1-2. N’nga madhu a lemba la Namalaleya 11:6 anovwelana a-vi na basa lolaleela milanyu ya Umwene?

VILAMBO vinango, atu anoliona pama basa lolaleela. Milanyu yapama inotukula i-yo puemodi munofuna aliwa! Vilambo vinango, atu katinokaana chidwi na Nlungu venango Bibilya. N’nga atu agaoni winyu anoonecha a-vi? Yofuneya kamubale moda unoonela aliwa, Yohova unodedi-edha ira nidhowenave laleela fiedhela anganiwandenle ira basali litofiya komoni.

² Yohova utomala kaathei-a dambo linofuna dhamala basa lolaleela, thitho dambo linofuna dhafiya “siku logomi-edha.” (Mat. 24:14, 36) Fiedhela weo n’nga ninavwele a-vi lamulo loi “kuvumi-e dhandha lao”? *—Muleri Namalaleya 11:6.

3. N’nga va yofunjedha yei ninofuna nitapanyen’ni?

³ Yofunjedha ivirile itoonga vyongo vinai vyofwanelela ira mutu akale “namameza atu wapama.” (Mat. 4:19) Yofunjedha yei ninofuna nitapanye vyongo viraru vyevyo vinofuna nilimbi-a volaleela, mo-obala vinogumanana i-yo vaingumi yi-u. Ninofuna nifunjedhe (1) dhowanave kala athindhi, (2) kala oleva rima na (3) kaana iroromelo yolimba.

4. Mwasiwa ngwan’ni ninofwanela kala atindhi vabasa liniva-idhi Yohova?

⁴ Yesu atoonga mwafuna kalela ilambo m’malambo omari-a liye atoidhiwa ira makalelo amalambo omari-a angaodile dodomi-a anama-arelee volaba basa lolaleela. Voi ee-no atowenjeli-a anama-arelee ira “mukaleve methove.” (Mat. 24:42) Malambo a Nowa igumula ya-anafiye, atu anjinji tali opingeya na mabasa a dambo nadambo na mwasa wenuo katamvwenle vyaawenjeli-a Nowa. (Mat. 24:37-39; 2 Pe. 2:5) Malamboano atu anopingeya saasawa ninga hora ya Nowa, ngumwasiwa ninofwanela  dhowanave kala athindhi volaba basa liniva-idhe Yohova.

5. Movwelana na lemba la Mayirelo 1:6-8 basa lolaleela linamagomele wani?

⁵ Basa lolaleela vya Umwene tibasa lofuneya vinjinji wa i-yo malamboano. Yesu atoonga ira vanduli wa ukwa wee basa lolaleela langadhowilenave vahora injinji thitho langaodile fwanya atu anjinji. (Juwau 14:12) Yesu angakwide enango mwa anama-arelee tatowelela nduli dhowa makala anamameza somba okoka. Mbwenye Yesu angavenyathi-iwile, atoira vyodabwi-a wa anama-arelee moi tatomeza somba dhinjinji. Va hora yenio atoalimbi-a anama-arelee ira kala namameza atu kofuneya vinjinji kwaranya basa lililothene. (Juwau 21:15-17) Yesu a-anadhowe dhulu atoawandela arumiwe ira basa lolaleela laromile liye langafiile undendai a-kala Muisiraelive. (Muleri Mayirelo 1:6-8.) Vangavirile vyawa, Yesu atom’mwiri-a rumiwi Juwau ona masopenya enao aoni-a vyafuna ireya “dambo la Mbwiye” * va yongo imbo-i yeo Juwau yaoni liye ali vyodabwi-a, ikundu inango aoni angelo talaleelanga “milanyu yapama yo-omala” wa “atu amaziza othene, tundu uliwethene, na iongelo iliyothene.” (Apok. 1:10; 14:6) Evi, vinooni-a pama Yohova vinonifunana liye ira nilabenganao basa lilukululi loirela umboni fiedhela komoni wangafiile.

6. Chini inafuna nikami-a dhowanave kala athindhi muurumiwini?

⁶ Yongo inango inofuna nikami-a kalave athindhi va basa lolaleela, kuthuulela vyothene Yohova vinonilabela liye vofuna nikami-a. Mofwanafwani-a, mutoona injiva wa vyodya vyauzimu vina-iyo nitokaana mabukhu, vyovuruwana na mavidiyo, thangani-avo maporograma enango a va internetini mo-oonga saiti ina i-yo yeniyo ina viongelo vyokwaranya 1000 yeniyo ili disponivel. (Mat. 24:45-47)  Masiki ira ilabwila itomala gaweya na ndale, mareligiau onama, thangani-avo sakulo, mbwenye atu okwaranya mamiliyau 8 enao ali arumiwi a Nlungu, tanaira banja laimbarimbari thitho lovwelana. Mofwanafwani-a, xixanu va 19 mwedi wa abril yawa ya 2019, Mboni dha Yohova rungunuwa ilambo yathene yavathi tatogumaneya ira lemba la siku. Ma-iyu wa dambo lenle atu okwakwana 20,919,041 tatogumaneya va ithuulelo ya ukwa wa Yesu Kristu. Ona vyodabwi-a vyevi thitho kala ikundu ya atu enala njingari ilukulu vinjinji nathuulela vyevyo ninovivwa kala olimbi-eya thitho kala athindhi va basa la Umwene.

7. N’nga ifwanafwani-o ya Yesu inanikami-e a-vi dhowanave kala athindhi?

⁷ Ikundu inango yofuna dhowanave kala athindhi muurumiwini ku-arela ifwanafwani-o ya Yesu. Liye kaa-iidhe yongo ili yathene ira idodomi-e irela umboni imbarimbari. (Juwau 18:37) Satana angamva-idhe “maumwene othene ailambo yavathi na titimi-o liwa”; Yesu kaagwide go-ini. Thitho kaarumenle ira enango mwafunela aliwa ira liye akale mwene. (Mat. 4:8, 9; Juwau 6:15) Yesu kaadobeile na kaana vyongo vinjinji; thitho kaarumeli-idhe ira a-ra-ariwa umwimwanani-e basa lee. (Luka 9:58; Juwau 8:59) I-yo thitho ninodhowanave kala athindhi iroromelo yi-u yawesedhiwanga. Inofuneya ku-arela malangi-o arumiwi Paulo. Liye atoalimbi-a Makristau a-rela ifwanafwani-o ya Kristu “vo-ochenyela thitho vo-ofooka”!—Aeb. 12:3.

8. N’nga leva rima chini, mwasiwa ngwan’ni leva rimao kofuneya malamboano?

⁸ Leva rima tikalelo lodedi-edha thitho pwaseya fiedhela vyongo vingachinjile. Hora dhinango ninogumanana vyongo vyorucha thitho ninofunecha ira vimale mombaranya. Venango ninofunecha vinjinji ira vyofuna vi-u vikwakwanele. Va vyongo vinlivi ninofuneela leva rima, namaro-edha Habakuku anofunechecha vinjinji ona komoni wa vyoireya vyothakala vya ilambo ya Yuda. (Habak. 1:2) Arumiwi a Yesu tanodedi-edha umwene ira udhe mombaranya ira waavulumuche mandhani mwa aroma. (Luka 19:11) Mbwenye i-yo kaninaone hora inafuna dhamali-a Umwene wa Nlungu vyongo vyothakala dhana ilambo ya rendele. (2 Pe. 3:13) Mbwenye ninofwanela kala oleva rima vodedi-edha hora yofwanelela ya Yohova. Kaonani mwemo Yohova munanifunji-edha liye kala oleva rima.

9. Pivifwanafwani-o viivi vinooni-a ira Yohova ngoleva rima?

⁹ Yohova nguifwanafwani-o yapama voleva rima. Igumula ya-anafiye liye atova-a hora yokwakwanela Nowa ira amange mwadiya thitho ira akale “namalaleya wa madhu olongomana.” (2 Pe. 2:5; 1 Pe. 3:20) Abrahamu angafukile vyofuka moweli-edhaweli-edha vyoonga vya nongiwa wa Sodoma na Gomora, Yohova atomvuruwana moleva rima. (Maro. 18:20-33) Wari mwa vyawa chikwi vyoroma ziza la Anaisraeli latokala lo-ororomeleya wa Nlungu, Masiki ira lingalive e-no, Yohova atooni-a leva rima mo-okaana sakulo. (Nee. 9:30, 31) Malamboano liye unodhowanave kala oleva rima. Liye unowakokela atu wa liye thitho unoawava-a hora ira tachinyuwe vyondawa viwa. (2 Pe. 3:9; Juwau 6:44; 1 Timo. 2:3, 4) Nathuulela ifwanafwani-o ya Yohova kamunaonelamo ira nitokaana myasa dhovweya dhofuna dhowanave laleela no funji-a moleva rima? Mbwenye kaonani vachineneeva Yohova muno-indi-edhela liye vifwanafwani-o vya Bibilyani vonifunji-a kala oleva rima.

10. N’nga ninofunjedhavo n’ni va ifwanafwani-o ya lemba la Tiyago 5:7, 8?

¹⁰ Muleri Tiyago 5:7, 8. Ifwanafwani-o  ya namalima inonifunji-a kala oleva rima. Chiimbarimbari ira vatokala beu dhinango dhinoulukula mombaranya. Mbwenye mbeu dhinango, simbwambwa dhile dhinova-a vyova-a, dhinotukula hora injinji ira dhiwarale. Mu Israeli mbeu dhamala medi mithanu na mmbo-i ira dhiulukule. Namalima anodhalela mise va dhongwe oroma thitho tano-anda va dhongwe ogomi-edha weo uli ilimweni. (Marku 4:28) Leva rima wa namalima, chiifwanafwani-o yapama vinjinji wa i-yo. Mbwenye vyevi kai vyokweya.

11. N’nga leva rima unonikami-a a-vi va basa lolaleela?

¹¹ Mwasa oira nili o-olongomana ninofunecha ona vilabile i-yo mombaranya mbwenye ira mbeu ikaena vyova-a namalima unofwanela tipula teya mundani dhalamo mbeudhee thitho kwadhulela mathakurwee thangani-avo regari ma-inje. Basa lolaleela linofuneela nguru na thindhi ninga dhanamalima. Vano vira hora injinji ira namafunjedhinyu achinje rimanimwee ira aode i-yani-a mathuulelo odaweya nokaikela. Mbwenye nakala oleva rima vyongo vyorucha kavinanisukwali-e. Masiki ira atu tavuruwanenga pama milanywi-u ninofwanelela dhowanave kala oleva rima. Mwaimbarimbari kaninofwanela mkanyi-edha namafunjedha Bibilyiu ira akaena iroromelo yolimba. Masiki arumiwi enango a Yesu tanochecheluwana vwechecha vyafunji-a Yesu. (Juwau 14:9) Muthuulelenga ira i-yo ninooda dhala thitho regari ma-inje mbwenye unoulukuli-a ndi Nlungu.—1 Akor. 3:6.

12. Nga ninaode avi ira nekale oleva rima nairelanga abali-u ta-ananiroromela?

¹² Hora yorucha kala oleva rima njoi nairelanga abali-u a-ananiroromela likundo linafuna nikami-a tili va Namalaleya 3:1, 7 linoonga ira “vatokala hora yomiyala thitho vatokala hora yoonga.” Ndhila inango i-yo ninooda kala omiyalene iyachi vyoiravi-u viode onga kaleloli-u mbwenye thitho ninooda dedi-edha ira hora yakalavo niode wandela atu  vyaimbarimabri. (1 Pe. 3:1, 2) Pyofuneya kala wathidhi volaleela no funji-a, mbwenye thitho ninofwanela kala oleva rima wa atu othene ngumani-avo atu abanjani mwi-u.

13-14. Pivifwanafwani-o viivi vinofwanela i-yo sazi-edha?

¹³ Ninooda funjedha kala oleva rima dhela mu vyifwanafwani-o vyaanamalaba ororomeleya andulimu na malamboano Habakuku anolavela ona mala wavyongo vyothakala mbwenye atooni-a leva rima vyaongile liye ira “ndinodha kala oimelene valimburoni vanga voing’anela.” (Habak. 2:1) Rumiwi Paulo atofiedha onga ira afuna “mari-a” basalaye laurumiwi mbwenye liye atodhowanave irela umboni mokwakwanela milanyu yapama moleva rima.”—Mayir 20:24.

¹⁴ Kathuulelani ifwanafwani-o ya banja linango ladhowile maira xikola la Giliyadi aliwa tava-iwile basa weo wali amboni dha Yohova oyeva namwasa oi atu anjinji ilambo yade aliwa talobela religiau loi kalali laukristau banjalo kalafwa-idhe atu anjinji ana ifunelo yofunjedha Bibilya. Vaikundu inango afwiwa afunjana aliwa xikola la Giliyadi enao talaba muilambo inango. Hora dhothene kanolanyedha madhu odabwi-a vinjinji aanamafunjedha Bibilya ana aliwa mbwenye banjalo latodhowanave kala loleva rima, masiki gaolo kaladhowa vasogolo aliwa katawelele nduli volaleela, aliwa kato fiedhela laleela vyawa 8 mu gawo laoneya kala louma magomelo we katokala aimwerumweru voona namafunjedha Bibilya abadiziwanga. [12] N’nga vifwanafwani-o vyawale na vyamalamboano vinofwanafwana a-vi? Mbwenye aliwa katapololile thitho vumi-a mandhiwa Yohova atoraeli-a levauwa rima evyo mo-okaikela vinonilimbi-a “sazi-a atu ana iroromelo thitho moleva rima no wachela vyalanyedhiwile aliwa.”—Aeb. 6:10-12.

15. N’nga iroromelo inanisikimizeli-a a-vi ira niodenga laleela?

¹⁵ Ninororomela milanyu inolaleela i-yo. Ngumwasiwa, ninovilimbi-edha ira niode wandela atu anjinji. Thitho ninororomela vinolanyedha madhu a Nlungu. (Masal. 119:42; Esaya 40:8) Ninoona maulosi a Bibilya takwakwanelanga malamboano. Ninoona atu ta-indi-edhanga basa makundo a Bibilya chinja vingumi viwa kala atu apama. Vyothene eevyo, vinoniroromeli-a ira atu othene anofwanela uvwa milanyu yapama ya Umwene.

16. Movwelana na lemba la Salimo 46:1-3, n’nga roromela Yohova na Yesu unonisikimizeli-edha va basa lolaleela?

¹⁶ I-yo thitho ninororomela Yohova, tipwati la milanyu inolaleya i-yo. Thitho ninomroromela Yesu wenuo Yohova umsakunle liye ira akale Mwene wa Umwene wee. (Juwau 14:1) Kanibale nyarwa dhinagumanana i-yo vaingumi yi-u. Yohova hora dhothene unodhowanave kala votawela vi-u thitho nguru dhi-u. (Muleri Salimo 46:1-3.) I-yavo evyo, nitokaana iroromelo ira Yesu unanasogolela basa lolaleela dhulu, vo-indi-edha basa nguru na izo iwachenle liye wa Yohova.—Mat. 28:18-20.

17. Mwasiwa ngwan’ni ninofwanela dhowanganave laleela? Muonge ifwanafwani-o.

¹⁷ Iroromelo inowenjedha mnyidhela wi-u Yohova ira unodha raeli-a vilimbi-edha wi-u. Evi thitho, vinooda ireya mwadhila yoira i-yo kanavidedi-edha. (Namal. 11:6) Mofwanafwani-a, nitoidhiwa ira mamiliyau aatu anjinji malamboano anoona displays faramento yooni-a mavidiyo na mwemo basa munowendela aliwa thitho makarinya olaleelana. N’nga ndhila dhedhi dhino-inda basa? Mo-okaikela Utumiki Wathu wa Ufumu wa Novembro wa 2014 watoonga mwasa wa mwana-iyana mmbo-i afunjedha xikola la universidade afuna laba  basa loonga vya Mboni dha Yohova liye kaodile fwanya Nyumba ya Umwene, mbwenye atofwanya meza yolaleelana vali mabuku va kapuni yofunjedha vya universidade thitho atofwanya vyoonga vinjinji ira aode thangani-avo na basa lee. Mamalelo wee, liye atokala wa Mboni dha Yohova fiedhela badiziwa, malamboano ngupainiya okaatheya. Vyoireya ninga vyevi vinonilimbi-a ira nidhowengave laleela. Vyevyo vinooni-a ira vatokala atu anofuneela fwanya thitho uvwa milanyu ya Umwene ya imbarimbari.

18. Chini jinonisikimizeli-a ira basa lolaleela vya Umwene linodhamala ninga mwemo munofunela Yohova?

¹⁸ Ninooda nyindela ira basa lolaleela linooda mala va hora yofwanelela. Kathuulelani vyaireile malambo a Nowa. Yohova atooni-a ira liye unooda ing’anela hora. Vanga-adhi vyawa 120 Yohova atovaela e-la dambo la Igumula. Vyawa makuumangasi Yohova atomva-a Nawa basa lomanga mwadiya. Vinooneya ira apwase, vanga-anle vyawa 40 venango 50 Igumula ya-anafiye, Nowa atodhowanave laba basa nlukulu. Angalive ira atu katavwela vyaonga liye, Nowa atodhowanave laleela milanyu fiedhela dambo laongile Yohova ira yali hora yoira avoloche vinyama mwadiyani. Ee-no, ingafiile hora yofwanelela “Yohova atofunga lango.”—Maro. 6:3; 7:1, 2, 16.

19. Chini inofuna i-yo dedi-edha akala na-avumi-a mandhi-u?

¹⁹ Va chineneeva, Yohova unodha onga ira basa lolaleela milanyu ya Umwene litomala. Liye unodha “funga lango” wa makalelo a ilambo ya Satanila thitho unodha dhana ilambo ipya yolongomana. Fiedhela dambo lelo mukale osikimiza vosazi-a Nowa, Habakuku na atu enango a-avumi-idhe mandhiwa. Mudhowenave kala athindhi kala oleva rima thitho kaana iroromelo yolimba wa Yohova na vilanyedhile liye.