YOFUNJEDHA 6
Chini inaireya mutu akwa?
1. N’nga milanyu yaphama ina Nlungu mwasa waatu akwide njiivi?
Vyafiya Yesu wu tatamo ya Betaniya, yenio yali vakwikwi na sidade ya Yerusalemu, vali vangavirile malambo manai Lazaro angakwide wanle. Yesu o-odhowa weo walokhotiwile tutu la Lazaro. Mo-odimbela atu to-odhala masiyeniwo. Yesu o-omvenyathi-a Lazaro! Marta na Maria to-odhiveliwa vinjinji mmona okhokha rongoliwa.—Muleri Juwau 11:21-24, 38-44.
Marta anoidhiwa milanyu yaphama ya Nlungu mwasa waatu akwide. Yohova unodha venyathi-a atu akwide titho tanodha khala vailambo yavathi.—Muleri Yobo 14:14, 15.
2. Chini inaireya mutu akwa?
Nlungu o-ommwandela Adamu ira: “Uli tumbulu, titho unodha welela tumbuluniwo.”—MAROMELO 3:19.
Mutu akwa khavali yongo inokhaanave ingumi. Yohova unipanduchile khumela tumbuluni. Iyo khanili minemba, mbwenye nili atu atutu na sangiri. (Maromelo 2:7; 3:19) Mutu akwa, ugogo wae unokwa, titho mathuulelwae na mavwelwae vinomala. Pievyo vyamwiireile Lazaro. Ngumwasiwa ira Lazaro angavenyathi-iwile khaaongile vyongo vyaoni liye angakwide.—Muleri Salimo 146:4; Namalaleya 9:5, 6, 10.
N’nga nyo mutoroma vwa ira Nlungu unokha-echa atu othakhala va muloni? Vyevyo pyonama. Bibilya linaonga ira mutu akwa khanathuulela iliyathene. Ifunji-edho yoi Nlungu unokha-a atu chonama titho vinoiri-a atu thuulelanga ira Nlungu ngothakhala. Liye unothakhaleliwana zelu yenio neri-a liye khanokha-a mutu uliwathene.—Muleri Jeremiya 7:31.
3. N’nga atu okwa tanooda onga na iyo?
Atu okwa khatinaonga venango uvwa. (Salimo 115:17) Mbwenye vatokhala angelo o-ovwela Nlungu titho othakhala enao tanoonga naatu tavioni-anga ira mbaatu enale akwide. (2 Pedru 2:4) Titho Yohova unokhondi-a wesedha ongana atu okwa.—Muleri Dotornomio 18:10, 11.
4. N’nga mbaani unafuna dhavenyathi-iwa?
Mamilyau manjinji aatu tali masiyeni tanodha venyathi-iwa ira tadhakhaena ingumi vailambo yavathi. Titho atu taira vyongo vyothakhala mwasa o-ommwidhiwa Yohova tanodha venyathi-iwa.—Muleri Luka 23:43; Mayirelo 24:15.
Atu anofuna dhavenyathi-iwa tanodha funjedha imbarimbari ya Nlungu. Eno tanodha khaana ngari yooni-a ira tatokhaana iroromelo dhela movwela Yesu. (Apokalipse 20:11-13) Aliwa takhala ovwela, tanodha khalawo dhowa no dhowa vailamboni yavathi.Muleri Juwau 5:28, 29.
5. N’nga venyathi-iwa muukwani unothonyi-edha nni mwasa wa Yohova?
Venyathi-iwa waatu akwide unoodeya mwasa oi Yohova o-oruma mwanae ira adhanikwele. Eno, venyathi-iwa muukwani unooni-a ira Yohova ngwaudhivela titho ngwaphama vinjinji. Atu tadhavenyathi-iwa, mbaani unadhiveliwena nyo mmona?—Muleri Juwau 3:16; Aroma 6:23.
