I-yo othene ninororomela ira malambo omaria-la Yohova unave sogolela nodyi-a atwee mwaunemba. (2 Timo. 3:1) N’nga i-yo ninoirecha a-vi Yohova aniva-a malangi-o? Vyoira vi-u pyolandanana vya aisraeli tangali a-ngani. Tangavwide ula wa lipenga tanofwanela iravo yongo.

Yohova atoruma Mose saka-edha malipenga meeli agolidi oira gogoda momba. Tanokami-a “itana atu nova-a izindielo yomanga sasa.” (Num. 10:2) Andimuwa ovelela kuto tanofwanela li-a lipenga mwatundu unango ira atu taidhiwe vyofuna ira. (Num. 10:3-8) Peeno atu a Nlungu tanowachela malangi-o ndhila dho-iyana-iyana. Ndhila dhedhi dhinonithuucha lipenga lali-iwa hora yawale. Dhoweni nitapanye ndhila taaru: naitaniwanga ira nimafwanye vamigumano milukulu, andimuwa avapingoni taitaniwa ira tamafunji-iwe thitho vakala machinjo a malangi-o anowachela pingo.

Tangali anganiwo, ziza la asraeli toomangecha sasa morungunuwa kachisi, mbwenye tagawa magulu manai. Hora dhinango Yohova aongecha ira atu othene tagumaneye mavolowelo a ikundu ya kachisi. (Num. 10:3) Vofuna itana maziza, alimbo velela kuto tanofwanela li-a malipenga amelene. Aisraeli othene tanooda uvwa ula wavakundu. Ale tamangecha misasa dhiwa morungunuwa tanofiya mombaranya. Mbwenye ale takalecha olapela tanofwanela mala hora injinji thitho dhilimbi-edha ira tafiye. Mo-obala yongo iliyothene, Yohova afuna ira othene tagumaneye novwa malangi-o.

Malamboano i-yo kaninogumaneya vakachisini, mbwenye ninoitaniwa ira nidhagumaneye na mbumba ya Nlungu. Vyevyo ninoviira nadhowanga migumano milukulu na vyoireya vinango vyavakundu, wewo unawandeliwa i-yo vyongo na malangi-o ofuneya vinjinji. Rungunuwa ilambo yothene, atu a Yohova tanoonela thandha umbo-ive. Anamalaba othene a Yohova anorumela itaniwa tanoira ikundu ya mwinji nlukulu thitho aimwerumweru. Enango mbofuneya wenda ulendo olapa, mbwenye enango okwivela. Mwandhila iliyothene fwanyeya vagumano nlukulula chiyongo yofuneya vinjinji!

N’nga wa ale tanoira ikundu ya gulu lolapela, na unaireliwa migumano milukulu? Dhela mwangari ya mafaramento anjinji anooda onela vyoirevi novivwa ninga tali wewowene. Mofwanafwani-a tambi ya Benin ingawachele bali oimelela likulu li-u vatoireya masasa-edho ira abali a Nijeriya enao tali uruni wa Saara, unoromoliwa  Arlit. Atu okwakwana 21 tatoonela gumanula; vaari vaatu enala vali abali, arongola na atu achidwi. Masiki watolapela aliwa tatoira ikundu ya atu ogumaneya okwakwana 44.131 vagumano ulukulu. Bali mwinango atolemba ira: “Ninosimba vinjinji kumela vathi varima vamasasa-edho othene. Vyevyi vitooni-a ira Munonidhiveliwana vinjinji!”

Alimbo velela kuto tali-a lipenga limbo-i “andimuwa naalimbo ing’anela baa-i” tanofwanela fwanyeya vagumanonivo. (Num. 10:4) Tafiya tanowachela malangi-o nofunji-iwa kumela wa Mose. Vyevyo vyanowakami-a kwakwaneli-edha izo yan’na aliwa yosamalela maziza. Aakale ira nyo mwali ndimuwa hora yen’ne mo-okaikela mwangaodile dhilimbi-edha ira mumakale vambo-i naafwinyu.

Malamboano, andimuwa avapingoni kai “avadhulu”. Aliwa katinonyingalela mabila a Nlungu. (1 Pedru 5:1-3) Mbwenye mo-okaikela aliwa tanodhilimbi-edha vokumbiza mabila. Ngumwasiwa taitaniwa ira tamafunji-iwe vyongo vyowenjedheleya ninga Xikola ya Urumiwi wa Umwene, aliwa mbokozeya mafwanyeyawo. Ee-no andimuwa avapingo tanofunji-iwa ira tasamalilenga mokwakwanela myasa dhapingo. Vyo-arelavo viwa pingo othene unodhowave vasogolo voulukula mwaunemba. Venango nyo kamunaromengavo itaniwa imbo-i mwaxikolila, mbwenye ninororomela ira mutoganyali dhela waatu ale tadewo.

Hora dhinango alimbo velela kuto awu Israeli tanokaana izindielo yorenjecha ya lipenga. Ee-no atu tanozindiyela ira Yohova unaawandela ira takumevo vasasanivo. (Num. 10:5, 6) Aisraeli tanokumavo movwelana pama mbwenye ira taire ee-no vyevyo vyafuna hora yokwakwanela. Vinooneya ira wali orucha ira asraeli enango taode a-rela machinjo. Nan’ni?

Venango tangaodile thuulela ira vizindielo vya lipenga vyadha mo-ari-ana thitho morurumucha. “Venango rambo wakala oimelene romela nama-iyu fiedhela undhe ucha.” Venango chinjawo wakala wa “ malambo meeli “mwedi mmbo-i “venango hora yolapela.” (Num. 9:21, 22) N’nga tifendo dhingasi dhafwanela aisraeli thama vasasani? Lemba la Numero 33, linoonga vya mamburo okwakwana 40 mwamanga aliwa misasiwa.

Hora dhinango aisraeli enango tanooda manga misasiwa “varuthini vyali vyova-a imwerumweru waandimuwa naatu oova kala angani.” (Dotor. 1:19) Vyevyo vyangakanle vyorucha. Aliwa tangaodile thuulela ira kuma wiwa wali machinjo malukulu.

Aliwa tangali mwari mowenda enango kataode dedi-edha ira afwiwa tarome sogola. Othene tanovwa ula worenjecha wa lipenga mbwenye katakuma hora imbo-ive. Izindielo yoroma yali yamaziza tamangile misasiwa mavirelo adhuwa, enao ali a Yuda, Isakari na Zebulau. (Num. 2:3-7; 10:5, 6) Vanduli voi magulu mararu atokuma, alimbo velela kuto tanoli-a izindiyelo yanambili yorenjecha. Fiedha atu othene tarome wenda ulendo.

Hora dhinango machinjo agulu anooneya kala orucha arumela. Nyo munooda kala o-okaana idedi-edho mwavwa vya machinjo manjinji o-odedi-edhela. Venango mutolemeela basa linalabanyo onanga ira chipo kamunodha chinjiwa. Va matangwi enango, nyo munooda thuulela ira leva winyu rima utowessedhiwa fiedha vakomoni, thitho vatodimbela ira mulemeele machinjo. Masiki angalive ee-no, i-yo navilimbi-edha ira vyongo moda ofwanelela, ninongo vivwa ira ira hora dhothene mareeli-o a Yohova ali na i-yo.

Hora ya Mose, Yohova atosogolela mamiliau manjinji aatu enao tali alombwana, a-iyana vambo-i naa-ima angani. Yohova aakonde asamalela katafiedhe kalawo. Malambo omari-ala, Yohova unonisogolela mwaunemba. Dhela mwa pedhelo lee, malo mokaana ingumi i-yo nitokaana idedi-edho! Ngumwasiwa, nyo mwavwa izindielo ya lipenga, muire vyongo ninga aisraeli ororomeleya: Muirevo yongo mombaranya!