MURU OFUNJEDHA 4
Mwasa unoniiri-a fwanyeyanga vaithuuleloni
“Mwiirengana vyevi vondithuulela miyo.”—LUKA 22:19.
NYUMBO 20 Munapereka Mwana Wanu Wobadwa Yekha
VINOFUNA I-YO FUNJEDHA *
1-2. a) N’nga njihora iivi vevo vanomthuulela i-yo maningi mutu wenuo wamdhiveliwana i-yo ukwide? b) N’nga Yesu aromi-idhen’ni nama-iyu ogomi-edha a-anapiwe?
AKALA vavire hora yolapela a-vi kumela vevale mutu wen’ne wamdhiveliwana i-yo angakwide, i-yo ninomthuulelave. Ninothuulela vyongo vyapama vyokuza mutu wamdhiveliwana i-yo, simbwasimbwa lafiya dambo lakwide liyelo.
2 Yawa iliyothene ninokala mugulu laatu mamiliau availamboi enao tanogumanea ira tathuulele wukwa wa mutu unango wenuo unamdhiveliwana i-yo maningi wenuo ngu—Yesu Kristu. (1 Pe. 1:8) Ninoira vyevi ira nithuulele mutu wen’ne uvelenle ingumi ninga kuto ira anivulumuche uvyodawa na wukwa. (Mat. 20:28) E-no Yesu afuna ira anama-arelee tathuulelenga ukwawee. Vama-iyu omari-a a-anapiwe, Yesu atoromi-a ithuulelo yavakundu ya yodya ya nama-iyu namaulo thitho atoonga ira: “Mwiirengana vyevi vondithuulela miyo.” *—Luka 22:19.
3. N’nga ninofuna nitapanyenin’ni muyonjedha yei?
3 Atu oyeva ale anofwanyea vothuulela wukwa wa Kristu, tatokaana idedi-edho yodhowa dhulu. Mbwenye atu mamiliau manjinji tan’na idedi-edho yokala vailamboi, tanofwanyea vaithuuleloni. Muyofunjedha yei ninotapanya vinoiri-a magulu menli othenala kala ofunechecha fwanyeanga vaithuuleloni yawa iliyothene. Ninoona thitho mwemo fwanyenga vaithuuleloni munonikami-edha aliwa. Voroma dhoweni nitapanyeni myasa inango inoiri-a ozoziwa fwanyeanga vaithuuleloni.
MWASA UNOIRI-A IRA OZOZIWA TAFWANYEENGA VAITHUULELONI
4. Mwasiwa ngwan’ni ozoziwa tanodya pau naumwa vinyu vaithuuleloni?
4 Yawa iliyothene, ozoziwa tanodedi-edhela fwanyeanga vaithuuleloni ninga odya vizindiyelo. Mwasiwa ngwani aliwa tanodya pau naumwa vinyu vaithuuleloni? Ira niwakula yofuka yei, kathuulelani vyevile vyaireile nama-iyu ogomi-edha waingumi ya Yesu vailamboi. Angairile ithuulelo ya paskwa, Yesu atoromi-a ithuulelo inoidhiweya na yodya ya maulo ya Mbwiye. Atovelela pau na vinyu waarumiwee 11 ororomeleya noawandela ira tadye naumwa. Liye atoawandela vwelano la vikundu vinli, eniyo ili vwelano lachineneeva na vwelano la Umwene. * (Luka 22:19, 20, 28-30) Vivwelanovi vyatodhula ngari ira arumiwi na atu enango olengeseya tadhakale mamwene thitho anamavelela kuto dhulu. (Apok. 5:10; 14:1) Ozoziwa amu vivwelano vinli enao tali vailamboi, * mbenao anofwanela udya pau naumwa vinyu.
5. N’nga ozoziwa tanozindielan’ni na idedi-edho iva-iwile aliwa?
5 Vatokala mwasa unango unoiri-a ira ozoziwa takale ofunechecha fwanyea vaithuulelo. Fwanyea vaithuuleloni unoava-a ngari ira: tathuulelenga vya idedi-edho yiwa. Yohova atoava-a idedi-edho yapama vinjinji yeyo ili dhakaana ingumi yo-okwa dhulu vambo-i naafwiwa agulu la 144.000 thitho malaba vambo-i na Yesu Kristu, wenuo uva-iwile titimi-o. Iyavo vyothene, aliwa tatova-iwa ngari yokala vambo-i na Yohova Nlungu! (1 Akor. 15:51-53; 1 Ju. 3:2) Ozoziwa tanozindiela ira tatova-iwa ngari yoi tanamasangalala na vwevi dhulu. Mbwenye ira tadharumeli-iwe dhowa dhulu tanofwanela kala ororomeleya fiedhela ukwawiwa. (2 Timo. 4:7, 8) Ozoziwa tanosangalala vinjinji tathuulela vyaidedi-edho yiwai. (Titu 2:13) N’nga vya “mabila enango”? (Juwau 10:16) N’nga timyasa dhiivi dhinango dhinoairi-a fwanyenga vaithuuleloni?
MWASA UNOIRI-A IRA A MABILA ENANGO TAFWANYEENGA VAITHUULELONI
6. Mwasiwa n’ngwani amabila enango tanofwanyea vaithuuleloni yawa iliyothene?
6 Amabila enango tanofwanyea vaithuuleloni ninga oonela a-kala odya vizindielo. Mu yawa ya 1938, enao tana idedi-edho yokala vailambo yavathivano tatoithaniwa mwavakundo mufendo yoroma ira tadafwanyeenga vaithuuleloni. Nsanja ya Olonda ya Março wa 1 wa 1938, yatoonga ira: “Kofwanelela ira amabila enango tafwanyeenga vaithuuleloni noonela vyevyo vinoireya. . . . Yen’na njihora yoi naaliwene tasangalale.” Mofwanafwana na alendo tanosangalala tafwanyea vakazamethoni, amabila enango naaliwene tanosangalala tafwanyea vaithuuleloni ninga oonela.
7. Mwasiwa ngwan’ni amabila enango tanodedi-edhela modhiveliwa vuruwana mwasa wavaithuuleloni?
7 Mofwanafwana na ozoziwa, fwanyea vaithuuleloni unokami-a amabila enango thuulelenga vya idedi-edho yiwa. Aliwa tanodedi-edhela modhiveliwa vuruwana mwasa unoonga vinjinji vya Kristu vambo-i naafwee a 144.000 vyevyo vinafuna aliwa dhairela atu ororomeleya mu Utongi wa vwawa 1.000. Mosogoleliwa na Mwene Yesu Kristu, anamatonga afweala anokami-a chinja ilambo kala paradaizo thitho atu ovwela kala ochena. Vinokala vyosangalali-a waatu mamiliau manjinji enao tanofwanyea vaithuuleloni tathuulelanga vya maulosi a Bibilyani tanofuna dakwakwaneli-edhiwa sogolou ninga anofwanyea va Esaya 35:5, 6; 65:21-23; na Apokalipse 21:3, 4. Tadhifwanafwani-edhanga tangali mwiilambo ipya vambo-i naatu anoadhiveliwana aliwa, idedi-edho yiwa ya sogolou inolimba thitho tanosikimizela rima ira ta-a i-yachi labela Yohova.—Mat. 24:13; Agal. 6:9.
8. N’nga ngumwasa unango uuvi unoiri-a amabila enango fwanyeanga vaithuuleloni?
8 Kathuulelani mwasa unango unoiri-a amabila enango fwanyeanga vaithuuleloni. Aliwa tanofuna thonyi-edha udhivela thitho kami-a ozoziwa. Madhu a Nlungu tatoongelatu ira ozoziwa tanodha vwelana vinjinji na an’na idedi-edho yodhakala vailamboi. Moi a-vi? Dhoweni nitapanyeni vifwanafwani-edho vingasi.
9. Movwelana na ulosi wava lemba la Zakariya 8:23, unothonyi-edha a-vi mabila enango munovivwela aliwa voonga vwa ozoziwa?
9 Muleri Zakariya 8:23. Ulosula unothonyi-edha pama mwemo amabila enango munavivwela aliwa tathuulela vyaabali naarongola ozoziwa. Madhu oi “Yuda” thitho “atu nyo,” anoonga vya gulu limbo-i lelo ili lozoziwa tali vailambo yavathi vano. (Aroma 2:28, 29) “Alombwana 10 okumela muviongelo vyothene vyaatu amitundu inango” tanoimelela amabila enango. Aliwa “tanodha laba,” venango anodha kalave ororomeleya wa ozoziwa, no lambela vambo-i Yohova morumeleya. Ee-no nama-iyu wadambo laithuulelo, amabila enango tanothonyi-edha ira mbovwelana vinjinji tafwanyeanga vaithuuleloni.
10. N’nga Yohova wiirile vyongo vyoi a-vi vokwakwaneli-edha ulosi wavalemba la Zakiyeli 37:15-19, 24, 25?
10 Muleri Zakiyeli 37:15-19, 24, 25. Vokwakwaneli-edha ulosula, Yohova atokami-a ira ozoziwa na amabila enango talabenga mabasa vambo-i movwelana vinjinji. Ulosula watoonga vyamagolomondo menli. Ale tan’na idedi-edho yodhowa dhulu tali ninga golomondo “la Yuda,” ziza lenle mwakuma mamwene a Israele. Thitho ale tan’na idedi-edho yokala vailambo yavathi tali ninga golomondo “la Efuraimu.” * Yohova atoonga ira unodha vwelani-a magulu menlala ira takale golomondo limbo-i. Vyevi vinothapulela ira aliwa tanolaba movwelana mosogoleliwa na Kristu Yesu. Yawa iliyothene ozoziwa na amabila enango tanofwanyea vaithuuleloni a-kala ninga magulu menli o-iyana mbwenye “gulu limbo-i” lokaana “namakumbiza, mbo-i.”—Juwau 10:16.
11. N’nga mabila oongiwa va lemba la Mateu 25:31-36, 40 tanothonyi-edha a-vi ira tanokami-a abalee a Kristu?
11 Muleri Mateu 25:31-36, 40. “Mabila” Oongiwa mwiifwanafwanani-o yi, tanoimelela olongomana amuhora ya komonila enao tan’na idedi-edho yokala vailambo yavathi venango nionge ira mabila enango. Aliwa tanokami-a mororomeleya abalee a Kristu ozoziwa vokwakwaneli-edha izo ilukulu yeyo inaaliwa, volaleela nofunji-a atu vailambo yothene.—Mat. 24:14; 28:19, 20.
12-13. N’nga mabila enango tanothonyi-edha ira tanokami-a abalee Kristu mundhila dinango dhiivi?
12 Yawa iliyothene wa-ala masuma oyeva ira dambo laithuulelo lifiye, amabila enango tanothonyi-edha ira tanokami-a abalee a Yesu volaba naaliwa basa lopambuleya lelo linoireya vailambo yothene yoitanela atu aifunelo wiithuuleloni. (Onani kwadru loi “ N’nga munaakozeela inthulelo?”) Aliwa tanovilimbi-edha ira ithuulelo iireye mupingoni uliwethene angalive ira mipingo minjinji kamuli odya vizindiyelo. Amabila enango tanosangalala kami-a abale a Kristu mundhila dhedhi. Aliwa tanoidhiwa ira Yesu unoona vyevo vinoira aliwa vokami-a abalee ozoziwa ninga anomwirela liye.—Mat. 25:37-40.
13 Mo-obala idedi-edho yi-u, n’nga timyasa iivi inango inoniiri-a i-yo othene fwanyeanga vaithuuleloni?
MWASA UNONIIRI-A I-YO OTHENE FWANYEANGA VAITHUULELO
14. N’nga Yohova na Yesu unithonyi-edhe a-vi udhivela ulukulu?
14Ninosimba vinjinji Yohova na Yesu namwasa waudhivela unithonyi-edhe aliwa. Yohova utonithonyi-edha udhivela mudhila dhinjinji. Mbwenye ndhila yavakundu inithonyi-edhe liye udhivelee kutumiza Mwanee odhiveliwiwa ira adarucheye nonikwela. (Juwau 3:16) Ninozindiyela ira naliyene Yesu atonithonyi-edha udhivela uluku vorumela velela ingumiyee namwasa wa i-yo. (Juwau 15:13) Kaninaode mmweli-edha Yohova na Yesu va udhivela unithonyi-edhe aliwa. Mbwenye ninothonyi-edha ira ninosimba vavyevyo vinoira i-yo dambo nlilothene. (Akol. 3:15) E-no ninofwanyeya vaithuulelo ira nithuulele udhivela wen’na thitho thonyi-edha ira ninoasimba.
15. Mwasiwa ngwan’ni ozoziwa na amabila enango tanoona ira kuto chothuva ya pereso yavadhulu?
15Ninoona ira yotuva ya kuto nja pereso yavadhulu vinjinji. (Mat. 20:28) Ozoziwa tanoona ira kuto ngwa pereso yavadhulu namwasa oi unoiri-a ira idedi-edho yiwa kala yoodeya. Namwasa ororomela kuto wa Kristu, Yohova unoawona kala olongomana thitho a-imee. (Aroma 5:1; 8:15-17, 23) Amabila enango naaliwene tanosimba kuto. Namwasa ororomela sangiri la Kristu, Nlungu unoaona ira mbochena, tanooda m’mwiirela urumiwi wavakundu thitho tatokaana idedi-edho “yodakuma mu nyarwa dhilukulu.” (Apok. 7:13-15) Ndhila imbo-i yeniyo ozoziwa na amabila enango munothonyi-edhela aliwa ira tanosimba kuto, kufwanyea vaithuuleloni yawa iliyothene.
16. N’nga ngumwasa unango uuvi unoniiri-a fwanyeanga vaithuuleloni?
16 Mwasa unango unoniiri-a fwanyeanga vamigumanoni njoi ninofuna mvwela Yesu. Akala idedi-edho yi-u choi a-vi ya sogolo, uliwethene wa i-yo unofunechecha vwela lamulo lenle lavelenle Yesu mwaromi-idhe liye ithuulelo ya ukwawee loi: “Mwiirenga vyevyi vondithuulela miyo.”—1 Akor. 11:23, 24.
MWEMO FWANYEA VAITHUULELONI MUNONIKAMI-ELA ALIWA
17. N’nga fwanyea vaithuuleloni unonikami-a a-vi kala vauxamwali olimba na Yohova?
17Ninokala vauxamwali wapama na Yohova. (Tiy. 4:8) Fwanyea vaithuuleloni unoniva-a ngari yothuulela idedi-edho yeyo Yohova iniva-idhe liye thitho udhivela uluku unithonyi-edhe liye. (Jer. 29:11; 1 Ju. 4:8-10) Nathuulelanga idedi-edho yi-u ya sogolo, yeyo ili yosikimizeleya, thitho udhivela o-omala wenuo Nlungu unithonyi-edhe liye, ninoroma mdhiveliwana vinjinji thitho uxamwali-u na liye unolimba.—Aroma 8:38, 39.
18. N’nga thuulela ifwanafwani-o ya Yesu unonilimbi-a iranan’ni?
18Ninolimbi-iwa a-rela ifwanafwani-o ya Yesu. (1 Pe. 2:21) Va-ala malambo oyeva ira ithuulelo iireye, ninothuulela myasa dha Bibilyani yoonga vyevyo vyaireile va sumana logomi-edha laingumi ya Yesu vailamboi, ukwawee thitho venyathi-iwawee. Ee-no vadambo laithuulelo namaulo, mwasa unoongiwa unonithuucha vyaudhivela unithonyi-edhe Yesu. (Aef. 5:2; 1 Ju. 3:16) Naleringa nothuulela ifwanfwani-o ya Yesu yorumela rucheya namwasa waatu enango, ninolimbi-iwa “dhowanave wenda mule ninga mwawendela liye.”—1 Ju. 2:6.
19. N’nga ninaire a-vi ira nidhowenave kala vauxamwali na Nlungu?
19Ninokala osikimizela kala axamwali a Yohova. (Juda 20, 21) Ninodhowanave kala vauxamwali na Nlungu navilimbi-edhanga mvwela, cheni-a dhinalee thitho sangalali-a rimee. (Sang. 27:11; Mat. 6:9; 1 Ju. 5:3) Fwanyea vaithuuleloni unoniiri-a ira nikale osikimizela ira dambo nlilothene niirenga vyongo vyevyo vinokala ninga ninammwandela Yohova ira, ‘Ndinofuna ndikale xamwalinyu dhowa nodhowa!’
20. N’nga timyasa iivi yovweya in’na i-yo yoniiri-a fwanyea vaithuuleloni?
20 Akala ninodedi-edha dadhowa dhulu venango dakala vailambo yavathi modhowa nodhowa, nitokaana myasa yovweya yoniiri-a fwanyea vaithuuleloni. Yawa iliyothene nagumaneya vadamboli, ninothuulela ukwa wa Yesu Kristu wenuo unamdhiveliwana i-yo. Kwaranya vyothene vyevi nithuulela udhivela ulukulu unithonyi-edhe Yohova voniva-a Mwanee ninga kuto. Maanene ithuulelo inodha ireya namaulo adambo la Xixanu 15 wa Abril wa 2022. Ninomdhiveliwana Yohova na Mwanee. Ee-no vadambo lothuulela ukwa wa Yesu, kavali yongo inofwanela i-yo iona kala yofuneya vinjinji yeyo inaniimwanani-e fwanyea vaithuuleloni.
NYUMBO 16 Tamandani Yehova Chifukwa cha Mwana Wake Wodzozedwa
^ ndima 5 Akala ninodedi-edha dhadhowa dhulu venango dakala m’paradaizo vailamboi, ninodedi-edhela mwachidwi dafwanyeya vaithuulelo yawa ili yothene. Muyofunjedha yei ninofuna nita panyeni mwasa ovweya okumela malembani unoniiri-a fwanyeanga vaithuuleloni thitho mwemo munaganyalele i-yo nafwanyeangavo.
^ ndima 2 Madhu enala tathapuleliwile ira “Mwiirengana vyevi vondithuulela miyo” (Ingles yamalamboano) na “Iranani vyevi ninga yondithuulelana” (Bibilya lau Yerusalemu).
^ ndima 4 Ira mwiidiwe vinjinji vamwasa wa vwelano lachineneeva na vwelano la Umwene, onani mwasa oi, “Mudzakhala ‘Ufumu wa Ansembe’” mu Nsanja ya Olonda ya October 15, 2014, patsamba 15-17.
^ ndima 4 MADHU OTHAPULELIWA: Madhu oi ozoziwa o-alela anothapulela ira Makristau ozoziwa tali vailambo yavathivano.
^ ndima 10 Ira mwiidiwe vinjinji vyoonga ulosi oonga vyamagolomondo menli oongiwa mu kapitulo 37 la Zakiyeli, onani mwasa oi, “Mafunso Ochokera kwa Owerenga” mu Nsanja ya Olonda ya Julho wa 2016.
