Mwaimbarimbari, vifunjedhile nyo Bibilyani vitoulukhuli-a udhivela winyu wa Yohova. Mbwenye ira udhivela wenna udhowenave ulukhula, munofwanela dhowanave funjedha Bibilya. (1 Pedru 2:2) Nyo munooda khalao dhowa no dhowa. Ira viodeye munofwanela ulukhuli-a uxamwali winyu na Yohova.—Muleri Juwau 17:3; Juda 21.

Mwafunja vinjinji mwasa wa Nlungu iroromelo inyu inolimba vinji nji. Iroromelo inyu inodha ukhami-ani titho dhiveliwi-a Nlung u. (Aebere 11:1, 6) Nyo munodha khaana ifunelo yo-iya ira vyongo vyothakhala na roma irana vyongo vyaphama.—Muleri Mayirelo 3:19.

Atu othene tanodhiveliwana onga milanyu yaphama. Eeno, mwaimbarimbari nyo munodha funa wandela atu enango milanyu yaphama ya Nlungu. Ira muode aoni-a vifunjile nyo Bibilyani, munofuneela dhowanave funja Bibilya.—Muleri Aroma 10:13-15.

Nyo munooda roma wandela afwinyu venango abalinyu. Khai vyofuneya awandela ira religiau liwa linofunji-a vyongo vyodaweya. Munofwanela awandela vyongo vyaphama vinafuna dhaira Nlungu baa-i. Iyavo vyongo vyevi, aliwa tanooda silila vyoira vinyu kwaranya vyoonga. Eno munofwanela irana vyaphama.—Muleri 2 Timoteo 2:24, 25.

Dhowananive funjedha Bibilya ira uxamwalinyu na Yohova ukhale olimba vinjinji. Iyavo khala xamwali wa Yohova, nyo munooda ira ikhundu ya banja lae. Vyevyo pyaphama vinjinji. Khai eno?—Muleri 2 Akoritiyo 6:18.

Yongo yoroma inofuneela nyo ira, khudhowanave funjedha Bibilya. (Aebere 5:13, 14) Munooda vepha mutu m’mbo-i wa Mboni dha Yohova ira afunjedhenga Bibilya vambo-i na nyo, mo-indi-edha basa bukhu loi Zimene Baibulo Limaphunzitsa. Mwafunjedha vyongo vinjinji mwasa wa Nlungu, munodha khala waimwerumweru vinjinji.—Muleri Salimo 1:1-3; 73:27, 28.

Ira mukhale vauxamwali olimba na Yohova munofwanela titho gumaneyanga na atwae. (Aebere 10:24, 25) Yohova ukhaana milanyu yaphama wa nyo. Liye unofuna ira mukhaena ingumi yaimbarimbari. Mwavilimbi-edhanga ira muire vinafuna liye munodha khalao dhowa no dhowa. Khilivo yongo yofuneya vinjinji kwaranya khala xamwali wa Yohova.—Muleri 1 Timoteo 1:11; 6:19.