Namapandhuchi-u ngwa zelu vinjinji kwaranya iyo. Liye ngubaba waudhivela titho unonisakela vyofuneya. Iyo ninonyindela Nlungu ira nikhale aimwerumweru. (Jeremiya 10:23) Iyo ninofuna khami-iwa na Nlungu ninga mwemo mwana munafunela liye khami-iwa na anamabalae. (Esaya 48:17, 18) Bibilya linonikhami-a, titho lili ninga yotuva yokhumela wa Nlungu.—Muleri 2 Timoteo 3:16.

Navwelanga malamulo a Yohova, ninokhala aimwerumweru malambo ano, titho ninoidhiwa vyofuneya ira nikhale aimwerumweru dhowa no dhowa. Nlungu ngunipanduchile. Ngumwasiwa ira khavali yongo yofuneya vinjinji kwaranya arela malagi-o ae.—Muleri Salimo 19:7, 11; Apokalipse 4:11.

Hora inango, Bibilyani ninofwanyamo lamulo linalabi-edhiwa va mwasa umbo-i. (Dotornomio 22:8) Mbwenye hora dhinango, Bibilya linoonga likhundo loi ninooda li-indi-edha basa va myasa dhinjinji va ingumini. Eno, ninofuneela thuulela ira niidhiwe munanikhami-edha Bibilya voira vyosakhula. (Sanganikho 2:10-12) Mofwanafwani-a, Bibilya linoonga ira ingumi ti yotuva yokhumela wa Nlungu. Nathuulelanga vyevyo, ninoira vyothene vinaode iyo ira nivunele ingumi-u na yaatu enango. Ninooda viira vyevyo basani, vandhe vi-u venango vowenda.—Muleri Mayirelo 17:28.

Yesu atoonga malamulo meeli ofuneya vinjinji. Lamulo loroma linooni-a ira ifunelo yi-u vaingumi kukhala oidhiwa, khala  audhivela na labela Nlungu. Ninofwanela thuulelanga vyevyo nasakhulanga vyoira. (Sanganikho 3:6) Atu tanovwela lamulo leli tanooda khala vauxamwali na Nlungu, khala aimwerumweru na khalao dhowa no dhowa.—Muleri Mateu 22:36-38.

Lamulo lanambili linonikhami-a ira nikhale mwarendele naatu. (1 Akoritiyo 13:4-7) Ira ni-arele vinaonga lamulo leli, ninofuneela irela atu enango vyongo vyaphama ninga mwemo munairela Nlungu.—Muleri Mateu 7:12; 22:39, 40.

Bibilya linofunji-a mabanja ira takhaena udhivela na khala ovwelana. (Akolose 3:12-14) Lo linoonga ira banja li-eliwile ira likhaleo dhowa no dhowa. Vyevyo titho vinovunela banja.—Muleri Maromelo 2:24.

Irana vinaonga Bibilya vinooda nivunela ndhila dhinjinji. Mofwanafwani-a, Bibilya linoonga ira ninofwanela khala ororomeleya na olaba. Atu oraela tanodhiveliwana atu ninga enao ira taalabelenga. (Sanganikho 10:4, 26; Aebere 13:18) Bibilya linoonga ira khala vauxamwali na Nlungu kofuneya vinjinji kwaranya kobiri. Titho linoonga ira ninofwanela sakasaka vyongo vyofuneya baa-i ira nikhaena ingumi.—Muleri Mateu 6:24, 25, 33; 1 Timoteo 6:8-10.

Mutu una-arela malangi-o a Bibilyani unovunela ingumi yae. (Sanganikho 14:30; 22:24, 25) Mofwanafwani-a, Bibilya khalinokhondi-a umwa vyomwa vyolezeli-a, mbwenye lo linoonga ira umwa mokwaranyi-a khothakhala. Vwela lamulo leli unonivunela vamarenda na ngovi. (Salimo 104:15; Sanganikho 23:20; 1 Akoritiyo 6:10) Iyavo vyongo vyevi, Bibilya linonikhami-a ira nikhaena vyothuulela vyaphama. (Salimo 119:97-100) Mwaimbarimbari, irana vinoonga Bibilya kwaphama vinjinji. Mbwenye anamalaba a Nlungu tanoira vyevyo simbwasimbwa mwasa ofuna mva-a Yohova titimi-o.—Muleri Mateu 5:14-16.