MURU OFUNJEDHA 25
“Ninga libila lodimela munavivwela aliwa”
“Miyo ndinodha saka meka mabilanga.”—ZAKIYELI 34:11.
NYUMBO 105 “Mulungu Ndiye Chikondi”
VINOFUNA I-YO FUNJEDHA *
1. Mwasiwa ngwan’ni Yohova atovifwanafwan’ni-edhana anamabala?
“N’NGA vinoodeya namabala diwala mwanee? ila yali yofuka yafukile Yohova hora ya namaro-edha Esaya. (Esaya 49:15) Liye atoagumani-a liye ira: “Akala namabala unooda diwala, mbwenye miyo kandinodha udiwalani” mbwenye kai ira. Yohova unoirechave vifwanafwani-edha naanamabala hora dhothene, liye airile vyevi vaora yeniyo baa-i. Vofwanafwani-edha na udhivela unakalavo mwana na mmee, Yohova unofuna aoni-e ira liye utokaana udhivela vinjinji wa arumiwee. Anamabala anjinji tanothuuchiwa na vyaongile rongola mbo-i unaongiwa Jasimi liye aoongile ira: Akala weyo utokaana mwana, weyo unooda kala naliye vaudhivela vinjinji naliye vaingumi yothene.”
2. N’nga Yohova unovivwa a-vi akala mwanee mbo-i mwaaliwa utoroma fooka?
2 Yohova unoidhiwa akala mmbo-i mwa mwanee uto-iya fiya vamigumanoni venango a-adhowenga malaleela, ndiyevi vinosukwali-a. Kathuulelani e-ni, mwemo munavivwela liye arumiwee anjinji vinofooka * aliwa mwaunemba vakadha yawa.
3. N’nga Yohova unofunan’ni?
3 Abali na arongola anjinji enao tafookile tawelela pingoni i-yo ninoawachela na mandha menli! Yohova thitho i-yo ninofuna ira aliwa tawele. (1 Pe. 2:25) N’nga ninaakami-e a-vi ofooka ira tawele? Na-anawakule yofuka yen’na, yoroma dhoweni nirome idhiwa ira mwasiwa ngwan’ni abali enango tano-iya dhowa migumanoni venango malaleela?
MWASIWA NGWAN’NI ATU ENANGO TANO-IYA LAMBELA YOHOVA?
4. N’nga mabasa tananidodomi-e a-vi?
4 Abali enango tano-iya basa taona yongo yofuneya vinjinji vaingumi yiwa. Hung, bali mbo-i unokala vakwikwi na Aziya, * aongile ira: “Miyo ndatosibwa dhivelela vinjinji vabasalanga, mbwenye ndatogwela ngo-ini mwasiwa ndatoroma thuulela ira, akala ira miyo ndakaana kobiri dhinjinji, ndinooda kaana uxamwali wapama na Yohova.” Mbwenye, ndanomala hora injinji basani. moi ee-no ndatoroma a-fiyanga migumanoni mo-okwakwanela, komoniwee, ndatofiya a-dhowanga migumanoni. Puemu ilambwila munaodela aliwa ni-iyani-a na Nlungu mwavang’ono navang’ono.”
5. N’nga tinyarwa dhiivi dhaguman’nena rongola mmbo-i vaingumini vee?
5 Abali na arongola enango tanovivwa kala osanyeya vinjinji mwasa wa vyoireya. Ane, wau Gra-Bretanya, namabala waa-ima athanu, liye unoonga ira: “Mwananga mbo-i atobaliwana na irenda inango yorucha. Vira wahora mwananga mbo-i wa-iyana atochosiwa. Thitho mwananga wa lombwana atokaana marenda o-okwakwanela muruni. Ndanovuteya rimani vinjinji fiedhela miyo a-dhowanga migumanoni na muurumiwini. fiedhela miyo fooka.” Ndivyopi-a rima vinjinji idhiwa ira Ane na banja lee, thitho thangani-avo abali enango anolimbanana nyarwa dhorucha vinjinji!
6. Mwasiwa ngwan’ni mutu a-ana-arela malangi-o ali va Akolose 3:13 unooda ira vyongo vyo-ofwanelela fiya vimwadhani-a na Yohova?
6 Muleri Akolose 3:13. Arumiwi enango a Yohova anosukwala anowalunduwela abali enango. Rumiwi Paulo atozindiela ira, hora dhinango, ninokaana mwasa ovweya “ira na-avwanane” na bali venango rongola. Venango ira ninoireliwa vyongo vyo-olongomana, mbwenye na-aire polepole, ninongoroma lokota vyongo vyarimani, vira wa hora, sukwala unommwiri-a mutu i-yachi mmwandamela Yohova. Kaonani vyamwireele Pablo, bali mmbo-i wau Amerika do Sul. Angalive ira kaadawile iliyotene, liye atofiedha nukedhiwa ira atoirana vyongo vyo-ofwanelela thitho atoluza ngari yanaliye pingoni. N’nga liye airile a-vi? Liye unoonga ira: “Ndatothakaleliwa vinjinji, mwavang’ono vang’ono ndatofiya vo-iyachi dhowa migumanoni.”
7. N’nga chini jinofuna ireya wa mutu ule una ithuulela rima yodaweya?
7 Abali enango tanokala taoni-iwanga nyarwa na ithuulela rima mwasa oi tatodawa ndulimu. Aliwa tathuulela ira katinofwanelala udhivela wa Nlungu. Masiki ira tatochinyuwa noleveleliwa na Yohova katinoona kala ofwanelela fwanyeya vari vagulu la Nlungu. Puemo mwavwela bali Francisco. Liye atoonga ira: “Miyo ndatosumululiwa mwasa oirana vyamararuo. Voroma ndanodhowanave fiya vamigumanoni, mbwenye ndalive osukwala. Ndaviona ira kandafwanelela kala vari vaatu a Yohova. Ithuulela rimanga yanondioni-ave nyarwa, ndatokaana imbarimbari ira Yohova ali a-anandilevelele. Vira wahora, ndato-iyachi fiya vamigumanoni.” Nga nyo munovwa a-vi mwathuulela vyaabali na arongola anogumanana vyoireya ninga vyevi? Munooda vi-ela valimburoni viwa? Kwaranya vyothene n’nga Yohova unaathuulela a-vi?
YOHOVA UNODHIVELIWANA MABILEE
Namakumbiza mmbo-i wa israeli anodhilimbi-edha vinjinji saka libila limbo-i ladimele (Onani ndima 8 na 9) *
8. N’nga Yohova unodiwala atu ale tamlabele? Onganimo.
8 Yohova kanodiwala atu ale taodile mlabela mbwenye tato-i-yachi gulu. Liye kanodiwala mwa vyothene viirile aliwa vomlabela. (Aeb. 6:10) Namaro-edha Esaya atolemba ifwanafwani-o yapama vinjinji inooni-a ira Yohova unodhiveliwana atwee. Liye atolemba ira: “Ninga namakumbiza liye unodha samalela mabilee. Na onwee unodha gumani-a mabila noa-ela nduli.” (Esaya 40:11) N’nga Yohova, Namakumbiza Nlukulu unovwa a-vi limbo-i mwa mabilee lakumamo muli afwee? Yesu atooni-a mwemo Yohova munovwela liye angafukile anamafunjedhee ira: “N’nga nyo munothuulela a-vi? Akala ira mutu mwinango utokaana mabila 100 mbwenye limbo-i dimela, kana-iyachi 99 vahora yeniyo nodhowa masaka lidimenlelo? Ee-no alifwanya, mo-okaikela ndinouwandelani ira unodha kala waimwerumweru vinjinji na limbo-ilo kwanya 99 o-odimelao.”—Mat. 18:12, 13.
9. N’nga namakubiza wapama hora yawale asamalelecha a-vi mabilee? (Onani iruthiruthi yakapa.)
9 N’nga mwasiwa ngwan’ni ifwanafwani-o ya Yohova na namakumbiza njavahora yofwanelela? Mofwanafwani-a Davide atowana na kalamu na imbalangondo. (1 Sam. 17:34, 35) Namakumbiza wapama unooda zindiela ira mabilee katikwakwanele. (Juwau 10:3, 14) Liye anga-iidhe mabila 99 valimburo lovuneleya venango fwee asamalilenga nodhowa masaka lodilemelalo. Yesu ato-indi-edha basa ifwanafwani-o yen’na vofuna nifunji-a imbarimbari yofuneya vinjinji: “Baba wa dhulu ngofunechecha ira a-aluze limbo-i mwa mabilee.”—Mat. 18:14.
Namakumbiza wairaeli angali waimwerumweru vosamalela libila ladimelile(Onani ndima 9)
YOHOVA UNOSAKASAKA MABILEE
10. Mofwanafwana na lemba la Zakiyeli 34:11-16 n’nga Yohova ulanyedhilen’ni wa mabilee odimela?
10 Yohova unodhiveliwana mmbo-i na mmbo-i wa i-yo thangani-avo oyeva ale aliundhe wa tangalee. Dhela wa namaro-endha Zakiyeli Yohova utolanyeda ira unodha sakasaka mabilee odimela noakami-a fwanya ingumi ya iroromelo, thitho liye atolemba vyongo vyofuneya mooni-a tundu wafuna liye irana vyevi, vyaira namakumbiza wa israyeli akala vakumbini vee vatodimela libila limbo-i. (Muleri Zakiyeli 34:11-16.) Yoroma namakumbiza anodhowa masaka libilalo, yei yali yongo yofuneya kaana thindhi na nguru. Moi ee-no liye alifwanya libila lodimelalo, namakumbiza anolitukula nolidhowana tangani. Mbwenye akala libilalo latopeya venango kaana ndhala liye anolisamalila pama liing’anechecha, litukula nolidyi-a mwapama thitho mwaudhivela. Anamakumbiza “mabila a Nlungu” venango ira andimuwa avapingoni anofwanela kaana makalelo ninga enala ira takami-e atu enao ta-iidhe gumaneya vambo-i napingo. (1 Pe. 5:2, 3) Andimuwa anosakasaka mabila ee-no kaafwanya aliwa anoakami-a ira tawelele tangani, thitho aoni-a dhivelo la nemba wairoromelo unofwanelela aliwa. *
11. N’nga namakumbiza wapama unofwanela idhiwan’ni?
11 Namakumbiza wapama unozindiela ira mabila anooda dimela hora dhinango. Akala ira limbo-i mwamabila litodimela namakumbiza kaaliirela uwalanga. Ifwanafwani-o ya Nlungu itokami-a anamalaba enango taguman’nena nyarwa.
12. N’nga Yohova airile a-vi na Yona?
12 Namaongela Yona atotawa warumiwileliye. Mbwenye Yohova kam-iidhe. Ninga namakumbiza wapama, Yohova atommomela rima vommva-a nguru dhokwakwanela ira alabe basa lava-iwile liye. (Yona 2:7; 3:1, 2) Vanduli viwa, Nlungu ato-indi-edha basa mulimbo oing’anela boti ira avwecheche ira ingumi ya kada mutu njapereso yavandendai waliye. (Yona 4:10, 11) N’nga ninofunjedhavon’ni? Andimuwa katinofwanela i-yelatu abali ofooka muunembani. Mbwenye, tanofwanela vwechecha mwasa uva-idhe ira libila li-iyachi gumaneya napingo. Thitho libilali lawelela wa Yohova, andimuwa avapingoni tanofwanela dhowanave oni-a udhivela nowabala.
13. N’nga chini jinofunjedhevo i-yo dhela wa Yohova Mulimbo lemba Salimo 73 vinoonga aliwa?
13 Mulimbo lemba Salimo 73 atosukwala angaoni ira atu othakala taoneya kala aimwerumweru. Liye atodhifuka akala vyali vyofwanelela dhowanave mabela Nlungu. (Masal. 73:12, 13, 16) N’nga Yohova airile a-vi? Liye kamsanyile. Mo-iyana na vyevyo, Nlungu atorumeli-a ira madwee talembiwe Bibilyani. Mamari-edho mulimbo lemba salimo atovwechecha ira kala vauxamwali na Yohova unofuna vinjinji i-yavo mdhiveliwana baa-i, pievyo vinoiri-a ingumi kaana yothapulela. (Masal. 73:23, 24, 26, 28) N’nga ninofunjedhavon’ni? Andimuwa avapingoni katinofwanela ira vyongo mopupuluma vosamalela mwasa wa mutu unokaikela akala unofuna mlabelangave Yohova. Malo momsanya, andimuwa avapingoni tanofwanela vwechecha ira mwasiwa ngwan’ni liye unoonga venango ira vyongo mwatundu wenuo. Mwandhila yeniyo, andimuwa tanooda indi-edha basa pama Bibilya ira tamlimbi-e mutuo.
14. Mwasiwa ngwan’ni Eliya anofuneela kami-iwa, n’nga Yohova amka-mi-idhe a-vi?
14 Namaro-edha Eliya atotawa Yezebeli. (1 Mam. 19:1-3) Liye aviona ira u-adhi ekene ninga namaongela wa Yohova thitho vyothene vyairile liye volaba basa vyali vyo-okaana basa. Eliya ali osukwala thitho anofuna ira akwe. (1 Mam. 19:4, 10) Yohova kamsanyile Eliya. Malo mwa vyevyo, Yohova atomroromeli-a ira kaali ekene, anofwanela roromela nguru dha Nlungu thitho vatokala basa linjinji sogolo. Mwaupama, Yohova atomvuruwana Eliya hora yaonga liye thitho atomva-a basa n’nango. (1 Mam. 19:11-16, 18) N’nga ninofunjedhavon’ni? I-yo othene, simbwasimbwa andimuwa avapingoni, ninofwanela samalela mabila a Yohova mwapama. Akala ira mutu mwinango utonyanyuwa thitho kanofwanelela leveleliwa, andimuwa avapingoni tanofwanela ira tam-iye ira aonge vyothene mothathuwa, nomvuruwana. Tamala, tanofwanela kami-a libila lodimelalo ona ira liye ngofuneya vinjinji vamethoni va Yohova.
N’NGA MABILA ODIMELA A NLUNGU NAAONENGA A-VI??
15. Movwelana na Juwau 6:39, n’nga Yesu aona a-vi mabila a Babee?
15 N’nga Yohova unodedi-edhela ira mabilee odimela naaonenga mwatundu oi a-vi? Yesu atoni-iedhela ifwanafwani-o yapama. Liye atoidhiwa ira Yohova unoona libila lililothene kala lapereso indendai. Ngumwasiwa, liye atoira vyothene vofuna kami-a “mabila odimela a nyumba ya Israeli”. (Mat. 15:24; Luka 19:9, 10) Voi liye ali namakumbiza wapama, Yesu atodhilimbi-edha ira va-akale libila lililothene la Yohova lodimela.—Muleri Juwau 6:39.
16-17. N’nga andimuwa avapingoni tanofwanela vivwa a-vi vamwasa okami-a atu ta-iidhe gulu? (Onani kwadru “ Mwemo munavwela libila lodimela”.)
16 Rumiwi Paulo atowalimbi-a andimuwa a pingo wa Aefeso ira ta-arelenga ifwanafwani-o ya Yesu. Liye atolemba ira: ‘Nyo munofwanela kami-a ofooka nothuulela madhu a Mbwiye Yesu, voonga ira: “Vatokala imwerumweru injinji vova-a i-yana yowachela.’” (Mayir. 20:17, 35) Mo-okaikela, malamboano andimuwa avapingoni tatokaana izo yei. Salvador, ndimuwa wa Espanya, unoonga ira: “Ndathuulela mwemo Yohova monobala liye mabilee odimela, ndinoviona kala ofuneya ira iliyothene inaode miyo vofuna kami-a mabila a Yohova. Miyo nditoidhiwa ira Yohova unofuna ira miyo ndaasamalili”.”
17 Othene ofooka taongiwile mwaari mwa mwasula tatokami-iwa nowelela wa Yohova. Vachineneeva, abali-u anjinji ta-iidhe gulu mbofunechecha welela okoka. N’nga ninaire a-vi ira naakami-e? Mwasa o-arela unodha onga movweya pama vyofwanela ira.
NYUMBO 139 Yerekezerani Kuti Muli M’dziko Latsopano
^ ndima 5 Mwasiwa ngwan’ni abali anolambela Yohova mo-ororomeleya tanochosiwa vakadha yawa? N’nga Nlungu unotuulelan’ni vamwasa waabalala? Va yofunjedha yen’na inooda nioni-a yowakula ya vyofuka vyevi. Thitho ninoona vinofuna i-yo funjedha, mwemo Yohova mwakami-idhe liye arumiwi awalelene anoongiwa Bibiliyani agumannena nyarwa niga dhedhi.
^ ndima 2 IDHIWANI VINJINJI: Namalaleya ofooka mwaunemba ndiule a-anafiya migumanoni thitho a-anadhowa malaleela fiedha mala medi mithanu na mbo-i vanango kwaranya. Mbwenye vyangalive ee-no, atu ofooka anodhowanave kala abali-u na arongoli-u, thitho i-yo ninoadhiveliwana vinjinji.
^ ndima 4 Madhina enango atochinjiwa.
^ ndima 10 Muru o-arela unodha onga ndhila yo-orucha andimuwa avapingoni inofwanela aliwa arela.
^ ndima 60 VIRUTHIRUTHI VYAVATHAKURU: Namakumbiza mmbo-i wavapingoni wawale anodhilimbi-edha weli-a libila lodimela. Liye utodhowa malisaka nolikami-a ira liwelele uli afwee. Anamakumbiza aunemba malamboano tanoira vimbo-ive.
^ ndima 64 VIRUTHIRUTHI VYAVATHAKURU: Rongola mmbo-i ofooka angali mwari mwa karo. Liye atoona amboni dha Yohova ambiili tangali aimwerumweru tatapanyanga na ndimuwa mmbo-i.
