Madhu oi “upainiya” anotaphulela mutu ule unaromi-a mamburo mapya na unadhulela ndhila atu enango. Ninooda onga ira Yesu ali painiya, mwasiwa o-orumiwa vailambo yavathi ira alaleele milanyu vovelela ingumi yae, na dhula ndhila yovulumucha atu. (Mateu 20:28) Malambo ano, anama-arelae ano-arela ifwanafwani-edho vomalela hora injinji volaba basa lofunji-a atu ira takhale anamafunjedha. (Mateu 28:19, 20) Vofuna laba mwathindi basa leli, enango anoroma urumiwi ule unoidhiweya na dhina loi upainiya?

Painiya ngu mutu unolaleela hora dhothene. Uliwathene wa Mboni dha Yohova ngunamalaleya wa milanyu yaphama. Mbwenye, amboni enango anovungula mabasiwavenango na vyo-inda vinango ira takhale apainiya okhaatheya, anovelela mahora okwakwana 70 a basa lolaleela vamwedi. Ira urumiwi wenna uodeye, anjinji anooda sakhula basa la mahora oyeva. Enango anosakhuliwa ira takhale apainiya avakhundu mamburo ofuneya atu olaleela milanyu yaphama Yaumwene. Mwedi uliothene apainiya enala anomala mahora 130 venango kwaranya talaleelanga no funji-a atu madhu a Nlungu. Apainiya khatinafuna vyongo vinjinji mwasa oi tanoidhiwa ira Yohova unoava-a vyongo vyothene vyofuneya vaingumi iwa. (Mateu 6:31-33; 1 Timoteo 6:6-8) Ale a-anaoda khala apainiya okhaatheya anoira upainiya okhami-a vahora inoona aliwa. Vyevyi vinoava-a ngari yowenjedhela basa liwa lolaleela, thitho anooda velela mahora okwakwana 30 venango 50 vamwedi unolaba aliwa basa lolaleela no funji-a atu madhu a Nlungu.

Painiya unoira basa leli mwasa waudhivela unaliye wa Nlungu naatu. Mofwanafwana na Yesu iyo thitho ninoona ira baatu anjinji anofuna funji-iwa vya Nlungu na vyofuna vye. (Marku 6:34) Moi ninoidhiwa vyongo vinjinji vile vinaode iyo akhami-a, chineneeva ninoafunji-a ira tadedi-edhenga vyongo vyaphama vyasogolo. Mwasa ofuna atu, painiya uno-indi-edha basa hora na nguru dhae vokhami-a enango ira tavwe milanyu yaphama. (Mateu 22:39; 1 Atezalonika 2:8) Vyevyo vinolimbi-a iroromelo yae, unokwivela wa Nlungu thitho unokhala waimwerumweru vinjinji.—Mayirelo 20:35.

• N’nga painiya unoira nni?

• Chini vinalimbi-a atu enango ira takhale apainiya a hora dhothene?