1. Njihora iivi vinokala aliwa vyorucha Mlambela Yohova?

TI-ELINI, vanaona nyo ira pyorucha mlabela Yohova? Hora inogumanana nyo nyarwa, venango mwakala varendeleni? Vinokala vyo-orucha roromela Yohova nakala vanyarwani. N’nga nakala varendeleni nine-avi? Ninokala vago-ini ofuna diwala ira lambela Nlungu kofuneya vinjinji? Yohova atoawenjeli-a anaisraeli ira ta-aire polepole tangaodile manga go-i wenuo.—Dotor. 6:10-12.

2. Mwene Aza uni-iyedhe ifwanafwani-o ivi?

² Mwene Aza chiifanafwani-o yapama wa i-yo voira vyongo mwazelu. Liye hora dhothene aroromela Yohova thitho liye kaalabele Yohova hora yoruchave, mbwenye liye atomlabela hora yarendele. Romela voromavene “rima wa Aza wali odhivelela wa Yohova.”(1 Mam. 15:14, madhu achindo.) Kalalelo ooni-a ira Aza ali odhivelela wa Yohova, ali cheni-a Yuda vokumi-amo lambela onama. Bibilya linoonga ira “liye atogomola viguwa vya minlungu yaundhe thitho atogwi-a mamburo avadhulu, atopwanya vipilala vyopambuleya na dula mizati yopambuleya.” (2 Limb. 14:3, 5) Thitho Aza atomthithi-a mbwiyee Makaa vapandoni wavadhulu vali liye. Mwasiwa ngwan’ni? Mwasa ngoi liye anolimbi-a lambela onama olambelanga yosema.—1 Mam. 15:11-13.

3. Chini vinofuna i-yo funjedha wari mwa muru wen’na?

³ Mwene Aza atolaba basa linjinji wenjedhela va basa locheni-a ilambo volambela onama. Liye atolimbi-a lambela waimbarimbari, atokami-a umwene wa Yuda ira uwelele wa Yohova. Namwasa wa vyevyo, Yohova atomraeli-a Aza vambo-i na anaisraeli adhi-edha rendele.  *Mwa vyawa Kumi vyaumwene  wa Aza, “ilamboyo yali mwarendele.” (2 Limb. 14:1, 4, 6) Wari mofunjedha muru wen’na, ninoona mwemo Aza mwa-indi-edhele liye mwa zelu vyawa vya rendelevi. Namala vevo ninofuna nifunje ifwanafwani-o ya makristau a vyawa zana loroma. Ninga vyairile Aza, makristau avyawa zana loroma tatoidhiwa i-ndi-edhela pama basa vyawa vya rendele. Mamari-edho wiwa ninodha rumela yofuka ji: Akala nyo munokala ilamboni muli rendele omlambela Yohova mothathuwa muna-indi-edhele a-vi mwazelu hora yarendeliyo?

4. Movwelanana lemba la 2 Limbili 14:2, 6, 7 Aza abazeletu iran’ni hora ya rendele?

⁴ Muleri 2 Limbili 14:2, 6, 7. Aza atoawandela atu ira Yohova ‘atoavumi-a waamwidaniwa othene owarungunuwa.’ Aza kaaona ira hora yenne ali hora yokoloweza mendo vakadelani. Mo-iyanana vyevyo, liye atobazelatu manga masidadi, nyumba dhopindha-edhana, nsanja, na misuo. Aza aawamdenle ee-ni anaisraeli: “Ilambo ilive mandhani mwi-u.” Vyevyo vyafuna viongen’ni? Ali ira atu tangaodile wenda ikhundu ili yothene yailamboyo nomanga nyumba mo-oruni-iwa naamwidani. Aza atoalimbi-a atu ira tabazeletu i-nda basa lililothene hora yarendeliyo.

5. Mwasiwa ngwan’ni Aza atowenjedhela anyathoropa?

⁵ Aza atovaelatu bazedha hora yarendele ira alimbi-e no wenjedha anyathoropa akhondo. (2 Limb. 14:8) Vyevyo vinothapulela ira liye kaaroromela Yohova? Navang’onovene. Aza anoidhiwa ira ali izoyee ninga mwene ira akozeeli-edhe mbumba va vyorucha vyothene vyafuna udha sogolo. Liye atoidhiwa ira hora yarendele yau Yuda kaali  yodhowa nodhowa, vyali vyevyo ira vyongo vyatochinja.

6. N’nga makristau azana loroma ta-indi-edhe a-vi pama basa horiwa yarendele?

⁶ Angalive ira makristau avwawa zana loroma tanooni-iwa nyarwa mwasa o-ara-ariwa, yatofiya hora inango aliwa kala varendeleni. N’nga aliwa tairechan’ni hora yeniyo? Aliwa tatobazelatu laleela mo-odjombela. Movwelanana lemba la Mayirelo, alombwana naa-iyana ororomeleyala “tawenda moova Yohova.” Aliwa tanodhowanave laleela milanyu yapama, vyo-arela viwa “taira wenjedheleyave.” Mo-okaikela, Yohova atoraeli-a basa la-inda makristawala modhivelela va horiwa yarendele.—Mayir 9:26-31.

7-8. N’nga Paulo na makristau enango vyana aliwa ngari yolaba basa tairileni?

⁷ Makristau azana loroma, tanolaleela va hora na limburo lothene laona aliwa ira anooda ira e-no. Mofwanafwani-a, Rumiwi Paulo atozindiela ira lango nlukulu utodhuliwa ira taode laleela wu Efeso. Moi e-no liye atobazelatu hora yeniyo ira alaleele no funji-a atu asidadi lelo.—1 Akor. 16:8, 9.

⁸ Hora inango yangari yoi talabe basa yaoni Paulo na makristau enango yali yawa ya 49, vyamadhi tongiwa selu waonga vya ineliwa. (Mayir 15:23-29) Mipingo ingamadhi uvwa moda wamadhi aliwa tongiwa, arumiwi tatolaba mwathindhi ira “tavwei-e milanyu ya Yohova.” (Mayir 15:30-35) N’nga vyo-arela viwa alin’ni? Bibilya linoonga ira “mipingo yanodhowane limba muiroromelo, thitho numero yaatu yanowenjedheleya dambo na dambo.”—Mayir 16:4, 5.

9. Vilambo vinjinji vili mukalelo livi malambo ano, n’nga ninofwanela dhifuka yofuka ivi?

⁹ Malamboano vinoodeya laleela mothathuwa vilambo vinjinji. Nyo mutokaana ngari yomlambela Yohova mothathuwa ilamboni mwinyu? Akala mute inde, dhifukeni ira: N’nga ndino-indi-edha basa pama ngari inamiyo yarendele? Malambo orucha omari-ala, gulu la Yohova linasogolela kapanya ilukulu yolaleela na mafunji-edho anooneya vailamboni vano. (Marku 13:10) Milango minjinji iliyodhulene wa mbumba ya Yohova.

10. N’nga lemba la 2 Timoteo 4:2 linonilimbi-a iran’ni?

¹⁰ N’nga nyo munanganyalina a-vi hora yarendele? (Muleri 2 Timoteo 4:2.) Munoona a-vi ira mwa-arome dhipenda pama kalelo linyu? Nyo venango mutu wavandhe vinyu mungaodile wenjedhela basa linyu lolaleela venango kala painiya? Hora ila kai hora yodhiunjikela fuma yailambo—vyongo vyoi vaisauso ilukulu kaninodha vipyolanavo.—Sang. 11:4; Mat. 6:31-33; 1 Juwau 2:15-17.

11. Chini vinoira anamalaleya anjinji vofuna ira taode laleela atu anjinji?

¹¹ Anamalaleya anjinji anafunjedha viongelo vipya ira taodenga laleelana no funji-a vaviongelo vyevyo. Gulu la Nlungu linoakami-a abali enao vowenjedhela saka-edha mafaramento a Bibilyani ira aakami-e vofunjedha viongelo. Mofwanafwani-a, yawa ya 2010, nanokumi-a mabuku muviongelo vyokwakwana 500. Malamboano ninokumi-a muviongelo vyokwaranya 1000!

12. Mwasiwa ngwan’ni tipama atu tavuruwanenga milanyu Yaumwene muiongelo yiwa? Ongani ifwanafwani-o.

¹² N’nga vali i-yana oi a-vi akala mutu unovwa madhu a Nlungu muingeloyee yobaliwana?  Onani vyamwireele rongola angamadhi onela gumano wa gawo wu Memphis, Tennessee, EUA. Iongelo ya rongolula chii quinyarwanda, inosimbwa ongiwa wu Ruwanda, Republika Demokratika do kongo na Uganda. Thandha wa gumano waoni-iwile muiongelo yei. Gumano ungamadhi, rongoluo aongile ira: “vatovira vyawa 17 ndingali Amerka uno, mbwenye ila njifendo yoroma miyo uvwa vyothene viongiwile vagumano wauzimu.” Mo-okaikela rongolula ali waimwerumweru vuruwana gumano muiongelo yobaliwana. Akala wanyo pyoodeya munoona a-vi ira mufunje iongelo inango ira mukami-e atu aiongelo yeyo tatamoni winyu? Venango Tatamoni winyu utokala atu anodhivwa pama akala ira anoonga iongelo inango a-kala inaonga nyo. Vyevyo vinoova-ani ifunelo yoi mufunjedhe iwongelo inango? Pyovweya ira vyevyo vinofuna dhilimbi-edha, mbwenye pyapama mwaviira.

13. N’nga abali-u a Rusiya ta-indi-edhe basa a-vi mwazelu hora yarendele?

¹³ Kai abali-u othene ana rendele odhowa malaleela. Mamburo enango, anamatonga ano-ela malamulo orucha okondi-a basa lolaleela. Mofwanafwani-a, kathuulelani vyaabali-u a Rusiya. Va vyawa makuumangasi vyo-ara-ariwa, tarumeli-idhiwe mwedi wa março yawa ya 1991. Vahora yeen’ne, talivo anamalalela okwakwana 160 mili! Pyooneya ira abali-uala tali owenjela vahora yana aliwa rendele olaleela valivothene. Hora yarendeliyo chaadimbelile. Mbwenye chinja wavyongo kuodile vungula changu ina aliwa volambela waimbarimbari. Tatodhowanave mlabela Yohova, e-ni ana-indi-edha basa ndhila dhilidhothene volambela.

14-15. Yohova aoni-idhe a-vi kopolodhe vomvunela Aza?

¹⁴ Malambo a Mwene Aza, malambo a rendele  atofiya komoni. Anyathoropa o-ooda ing’aneya— akopolodhiwa okwakwana miliyau imbo-i — takumele wu Etiopiya. Komandatiwa, aitaniwa Zeraa, anororomela ira anyatropeao anamaganyali kondo no gonji-a Yuda. Mbwenye Aza kaaroromela injiva waanyathoropa, mbwenye wa Nlungwee, Yohova. Aza atolobela ira: “Nikami-eni, Yohova Nlungwi-u, i-yo ninororomela nyo, mudhina linyu nitodha ira nilimbanena mwinjula.”—2 Mam. 14:11.

¹⁵ Angalive ira Aza atoidhiwa ira anyathoropa awu Etiopiya tatooinji-va mokwaranya iwa fendo mbili, liye anoidhiwa ira Yohova utokaana kopolo thitho unooda vunela Mbumbee. Yohova kaanyozi-idhe Aza, atoaunda anyathoropa awu Etiopiya, moaluluvi-a.—2 Limb. 14:8-13.

16. Ninoidhiwa a-vi ira hora yarendele kinodimbela?

¹⁶ I-yo kaninoidhiwa vinofuna niireela vambo-i nambo-i wa-iyo sogolou. Mbwenye jinoidhiwa i-yo choi rendele waatu Nlungu hora dhothene ngo-odimbela. Pyovweya, voi Yesu aongile ira anama-arele tanga “idiwile naatu amaziza othene.” (Mat. 24:9) Thitho rumiwi Paulo aongile ira: “Atu othene anofuna kaana ingumi yodhivelela wa Nlungu, anodha a-ra-ariwa.” (2 Timo. 3:12) Satana atokaana “raiva nlukulu.” ninovutha akala ira ninothuulela ira ninooda rambela raiva lee ira la-anifwanye.—Apok. 12:12.

17. Iroromelo yi-u inadhe iwesedhiwe a-vi?

¹⁷ Mo-odimbela, othenene ninodha limbanana wesedhiwa wa iroromelo yi-u. Ilambo inodha vira mu “nyarwa ilukulu yoi chipo kinakalevo romela valengiwele ilambo fiedha peeno.” (Mat. 24:21) Wari mwahora yeniyo, venango abali-u anodha nidhimbinuwela, thitho venango basa li-u podi dhakondi-iwa. (Mat. 10:35, 36) N’nga nyo munadhaire a-vi? Munodha kala ninga Aza, nyindela Yohova nomroromela ira unodha ubarelani?

18. Movwelana na lemba la Aebere 10:38, 39, chini inofuna nilimbi-a ira nikale okozeela vomala warendele?

¹⁸ Yohova unanikozeeli-edha va nyarwa dhinofuna nioneela vasogolova. Liye unave sogolela “dhari ororomeleya na wazelu” ira aniva-enga yodya yauzimu “vahora yofwanelela.” (Mat. 24:45) Mbwenye i-yo ninofwanela  ira ikundu yi-u. Ninofwanela dhilimbi-edha ira niwenjedhele iroromelo yi-u ira ikale yolimba wa Yohova.—Muleri Aebere 10:38, 39.

19-20. Movwelana na lemba la 1 Limbili 28:9, pyofuka viivi vinofwanela i-yo dhifuka, n’nga na mwasa wan’ni?

¹⁹ Molandanana Aza, i-yo ninofwanela ‘sakasaka ndhila dha Yohova.’ (2 Limb. 14:4; 15:1, 2) Ndhila yoroma yasakasaka weu, kum’mwidhiwa Yohova no badiziwa. Ninofwanela ira nibazeletu ira mulimwethene mwazelu ira nilimbi-e udhiveli-u na Yohova. Ira muzindiyele ira nyo munoviira vyevyo, dhifukeni ira, ‘Ndinofiya vamigumano yothene?’ Vamigumanoni ninowenjedhela forsa dhi-u vomlabela Yohova thitho ninolimbi-iwa naabali-u airoromeloni. (Mat. 11:28) Vyofuka vinango vinofwanela nyo dhifuka pivi: ‘Miyo ndinofunjedhecha Bibilya malambo othene?’ Akala nyo utokaana banja, munoirecha lambela wavabanjani masumana othene? N’nga akala muli diye, munosakulecha hora ira mufunjedhenga ninga munoirela atu avabanjani? I-yavo vyevyo, munolaleelecha mwathindhi no dhowa mafunji-a?

²⁰ Mwasiwa ngwan’ni dhifuka vyofuka vyevi kofuneya? Bibilya linoonga ira Yohova unopenda vyothuulela vi-u na vili rimani mwi-u, voi ee-no iyene thitho ninofwanela vipenda o-kave. (Muleri 1 Limbili 28:9.) Akala ira munodhiona ira vatokala vyongo vinango vyofuna chinja, kalelo venango vyothuulela, muvepe Yohova ira aukami-eni chinja. Chineneeva njihora yodhikozeeli-edha vyowesedha vili vasogolova. Kamurumeli-eni ira yongo inango iuimanani-eni zindiyela mwadodoliso vahora yarendele!