Ndibaliwile yawa ya 1954, sidadi la Saint Paul, Minnesota, AMERIKA. Ndili wa banja la Katolika thitho vyongo vina-iyo pyoyeveela ndili mwana wanambili vaa-ima athanu. Nditofunjedha xikola la akatolika. Angalive ee-no ndanororomela ira utokala Nlungu upanduchidhe vyongo vyothene, onga mwaimbarimbari ndatoluza iroromelo mwasa wa vyafunjedha miyo gerejani.

Ndangali waari mofunjedha mafunji-edho avadhulu, banja n’nango latodha mbwenye voi ndali ndifulanga nguo ndatovepa banjalo ira liwele dambo n’nago aliwa modhievi-a tatorumela . Tangawenle ndatokaana vyofuka vinjinji ninga vi: “N’nga mwasiwa ngwan’ni atu apama katinokala aimwerumweru”? Na “Ninofwanela iran’ni ira nikale aimwerumweru”? Miyo ndatorumela buku loi Chiziwitso Chosogolera ku Moyo Wosatha na Baibulo la Dziko Latsopano la Malemba Opatulika lokaana kapa yamathamba ipya yobaleya vinjinji. Ndatorumela funjedha Bibilya wavanyumbani. Vyevyo mwaimbarimbari vyatooda ndidhula metwanga. Ndatokala odhiveliwa vinjinji ndangaidhi ira ndi Umwene wa Nlungu baa-i ngunaode tonga thitho nomali-a nyarwa dhothene dhaatu. Ndatozindiyela ira pyorucha anamatonga taode tonga ilamboi thitho malo mochija vyongo  tanave dhi-a vyopa, a-longomana na nyarwa.

Ndatovivelela wa Yohova yawa ya 1982, vangavirile medi ndatobadiziwa va gumano wa gawo wa muru oi “A Verdade do Reino”, waireile ilambo ya Siviku wu Saint Paul. Sumana lo-arela ndatowelela wu Siviku ira ndimaire maporova enango. Maromelo a outubro, ndatovwa ira nditopasari maporova thitho ndinooda kala ninga namavunela milandu.

Romela vagumano wa “A Verdade do Reino” ndatoidhiwana na Mike Richardson. Liye alaba Beteli ya Brooklyn thitho atondiwandela ira tanofuna tamange nyumba departamento ya yoona vya miselu wu sede lavailambo yothene yavathi. Ndatothuulela vya madhu a ndimuwa wa Etiopiya wava Mayirelo 8:36 nodhifuka ira: N’nga inofuna ndiimanani-a ira nda-aode laba vadepartamento yoona vya miselu chini? Ee-no ndatolemba formulario ira nditumize Beteli.

Anamabalanga katadhiveliwile voidhiwa ira miyo ndili wa Mboni dha Yohova. Babanga atondifuka akala ira laba basa lodhivelela wangadhi-idhe vyoganyali-a. Ndatoawandela ira basa langa todhivelela thitho vamwedi ndangawachelenga kobiri yokwakwana madolare 75 yawachelecha atu a avabeteli.

Ndangamari-idhe laba vyaira miyo ndatoroma laba vabeteli ya Brooklyn, Nova York, yawa ya 1984. Ndatosakuliwa malaba wu Departamento yoona vya miselu. Vyongo vyaidhi miyo vyatondikozeeli-a vyongo vyasogolo.

Nyumba ya teatro stanley, wu Jersey City, yaguliwile mwedi wa Novembro yawa ya 1983. Abali tatovepa rumeli-iwa ira taode saka-edha ikundu ya maluju na voirelavo vifwanafwani-o. Tangaguman’ne naanamatonga avaisanivo, abalao tatoawandela ira tafuna ta-indi-edhe basa nyumba ya mateatro ninga limburo loirelamo migumano ya Mboni dha Yohova. Mbwenye vyevyo vyatodhi-a nyarwa dhinjinji. Movwelana na malamulo a sidadi la vaisanivo, nyumba dholambelelamo tadhi-ela ikundu inango. Mbwenye nyumba dha mateatro tadhi-ela vaari ikundo ya comersiale vasidadi. Namwasa wen’na anamatonga tatokonda arumeli-a. Abalao tatovepa ira andimuwa anamatonga takaathedhe okoka mwasuo, mbwenye aliwa katachinjile mathuulelo.

Vangavirile sumana ndingali beteli, gulu li-u latotukula mwayasuo dhowana waanamatonga. Voi ali vangavirile hora yoyeva ndingamari-idhe mafunji-edho aira miyo muvyawa vinli  departamento ya miselu wu Saint Paul Minnesota, miselu ninga yenna ndanoiidhiwa pama. Mmbo-i mwaalimbo nivunela ato-inda basalo mu vyoireya vinjinji vyavamwinjini, romela mafilime fiedhela vioneeli-edha wa rock. Ee-no, mwasiwa ngwan’ni ali vyo-ofwanela dhowa makwakwaneli-edha vyoireya vya religiau weu? Anamatonga tadhaone mwasuo tatotonga ira Jersey City utothwa ufulwi-u waureligiau. Anamatonga tatoiri-a ira sidade lisaka-edhe madukumento ofwanelela. Natoroma ona ira Yohova ali araeli-anga basa la departamento ya miselu ya gulu li-u. Ndali waimwerumweru vo-inda naatu basali!

Abali tatoroma masaka-edho omanga nyumba ,va 8 mwedi wa setembro yawa ya 1985 va-anavire yawa imbo-i vanduli voroma manga nyumbiyo vyali vyoodeya ira limburo la Stanley tairelengamo xikola ya gulu la anamafunjedha okwakwana 79 la Gileade. Wa miyo, ali ngari oda kami-a ifunelo ya Umwene ninga ikundu yaatu ovunela. Vyongo vinjinji viirile miyo vitokwaranya vyothene vile vyaira miyo ndulimu ninga namavunela nda-anadhe Beteli. Miyo ndatoidhiwa ira Yohova unodha ndi-indi-edha basa vokami-a ing’anela miselu.

Yawa ya 1980 mamediko talaba ximitarini katalemeza Mboni dha Yohova tavepa ira taode kami-iwa na mirombwe dho-o-eliwa sangiri. Waa-iyana tana wise yali nyarwa ilukulu, mwasiwa anamatonga hora dhinango tathuulela ira i-yana kanaode tongeliwa vokonda e-liwa sangiri. Aliwa tanoongecha ira kavyakale pama mwana a-kaana mmee mwasa oira liye utokonda ira a-eliwe sangiri.

Va 29 mwedi wa dezembro yawa ya 1988, rongola Denise Nicoleau atokaana marenda malukulu otatila sangiri angamadhi bala. Liye selula lee latothita fiedhela va 5, voi e-no mediko atomvepa ira a-eliwe sangiri. Mbwenye rongola Denise kaarumeli-idhe. Dambo lo-arela, ximitari katoyesayesa ira taodhe va-iwa ufulu na anamatonga venango na mediko ira kam-ele sangiri yofwanelela. Mo-orumeli-iwa venango mvepa mwinyaa rongola Denisula venango mmwandela manee, anamatonga tatorumeli-a ira ximitari thitho ta-elenga sangiri.

Dambo la xixanu, 30 mwedi wa dezembro, gulu la ximitarilo lato-ela sangiri rongola Denise. Aliwa tatoirana vyevyo angalive ira katammwandenle manee venango abali ale aongile ira liye ka-eliwe sangiri. Ma-iyu a dambo leli, abali anjinji a rongola Denise thitho na andimuwa avapingoni ambinli tato-eliwa perezoni. Aliwa tatonukedhiwa ira tatoirana vyongo vyo-ofwanelela wa mutu voonga ira rongola Denise ka-eliwe sangiri. Nama-iyu a dambo la sabudu, 31 wa dezembro, perezo mwali abalao watoroma kuma myasa dha milanyu dha Nova York na Long Island.

 Dambo la chiposi namaebe-i, ndatoonga na Milton Mollen, namatonga wa izo ilukulu. Ndatommwandelamo vya mwasuo ira, namatonga arumeli-dhe ira liye a-eliwe sangiri, kaavepile mutu uliwathene. Namatonga Mollen atondivepa ira ndiwele hora inango ira niode tapanya vinjinji vyoonga mwasuo thitho malamulo a oonga vya myasa dhedhi. Nama-iyu, miyo na ndimuwanga Philip Brumley, natodhowa mwalaba Mollen thitho namatonguo atoitana namavunela wa hoxipitali ira adhakalevo vanofuna tongiwa mwasa. Mwasuo watorucha. Ee-no ndatoroma kaana raiva, va hora yenio bali Filipi atondilembela ixipapeli laonga ira “kamiyala.” Enala ali malangi-o apama vinjinji va horiyo, namwasa oi ndatokaana raiva vinjinji thitho ndatoroma mruni-a namavunela miselu wa hoxipitaluo.

Vangavirile hora imbo-i, namatonga Mollen atoonga ira mwasinyu unokala vaikundu yoroma va dambo lo-arela. Hora yakuma i-yo mwalamba namatonga Mollen, liye aongile ira: “Namavunela wa ximitari utokaana mwasa unjinji bebe-i.” Venango onga ira, utokaana basa ilukulu ira aode ongamo mwasa o-ela sangiri mokanyi-edha. Va hora yen’ne, ndavivwa ira Yohova unaaniwandela ira nyo mutokaana gari ilukulu yoganyali va mwasa wen’na. Vyali vyodabwi-a vinjinji ona mule Yohova mwani-indi-edha liye basa vofuna irana ifunelwee.

Natolaba fiedhela vari va ma-iyu ira nikozeele mwemo mwafuna i-yo vunela mwasuo va dambo lo-arela. Voi nyumba yotongelamo miselu yali vakwikwi nava Beteli yau Brooklyn, abali anjinji amadepartametwi-u mang’ono tatodhowa maonela seluo. Anamatonga enango tatovwa vivunela wi-u thitho tatokala ikundu ya rongola Denise. Aliwa taongile ira namatonga oromula kaafwanenle va-a lamulo lokanyi-edha ira rongoluo a-eliwe, thitho mo-omvepa bali uliwethene mwasula unooni-a ira aliwa tatothwa lamulo nle li-elile anamatonga.

Vangavirile hora vang’ono, ndimuwa wau Nova York atoonga ira rongola Denise utokaana ufulu ofuna kami-iwa mo-o-indi-edha basa sangiri. Vanduli va mwasee, ndatokana ngari yofwanyeya va vyoireya vyaatu araru va mwasa olandanana na wen’na weniyo watongiwile wu nyumba ilukulu yotongelamo miselu. (Onani kwadru la “ Vyoireya nyumba ilukulu yotongelamo miselu.”) Miyo thitho ndatofwanyeya va myasa dhinango vambo-i na anamavunela miselu a Beteli yeniyo yaonga  vya vunela a-ima, mwadhana na makaathedho o-ofwanelela aireya matatamoni.

Ndangammwidhi i-yananga Dawn, liye ali angamwadhan’ne na man’nee. Liye asamalila a-ima araru, anolaba thitho ali painiya. Dawn atogumanana vyorucha vinjinji vaingumi yee, miyo ndatokala odabwa na dhivelelawee vofuna mlabela Yohova. Yawa ya 1992, i-yo natodhowa maonela gumano wa gawo wu sidade ya Nova York, miyo ndatomvepa ira nikale vaimweendi. Vangavirile yawa imbo-i, i-yo natothelana. Dawn chotuva ya Yohova. Liye utokaana mathuulelo aunemba thitho ngwamakalelo apama. Ndinooda onga mwaimbarimbari liye unoira vyongo vyapama malambo othene a va ingumi yi-u ningali vambo-i.​—Sang. 31:12.

Nangathelanile, a-ima a Dawn tana vyawa 11, 13 na 16. Miyo ndanofwanela kala baba wapama waaliwa, thitho ndatofunjedha moda ofuna samalela a-ima owafwanya dhela mu mabuku akumi-iwa. Natokaana vyorucha vinango wa vyawa vinjinji, mbwenye ndinokala waimwerumweru ira a-ima tandiona ninga fwiwa onyindeleya thitho baba waudhivela. Yanikami-idhe kaana banja lapama ali kala othathuwa thitho a-imi-u aona kala axamwali-u. Ali vyova-a imwerumweru ona vandhe vi-u vangadhanle azombwe aimwerumweru.

Yawa ya 2013 miyo na Dawn natothama dhowa wu Wisconsin ira nimasamalile anamabali-u oulula. Ndatodabwa voidhiwa ira basa langa lau Beteli kalamale. Tatondivepa ira ndidhowenave kami-a mu gulu li-u va myasa dhinjinji dhoimelela tonga miselu.

Mwedi wa setembro wa 2018, ndatoona ira nda-anarome onga ndaroma kothomula. Mediko atondiona, mbwenye kaodile ona yandiiri-a ee-no. Vandulivee, mediko wanambili atoonga ira umasake ndimuwa waamediko. Mwedi wa janeiro wa 2019, ndimuwa wamamedikuo atondiwandela ira nditokaana irenda inango yorabuleleya, yaromoliwa paralisia supranuclear progressiva (PSP).

Malambo mararu adhamanle, ndatodhowa mawareda ma-injeni odidila vinjinji thitho ndatoroma luza dodoliso langa. Miyo ndali odhudhuma vaingumi yanga thitho vyevi ali vyongo vyoi ndatolemeela thitho pyalabecha miyo. Adhaire e-no ndatovwechecha ira ndali ndiluzanga dodoliso langa. Kumela vevo, marendanga mobaranya tatoroma simbwa. Ndatoroma rucheya ira ndionge, thitho ira ndirome tekenya milomo thitho ira ndimidhe.

Miyo ndinoona kala ngari injinji vo-indi-edha basa dodoliso dhanga ninga namaing’anela ofuna kami-a ifunelo ya Umwene. Thitho ndinoona kala ngari ilukulu lembiwa mu mabuku thitho marevista vofuna va-a mwasa va gumano wa mamediko voing’anela ilambo yothene yavathi. Va hora yen’na, ndatooda vunela ikundu yaatu a Yohova vofuna sakula mirombwe dhamamediko thitho ira operasau mo-ondi-edha basa sangiri. Masiki angalive ee-no ndinothuulela lemba la Luka 17:10: ‘Linoonga ira, miyo ndili namalaba o-okaana basa. Vyothene vilabile miyo pyafwanela miyo ira ndivilabe.’