YOFUNJEDHA 10
N’nga munaidhiwe avi religiau laimbarimbari?
1. N’nga vatokhala religiau limbo-i laimbarimbari?
“Mukhale owenjela na anamaro-edha onama.”—MATEU 7:15.
Ee. Religiau laimbarimbari tilelo lafunji-idhe Yesu. Liye aongile ira religiau laimbarimbari nli ninga ndhila. Mbwenye atu oyeva mbanoifwanya ndhiliyo, titho atu enao tanodha khalao dhowa no dhowa. (Mateu 7:14) Mutu unafuna dhiveliwi-a Nlungu unofwanela arela vinaonga Bibilya. Eno anamalambela aimbarimbari othene tanororomela vyongo vimbo-ive titho tanolambela vambo-i.—Muleri Juwau 4:23, 24; 14:6; Aefeso 4:4, 5.
2. N’nga makristau othene tanofunji-a imbarimbari?
“Tanoonga vochena ira tanommwidhiwa Nlungu, mbwenye tanomkhonda na vyoira.”—TITU 1:16.
Khabe. Yesu atoonga mwasa wa anamaro-edha ofunji-a vyonama. Aliwa tanooda oneya ninga tanaira ifunelo ya Nlungu. Titho tanoonga ira tano-arela Yesu. Mbwenye ninooda idhiwa akhala ira vyevyo pyaimbarimbari. Moi avi? Dhela moonechecha vyoira viwa.—Muleri Mateu 7:13-23.
3. N’nga nyo munaidhiwe avi religiau laimbarimbari?
Khaonani vyongo vithanu vinaira atu olambela mwaimbarimbari:
-
Tanororomela ira Bibilya ndi madhu a Nlungu. Atu tali mureligiau laimbarimbari tanodhilimbi-edha ira ta-arele malangi-o a Bibilyani. Mareligiau manjinji tano-arela malamulo aatu. (Mateu 15:7-9) Mutu uli mureligiau laimbarimbari unofunji-a na irana vinaonga Bibilya.—Muleri Juwau 17:17; 2 Timoteo 3:16, 17.
-
Tanofunji-a na indi-edha basa dhina la Nlungu loi Yohova. Yesu anolemeza dhina la Nlungu titho anooni-a ira dhina leli tofuneya vinjinji. Liye o-ofunji-a mwasa wa Nlungu, titho atolobela ira dhina la Nlungu licheni-iwe. (Mateu 6:9) N’nga nyo, mutoliidhiwa religiau linafunji-a atu dhina la Nlungu loi Yohova?—Muleri Juwau 17:26; Aroma 10:13, 14.
-
Tanolaleela mwasa wa Umwene wa Nlungu. Yesu o-ofunji-a mwasa wa vyongo vyaphama vinafuna dhaira Umwene wa Nlungu. Umwenula ngunafuna dhamali-a nyarwa dhaatu. Yesu atoonga vyevi fiedha va dambo lakwide liye. (Luka 4:43; 8:1; 23:42, 43) Titho liye atoaruma anama-arelae ira talaleelenga mwasa wa Umwene wenna. N’nga ti religiau livi linalaleela malambo ano?—Muleri Mateu 24:14.
-
Katinaira ikhundu yailambo yotongiwa na Satana. Atu tali mureligiau laimbarimbari katinavolowela ndale dha ilambo, venango muvioneli-edho. (Juwau 17:16; 18:36) Iyavo vyongo vyevi, aliwa khatinaira vyongo vyothakhala vinaira atu malambo ano.—Muleri Tiyago 4:4.
-
Makristau aimbarimbari tanodhiveliwana unango na fwae. Mutu uli mureligiau laimbarimbari unofunjedha khumela Bibilyani ira unofwanela lemeza atu othene. Mareligiau onama fendo dhinjinji tanokhami-echa khondo. Mbwenye mutu uli mureligiau laimbarimbari khanoira vyevyo. (Mikeya 4:1-3) Makristau aimbarimbari tano-indi-edha basa hora na kobiri dhiwa ira takhami-e atu enango.—Muleri Juwau 13:34, 35; 1 Juwau 4:20.
4. Mutooda zindiyela religiau laimbarimbari?
Tireligiau livi lina-arela vinaonga Bibilya titho indi-edha basa dhina la Nlungu? N’nga ti religiau livi linalaleela ira Umwene wa Nlungu ngunafuna dhamali-a nyarwa dhi-u? Ti gulu livi linadhiveliwana unango na fwae titho la-anadhowa khondoni? Mutoliidhiwa?—Muleri 1 Juwau 3:10-12.
