1. N’nga Yohova unoava-an’ni arumiwee ororomeleya?

MWAUDHIVELA, Yohova utoava-a ngari anamalabee othene ororomeleya ira takaena limburo pingoni. Masiki ira ninolaba mabasa o-iyana-iyana mbwenye othene nili ofuneya vamethoni va Yohova, mbwenye thitho mutu uliwethene unofuneela wafwee. N’nga rumiwi Paulo unonivwei-a a-vi va yofunjedha yofuneyai?

2. Movwelana na lemba la Aefeso 4:16, mwasiwa ngwan’ni ninofwanela lemezana no laba mabasa vambo-i?

² Va lemba likumi-iwile murula, Paulo utoonga ira kavali mutu unofuna ing’ana namalaba wa Yohova liye ummongana ira: “Miyo kandinaufuna.” (1 Akor. 12:21) Ira pingoni mukale rendele ninofwanela lemezana unango na fwee thitho laba vambo-i mabasa. (Muleri Aefeso 4:16.) Nalabanga movwelana ninokala odhivelana thitho pingo unokala olimba.

3. Chini inofuna i-yo funjedha va yofunjedha yei?

³ Pivikundu viivi vinofuna i-yo lemezela abali-u pingoni? Va yofunjedha yei, ninofuna nione mwemo andimuwa avapingoni munofunela aliwa lemezana. Vo-arela ninofuna nione mwemo munaalemezele i-yo abali naarongola enao ali adiye, vogomi-edha ninofuna nione mwemo munaalemezele i-yo atu anofunja iongelo yi-u.

4. Mbamalangi-o a-vi anofwanyeya va lemba la Aroma 12:10, enao anofwanela ira andimuwa avapingoni taa-arele?

⁴ Ndimuwa uliwethene vapingoni usakuliwile na zimu ochena wa Yohova. Uliwethene utokaana yotuva na dodoliso lo-iyana na fwee. (1 Akor. 12:17, 18) Enango ta-eliwile chineneeva  kala andimuwa avapingoni katinaidhiwe vinjinji, thitho enango katinaoda laba mabasa manjinji mwasa waurenda venango mwasa oulula, masiki angalive ee-no kavali mutu unofuna ing’ana fwee kalanga ninga funa aonge ira: “Weyo kunafuneyavo vapingoni vano.” Malo moira ee-no, andimuwa othene anofwanela arela malangi-o a rumiwi Paulo ali va lemba la Aroma 12:10.—Muleri.

5. N’nga andimuwa avapingoni anaoni-e a-vi ira anolemeza andimuwa afwiwa, mwasiwa ngwan’ni pyofuneya ira tairenga vyevyo?

⁵ N’nga ndimuwa wavapingoni unaoni-e a-vi ira unolemeza andimuwa afwee? Voavuruwana mopwaseya simbwasimbwa aliwa anofwanela irana vyevyo vanogumaneya aliwa ninga bungwe laandimuwa ira tamange likundo lofuneya movwelana. Mwasiwa ngwan’ni anofwanela ira ee-no? Onano viongile Nsanja ya namaing’anela, ya chichewa, 1 mwedi wa outubro yawa ya 1988, iyongile ira: “Andimuwa avapingoni anodha mmwidhiwa Kristu mwa zimu ochena, zimu ochenula unooda dhela mathuuleloni mwa ndimuwa uliwethene vari va gulu laandimuwa ira aoni-e makundo aliothene ofwanelela a Bibilya ira taode limbana likundo lililothene lofuneya va yongo inofuna aliwa manga. (Mayir. 15:6-15) Kavakale ndimuwa uliwethene okaana mathuulelo ooni-anga ninga nguliye baa-i una zimu ochena.”

6. N’nga andimuwa analabe a-vi movwelana, n’nga vyevyo vinaganyali-e a-vi pingo?

⁶ Ndimuwa unolemeza andimuwa afwee avapingoni, kanokala vasogolo vaafwee uneyanga ninga wazelu tofwanelela kwaranya andimuwa afwee, vanoira aliwa gumano waandiwa. Liye kanosimbwa onga kwaranya afwee unooda onga vinothuulela liye mbwenye modhievi-a, afwee taonganga mathuulelwiwa liye unoavuruwana mwapama. Malo moira ee-no liye unokala okozeya tapanya naafwee makundo okumela Bibilyani namalangi-o okumela wa “dhaari ororomeleya na wazelu.” (Mat. 24:45-47) Andimuwa tagumaneya mwaudhivela na molemezana zimu ochena unokala naaliwa thitho aliwa anooda manga likundo lokami-a othene aliwa limbi-a pingoni.—Tiy. 3:17, 18.

7. N’nga Yesu aaonecha a-vi adiye?

⁷ Pingoni mutokala anamathelana na mabanja enango o-iyana-iyana, mbwenye thitho mutokala abali naarongola enango ali adiye. N’nga adiyala ninofwanela ira naaonenga a-vi? Dhoweni nione Yesu mwaaonela liye adiye, hora yothene yali Yesu vailambo yavathivano ali diye. Liye nguru dhee alabana basa lava-iwile liye, mbwenye kavali dambo laongile Yesu ira kala diye venango thela mutu unooda kanyi-edhiwa, mbwenye liye atoonga ira atu enango anooda kalave diye a-thela (Mat. 19:11, 12; muone madhu a chindo Mateu 19:12.) Liye kaaona adiye ninga othitha pereso thitho liye kaaona ninga anaaluza.

8. Movwelana na lemba la 1 Akoritiyo 7:7-9, Paulo alimbi-a ira Makristau tairen’ni?

⁸ Ninga mwakalele Yesu rumiwi Paulo kaathelile liye alive diye. Paulo kaaongile ira pyodawa mutu thela liye atozindiyela ira yeyo chosakula yamutu. Angalive ira chosakula yamutu, Paulo anokami-a thitho alimbi-a Makristau ira akala anooda dhowanave mlabela Yohova tangali adiye. (Muleri 1 Akoritiyo 7:7-9.) Mwaimbarimbari, Paulo kaaona Makristau o-othela kala othitha pereso. Ngumwasiwa liye atofiedha msakula zombwe Timoteyo wenuo ali diye, ira aode laba mabasa malukulu. * (Afil. 2:19-22) Vyevyo vinonikami-a ona ira kai pama onanga ira bali unooda kaana izo mwasa othela venango o-othela.—1 Akor. 7:32-35, 38.

9. N’nga maonelo apama mbavi vokala diye venango thela?

⁹ Yesu venango Paulo katinaongevo ira Makristau tathelenga venango katithelenga. N’nga likundo leli linofuna lithapulelen’ni? Nsanja ya namaing’anela, ya chichewa, 1 mwedi wa outubro yawa ya 2012 yatoonga pama voonga ira: Mwaimbarimbari vikundu viinlivi [kala diye venango thela] inooda kala yotuva yokumela wa Nlungu. . . . Yohova kanoona ira kala diye chiyongo yova-a manyadho moidhiwa vyevyo ninooda lemeza abali-u naarongola enao ali adiye pingoni mwi-u.

10. Akala ninolemeza abali-u naarongoli-u aadiye ninarambele ira n’ni?

¹⁰ Ninaoni-e a-vi ira ninolemeza mathuulelo na vyoira vyaadiye? Pyapama idhiwa ira Makristau enango talive adiye mwasa oira aliwa tafunile ee-no. Mbwenye enango talive adiye mwasa oira katinafwanye fwiwa wavarimani enango ngumwasa oi i-yanee venango  man’ne ute ukwa. Mwamakalelo othene enala tipama ira abali naarongola takalelenga fuka ira: “Mwasiwa ngwan’ni kamutheliwile venango kamuthelile?” Venango pyapama sakanga ndhila dhoi venango bali venango rongola wa diye akaena fwee? Vinokala pama akala ira bali venango rongola wadiuo ute nivepa. N’nga akala ira liye kauvepileni vinokala a-vi liye uvwa ira munaamsakela diye? (1 Atez. 4:11; 1 Timo. 5:13) Dhoweni nioneni abali-u naarongoli-u ororomeleya aadiye muongele aliwa vamwasa wen’na.

11-12. Mbamakalelo aavi anaode sukwali-a adiye?

¹¹ Namaing’anela isa wa diye unodhiveliwana basa lee vinjinji aongile ira kala diye unodhi-a maraeli-o manjinji. Mbwenye liye unokalecha osukwala angalive ira abali katinoirecha msingilila tamfuka ira: “N’nga nyo athelaa?” Bali unango wadiye unalaba Beteli aongile ira: “Hora inango, abali naarongola anodithuuleli-echa ira kala diye pyova-a sisi vyevyo vinodhi-a mathuulelo oira kala diye kai yotuva mbwenye ndi tolo.”

¹² Rongola mwinango wa diye unolaba Beteli aongile ira: “Atu enango tanothuulela ira diye uliwethene vanokala liye utokaana fwee unofuna liye mtheliwana venango mthela, venango enango anothuulela ira adiye tadhowanga limburoni venango ilambo inango oi utokala vyoireya anodhowa masakao mutu unango unafuna aliwa dhamtheliwana venango mthela. Dambo linango voi ndatokuma beteli dhowa unangowene ma-inda basa larumiwile miyo, ndafiilenga dambo loi ma-iyunimwee atu anodhowa migumanoni rongola andiwachenle atondiwandela ira pingoni mwee mutokala abali ambinli atungalanga. Liye atondiwandela ira kai ira unaandisakela diye tai, mbwenye ningafiile vanyumbani ya Umwene liye atondidhowana vali abali ambiilale ira nimatapanyenga pyoira a-fuka ira ningafiile natonyaswa vinjinji.”

13. Chiifwanafwai-o iivi ilimbi-idhe rongola unango wa diye?

¹³ Rongola unango unolaba Beteli uongile ira: “Miyo nditoidhiwa apainiya aadiye a tunga lapamalene tali othuulela pama thitho ovilimbi-edha thitho aimwerumweru vabasa liwa. Aliwa tanokami-a pama vapingoni. Aliwa kala diye katinoona kala yongo yorucha thitho katinaviona kala avadhulu mwasa okala aadiye aliwa thitho katinosukwala mwasa o-othela venango a-kaana a-ima.” Ngumwasiwa unairi-a pingo kala limburo lapama! Othene tanodhivwa kala olemeziwa thitho orii-edhiwa. KavaIi unodhivwa kala ova-a sisi, thitho okondiwa venango viona kala odhowa vasogolo kwaranya atu enango. Uliwethene unovivwa kala ofuneya thitho kaana limburo pingoni.

14. N’nga ninaoni-e a-vi ira ninolemeza adiye?

¹⁴ Abali-u naarongoli-u aadiye pingoni aliwa anofuna ira abali taalemezenga na makalelo anaaliwa. Kai namwasa o-othela venango o-otheliwa, kaninofwanela avwela sisi ninofwanela alemezanga namakalelwiwa. Nairanga ee-no abali naarongoli-u aadiye katinathuulelenga ira i-yo ninoawandela ira: “Kaninoufunani.” (1 Akor. 12:21) Mo-iyana na vyeyo aliwa anooda vivwa ira ninoalemeza thitho ninolemeza limburo linaaliwa pingoni.

15. Mbamachinjo aavi anoira abali naarongola ira taode wenjedhela mlabela wiwa basa Yohova?

¹⁵ Romela yawa imbo-i ivirile fiedha maano anamalaleya anjinji anofuneela funjedha iongelo inango vofuna wenjedha basa liwa lolaleela. Ira evyo viodeye aliwa tafwanela chinja  vyongo vinago vaingumi yiwa, aliwa atothama, pingo waiongelo yiwa dhowa makala pingoni waiongelo inango mwemo murambuleleile anamalaleya. (Mayir. 16:9) Irana vyevyi chiyongo yosakula mutu vaeka ira taode wenjedha basa liwa lomlabela Yohova. Masiki ira vanovira hora injinji ira aliwa taode funja pama iongelo yaweo, mbwenye aliwa anooda kami-a vinjinji makalelwiwa apama na viidhi aliwa vinooda limbi-a pingo. Mo-okaikela abali odhivelelala, mbofuneya vinjinji wa-iyo.

16. Ndivyofwanelela viivi vinofuna andimuwa avapingoni i-ndi-edha basa ira taode e-la rumiwi okami-a venango ndimuwa wavapingoni?

¹⁶ Gulu laandimuwa kalinofwanela a-ela arumiwi venango andimuwa avapingoni mwasa oira aliwa katinooda onga pama iongelo yavapingoni. Aliwa anofwanela ona makundo a Bibilyani anaode afwaneli-edha izo yeyo, a-kala ing’ana iongelo.—1 Timo. 3:1-10, 12, 13; Titu 1:5-9.

17. Ndi vyofuka viivi mabanja enango vinokaana aliwa tathamela ilambo inango?

¹⁷ Mabanja enango anothamela vilambo vinango mwasa otawelao venago saka basa. Mwamakalelo enala venango a-imiwa anofunja xikola laiongelo yaolambo ithamile aliwa. Venango anamabaliwa anooda funjedha iongelo yailambo yeo a-rela ira taode fwanya basa. N’nga akala ira ilambo ithamele aliwayo utokala pingo venango gurupu? N’nga banjalo linofwanela ira limagumaneenga pingo wa iongelo jiivi? Anofwanela ira tamagumaneenga pingo waiongelo uthamele aliwao venango waiongeli uthamile aliwa?

18. Movwelana na lemba la Agalata 6:5, ninaoni-e a-vi ira ninolemeza yosakula ya muru wabanja?

¹⁸ Unofuna sakula pingo unofuna aliwa magumaneyanga ngumuru wavabanjanivo. Mwasa oi yei chosakula vamutu vaeka, muru wabanja unofwanela onechecha ule unofuna ganyali banja lee tagumaneyanga. (Muleri Agalata 6:5.) I-yo ninofwanela lemeza yosakula ya muru wa banjalo i-yo kaninobala vinofuna liye sakula, mbwenye muru wa banjalo vinofuna aliwa sakula ninofwanela ira nivilemeze tasakula ira tagumaneenga pingoni mwi-u niode awachela mwaudhivela.—Aroma 15:7.

19. N’nga chini miru ya banja inofuna aliwa lobelela vofuna sakula?

¹⁹ Hora inango, banja linosakula magumaneyanga pingo waiongelo yawaniwa. Venango a-imiwao iongelo yapingoni mwinyu katiidhi pama, akala ira aliwa anodhowa maguneya pingoni mwaiongelo yailambo ithamele aliwao venango a-imiwa tadhowa migumanoni katinaganyalio anofiedha a-dhowa vasogolo mwauzimu. Na mwasa wan’ni? Namwasa oi venango a-imao anofunja iongelo yailamboni muthamele aliwamo a-kala iongelo yailambo uthamile aliwa ya pingoni munagumaneya aliwamo mwamakalelo oi ee-no muru  wabanja unofwanela thuulela pama wari mwa lobelo kalelo linakami-a a-imiwa ira tadhowe vasogolo mwauzimu. Venango unooda akami-a a-imiwao ira taode ifunja pama iongelo yailambo ithamele aliwa venango anooda thamela waiongelo inovwa pama a-imiwao, kavali mwasa akala ira muru wabanja utosakula pingo ufun’ne liye unofwanela ira ikundu yee ira liye vambo-i na banja lee tavionenga kala olemeziwa thitho ofuniwa.

20. Ninaoni-e a-vi ira ninoalemeza abali naarongoli-u enao anofunja iongelo ipya?

²⁰ Va vyongo vinjinji vifunjile i-yo ndulimu, vinooni-a ira vatokala mipingo minjinji thitho viongelo vinjinji vinofuna i-yo funjedha. Abali enala anorucheya funa onga vyongo vinothuulela aliwa, i-yo nakalelanga ona vinododomi-a aliwa onga iongelo yi-u ninooda zindiela ira aliwa anomdhiveliwana Yohova thitho anofuna mlabela. Nazindiyelanga makalelo apama aabali naarongola enala ninooda arii-edha noalemeza vinjinji. Vamwasa oi aliwa katinooda onga pama iongelo yi-u kavanakala selu ofuna awandela ira: “I-yo kaninoufunani.”

21-22. N’nga njingari iivi ina i-yo?

²¹ Yohova utoniva-a ngari yodabwi-a yokaana limburo mwari mwa pingoni mwee. Liye kanobala akala nili lombwana venango nili i-yana venago akala ira nili diye venango othela thitho liye kanobala akala nili azombwe venago nili oulula akala ninooda onga pama iongelo venango kaninooda onga pama othene nili ofuneya wa Yohova thitho nili ofuneya wamutu na fwee.—Aroma 12:4, 5; Akol. 3:10, 11.

²² Ninooda dhowanave vilimbi-edha a-rela vifunjedhile i-yo dhela mwaifwanafwani-o ya rumiwi Paulo i-indi-edhile liye basa tutu la mutu. Ee-ni, ninokala okozeya vangari iliyothene inava-iwe i-yo vofuna oni-a ira ninolemeza limburo li-u thitho ninolemeza limburo laatu enango pingoni mwa Yohova.