1. N’nga njingari iivi ina i-yo?

NJINGARI ilukulu kala pingoni mwa Yohova, nili paradaizoni wauzimu modhala atu anjinji arendele na aimwerumweru. N’nga nyo limburo linyu tivi vapingoni?

2. N’nga chiifwanafwani-edho iivi ya-indi-edhe basa rumiwi Paulo volemba makartee o-iyana-iyana ovudheleliwa?

² Va muru wen’na ninodha funjedhavo vinjinji kumela vaifwanafwani-o ya-indi-edhe basa rumiwi Paulo volemba makartee manjinji ovudheleliwa. Vakarta limbo-i na limbo-i la rumiwi Paulo liye atofwanafwani-a pingo na tutu lamutu. Liye thitho atofwanafwani-a va kadha mutu uliwethene pingoni kala ninga tutu lamutu.—Aroma 12:4-8; 1 Akor. 12:12-27; Aef. 4:16.

3. Mbamakundo mararu aavi anafuna i-yo funjedha mwari wa muru wen’na?

³ Va muru wen’na ninofunjedha makundo mararu ofuneya maningi a vifwanafwani-o vya Paulo enao anaode nikami-a. Likundo loroma ninofuna nifunjedhe ira vakadha mutu wa i-yo utokaana ikundu yofuneya pingoni * mwa Yohova. Likundo lanambili ninofuna nitapanye inaire i-yo akala ninorucheya zindiela ikundu ina i-yo pingoni. Yanararu ninofuna nitapanye ira mwasiwa ngwan’ni ninofwanela lemeza ikundu ina i-yo pingoni mwa Nlungu.

4. N’nga ninafunjedhavon’ni va lemba la Aroma 12:4, 5?

⁴ Likundo loroma linofuna i-yo funjedha vaifwafwani-o ya rumiwi Paulo toi, othene nili ofuneya va banjani la Yohova. Paulo voonga ifwanafwani-o yee aromilena madhu oonga ira: “Saasawa thitho na i-yo, masiki ira nili anjinji, nili tutu limbo-i movwelana na Kristu, mbwenye, thitho uliwethene vaeka nili vyano vinofuneela unango na fwee.” (Aroma 12:4, 5) N’nga Paulo afuna avwei-en’ni? Uliwethene wa i-yo utokaana ikundu yo-iyana vinjinji na fwee pingoni mbwenye uliwethene wa i-yo ngofuneya vinjinji.

5. Pyotuva viivi Yohova vinava-a liye pingo?

⁵ Navwa onga ira ana limburo pingoni inothuulela i-yo voroma nothuulela atu ale anosogolela. (1 Atez. 5:12; Aeb. 13:17) Chiimbarimbari ira dhela mwa Kristu, Yohova unova-a pingo yotuva yaalombwana. (Aef. 4:8) Mwari mwa vyotuva vyaalombwana ninofwanyamo gulu lotonga, anamakami-a a gulu lotonga anamaing’anela isa, anamafunji-a a xikola la Bibilya andimuwa ava pingoni naarumiwi okami-a. Abali othene enala asakuliwile na zimu ochena, atokaana basa lofuneya maningi voing’anela mabila ofuneya a Yohova na limbi-a pingo.—1 Pe. 5:2, 3.

6. Movwelana na lemba la 1 Atezalonika 2:6-8 n’nga alombwana osakuliwa na zimu ochena anovilimbi-edha a-vi volaba basa?

⁶ Abali anasakuliwa na zimu ochena vofuna ing’anela mabasa o-iyana-iyana. E-no ninga mandha, manyalo na vyano vinango vyatutu munalabela aliwa vofuna ganyali-a tutu. Abali enala anovilimbi-edha laba vofuna ganyali-a pingo, aliwa katinasakasaka vyofuna titimi-iwa. Mbwenye anovilimbi-edha vofuna kami-a no limbi-a abaliwa na arongoliwa mwiiroromelo. (Muleri 1 Atezalonika 2:6-8.) Ninosimba vinjinji Yohova voniva-a yotuva yaalombwana auzimu thitho odhivelela va basa.

7. N’nga ndimaraeli-o avi anowachela abali onolaba basa la hora yothene?

⁷ Pingoni mutokala abali anango anasakuliwa kala amisionario, apainiya avakundu venango apainiya okaatheya. Puemodi abali na arongola rungunuwa ilambo yothene atosakula basa la hora iliyothene, lolaleela na funji-a atu. Mwandhila yeniyo aliwa anooda kami-a atu anjinji ira taode kala anama-arela a Yesu Kristu. Masiki ira anamalaba a hora dhothene katinokaana vyongo vinjinji vyaututu mbwenye Yohova hora dhothene unooda araeli-a mwauzimu. (Marku 10:29, 30) I-yo ninoadhiveliwana abali naarongola odhiveliwiwala, thitho ninoasimba mwasa okala ikundu ya pingo wa Nlungu.

8. Mwasiwa ngwan’ni namalaleya uliwethene ngofuneya wa Yohova?

⁸ N’nga abali ana vizo venango anolaba mu hora yothene atokaana limburo pingoni? Mwaimbarimbari kabe namalaleya uliwethene wa milanyu yapama ngofuneya vinjinji vapingoni thitho wa Nlungu. (Aroma 10:15; 1 Akor. 3:6-9) Ninofwanela thuulelanga vinjinji ira yofuneya va pingoni kufunji-a atu ira takale anamafunjedha a Yesu Kristu. (Mat. 28:19, 20; 1 Timo. 2:4) Othene anoira ikundu ya pingo anamalaleya obatidiziwa venango o-obadiziwa anovilimbi-edha e-la valimburo loroma laleela vaingumi yiwa.—Mat. 24:14.

9. Mwasiwa ngwan’ni arongoli-u amakristau mbofuneya vinjinji?

⁹ Yohova unova-a arongola limburo lotitimi-eya pingoni, Yohova unova-a lemezo a-iyani-u alimbo kweliwa arongola aadiye anolambela mororomeleya. Bibilya linoonga vyavifwanafwani-o vyaa-iyana apama  ale adhiveliwi-idhe rima wa Yohova aliwa anothuuleliwana na vifwanafwani-o viwa vyapama mwasa oidhiwa, nairoromelo, limba rima, va-a wiwa mo-oumeleliwa, na mabasiwa apama. (Luka 8:2, 3; Mayir. 16:14, 15; Aroma 16:3, 6; Afil. 4:3; Aeb. 11:11, 31, 35) Mwaimbarimbari ninosimba vinjinji Yohova mwasa wa arongola au Kristau amipingoni mwi-u ale anooni-a vifwanafwani-o vyapama vimbo-ive.

10. Mwasiwa ngwan’ni andimuwa aimbwi mbofuneya vinjinji wa-iyo?

¹⁰ Thitho ninoraeli-iwa na mwasa okaana andimuwa aimbwi mipingoni mwi-u. Abali anango aandimuwa katodhivelela vaingumi yiwa yothene vomlabela Yohova, Mbwenye anango mwaaliwa kafunjedhile imbarimbari tangali a-ima, vamyasa miilila andimuwi-u venango anogumanana nyarwa dhinjinji vaingumi yiwa na mwasa oulula, nyarwa dhedhi dhinooda aimwanani-a laba vyongo pingoni, venango dhowa malaleela. Angalive ee-no andimuwa aimbwi anovilimbi-edha volaleela thitho ano-indi-edha basa nguru dhiwa volimbi-a nofunji-a atu enango. Viguman’nena aliwa vaingumi yiwa, i-yo nooda funjedhavo yongo dhela waaliwa, mwaimbarimbari abali-u aimbwi mbofuneya vinjinji wa Yohova thitho wa-iyo.—Sang. 16:31.

11-12. N’nga nyo munovivwa a-vi navifwanafwani-o vyaazombwe apingoni mwinyu?

¹¹ Thuulelani thitho azombwe, kai vyokweya waaliwa ulukulela ilambo yotongiwana Satana namanami-a thitho namafunji-edho aundhe. (1 Ju. 5:19) Angalive ee-no ninokala olimbi-eya naonanga aliwa kaodanga wakula vamigumanoni dhowa malaleela thitho oda vunela makundo a Bibilyani. Mwaimbarimbari azombwenyo mutokaana ikundu yofuneya vinjinji pingoni mwa Yohova!—Salimo 8:2.

¹² Waabali naarongola anango vinokala vyorucha vinjinji ira kaode zindiela ira aliwa mbofuneya vinjinji vapingoni. N’nga inanikami-e chini ira uliwethene wa-iyo viona ira utokaana limburo lofuneya vinjinji va pingoni.

13-14. Mwasiwa ngwan’ni atu enago kanodhiona kala o-okaana basa pingoni?

¹³ Dhoweni nione likundo lanambili. Linofuna  nifunji-a ifwanafwani-o ya Paulo, liye unoniwenjeli-a va nyarwa dhinagumanana atu anjinji malamboano ninga dhi; a-roromela ira mbofuneya pingoni. Paulo alembile e-ni: “Akala ira nyalo linoonga voi miyo kandili madha kandili ikundu yatutu mwasee kai wenuo ira linga-iidhe kala ikundu yatutu. Thitho aakale ira libaru linoonga ira: Voi miyo kandili litho kandili ikundu yatutu mwasee kai wenuo ira linga-iide kala ikundu yatutu.” (1 Akor. 12:15, 16) Veva Paulo afuna aongen’ni?

¹⁴ Vifwanafwani-ana atu anango pingoni unoniiri-a ira na-aodenga ona vile vinakami-a i-yo. Venango pingoni mwinyu mutokala abali anango ale analaba pama nofunji-a vosaka-edha basa liwa lokumbiza, nyo pode dhionanga ira kamunolaba pama molandana naaliwa dhiona ee-no ikundu inango tipama, vinooni-a ira nyo muli odhi-yevi-a thitho o-odhioneeli-edha. (Afil. 2:3) Mbwenye muire polepole nyo mwakalelanga dhilandani-a naabali a pingoni mwinyu anadodoliso vinjinji nyo munamalela didila mwauzimu. Ninga muongele Paulo venango nyo munadhiona kala o-okaana basa pingoni. N’nga munamali-e a-vi mathuulelo enala?

15. Movwelana na lemba la 1 Akoritiyo 12:4-11 chotuva iivi inafuna i-yo dhizindielana?

¹⁵ Kathuulelani vi: Yohova anoava makristau a zana loroma yotuva ya zimu ochena. Mbwenye kai ira makristau othene kanowachela yotuva ya zimu ochena imbo-ive. (Muleri 1 Akoritiyo 12:4-11.) Yohova ato-ava yotuva na dodoliso mo-iyana mbwenye aaona makristau othene kala ofuneya. Malamboano kaninowachela yotuva ya nemba modabwi-a, mbwenye likundolo lino-inda basa wa othene vambo-i na an’na dodoliso lo-iyana-iyana. Mbwenye othene nili ofuneya maningi vamethoni va Yohova.

16. N’nga bamalangi-o avi a rumiwi Paulo anofuna i-yo arela?

¹⁶ Malo modhisaasani-angana atu enango ninofwanela a-rela malangi-o a rumiwi Paulo oonga ira: “Mbwenye uliwathene vaeka awesedhe basa lee, aira e-no unokaana mwasa ofuna dhiveliwela va vyoira vyee eka, a-kala mosaasani-ana na vyoira vya mutu mwinango.”—Agal. 6:4.

17. N’nga pyoganyali-a viivi vinofuna i-yo fwanya na-arelanga malangi-o a Paulo?

 ¹⁷ Na-arela malangi-o a Paulo thitho i-yo zindiela basa li-u ninooda ona ira i-yo thitho nitokaana yotuva na dodoliso linango lavakundu. Nione ee-ni venango ndimuwa m’mbo-i wa pingoni liye kanooda onga mwasa ovweya pingoni, mbwenye liye unooda kaana thindhi lodhowa mafunji-a atu muurumiwini. Venango liye kanooda saka-edha vyongo mwapama ninga munoirela andimuwa afwee ava pingonivo mbwenye liye unooda idhiweya kala namakumbiza waudhivela, ooda lemeeleya vakala mwasa atu dhowa mafukanga makundo a Bibilyani, venango uno-idhiweyana kala owachela alendo. (Aeb. 13:2, 16) Naodanga zindiela mo-orucha ikundu inaira i-yo pama na yotuva ina i-yo ninooda dhivwa mwapama, ninooda zindiela ira ninooda kami-a pingo ira udhowe vasogolo. evyo vinooda nikami-a ira na-aodenga idanana abali-u anadodoliso lokwaraya li-u.

18. Chini inanikami-e ira niodenga laleela mwapama?

¹⁸ Masiki ira nikaena ikundu pingoni othene ninofwanela dilimbi-edha ira niode wenjedhela dodoliso li-u thitho Yohova unooda nikami-a irana vyevyo liye uno-indi-edha basa gulu lee vofuna nikami-a. Mofwanifwani-a migumano inairecha i-yo vari vasumana, inooda nikozeeli-edha ira nioodenga laleya mwapama. N’nga nyo munovilimbi-endecha basa vamakundo anafunjecha nyo mwari mwa migumano yen’na?

19. Chini inaukami-eni ira muoode kala ofwanelela volowa xikola laanamalaleya vya Umwene?

¹⁹ Yongo inango inaode nikozeeli-edha pama tixikola laanamalaleya vya Umwene anadowa maira xikola leli mbaabali na arongola ali mubasa laora yothene a vyawa vyokumela 23 fiedha 65. Venango nyo munoona ira volowa xikola leli pyorucha malo moinjivi-anga onga vyongo vya-anaode uvolochani xikola leli munofwanela muongenga vyongo vinaode uva-ani ngari yovolowelana xikola leli. Mwamala mulembe vyongo vinaode ukami-ani ira muode fwanelela volowa xikolali. Mokami-iwa na Yohova nodhilimbi-edha winyu vyaona nyo ira kamunavioda vile munodhaonave mutovioda.

20. N’nga ninafunjedhavon’ni va lemba la Aroma 12:6-8?

²⁰ Likundo lanararu inofunjedhavo i-yo vaifwnafwani-o ya Paulo linafwanyeya va lemba la Aroma 12:6-8. (Muleri.) Veva, Paulo unowelela onga ira: Va mutu uliwethene pingoni utokaana yotuva yo-iyana na fwee, liye unoniwandela ira nioode i-ndi-edhela basa yotuva yothene ina i-yo ira niode kami-a nolimbi-a pingo.

21-22. N’nga ifwanafwani-o ya Roberto na Felice inanifunji-an’ni?

²¹ Dhoweni nioneni ifwanafwani-o ya bali mwinango unafuna i-yo m’mromola na dhina loi Roberto. Vanduli volaba basa la urumiwi ilambo ya undhe liye atowandeliwa ira amalambenga basa beteli ya ilambo ya wanuwa, masiki angaidhiwile ira liye kaachinjiwela dhowa waniwa mwasa wa yodawi-a yongo inango liye aongile ira: “Mathuulelo odaweya odhikaikelanga mekene ira ndili opolola atondidhela, mathuulelo enala atofiedha kalaove va hora injinji fiedhela ndithuuleli-edhanga miyo vyofuna kumao Beteli.” N’nga ira aode kala waimwerumweru ate a-vi? Ndimuwa mwinango wava pingoni atomthuucha Roberto ira urumiwi ulabile i-yo ndulimu Yohova anikozeeli-edha ira nioode laba urumiwi una i-yo. Roberto atozindiela ira liye anofwanela i-yachi thuulela vabasa lalaba liye ndulimu,  ira unofwanela kaathei-a mathuulelwee vabasa lalaba liye chineneeva.

²² Bali Felice Episcopo atogumana vyorucha vyoladanana ninga vyevyi liye na i-yanee tatoira xikola la Giliadi vyawa vya 1956 tongodowa malaba isa ya Boliviya. Yawa ya 1964 aliwa tatokaana mwana, Felice aongile e-ni: “Ali vyorucha i-yachi vyalaba i-yo ndinothuulela ira vatovira yawa ipumbula ndidandaulangave. Mbwenye mokami-iwa na Yohova ndatochinja mathuulelo enao dongodhowanave vasogolo vokwakwaneli-edha izo yanga ipya ninga baba.” N’nga nyo munodhilandani-a na Roberto venango Felice? Nyo munokala osukwala mwasa oi kamuna izo yan’na nyo ndulimu? Akala ti-eno chinjani mathuulelo enao mukaathei-e mathuulelwinyu vo-inda basa linaodhe nyo vomlabela Yohova vambo-i naabalinyu. Mukale athindhi volaba basa mu-indi-edhe basa yotuva ina nyo na dodoliso n’na nyo mwaira ee-no munodha kala aimwerumweru thitho munodha limbi-a pingo.

23. Mwasiwa ngwani ninofwanela pambula hora, n’nga muru o-arela ninodha funjedhan’ni?

²³ Mutu uliwethene wa-iyo ngofuneya vinjinji vamethoni va Yohova, liye unofuna nikale ikundu ya banjale nasakanga hora yofuna thuulela mule munalimbi-endele i-yo abali-u na munalabele i-yo basa lililothene vofuna kwakwaneli-enda ikundwi-u iniva-idhe Yohova, ninooda onelamo ira mwaimbarimbari nitokaana limburo pingoni. N’nga ninafwanela aonanga a-vi atu enango pingoni? N’nga ninaone a-vi ira ninolemeza limburo Yohova liva-inde liye atu enango. yofunjedha yo-arela inodha onga mwasa ofuneula.