MURU OFUNJEDHA 40
“Kami-a atu anjinji ira takale olongomana”
“Ule unokami-a atu anjinji ira takale olongomana, unodha wala ninga nyenyedhi fiyedha dhowa nodhowa, ee modhowa nodhowa.”—DAN. 12:3.
NYUMBO 151 Iye Adzaitana
VINOFUNA I-YO FUNJEDHA *
1. N’nga ndi vyongo viivi vyosangalali-a vinodedi-edha i-yo muutongi wa vyawa 1.000?
VINODHAKALA vyosangalali-a maningi atu tadharoma venyathi-iwa va ilamboi muutongi wa Kristu wa vyawa 1.000. Atu othene takweliwile odhiveliwiwa anofunechecha dha aona okoka. Mwemu ndi munovwela Yohova. (Yobo 14:15) Kathuulelani mwemo munofuna aliwa dhakalela vyosangalali-a ona atu vailambo yothene nagumana okoka na odhiveliwiwa i-u akwidhe. Ninga muonile i-yo muyofunjedha ivirile “olongomana” enao madhiniwa talembiwile mubukhu la ingumi “anodha venyathi ira takaena ingumi.” (Mayir. 24:15; Juwau 5:29) Pyoodeya ira anjinji mwa odhiveliwiwa i-u anodha kala mugulu la oroma venyathi-iwa ira takaena ingumi vailamboi arumagedo yadhamala. * Wenjedhela vevo “o-olongomana” enao ta-an’na ngari yom’mwidhiwa Yohova nomlambela vahora yana aliwa ingumi, “anodha venyathi ira tatongiwe.”
2-3. a) Movwelana na lemba la Esaya 11:9, 10, n’nga ndi basa liivi lukulu lofunji-a linofuna dhaireya? b) N’nga ninofuna nitapanyen’ni mu yofunjedha yei?
2 Atu othene anofuna dhavenyathi-iwa anodha funeela funji-iwa. (Esaya 26:9; 61:11) Ee-no vanodhakala basa nlukulu lofunji-a atu lelo kalinaireyevo romela wale. (Muleri Esaya 11:9, 10.) Mwasiwa ngwan’ni? Mwa vinango o-olongomana enao anofuna dhavenyathi-iwa anodha funeela funji-iwa vyokuza Yesu Kristu, Umwene wa Nlungu, kuto, funeya wa dhina la Yohova thitho mwasiwa liye ekene nguule uli ofwanela tonga. Olongomana anodhafuneela ira taidhiwe vyevyo Yohova vikanle liye afunji-anga atwee, vyaifuneloyee yokuza ilambwila. Thitho anjinji mwa ororomeleyala, takwidhe Bibilya la-anamari-iwe lembiwa. Ee-no vatokala vyongo vinjinji vyoi olongomana na o-olongomanene, anodha funeela vifunjedha.
3 Muyofunjedha yei, ninotapanya vyofuka vi: N’nga basa nlukulu lofunji-ali linodha ireya a-vi? N’nga linodhakuza a-vi mwasa oi madhiniwa takaleve mubukhu la ingumi venango tafudhiwemo? Vyowakula vya vyofuka vyevi pyofuneya maningi wa i-yo malamboano. Ninga munofuna i-yo onela maulosi enango tali mubukhu la Danieli na la Apokalipse anonikami-a vwechecha vyevyo vinofuna dhaireya atu tadhavenyathi-iwa. Yoroma dhoweni nioneni vyongo vyosangalali-a vyevyo vyaongiwile muulosi wa Danieli 12:1, 2.
“ATU TAKWIDHE . . . ANODHA VENYATHI-IWA”
4-5. N’nga lemba la Danieli 12:1 linoonga vyongo viivi vyokuza hora ya komoni?
4 Muleri Danieli 12:1. Bukhu la Danieli linoniwandela vyongo vyosangalali-a vinofuna ireya muhora yamagomelo. Mwaifwanafwani-o, va Danieli 12:1 anoniwandela ira Mikaeli, wenuo uli Yesu Kristu “Utoimela ira akami-e atu a [Nlungu].” Ikundu ya ulosi wen’na uromile kwakwaneli-iwa muyawa ya 1914 vevo Yesu va-eliwile liye kala Mwene wa Umwene wa Nlungu dhulu.
5 Mbwenye Danieli atowandeliwa thitho ira Yesu “unodhaimela” “vahora ya nyarwa yeniyo kinakalevo romela varomile kalao tundu waatu oroma fiyedhela hora yenio.” Veva “hora ya nyarwa” yen’na ndi “nyarwa ilukulu” yoongiwa va lemba la Mateu 24:21. Yesu unodha imelela venango unodha iravo yongo ira adhavunele atu a Nlungu komoni wa nyarwila va Arumagedo. Bukhu la Apokalipse linoonga vyaatu anofuna dhavuneliwao ira ndi amwinji nlukulu wenuo “unofuna dhakuma munyarwa ilukulu.”—Apok. 7:9, 14.
6. N’nga chini inofuna dhaireya na amwinji lukulu tadhavulumuwa va nyarwa ilukulu? Onganimo. (Muone thitho mwasa oi “Vyofuka vyokumela waalimbo leri” mu sanja yen’na, ira muidhiwe vinjinji va mwasa okuza venyathi-iwa waatu anofuna dhakala vailambo yavathi.)
6 Muleri Danieli 12:2. N’nga inofuna ireya chini amwinji lukulu tadhavulumuwa mu nyarwila? Ulosula kunoonga vya venyathi-iwa opipirisa venango wauzimu wa anamalaba a Nlungu unoireya malambo omari-ala, ninga mwaroromela i-yo ndulimu. * Malomwe madhwala anoonga vyavenyathi-iwa wewo unofuna dhaireya muilambo ipya. Mwasiwa ngwan’ni ninoonga e-no? Madhu oi “teya” venango ira tumbulu enao a-indi-edhiwile basa va lemba la Yobo 17:16 mbofwanafwana na madhu oi “masiye.” Ee-no lemba la Danieli 12:2 linoonga vya venyathi-iwa masiyeni unofuna dhaireya malambo omari-a tadhamala thitho vasogolo va kondo ya Arumagedo.
7. a) N’nga venyathi-iwa waatu enango anofuna dhakaana “ingumi yo-omala” unodhaireya a-vi? b) Mwasiwa ngwan’ni ninoonga ira weu ndi “venyathi wapama maningi”?
7 N’nga lemba la Danieli 12:2 linothapulelan’ni laonganga ira enango anodha venyathi-iwa ira takaena “ingumi yo-omala”? Linothapulela ira atu anofuna dhavenyathi-iwa noidhiwa venango dhowanave idhiwa novwela Yohova na Yesu wari mwa vyawa 1.000, anodha va-iwa ingumi yo-omala. (Juwau 17:3) Weu unodhakala “venyathi wapama maningi” kwaranya waatu ale avenyathi-iwile ndulimu. (Aeb. 11:35) Mwasiwa ngwan’ni? Namwasa oi atu enala katali olongomana thitho tatokwa okoka.
8. N’nga vinothapulelan’ni taonganga ira atu enango anodha venyathi ira “tanyoziwe thitho kondiwa modhowa nodhowa”?
8 Mbwenye kai atu othene anofuna dharumela funji-iwa na Yohova. Ulosi wa Danieli watoonga ira enango anodha venyathi ira “tanyoziwe thitho anodha kondiwa dhowa nodhowa.” Namwasa oi anodha thonyi-edha a-vwela madhiniwa katinodha lembiwa mubukhu la ingumi thitho katinodha va-iwa ingumi yo-omala. Malomwee “tanodha kondiwa modhowa nodhowa” venango ira anodha nongiwa. Ee-no lemba la Danieli 12:2 linoonga vinofuna dhaireela ovenyathi-iwa othene movwelana na vinofuna aliwa dhaira vasogolo vovenyathi-iwa wiwao. * (Apok. 20:12) Enango anodha kaana ingumi mbwenye enango anodha nongiwa.
“KAMI-A ATU ANJINJI IRA TAKALE OLONGOMANA”
9-10. N’nga chini thitho inofuna dhaireya vasogolo va nyarwa ilukulu, n’nga mbaani anofuna “dhawala ninga wala wa mirambo”?
9 Muleri Danieli 12:3. N’ga chini thitho inofuna dhaireya vasogolo va “hora ya nyarwa” inodhila? Wenjedhela va vinoonga lemba la Danieli 12:2 ,mu versu 3 linoonga yongo inango yeyo inofuna dhaireya vasogolo va nyarwa ilukulu.
10 N’nga mbaani wenuo unofuna “dhawala ninga wala wa mirambo”? Madhu a Yesu ava lemba la Mateu 13:43 anonikami-a fwanya yowakula yeyi, enao anoonga ira: “Hora yeniyo olongomana anodha wala maningi ninga wala wa dhuwa Muumwene wa Babiwa.” Veva Yesu aonga vya “a-ima a Umwene” enao mbaabalee ozoziwa anofuna dhatonga vambo-i na liye mu Umwene wa dhulu. (Mat. 13:38) Ee-no lemba la Danieli 12:3 vinooneya ira linoonga vya ozoziwa thitho basa linofuna aliwa dhalaba mu Utongi wa vyawa 1.000.
A 144.000 anodha laba basa vambo-i na Yesu Kristu vosogolela basa lofunji-a atu lelo linofuna dhaireya wa vyawa 1.000 (Muone ndima 11)
11-12. N’nga ndi basa liivi lelo a 144.000 linofuna liwa dhalaba vahora ya vyawa 1.000?
11 N’nga ozoziwa anodha kami-a avi “atu anjinji kala olongomana”? Aliwa anodha laba basa vambo-i na Yesu Kristu vosogolela basa lofunji-a lelo linofuna dhaireya vailabwila wari mwa vyawa 1.000. Kaiira a 144.000 anodha kala mamwane baa-i, mbwenye anodha laba thitho ninga asembe. (Apok. 1:6; 5:10; 20:6) Vyevi vinothapulela ira “anodha kami-a atu” vang’ono na vang’ono ira takale thitho olongomana. (Apok. 22:1, 2; Zakiy. 47:12) Ozoziwa anodha sangalala maningi na basa leli.
12 N’nga mbenango thitho aavi ali mugulu la “atu anjinji” enao anofuna dhakami-iwa kala olongomana? Atu enala anothangani-avo enao anofuna dhavenyathi-iwa, enao anofuna dhavulumuwa va Arumagedo thitho a-ima othene anofuna dhabaliwa muilambo ipya. Vofiya komoni wa vyawa 1.000, atu othene anodhakala olongomana. N’nga ndi vahora iivi vevo madhina aatu katinadha fudhiwave mubukhu la ingumi kala ninga talembewilena kaneta?
VYOWESEDHA VYOGOMI-EDHA
13-14. N’nga atu othene olongomana anodha funeela thonyi-edhan’ni ta-anakaena ingumi yo-omala?
13 Ninofwanela thuulela ira kala olongomana kunathapulela ira baa-i mutu unodha kaana ingumi yo-omala. Kathuulelani vyevyo vyaaireele Adamu na Eva. Aliwa tali olongomana mbwenye tanoofuneela dhowanave vwela Yohova Nlungu, ira tava-iwe ingumi yo-omala. Mbwenye pyovwi-a tangaranga ira aliwa tatoimwanana mvwela.—Aroma 5:12.
14 N’nga vyongo vinodha kala a-vi waatu vailamboi vofiya komoni wa vyawa 1.000? Othene anodhakala olongomana. N’nga aliwa anodhakala uikundu ya utongi wa Yohova modhowa nodhowa? N’nga venango atu enango anodha kala ninga Adamu na Eva enao ta-avwele Nlungu angalive ira tali olongomana? Vanodha funeela fwanya vyowakula vya vyofuka vyevi. N’nga vinodha fwanyeya a-vi?
15-16. a) N’nga ndi vahora iivi vevo atu othene vanofuna aliwa dhava-iwa ngari yothonyi-edha ira mbororomeleya wa Yohova? b) N’nga vyo-arela vya vyowesedhiwa vyomari-avyo vinodha kala vyoi a-vi?
15 Satana unodha mangiwa wa vyawa 1.000. Vahora yeniyo, liye kanodha woda dhodhomi-a mutu uliwethene. Mbwenye vadhavira vyawa 1.000, Satana unodha thathuliwa thitho unodha wesedha dhodhomi-a atu olongomana. Vahora ya vyowesedhiwa vyevi atu othene olongomana anodha kaana ngari yothonyi-edha ikundu ili aliwa vamwasa wa dhina la Nlungu na utungee. (Apok. 20:7-10) Vinofuna dhaira mutu uliwethene vahora yeniyo, vinodha thonyi-edha akala ngofwanelela ira dhinalee lidhowenave kala mubukhu la ingumi.
16 Atu enango oi numerwiwa kinaidhiweya, anodha kala ninga Adamu na Eva thitho anodha konda utongi wa Yohova. N’nga chini inofuna dhaaireela? Lemba la Apokalipse 20:25 linoniwandela ira: “Uliwethene wenuo unafwanyeye a-alembiwile mubukhu la ingumi atoponyedhiwa barani la mulo.” Ee-no atu o-ovwelala anodha nongiwa ira ta-akaleove. Mbwenye atu anjinji olongomana anodha ganyali va vyowesedhiwa vyomari-avi. Vyadhaira e-no madhiniwa katinodha fudhiwave mubukhu la ingumi.
“HORA YA KOMONI”
17. N’nga Danieli awandeliwile ira chini inofuna dhaireya muhori-uila?(Danieli 12:4, 8-10)
17 Pyosangalali-a maningi thuulelanga vyongo vyevyo vinofuna dhaireya sogolovi. Mbwenye ngelo atom’mwandela Danieli milanyu inango yofuneya maningi yokuza muhori-uila, “yeniyo ili hora yakomoni.” (Muleri Danieli 12:4, 8-10; 2 Timo. 3:1-5) Ngeluo atom’mwandela Danieli ira: “Atu anodha idhiwa vyongo vinjinji vyaimbarimbari.” Atu a Nlungu tali tavwechechanga paama maulosi ofwanyeya mubukhu leli. Ngeluo atowenjedhela onga ira vahoriyo “atu othakala anodha iranga vyongo vyothakala thitho kavali mutu othakala uliwethene wenuo unofuna dhavwechechanga madhu enala.”
18. N’nga chini inofuna ireela atu othakala vachineneeva?
18 Malamboano vinooneya ninga atu anoira vyongo vyothakala katinolangiwa. (Malak. 3:14, 15) Mbwenye vachineneeva Yesu unodha tonga atu enao ali ninga mbudi noa-iyani-a naatu ali ninga mabila. (Mat. 25:31-33) Atu othakala katinadha vulumuwa va nyarwa ilukulu thitho katinodha venyathi-iwa ira takale muilambo ipya. Madhiniwa katinodha fwanyeya mu “bukhu la ithuulelo” loongiwa va Malaki 3:16.
19. N’nga va-eeni ndi hora yoi niirengan’ni, n’nga mwasiwa ngwan’ni? (Malaki 3:16-18)
19 Va-eeni, ndi hora yoi nithonyi-edhenga ira kanili mugulu laatu othakala. (Muleri Malaki 3:16-18.) Yohova una gumani-a atu anoaona liye ira ndi “fuma yavakundu” venango ira atwee apereso yavadhulu. Pyo-okaikeli-a ira ninofuna kala mugulu laatu enala.
Vinodha kala vyosangalali-a maningi ona Danieli odhiveliwiwa i-u thitho atu enango anjinji “tavenyathinga” ira tawachele ikundu yiwa muilambo ipya! (Muone ndima 20)
20. N’nga cholanyedha iivi yava-iwile Danieli, n’nga mwasiwa ngwan’ni munodedi-edhela mofunechecha kwakwaneli-edhiwa wa yolanyedha yei?
20 Onga mwaimbarimbari va-eeni ninokala muhora yosangalali-a maningi. Mbwenye vyongo vinango vyosangalali-a maningi vi-adhi vang’ono ira viireye. Vachineneeva ninodhaona vyongo vyothene vyothakala vimali-iwanga. Vasogolo vavyevi ninodha ona kwakwaneli-edhiwa vyalanyedhile Yohova wa Danieli ira: “Unodha venyathi ira uwachele ikunduyaa vakomoni wamalambwao.” (Dan. 12:13) N’nga munodedi-edha mofunechecha hora yeniyo Danieli vambo-i na odhiveliwiwa inyu vinofuna “aliwa dhavenyathi-iwa”? Akala ndi-eno, va-eni mwiirenga vyothene vinaodenyo ira mukale ororomeleya. Mwaira e-no munokala osikimiza ira dhina linyu linodhowanave kala mubukhu la ingumi la Yohova.
NYUMBO 80 “Talawani Ndipo Muona Kuti Yehova Ndi Wabwino”
^ Mwasa wen’na unoonga mavweelo mapya okhuza basa nlukulu lofunji-a loongiwa va lemba la Danieli 12:2, 3. Ninoona hora yeniyo basali munofuna aliwa dhalabiwela thitho anofuna dhalilaba. Ninoona thitho mwemo basa lofunji-ali munofuna aliwa dhakami-edha atu okala vailamboi kozeela vyowesedha vyomari-a komoni wa utongi wa Kristu wa vyawa 1.000.
^ Pyoodeya ira venyathi-iwau unodha roma naatu ale tanokwa tangali ororomeleya malambo mari-ala, noroma welelanga wamaziza na maziza akwide ndulimu. Akala mwemu ndi munofuna aliwa dhakalela, kuongela ira maziza othene anodhakaana ngari yowachela atu tanofuna dhavenyathi-iwa enao aaidhi aliwa. Peno vyongo vinodhakala moi a-vi malemba anoonga ira venyathi-iwa waatu anofuna dhadhowa dhulu unodhaireya mwadodoliso venango ira “Uliothene valimburonivee.” Ee-no ninooda onga ira venyathi-iwa waatu anofuna dhakala vailamboi unodhaireya thitho saasawa.—1 Akor. 14:33; 15:23.
^ Vyevi vinochinja vyevyo vyaongile i-yo mu bukhu la Samalani ndi ulosi wa Danieli! Muru 17, thitho mu Sanja ya Olonda ya 1 wa Julho wa 1987, thakuru 21-25.
^ Mo-iyana na vyevi, madhu oi “olongomana” na “o-olongomana” ofwanyeya va lemba la Mayirelo 24:15 thitho oi “ale taira vyongo vyapama” na “ale taira vyongo vyothakala” anofwanyeya va lemba la Juwau 5:29, anoonga vya vyoira vya ovenyathi-iwao ta-anakwe.
