YOFUNJEDHA 13
Chini inafuna aireela mareligiau?
1. N’nga mareligiau othene mbaphama?
Mareligiau othene mutokhala atu anofuna mdhiveliwi-a Nlungu. Nlunguwo unoafuna atu enao. Imbarimbari choi mareligiau manjinji anoira vyongo vyothakhala. (2 Akoritiyo 4:3, 4; 11:13-15) Majornal anoongecha vya mareligiau anoirecha vya khondo na ponya mabomba malukhulu. Fendo chinjinji dhene mapadri, anamasogolela amareligiau na andimuwa enango anoraruwecha naa-ima. Atu anodhiveliwana Nlungu taona vyevi tanovwecha tangaranga mwasa wa vyevyo.—Muleri Mateu 24:3-5, 11, 12.
I-yavo vyevyo, mareligiau onama anofunji-a vyonama vofunji-a vya Nlungu na vinaireya atu takwa. Enao mbamakhalelo o-olemeza Nlungu. Yohova unofuna ira atu taidhiwe imbarimbari. Religiau laimbarimbari linofunji-a vili Bibilyani.—Muleri Zakiyeli 18:4; 1 Timoteo 2:3-5.
2. Chini inafuna aireela mareligiau?
Nlungu khanoomeliwana mareligiau anoonga ira anomdhiveliwana angali ira anodhiveliwana vya ilambo ya Satanai. (Tiyago 4:4) Madhu a Nlungu anoonga ira mareligiau othene onama anoitaniwa “Babulo Nlukhulu.” Dhina leli likhumele va sidadi nlukhulu lawale laitaniwa Babulo, wali religiau nlukhulu loroma lonama ma-inje a hora ya Nowa tangavirile. Mo-odimbela Nlungu unodha nonga mareligiau othene onama anothethedhela vyothakhala vinaireyavi.—Muleri Apokalipse 17:1, 2, 5, 16, 17; 18:8.
Chini inafuna aireela atu tanofuna irana ifunelo ya Nlungu tangalive mu religiau lonama? Yohova khanaadiwala. Liye unoava-a ngari ira tafunje Bibilya na khuma religiaunimo.—Muleri Mikeya 4:2, 5.
3. N’nga atu odhiveliwana Nlungu tanofuneya ira nni?
Religiau laimbarimbari linofunji-a atu ira takhale ovwelana
Yohova unaonga ira atu odhiveliwana imbarimbari tanofuneya ira takhume mu religiau lonama. Liye unoafuna vinjinji. Mutu odhiveliwana Nlungu unorumela irana vyofuna vyae.—Muleri Apokalipse 18:4.
Ndulimu, atu anjinji tatofunjedha milanyu yaphama ya Nlungu yafunji-echa arumiwi. Aliwa tatofunjedha khala na ingumi yodhiveliwi-a Yohova na ganyali idedi-edho yaphama ya sogolo. Ninooda sazi-edha vyevi. Vwela Yohova ikhalenga yongo yofuneya vinjinji va ingumi yi-u.—Muleri 1 Atezalonika 1:8, 9; 2:13.
Yohova unofuna ira atu anjinji tangakhumile religiau lonama ira taire ikhundu ya banja laudhivela. Taira eno, aliwa tanodha khala vauxamwali na Yohova, ira ikhundu ya atwae titho khalawo dhowa no dhowa.—Muleri Marku 10:29, 30; 2 Akoritiyo 6:17, 18.
4. N’nga milanyu yaphama wa atu othene yokhumela wa Nlungu njivi?
Milanyu yaphama njoi mareligiau onama anodha nongiwa. Vyevyi vinathaphulela ira atu tanodha khala vaufulu. Khavali mutu unafuna dhanami-iwa. Atu othene tanodha mlambela Nlungu m’mbo-i baa-i waimbarimbari mofwanelela.—Muleri Apokalipse 18:20, 21; 21:3, 4.
