Mwasiwa ngwan’ni atwala tali aimwerumweru? Mwasa ngoi tali vagumanoni nlukhulu unakhayechana iyo. Movwelana na anamalaba a Nlungu awale, enao awandeliwile ira tairenga migumano miraru vayawa, iyo thitho ninoira migumano ilukhulu. (Dotornomio 16:16) Yawa iliyothene ninoira migumano ilukhulu miraru: migumano minli yavakhundu inaireya dambo limbo-i vagumano uliothene, thitho gumano wagawo ngunaireyecha malambo mararu. N’nga ninoganyali avi na migumano yenna?

Inokhami-a ira ubali-u waukristau ukhale olimba. Mofwanafwana na anaizaraeli enao takhala aimwerumweru vonthamalela Yohova “vagumanoni,” iyo thitho ninokhala aimwermweru gumaneya vambo-ive nlambelanga vamigumanoni ilukhulu. (Salimo 26:12, 111:1) Migumano yenna inoniva-a ngari yogumaneya, thitho waredha na abali vambo-i na arongola amipingo inango venango okhumela vilambo vinango. Nathana ninokhala aimwerumweru udya vambo-i vyodya valimburo lagumanolo, vyevyo vinoniva-a hora yowaredha na makristau afwi-u. (Mayirelo 2:42) Vagumano wenna ninoona umboni waudhivela wenuwo unavwelani-a “gulu lothene laabali” vailambo yothene yavathi.—1 Pedru 2:17.

Inonikhami-a warala muunembani. Anaizaraeli tanoganyali mwasa oi “tanovwechecha phama madhu” amalembani enao aongiwa movweya phama. (Neemiya 8:8, 12) Iyo thitho ninosimba malangi-o a Bibilyani anawachela iyo vamigumanoni vi-u. Gumano uliwethene unokhaana muru okhumela Bibilyani. Vamigumano yenna vanokhala myasa yo-iyana-iyana yova-a imwerumweru thitho vifwanafwani-o vyevyo vinonikhami-a irana vyevyo vinafuna Nlungu vaingumi yi-u. Ninolimbi-iwa naatu enango taonganga viirile aliwa ira tavilele nyarwa dhedho dhinagumanana aliwa vaingumi yiwa yaukristau vahora yoruchela. Vagumanoni wagawo vanokhala madharama enao anonikhami-a vwechecha myasa dha Bibilya thitho ona vifunjile iyo, thitho oira madharamawo anowara ninga mwawarela atu awale. Vagumano uliwethene vanokhala ubadizo, eno atu enao anofuna thonyi-edha ira tatovivelela wa Nlungu anobadiziwa.

• Mwasiwa ngwan’ni anamalaba a Nlungu anokhala aimwerumweru takhala vagumanoni nlukhulu?

• N’nga munaganyali avi akhala ira mutofwanyeya vagumanoni nlukhulu?