YOFUNJEDHA 2
Nlungu mbaani?
1. Mwasiwa ngwani ninofwanela lambela Nlungu?
Ninofwanela lambela Nlungu neri-a liye ngupanduchile vyongo vyothene, titho nguniva-idhe ingumi. Liye khanna maromelo titho khanna magomelo. (Salimo 90:2) I-yavo vyongo vyevi, ngu liye univa-idhe milanyu yaphama inafwanyeya Bibilyani.—1 Timoteo 1:11.—Muleri Apokalipse 4:11.
2. N’nga Nlungu ngwamakhalelo oi avi?
Iyo khaninooda m’mona Nlungu neri-a liye ngu Nemba, titho unakhala dhulu. (Juwau 1:18; 4:24) Mbwenye, dhela moona vyongo vipanduchile liye, ninooda idhiwa makhalelwae. Mofwanafwani-a, liye upanducha vyova-a vyoiyana-iyana na mafolore. Vyevi vinooni-a ira liye ngwaudhivela titho ngwadodoliso. Naing’ana nyenyedi, dhuwa na ilambwila, ninozindiyela ira liye ngwanguru vinjinji.—Muleri Aroma 1:20.
Ndhila inango yommwidhiwana Nlungu khuleri Bibilya. Bibilyalo linoonga vinodhiveliwana Nlungu, vya-anadhiveliwana Nlungu titho mwemo munaaonela liye atu.—Muleri Salimo 103:7-10.
3. Nlungu utokhaana dhina?
Ee, Nlungu utokhaana dhina. Yesu aongile ira: “Babi-u wadhulu, dhina linyu licheni-iwe.” (Mateu 6:9) Iongelo iliyothene itokhaana maongelo o-iyana-iyana voromola dhina la Nlungu. Va Ilolo ninaromola ira “Yohova”. Madhu oi Nlungu na namapanducha khai dhina.—Muleri Salimo 83:18.
Bibilya lingalembiwile, dhina la Nlungu lanofwanyeya fendo dhowandamela 7000. Dhina la Nlungu tofuneya vinjinji titho Yesu anowandela atu dhina leli. Vira waora atu enango tatokhumi-amo dhina la Yohova Mabibilyani manjinji, mburoni mwae tato-elamo madhu oi Mbwiye venango Nlungu.—Muleri Juwau 17:26.
4. N’nga Nlungu unonithuulela?
Ninga namabala wa udhivela, Nlungu usakhaedha vyoi amali-e vyongo vyothakhala
Malambo ano, atu tanoona nyarwa dhinjinji. Enango tanoonga ira Nlungu uno-iya ira vyevi viireyenga mwasa oi, liye khanonithuulela venango vofuna wesedha iroromelo yi-u. Mbwenye vyevyo khai vyaimbarimbari.—Muleri Tiyago 1:13.
Nlungu uva-a atu ufulu wosakhula. Tiphama irana vyosakhula vi-u. (Yoswa 24:15) Yorucha choi atu anjinji tano-indi-edha ufulu wenna ira taiire vyongo vyothakhala, titho vyevi vinodhi-a nyarwa dhinjinji. Yohova unokhala worucheya vinjinji aonanga vyevi viireyanga.—Muleri Maromelo 6:5, 6.
Yohova unouthuulelani. Liye unofuna ira mukhaena ingumi ya imwerumweru. Liye unodha mali-a nyarwa na nonga atu anairana vyongo vyothakhala. Mbwenye, chineneeva atu tanoona nyarwa. Muru wa 8 unodhaonga ira mwasiwa ngwani Nlungu khanamali-eve nyarwadhi.—Muleri 2 Pedru 2:9; 3:7, 13.
5. N’nga ninofwanela ira n’ni ira nikhale axamwali a Nlungu?
Ira nikhale axamwali a Nlungu, ninofuneela iranga lobelo. Yohova unofuna ira nikhale axamwali ae. Liye unofuna idhiwa vinathuulela mutu uliwethene vaekha. (Salimo 65:2; 145:18) Yongo inango inofuneela iyo ira kudhilimbi-edha irana vyongo vyaphama. Khavali mutu uli olongomana. Mbwenye ninokhala axamwali a Yohova mwasa oi liye unonilevelela.—Muleri Salimo 103:12-14; Tiyago 4:8.
Ninofwanela dhiveliwana vinjinji Yohova kwaranya mutu uliwethene. (Marku 12:30) N’nga nyo munathonyi-edhe avi ira munodhiveliwana Nlungu? Dhela vofunja vinjinji vyokhumela wa liye titho irana vile vinofuna liye. Eno, uxamwalinyu na Nlungu unodha khala olimba vinjinji.—Muleri 1 Timoteo 2:4; 1 Juwau 5:3.
