinyu tanodhaukami-ani idhiwa akala mutoidhiwa vinjinji vyokwakwanela vyoonga Bibilya.
2. N’nga pivyongo vinango vivi vinofunanyo irana ira mubadiziwe?
Ira mubadiziwe, munofwanela, “chinyuwa nodhimbinuwa.” (Muleri Mayirelo 3:19.) Vyevi vinothapulela ira munofwanela dhivwela tangaranga namwasa wa vyodawa vyairilenyo thitho vepa Yohova ira auleveleleni. Munofwanela thitho dhilimbi-edha rambela irangana vyongo vinoona Nlungu ira pyothakala noirana vinofuna liye. Wenjedhela veva, munofwanela fiyanga vamigumanoni ya pingo thitho laleela ninga namalaleya o-obadiziwa.
3. Mwasiwa ngwan’ni kamunofwanela rumeli-a ira ova uuyimwanani-eni badiziwa?
Atu enango tanoova badiziwa namwasa oi tanoona ira katinaode kwakwaneli-edha vilanyedhile aliwa wa Yohova. Pyaimbarimbari ira hora dhinango munooda dawi-a vyongo. Mbwenye idhiwani ira alombwana na a-iyana ororomeleya taongiwile Bibilyani naaliwene tanodawi-a vyongo. Yohova kanadedi-edhela ira arumiwee tairenga vyongo mo-odawi-a yongo. (Muleri Salimo 103:13, 14.) Yohova unosangalala mwadhilimbi-edhanga irana vyongo vyapama. Liye ngokozeya ukami-ani. Thitho Yohova unonisikimizeli-a ira “kavali inofuna nimwadhani-a na udhivelee.”—Muleri Aroma 8:38, 39.
FUNJEDHANI VINJINJI
Muone mwemo m’mwidhiwa pama Yohova thitho rumeli-a ira aukami-eni munaukami-edheleni aliwa ira mumali-e vyongo vinauyimwanani-eni badiziwa.
4. Dhilimbi-edheni m’mwidhiwa pama Yohova
N’nga munofwanela idhiwa vyongo vyoinjiva a-vi ira mubadiziwe? Ira mum’dhiveliwengana Yohova thitho irana vyongo vyomsangalali-a munofwanela m’mwidhiwa pama. Muonele VIDIYO ira muone mwemo anamafunjedha Bibilya afwinyu vailambo yothene mwairile aliwa vyevi. Mwamala mutapanye yofuka yo-arelai.
-
Chini yakami-idhe atu tali vidiyonimu ira tabadiziwe?
Muleri Aroma 12:2, mwamala mutapanye vyofuka vyo-arelavi:
-
N’nga munokaikela ira vinofunji-a Bibilya venango vinofunji-a a Mboni dha Yohova pyaimbarimbari?
-
Akala ndi ee-no, munoiravon’ni?
5. Pyoodeya mali-a vyongo vinauyimwanani-eni badiziwa
Mutu uliwethene unogumanana nyarwa asakula dhivelela wa Yohova nobadiziwa. Ira muone ifwanafwani-edho ya vyevi, muonele VIDIYO, mwamala mutapanye vyofuka vyo-arelavi.
-
N’nga Narangerel amali-idhe vyongo viivi vyoi vyangam’mwimwanani-idhe labela Yohova?
-
N’nga dhiveliwana Yohova wam’kami-idhe a-vi ira alimbanena vyongo vyoi vyangam’mwimwanani-idhe badiziwa?
Muleri Sanganiko 29:25 na 2 Timoteo 1:7, mwamala mutapanye yofuka yo-arelai:
-
Mwasiwa ngwan’ni ninolimba rima mali-a vyongo vyoi vyanganiimwanani-idhe labela Yohova?
6. Kamukaikele ira Yohova unoukami-ani
Yohova ngokozeya ukami-ani ira muire vinom’sangalali-a. Muonele VIDIYO, mwamala mutapanye vyofuka vyo-arelavi.
-
Vidiyonimu, chini yam’mwimwanani-a namafunjedhula ira abadiziwe?
-
N’nga afunjedhile likundo livi lelo lam’kami-idhe ira a-akaikelenga ira Yohova unom’kami-a?
Muleri Esaya 41:10, 13, mwamala mutapanye yofuka yo-arelai:
-
Mwasiwa ngwan’ni kamunofwanela kaikela ira munooda kwakwaneli-edha vyothene vyalanyedhilenyo vyadhivelelanyo wa Yohova?
7. Dhowananive simba Yohova namwasa wa udhivela wauthonyi-edheni liye
Mwathuulelanga maningi udhivela wauthonyi-edheni Yohova, paevo vanom’simbanyo maningi thitho vyevyi vinouiri-ani ira mumlabelenga na ingumiinyo yothene. Muleri Salimo 40:5, mwamala mutapanye yofuka yo-arelai:
-
N’nga pivyongo vivi viuireleni Yohova vyoi munovisimba maningi?
Namaongela Jeremiya anoodhiveliwana Yohova na madwee thitho anosimba maningi ngari yoidhiweya na dhina la Yohova. Liye atoonga ira: “Ndingafwaidhe madhwinyu ndatoadya. Thitho madhwinyu anondidhiveliwi-a nosangalali-a rimanga, voi miyo ndinoitaniwa na dhinalinyu, nyo Nlungu wa maziza.” (Jeremiya 15:16) Muwakule vyofuka vyo-arelavi:
-
Mwasiwa ngwan’ni kala wa Mboni dha Yohova ndi ngari yavakundu?
-
N’nga nyo munofuna badiziwa kala wa Mboni dha Yohova?
-
N’nga vatokala yongo iliyothene inouimwanani-ani badiziwa?
-
N’nga munaire a-vi ira mukwakwaneli-edhe ifunelo yoi mubadiziwe?
ATU ENANGO ANOONGA IRA: “Ndinoova ira ndabadiziwa ndinooda imwanana kwakwaneli-edha vinalanyedhe miyo.”
-
N’nga nyo munoona e-no?
MAKUNDO OGWANDELA
Yohova unodha ukami-ani mali-a nyarwa iliyothene inauimwanani-eni badiziwa.
Vyofuka vyowelela
-
N’nga munofwanela idhiwa vyongo vyoinjiva a-vi ira mubadiziwe?
-
N’nga munofuneela chinja vyongo viivi vaingumiinyu ira mubadiziwe?
-
Mwasiwa ngwan’ni kamunofwanela ova badiziwa?
IDHIWANI VINJINJI
Muone mwasiwa dhiveliwana Yohova kofuneya ira mutu abadiziwe.
“Kodi Ndinu Okonzeka Kubatizidwa?” (Nsanja ya Olonda, Março wa 2020
Muleri mwasula ira muidhiwe vinairenyo akala vatokala vyongo vinangovyee vinouimwanani-ani badiziwa.
“Chikundiletsa Kubatizidwa N’chiyani?” (Nsanja ya Olonda, Março wa 2019)
Muone vyairile mutu unango ira amali-e vyongo vyam’mwimwanani-a badiziwa.
Voroma mutu unango, dhinale Ataa, anokaikela ira abadiziwe. Muone yamkami-idhe sikimizela ira anofuneela badiziwa.
