Nakala na Makristau afwi-u, ninovwa ninga Mwene Davide wenuo aongile ira: “Pyapama thitho vyosangalali-a maningi abali takala vambo-i movwelana.” (Salimo 133:1) Thitho vwelana weu kunodhave okene. I-yo othene ninofwanela kaana thindhi ira nidhowenave vwelana naabali-u.

1. Atu a Yohova anoira vyongo viivi vinoudabwi-ani?

Mwadhowa ilambo inango mafwanyeya vamigumanoni, abali naarongola anouwachelani namandha menli, anouthonyi-edhani udhivela thitho munokala omasuwa angalive ira kamunavwa iwongelo iwa. Vili e-no namwasa oira vyongo vino-indi-edha i-yo basa vofunjedha Bibilya, pyolandana uliwethene. Wenjedhela veva, ninodhilimbi-edha thonyi-edhana udhivela. Mo-obala unokala i-yo, othene “ninoitana va dhina la Yohova nomlabela movwelana.”—Zefwaniya 3:9.

2. N’nga munakami-e a-vi ira pingoni mudhowenave kala vwelano?

Bibilya linoonga ira: “Mudhivelane maningi kumela vathi varima.” (1 Pedru 1:22) N’nga nyo muno-indi-edha a-vi basa malangi-oala? Malo moonanga vyongo vinodawi-a atu enango, muthuulelenga maningi makalelwiwa apama. Kamuwaredhenganave atu ale anodhiveliwana vyongo vinodhiveliwananyo baa-i. Malomwee mudhilimbi-edhenga idhiwana naabali thitho arongola o-iyana-iyana. Akala nitokaana ixirima ya sakulo ninofwanela dhilimbi-edha imali-a.—Muleri 1 Pedru 2:17. a

3. N’nga munofwanela ira n’ni mwa-avwelanenga na Makristau afwinyu?

Angalive ira nili atu ovwelana, hora dhinango ninooda i-yana mathuulelo thitho sukwali-ana namwasa oi nili atu odawa. Ee-no, madhu a Nlungu anoniwandela ira: “Dhowananive levelelana . . . na rima wethene ninga mwemo Yohova muulevelelani liye na rima othene, nyo thitho munofwanela irana vimbo-ive.” (Muleri Akolose 3:13.) I-yovano atu ninomsukwali-a Yohova hora dhinjinji, mbwenye liye unonilevelela. E-no liye unofuna ira na-iyene nilevelelenga abali naarongoli-u. Mwazindiyela ira mutosukwali-ana na mutu unango, nyo mudhilimbi-edhenga mtapanyanee fwinyuo naifunelo yoi mumali-e a-vwelanao.—Muleri Mateu 5:23, 24. b

 FUNJEDHANI VINJINJI

4. Dhilimbi-edheni mali-a rima wa sakulo

I-yo othene ninofuna dhiveliwana abali naarongoli-u othene. Mbwenye ninooda rucheya vwelanana na mutu ule unooneya kala o-iyana na i-yo. N’nga chini inanikami-e? Muleri Mayirelo 10:34, 35, mwamala mutapanye vyofuka vyo-arelavi:

• Yohova unowachela atu amaziza othene ira takale Mboni dhee. N’nga munasazi-edhe a-vi ifwanafwani-o ya Yohova vamwasa unoonelanyo atu o-iyana nanyo?

• N’nga munofwanela rambela vyongo viivi vyevyo atu anjinji tatamuni ulinyo vinoira aliwa vothonyi-edha sakulo?

Muleri 2 Akoritiyo 6:11-13, mwamala mutapanye yofuka yo-arelai:

• N’nga munothuulela ira munofwanela iran’ni ira mudhiveliwengana maningi abali na arongolinyu ano-iyanananyo vyongo vinango?

5. Mulevelelenga na rima wethene thitho mudhilimbi-edhenga kaathei-a rendele

Yohova unonilevelela na rima othene angalive ira liye kananidawela. Muleri Salimo 86:5, mwamala mutapanye vyofuka vyo-arelavi:

• N’nga versuli linonifunji-an’ni vyoonga Yohova vamwasa olevelela?

• N’nga munomsimba Yohova namwasa oi unonilevelela? Mwasiwa ngwani munoonga e-no?

• N’nga ndivyongo viivi vinaniimwanani-e kala mwarendele naafwi-u?

N’nga ninasazi-edhe a-vi Yohova vamwasa olevelela, noirangave vyongo movwelana na abali naarongoli-u? Muleri Sanganiko 19:11, mwamala mutapanye yofuka yo-arelai:

• Mutu unango ausukwali-ani venango authomani, n’nga munofwanela iran’ni ira mukale varendele naliye?

 Hora dhinango i-yo thitho ninooda sukwali-a atu enango. N’nga niirenga a-vi vyevi vyaireya? Muonele VIDIYO, mwamala mutapanye yofuka yo-arelai.

• N’nga rongola wa vidiyonimu, airilen’ni ira akaathi-e rendele?

 MAKUNDU OGWANDELA

Munooda kami-a pingo ira udhowenave ira vyongo movwelana, mwalevelelanga thitho mwadhilimbi-edhanga dhiveliwana abali naarolinyu othene.

Vyofuka vyowelela

• N’nga munamali-e a-vi rima wa sakulo?

• Mwa-avwelanenga na Kristau fwinyu, n’nga munofwanela iran’ni?

• N’nga nyo munofuna sazi-edha Yohova vamwasa olevelela atu enango? Mwasiwa ngwan’ni munoonga e-no?