1. Movwelana na 2 Akoritiyo 3:1-3 linonikami-a a-vi vwechecha ngari ina i-yo yokami-a anamafunjedha fiedha badiziwa? (Onani iruthiruthi ya vakapani.)

N’NGA nyo munovivwa a-vi mwaona namafunjedha Bibilya wa pingoni mwinyu abadiziwanga? Mo-okaikela munokala waimwerumweru vinjinji! (Mat. 28:19) Akala amfunji-a mutuo ngunyo fiedha badiziwa onga mwaimbarimbari munokala waimwerumweru vinjinji! (1 Atez. 2:19, 20) Anamafunjedha anobadiziwa anokala “makarta apama olanyedhiwa,” a-kala wa anamafunji-ave mbwenye thitho wa pingo othene.—Muleri 2 Akoritiyo 3:1-3.

2. (a) N’nga pyofuka viivi vinofwanela i-yo vivuka, mwasiwa ngwan’ni? (b) N’nga funjedha Bibilya chini? (Onani madhu achindo.)

² Pyapama vinjinji ona ira komoni wa vyawa vinai, avereji ya namafunjedha enao tafunji-iwa vakadha mwedi vailambo yothene ali okwakwana 10.000.000. * Wari mwa vyawa vyevi avereji yokwakwana 280.000 tanovivelela badiziwa kala Mboni dha Yohova thitho kala anama-arela a Yesu Kristu. N’nga ninaire a-vi ira niode akami-a mamiliyau aanamafunjedha Bibilya fiedha badiziwa? Yohova ngoleva rima vinjinji liye unave va-a hora yoi atu takale anamafunjedha a Kristu, moi ee-no ninofwanela laba mwemo munofuna i-yo odela mombaranya ira niode kami-a anamafunjedha fiedha badiziwa akala pyoodeya. Neri-a hora inaamala mobaranya vinjinji!—1 Akor. 7:29a; 1 Pe. 4:7.

3. N’nga yofunjedha yen’na inofuna iongen’ni vamwasa ofunji-a Bibilya?

³ Mwasa orambuleleya ofuna ira anamafunjedha, Gulu Lotonga  latofuka maofesi a tambi o-iyana-iyana mwemo munaodele aliwa kami-a anamafunjedha Bibilya fiedha badiziwa. Yofunjedha yei na yo-arela ninofuna nione mwemo munafunjedhele i-yo kala apainiya, amixonale, na anamaing’anela isa enao ali adodoliso. * (Sang. 11:14; 15:22) Yofunjedha yen’na inofuna ionge mwemo munairele namafunji-a na namafunjedha ira funjedha wiwa Bibilya ukale okaatheya pama. Vaikundu yoroma ninofuna nione vyongo vyokwakwana vithanu vyevyo namafunjedha inofwanela liye irana ira adhowe vasogolo fiedha badiziwa.

4. Mwasiwa ngwan’ni tipama thuulela mwemo munofunjedhela i-yo oimelene na mwinyaa vandhe?

⁴ Anamalaleya anjinji abali na arongola anofunji-a tangali oimelene mo-oira kaathi na mwinyaa vandhe. Masiki ira yen’na chiikundu yapama yofuna ona chidwi ya mwinyaa vandhe, mbwenye tapanyao unokala ombaranya vinjinji thitho hora dhinjinji kunaireya vasumana lililothene. Mofuna ira tadhowenave wenjedhela chidwi ya mwinyaa vandhe namalaleya hora dhinango unovepa numero ya mwinyaa vandhevo aira ee-no bali unolemba mesage liye mtumizela mwinyaa vandhe ira taode tapanya makundo enango a Bibilyani hora dhinango funjedha weu unooda kala wa medi mingasi mbwenye kunokalecha funjedha odhowa vasogolo. Mbwenye kathuulelani ira; akala ira ndinovilimbi-edha hora dhothene ira mwinyaa vandhe avivelele fiedha badiziwa, mbwenye liye malambo manjinji kandinomfwanyecha ira nifujedhe madhu a Nlungu, n’nga liye * unofiedheladi badiziwa? Mwaimbarimbari vinooneya ira kabe.

5. Movwelana na likundo liongile Yesu va Luka 14:27-33, inofuna nikami-a chini va basa li-u loira anamafunjedha?

⁵ Va hora inango, Yesu atoonga ifwanafwani-o yofuna kala namafujedha. Yoroma liye aongile vya mutu unofuna manga nyumba, “liye unofwanela kaathi lengesa kobiri” akala unomala mangi-ana nyumba. Adhaire ee-no atooona vya mwene unofuna dhowa mawanana mwene fwee mwene wen’na “yoroma unofwanela kaathi liye ing’anechecha” akala ira anyakondwee atokaana mafwaramemto okwakwanela ira tanamaganyali khondwiyo. (Muleri Luka 14:27-33.) Yesu, atoidhiwa ira tisaasawa namutu unofuna kala namafunjedhee kadhamutu unofwanela thuulela pama na onechecha akala liye unooda kala nama-arela wa Kristu. I-yo thitho ninofwanela akami-a anamafunjedha thuulela vyevi thitho alimbi-a funjedha sumana lililothene. N’nga ninaviirena a-vi vyevi?

6. Chini inofwanela i-yo irana ira namafunjedhi-u adhowe vasogolo?

 ⁶ Yoroma kuwenjedha wi-u okala oimelene. Muvilimbi-edhe onga makundo a Bibilyani vahora iliyothene inoawaredhana nyo. Mwinyaa vandhe mwamlemeeli-edha tapanya hora injinji mumfuke ira: “Mutokaana limburo loira nikaathi nitapanye vinjinji?” Inofuna liye wakula inooni-a ira liye unofuna funjedha Bibilya. Mwaira ee-no vofuna wenjedhela dhowa vasogolo wa namafunjedhinyu, mfukeni ira: “Munoona a-vi vakadha sumana nifunjedhenga fendo winli?” Masiki angalive ee-ni vatokala vyongo vinango vinofwanela i-yo ira nifunjedhenga fendo umbo-i venango vendo winli vasumana.

7. N’nga namafunji-a unaire a-vi ira akozeele pama funjedha na namafunjedhee?

⁷ Nyo ninga namafunji-a, munofwanela kozeela va funjedha Bibilya uliwathene. Muromena leri ndima thitho ona malemba o-indiwa. Mukaena makundo ovwechecha pama mathuuleloni mwinyu. Thuulelani muru wa mwasuo, visimiru vili wari, vyofuka vya yofunjedhao, gumani-avo malemba a-indiwile ira “muleri,” na viruthiruthi na mavidiyo anofuna ukami-ani ira muode i-nda likundo. Mwaira ee-no muthuulele vya namafunjedhinyu, muthuulele mopwaseya mwemo munofuna nyo vwei-edha pama makundo, mwaira ee-no namafunjedhinyu unooda avwechecha mo-orucha no a-indi-edha basa makundwao.—Nee. 8:8; Sang. 15:28a.

8. N’nga lemba la Akolose 1:9, 10 linonifunji-an’ni vamwasa o-ela lobelo na namafunjedhi-u?

⁸ Yongo inango inofuna nyo ira vaikundu yokozeela winyu, kuira lobelo wa Yohova vyamwasa wa namafunjedhinyu vinofuneela liye. Muvepe Yohova ira aukami-eni funji-a mwapama ira muode mfiya varimani namafunjedhinyu. (Muleri Akolose 1:9, 10.) Muonecheche makundo anorucheyana vwechecha namafunjedhinyu venango aroromela. Kamudiwale ira ifunelo yinyu kufuna mkami-a ira abadiziwe.

9. N’nga namafunji-a unaire a-vi ira amkami-e namafunjedhee kozeela vya funjedha wiwa? Onganimo.

⁹ Ifunelo yi-u vofunji-a mo-ojombi-a na namafunjedhi-u choi namafunjedhi-u aodenga simba ira Yesu na Yohova anomfunela vinjinji. (Mat. 5:3, 6) Ira aode ganyali na funjedhao namafunjedha unofwanela kaana chidwi na vinofunjedha liye. Ira vyevi viodeye, munofwanela m’mwandela ira liye akozeelenga funjedha uliwethene. Mum’mwandele ira aleringa yofunjedha ya muru wenuo mopwaseya thitho vithuulela mwemo munofuna aliwa labela basa vaingumi yee makundo anofuna liye funjedhao. N’nga nyo munamkami-a a-vi? Mukozeele vambo-i yofunjedhao  na namafunjedhinyu vom’moni-a mwemo munofwanela liye laba. * Mum’mwandele mwemo munafwanyele liye vyowakula vyavaduzi navaduzi vya yofuka ya yofunjedha yenio. Mummwandele thitho pitari madhu anofuna liye oda wakula thitho athuulela, mwaira ee-no mumvepe ira liye arumele na madhu eene okumela vathi varima. Akala namafunjedha unoviirana vyevyo nyo munooda idhiwa ira liye unovwechecha makundo. Mbwenye vatokala vyongo vinango vinofuna nyo mlimbi-a ira namafunjedhinyu aviire.

10. Mwasiwa ngwan’ni namafunjedha unofwanela leri Bibilya dambo lililothene, n’nga liye unaganyali a-vi na leri wee Bibilya?

¹⁰ I-yachivo funja na namafunjedhinyu sumana lililothene, vatokala vyongo vinango vinofwanela namafunjedhinyu viira dambo lililothene vaeka. Liye unofwanela m’mongana Yohova venango mvuruwananga Yohova aonganga na liye. Ira aode mvuruwana Yohova namafunjedha unofwanela leri Bibilya malambo othene. (Yoswa 1:8; Masal. 1:1-3) Mum’moni-e mwemo muna-indi-edhele liye “thandha oleri Bibilya” unofwanyeya va jw.org. * Ira namafunjedha aganyali na leri wee Bibilya mumwandele ira liye unofwanela thuulela vinofuna liye leri, mum’mwandele thitho ira romela wari moleri Bibilya unofwanela vifuka ira: N’nga vyevi vinondifunji-a in’ni vyoonga Yohova? N’nga ndinavi-indi-edhe a-vi basa vaingumi yanga?—Mayir. 17:11; Tiy. 1:25.

11. N’nga ninaire a-vi nimfunji-e namafunjedhi-u ira aodenga lobela mofwanelela, n’nga mwasiwa ngwan’ni pyofuneya ira liye unofwanela lobelanga wa Yohova mo-ojombi-a?

¹¹ Mumlilmbi-e namafunjedhinyu onga na Yohova dhela mulobelo dambo lililothene. Ira aode irana vyevyo unofwanela kala wathindhi volobela, ngumwasiwa mwa-anarome venango mwamala vakadha funjedha uliwethene muromenga na lobelo na mari-a na lobelo vambo-i na namafunjedhinyu. Akala namafunjedhinyuo unouvuruwanani mwalobelanga liye unofunjedha lobela mofwanelela wa Yohova dhela mwa dhina la Yesu Kristu. (Mat. 6:9; Juwau 15:16) Kathuulelani mwemo namafunjedhinyu munakalele liye vauxamwali olimba na Nlungu! Dhela mofunjedha dambo lililothene (vomvuruwana Yohova) na leri Bibilya thitho m’mongana (Yohova dhela mulobelo). (Tiy. 4:8) Akala namafunjedhinyu unolemeela vyevi onga mwaimbarimbari liye unokala airanga yongo ilukulu inofuna mlimbi-a ira avivelele fiedha badiziwa.

12. N’nga namafunji-a unaire a-vi ira aode mkami-a namafunjedhee limbi-a uxamwalee na Yohova?

¹² Vyongo vyothene vinofunjedha namafunjedha Bibilyani kavinofwanela kaathi mathuuleloni mwee mbwenye vinofwanela chitela rimani. Mwasiwa ngwan’ni? Mwasiwa rima—ngunofuna vinolavela i-yo, vyothuulela, na vyokumbanya—thitho ngunonilimbi-a ira niode laba yongo. Yesu anooda i-ndi-edha basa pama vyongo vyokumela vathi varima vofuna funji-a ngumwasia atu tanom-ara neri-a liye anooda funji-a mo-inda rima. (Luka 24:15, 27, 32) Namafunjedhinyu unofwanela m’mona Yohova ira ngu mutu waimbarimbari, venango ira ngumutu oi unooda kala vauxamwali na liye, unofwanela m’mona Yohova kala Baba, thitho xamwalee. (Masal. 25:4, 5) Akala munaafunji-a Bibilya muodenga onga makalelo a Nlungu ira muode ganyali ingumi. (Ekis. 34:5, 6; 1 Pe. 5:6, 7) Kamubale vya mwasa unoonga nyo na namafunjedhinyu, muvilimbi-edhe ira namafunjedhinyu akale vauxamwali na Yohova ninga unaam’mona. Mukami-e vwechecha makalelo apama a Yohova ninga—udhivela, tangaranga, thangani-avo lenlo. Yesu atoonga ira “lamulo loroma lilukulu va malamulo othene” toira “udhiveliwengana Yohova Nlungwao.” (Mat. 22:37, 38) Muvilimbi-edhe limbi-a udhivela wa namafunjedhinyu na Yohova mokumela vathi va rima.

13. N’nga munamkami-e a-vi namafujedhinyu idhiwa makalelo a Yohova?

¹³ Vyotapanya vinyu na namafunjedhinyu, muthonyi-edhenga ira munomdhiveliwana Yohova. Vyevyo vinooda mkami-a namafunjedhinyu vwechecha ira liye unofwanelela. (Masal. 73:28) Mofwanafwani-a, venango bukhu linofunjedha nyo litokaana malemba a-indiwile anooni-a vya makalelo a Yohova—ninga udhivela, zelu, longomana, nanguru—nyo munooda mfuka namafunjedhinyu ira n’nga nyo munovivwa a-vi, evi vinou-indani rima? Muonge vya makalelo enala wa namafunjedhunyu ira ndi myasa inofuna ira liye amdhiveliwengana Babee wadhulu. Mbwenye masiki angalive ee-no vatokala yongo inango inofuna ira namafunjedhinyu aire vofuna dhowa vasogolo fiedha badiziwa.

14. Movwelana na lemba la Aebere 10:24, 25 n’nga migumano inaode ea-vi mkami-a namafunjedha Bibilya dhowa vasogolo?

¹⁴ I-yo othene ninofuna ira anamafunjedhi-u takale odhowa vasogolo fiedha badiziwa, ira naakami-e ninofwanela alimbi-a ira tafwanyeenga vamigumanoni. Anamafunji-a adodoliso anoonga ira namafunjedha aromanga fwanyeya vamigumanoni namafunjedha wenuo unokala  odhowa vasogolo mombaranya vinjinji. (Masal. 111:1) Anamafunji-a enango anoawandela anamafunjedhiwa ira vinofunjedha aliwa ndi hafu ya makundo enango a Bibilyani mbwenye ira taganyali na hafu inango anofwanela fwanyeya vamigumanoni. Muleri Aebere 10:24, 25 vambo-i na namafunjedhinyu thitho mummoni-e ira vinokala pama akala liye unofwanyeya vamigumanoni. M’moni—eni vidiyo yoi Kodi pa Nyumba ya Ufumu Pamachitika Zotani? * Mkami-eni namafunjedhinyu vwechecha ira dhowa migumanoni sumana lililothene unooda kala ikundu yofuneya vinjinji vaingumi yee.

15. N’nga munaire a-vi ira mulimbi-e namafunjedhinyu fwanyeyanga vamigumanoni mo-ojomba?

¹⁵ N’nga nyo munaire a-vi akala ira namafunjedhinyu kanofwanyeya vamigumanoni, venango unofwanyeya va dambo linofuna liye atonga vyee twanyuu? Mum’mwandele mwapama vyongo vifunjedhile nyo vagumano uvirile chineneeva. Vyevyo vinooda mlimbi-a akala ira m’mwitanave ira afwanyeye vamigumanoni. Mumva-e Nsanja ya Namaing’anela venango Ingumi yi-u yau Kristau na Urumiwi Ixibuku ya migumano ino-indi-edhiwa basa gumanoni. Mum’moni-e vinofuna nyo mafunjedha va sumana lo-arela thitho mumfuke akala utofwanya likundo lo-inda rima. Vinofuna uvwa namafunjedhinyu dambo loroma fwanyeya vamigumanoni vinooda wenjedhela liye oda i-yani-a na vyaonecha liye migumamo ya mareligiau enango. (1 Akor. 14:24, 25) Liye unooda aidhiwa atu enao tana ifwanafwani-o yapama yoi aliwa anooda mkami-a vivelela fiedha badiziwa.

16. N’nga pivyongo viivi vyevyo vili vyofuneya vofuna mkami-a namafunjedha fiedha badiziwa, n’nga yofunjedha yo-arela ninodha funjedhan’ni?

¹⁶ Makundo othene afunjedhile i-yo fiedha ee-ni, n’nga ninaakami-e a-vi anamafunjedhi-u vivelela fiedha badiziwa? Mlimbi-eni namafunjedhinyu funjedha aonenga kala yongo yofuneya vinjinji a-tukula mowaredhana tukula mwaimbarimbari vofunjedha sumana lililothene thitho kozeela va funjedha uliwethene naira lobelo mwa-anarome. I-yachi vyevyo mlimbi-eni namafunjedhinyu m’mongana Yohova malambo othene thitho limbi-a uxamwalee na liye. Vogomi-edha mlinbi-eni namafunjedhinyu fanyeya vamigumanoni mo-ojomba. (Onani kwadru “ Vinofwanela ira namafunjedha ira abadiziwe.”) Masiki angalive ee-no vatokala vyongo vinango vithanu vyoi anamafunji-a taode viira vofuna kami-a namafunjedhiwa fiedha badiziwa. Pivingasi yofunjehda yo-arela inodha onga vyevi.